PANAGBIAG KAS KRISTIANO
Tulongannatayo ni Jehova nga Agibtur Kadagiti Pannubok
Kadagitoy maudi nga al-aldaw, mapadasantayo ti adu a narigat a pannubok. No dadduma, mabalin a mariknatayo a saantayon a kaya nga ibturan dagiti pakarigatantayo. Ngem no itultuloytayo ti umasideg ken Jehova, tulongannatayo nga agibtur uray kadagiti karirigatan a pannubok. (Isa 43:2, 4) Kasanotayo nga umasideg ken Jehova no maipasangotayo kadagiti pannubok?
Kararag. No ipakaammotayo ken Jehova ti amin a linaon ti pusotayo, ikkannatayo iti talna ken bileg tapno makapagibturtayo.—Fil 4:6, 7; 1Te 5:17.
Gimong. Ad-adda a kasapulantayo ita ti ipapaay ni Jehova a naespirituan a taraon ken pammabileg dagiti kakabsat kadagiti gimongtayo. (Heb 10:24, 25) No agsagana, umatender, ken makipasettayo kadagiti gimong, naan-anay a mabenepisiarantayo iti tulong ti espiritu ni Jehova.—Apo 2:29.
Ministerio. Nalaklaka ti agbalin a positibo no ikagumaantayo ti agtalinaed nga aktibo iti ministerio. Mapatibkertayo met ti pannakigayyemtayo ken Jehova ken kadagiti padatayo nga agserserbi iti Dios.—1Co 3:5-10.
BUYAEN TI VIDEO NGA AYWANANNAKA NI JEHOVA, SA SUNGBATAN DAGITOY:
Ania ti nakatulong ken Malu nga agtalinaed a nadekket ken Jehova bayat a maipaspasango kadagiti pannubok?
Kas ken Malu, kasano a maliwliwanatayo ti Salmo 34:18 no maipasangotayo kadagiti pakarigatan?
Kasano a ti kapadasan ni Malu ipakitana a mangted ni Jehova iti “bileg a nalablabes ngem iti gagangay” no maipasangotayo kadagiti pakarigatan?—2Co 4:7