Usarenyo ti Web Site-tayo a Mangisuro Kadagiti Annakyo
1. Ania ti panggep ti seksion iti Web site-tayo a napauluan iti “Ubbing”?
1 Ti Web site-tayo a jw.org/ilo ket nadisenio a mangallukoy iti interes dagiti tattao aniaman ti edadda. Ti seksion ti Web site a napauluan iti “Ubbing” (kitaenyo ti Pannursuro ti Biblia > Ubbing) tulonganna dagiti annak ken nagannak nga agbalin a nasinged iti maysa ken maysa, kasta met ken Jehova. (Deut. 6:6, 7) Kasanoyo nga usaren daytoy a seksion a mangisuro iti annakyo?
2. Kasanoyo a pilien ti iyadalyo a material a maibagay iti edad dagiti annakyo?
2 Agbalinkayo a Mannakibagay: Nagduduma dagiti kasapulan ti tunggal ubbing. (1 Cor. 13:11) Kasanoyo ngarud a pilien ti iyadalyo a material a maibagay iti edad ti annakyo? Isaludsodyo iti bagiyo: ‘Ania ti makapainteres iti annakko? Kasano kaadu ti maawatandanto? Kasano kapaut ti panagatensionda?’ Kadagiti ubbing nga agtawen iti tallo wenno ub-ubing pay, mabalinyo nga iyadal dagiti estoria iti “Dagiti Masursurok iti Biblia.” Magustuan ti dadduma a pamilia dagiti estoria ti Biblia iti seksion nga “Isuroyo Dagiti Annakyo.” Usigenyo met dagiti sumaganad nga opsion.
3. Kasano a sieepektibo a mausar ti nagannak dagiti estoria ken aktibidad iti “Proyekto Para iti Panagdaydayaw ti Pamilia”?
3 Proyekto Para iti Panagdaydayaw ti Pamilia: Dagitoy a proyekto ket makatulong kadagiti nagannak a mangyadal iti annakda. Tapno maammuanyo no kasano nga usaren dagiti estoria ken aktibidad, i-click-yo ti maris orange nga i-download a button, ken basaenyo ti “Instruksion Kadagiti Nagannak” para iti tunggal proyekto. Usarenyo dagiti ladawan para iti aktibidad, kas kadagiti makoloran a panid, a mangisuro iti annakyo nga agtawen iti 3-5. Tulonganyo dagiti annakyo nga agtawen iti 6-10 a mangkompleto kadagiti aktibidad para iti panagadal. Amin nga aktibidad iti tunggal proyekto ket mainaig iti maysa nga estoria wenno masursuro iti Biblia. Gapuna, amin nga annak aniaman ti edadda ket mabalin a makipaset iti dayta met la a proyekto para iti panagdaydayaw ti pamilia.
4. Ania ti masarakan iti seksion nga “Agbalinka a Gayyem ni Jehova”?
4 Agbalinka a Gayyem ni Jehova: Dagiti video, kanta, ken aktibidad iti dayta a seksion ti Web site-tayo ti tumulong kadagiti nagannak a mangipasagepsep iti Sao ti Dios iti babassit nga annakda. (Deut. 31:12) Adda napateg a leksion nga isuro ti tunggal ababa nga animated video. Dagiti aktibidad kas iti ay-ayam a panangbirok ti mangipaganetget iti kinapateg dagita a leksion. Yantangay masansan a magustuan dagiti ubbing ti agkanta—ken makatulong dagiti kanta tapno matandaananda ti nasursuroda—dagiti kanta ti Pagarian ken kankanta a nairanta para kadagiti ubbing ket regular a maikabil iti Web site-tayo.
5. Apay a rumbeng nga agpatulong dagiti nagannak ken Jehova iti panangisuroda kadagiti annakda iti kinapudno?
5 Nagannak, kayat ni Jehova nga agballigikayo kas inna ken amma. Agpatulongkayo ngarud kenkuana iti panangisuroyo kadagiti annakyo iti kinapudno. (Uk. 13:8) Babaen iti tulong ni Jehova, masanayyo dagiti annakyo nga agbalin a ‘masirib maipaay iti pannakaisalakan babaen ti pammati a mainaig ken Kristo Jesus.’—2 Tim. 3:15; Prov. 4:1-4.