Panangparang-ay iti Abilidadtayo iti Ministerio—Panangsungbat iti Pangguped iti Saritaan

No Apay a Napateg: Panunotem nga ammom nga adda dumteng a kalamidad. Matay dagiti tattao no saanda nga agkamang iti natalged a lugar. Napanka iti balay ti kaarrubam tapno pakdaaram, ngem pinasardengnaka nga agsao, ket kunana nga adu ti trabahona. Sigurado nga ikagumaam latta a tulongan! Adu kadagiti tattao iti teritoriatayo ti saan a mayat a dumngeg kadatayo ta dida ammo a makaispal iti biag ti mensahetayo. Nalabit, adu ti trabahoda bayat ti isasarungkartayo. (Mat. 24:37-39) Wenno mabalin a dida mangikaskaso gapu kadagiti di umiso a madamdamagda maipapan kadatayo. (Mat. 11:18, 19) Mabalin nga ipapanda nga awan ti nakaidumaantayo kadagiti dadduma a relihion a dakes ti aramidna. (2 Ped. 2:1, 2) No saan nga interesado ti bumalay iti damo, saantay koma a dagus a sumuko.

No Kasano nga Aramiden Daytoy:

Sakbay a mangasabakayo iti binalaybalay, panunotenyo no ania dagiti posible a pangguped iti saritaan ken no ania ti isungbatyo.
No sumupiat ti bumalay, ikagumaanyo nga ituloy ti saritaan ngem iti naalumamay a pamay-an. Nalabit a maaramidyo dayta no komendaranyo. Kas pagarigan, no kunana nga addan ti relihionna, mabalinyo nga ibaga, “Kinapudnona, dagiti relihioso a kas kadakayo ti birbirokek.” No dadduma, maitultuloyyo a kasabaan ti bumalay no ikabilanganyo ti karirikna wenno kasasaadna. Kas pagarigan, no kunana nga adu ti trabahona, mabalinyo nga ibaga: “Maawatankayo. Ngem sakbay nga agpakadaak, kayatko nga ited kadakayo daytoy.” Mabalinyo met ti mangibangon iti saludsod no kuna ti bumalay a saan nga interesado. Mabalinyo nga isaludsod, “Ti kadi kayatyo a sawen ket saankayo nga interesado iti Biblia, wenno saankayo nga interesado iti aniaman a relihion?”
Tingitingenyo a naimbag ti kasasaad. Laglagipenyo a saan a pilpiliten ni Jehova a dumngeg dagiti tattao. (Deut. 30:19) Tunggal maysa ket adda sungsungbatanna iti imatang ni Jehova. (Gal. 6:5) No talaga a saan nga interesado ti bumalay, nasaysayaat nga agpakadatayo laengen. No raementayo ti kaririknana, baka dumngegton no addanto manen ti mangasaba kenkuana.—1 Ped. 3:15.

Padasenyo iti Daytoy a Bulan:

No adda imbangon ti bumalay a pangguped iti saritaan, apaman a makapagpakadakayo, pagsaritaanyo iti kaduayo no ania ti nasaysayaat koma nga insungbatyo.