No Kasanotayo nga Ipakita ti Ayat iti Padatayo a Tao

Kas kaputotan ti immuna a tao a ni Adan, maymaysatayo a pamilia. Manamnama nga ipakita ti tunggal miembro ti pamilia ti ayat ken respeto iti maysa ken maysa, ngem manmano ti kasta ita. Saan a kasta ti kayat ti naayat a Diostayo.

TI KUNA TI NASANTUAN A KASURATAN MAIPAPAN ITI AYAT

“Masapul nga ayatenyo [ti padayo a tao] a kas iti bagiyo.”​—LEVITICO 19:18.

“Itultuloyyo nga ayaten dagiti kabusoryo.”​—MATEO 5:44.

TI KAIPAPANAN TI PANANGAYAT ITI PADA A TAO

Kitaem no kasano a dineskribir ti Dios ti ayat iti Saona iti 1 Corinto 13:4-7:

“Ti ayat ket naanus ken naimbag.”

Panunotem: Ania ti mariknam no naanus ken naimbag kenka ti dadduma ken saanda a makaunget no agkamalika?

“Ti ayat saan a naimon.”

Panunotem: Ania ti mariknam no sobra ti panagsuspetsa ken panagapal kenka ti dadduma?

Ti ayat “saanna a sapulen ti bukodna a pagimbagan.”

Panunotem: Ania ti mariknam no resrespetuen ti dadduma ti kapanunotam ken saanda a kanayon nga ipilit ti opinionda?

Ti ayat “saan nga agbilbilang iti pannakadangran.”

Panunotem: Nakasagana ti Dios a mangpakawan kadagiti agbabbabawi a nakabasol. “Saanto a kanayon nga agbirok iti kamali,saan met nga agnanayon nga agsakit ti nakemna.” (Salmo 103:9) Naragsaktayo no pakawanennatayo ti napasaktantayo. Isu a masapul a nakasaganatayo met a mangpakawan kadagiti nakasakit kadatayo.​—Salmo 86:5.

Ti ayat “saanna a pagragsakan ti kinakillo.”

Panunotem: No adda dakes a mapasamak kadatayo, saantayo a kayat a maragsakan iti dayta ti dadduma. Saantayo met ngarud a maragsakan no agrigat ti dadduma uray saan a nasayaat ti panangtratoda kadatayo.

Tapno bendisionannatayo ti Dios, masapul nga ipakitatayo ti ayat kadagiti kastoy a pamay-an iti amin a kita ti tao. Ti maysa a pamay-an a maaramidtayo daytoy ket babaen ti panangtulongtayo kadagiti agkasapulan.