Dagiti Alikamentayo a Mangisuro
1. Kasano nga agpada dagiti Kristiano nga ebanghelisador ken dagiti trabahador?
1 Agus-usar dagiti trabahador iti nadumaduma nga alikamen. Nupay dadduma nga alikamen ket kasapulan laeng para iti partikular a trabaho, ti dadduma a kangrunaan nga alikamen ket kanayon a mausar. Dagiti batido a trabahador kanayon nga adda kadakuada dagiti kangrunaan nga alikamen, ken dagitoy ti ad-adda a kabesadoda nga usaren. Iparparegta ti Biblia kadagiti Kristiano nga agbalinda a nagaget iti ministerio ken agbalin a “mangmangged nga awan ti aniaman nga ibainna.” (2 Tim. 2:15) Ania ti kapatgan nga alikamentayo? Dayta ti Sao ti Dios—ti kapatgan nga alikamen nga usarentayo iti ‘panagaramid iti ad-adalan.’ (Mat. 28:19, 20) Ikagumaantayo koma ngarud ti agbalin nga eksperto iti ‘panangaramattayo a siuumiso iti sao ti kinapudno.’ Nupay kasta, adda pay dagiti alikamentayo a kanayon a mausar iti panangisuro a masapul a sursuruen ti amin a Kristiano nga usaren a naimbag tapno maisuro ti kinapudno kadagiti tattao.—Prov. 22:29.
2. Ania dagiti kangrunaan nga alikamentayo a mangisuro?
2 Dagiti Kangrunaan nga Alikamentayo a Mangisuro: Malaksid iti Biblia, ania pay dagiti alikamen a masapul nga usarentayo? Ti kangrunaan nga alikamentayo a mangisuro iti kinapudno ket ti libro nga Ania a Talaga ti Isursuro ti Biblia? No ti iyad-adalantayo iti Biblia malpasnan nga adalen dayta a libro, usarentayo ti Agtalinaedka iti Ayat ti Dios tapno maisurotayo kenkuana nga iyaplikar dagiti prinsipio iti Biblia iti inaldaw a panagbiagna. Gapuna, masapul a kabesaduentayo nga usaren dagitoy dua a publikasion. Adda met dagiti broshur nga iramantayo kadagiti alikamen nga usarentayo a mangisuro. Ti Naimbag a Damag Manipud iti Dios ti maysa kadagiti kangrunaan nga alikamentayo a mangirugi iti panangyadal iti Biblia. No adda dagiti tattao iti teritoriatayo a marigatan nga agbasa, wenno manmano ken awan pay ketdi ti magun-odan a publikasion iti lengguaheda, mabalintayo nga usaren ti Listen to God wenno ti Umimdengka iti Dios ket Agbiagka nga Agnanayon. Ti maysa pay a kangrunaan nga alikamen a mangiturong kadagiti iyad-adalantayo iti organisasion ket ti Siasino Ita Dagiti Mangar-aramid iti Pagayatan ni Jehova? Masapul met a sursuruentayo nga usaren a naimbag dagiti video a makatulong iti panagaramidtayo iti adalan, kas iti Apay nga Adalem ti Biblia?, Ania ti Maar-aramid iti Kingdom Hall?, ken Adda Kadi Nagan ti Dios?
3. Anianto ti maitulong dagiti ruar Ti Ministeriotayo iti Pagarian iti masanguanan?
3 Dagiti ruar Ti Ministeriotayo iti Pagarian iti masanguanan tulongannatayo nga agbalin nga eksperto a mangusar kadagiti adu a kangrunaan a publikasiontayo iti panangisuro. No ikagumaantayo ti agbalin a nalaing a mangusar kadagitoy nga alikamen, ipangpangagtayo ti naipaltiing a balakad: “Itultuloymo nga asikasuen ti bagim ken ti isursurom. Agtalinaedka kadagitoy a banag, ta babaen ti panangaramidmo iti daytoy maisalakanmonto agpadpada ti bagim ken dagidiay agimdeng kenka.”—1 Tim. 4:16.