No Kasano a Tultulongannatayo ni Jehova nga Agibtur

1. Apay a masapul nga agibturtayo, ken asino ti makatulong kadatayo? (1 Pedro 5:10)

BAYAT dagitoy maudi nga al-aldaw, kasapulan ti ili ni Jehova ti agibtur. Dadduma ti nabayagen nga agsaksakit. Adda met dagiti agrigrigat gapu iti ipapatay ti ipatpategda iti biag. Adda met dagiti busbusoren ti kapamiliada wenno dagiti opisial ti gobierno. (Mat. 10:​18, 36, 37) Ngem aniaman a problema ti mangparparigat kenka ita, manamnamam a tulongannaka ni Jehova nga agibtur.—Basaen ti 1 Pedro 5:10.

2. Apay a kabaelantayo ti agibtur?

² Ti panagibtur ket ti panagtalinaed a matalek ken Jehova uray no maipaspasangotayo iti pakarigatan, pannakaidadanes, pannubok, wenno sulisog. Karaman met iti panagibtur ti panangnamnama a sumayaatto met la ti bambanag. Makapagibturtayo saan a gapu iti bukodtayo a pigsa no di ket gapu ken Jehova, ti mangipapaay kadatayo iti “bileg a nalablabes ngem iti gagangay.” (2 Cor. 4:7) Iti daytoy nga artikulo, pagsasaritaantayo ti uppat a probision nga ipapaay ni Jehova tapno makapagibturtayo. Usigentayo met dagiti aramidentayo tapno magunggonaantayo kadagita a probision.

KARARAG

3. Apay a maibagatayo a ti kararag ket maysa a milagro?

³ Adda naisangsangayan a probision nga ipapaay ni Jehova tapno makapagibturtayo. Uray no managbasoltayo, pinagbalinna a posible a makasaritatayo isuna. (Heb. 4:16) Panunotem daytoy: Makapagkararagtayo ken Jehova iti aniaman nga oras. Maibagatayo met kenkuana ti aniaman a banag. Dengdenggennatayo aniaman ti lengguahetayo ken sadinoman ti ayantayo, addatayo man iti naiputputong a lugar wenno iti pagbaludan. (Jon. 2:​1, 2; Ara. 16:​25, 26) No kasdiay a madanagantayo unay ket saantayon nga ammo ti ibagatayo ken Jehova, ammona latta ti kayattayo nga ibaga. (Roma 8:​26, 27) Ti kararag ket talaga a maysa a milagro!

4. Apay a pagayatan ni Jehova no ikararagtayo a makapagibturtayo?

⁴ Ipaspasigurado ni Jehova iti Saona nga “uray ania ti dawatentayo maitunos iti pagayatanna, denggennatayo.” (1 Juan 5:14) Mabalintayo kadi a dawaten ken Jehova a tulongannatayo nga agibtur? Wen! Maitunos dayta iti pagayatanna. Apay a maibagatayo ti kasta? No ngamin ib-ibturantayo dagiti pakasuotan, adda isungbat ni Jehova iti daydiay mangin-insulto kenkuana, ni Satanas a Diablo. (Prov. 27:11) Malaksid iti dayta, ibagbaga ti Biblia a kayat la unay ni Jehova nga ‘ipakita ti pigsana kadagidiay naan-anay ti pusoda kenkuana.’ (2 Cron. 16:9) Masiguradotayo ngarud a kabaelan ken kayat ni Jehova a tulongannatayo nga agibtur.—Isa. 30:18; 41:10; Luc. 11:13.

5. Kasano a makatulong ti kararag tapno maaddaantayo iti talna ti panunot? (Isaias 26:3)

⁵ Ibagbaga ti Biblia a sipapasnek nga ikararagtayo ken Jehova dagiti pakaseknantayo. Iti kasta, ‘ti talna ti Dios a mangartap iti amin a pannakaawat salaknibannanto ti puso ken isiptayo.’ (Fil. 4:7) Imbag laengen ta adda dayta a probisionna. Ngamin, no maipasango dagiti tattao a saan nga agserserbi ken Jehova kadagiti pakarigatan, mabalin a padasenda ti nadumaduma a pamay-an tapno maaddaanda kano iti natalna a panunot. Kas pagarigan, adda dagiti mangar-aramid iti makunkuna a “meditation,” wenno pagbalinenda a blangko ti panunotda tapno maikkatda ti amin a pakaburiboranda. Ngem nakadeldelikado unay dayta iti espiritualidadtayo ta mabalin a gundawayan dayta dagiti demonio tapno maimpluensiaanda ti panunottayo. (Idilig ti Mateo 12:​43-45.) Ngem no agkararagtayo ken Jehova, ipaayna dayta a talna nga adayo a nasaysayaat ngem iti aniaman a maipaay dagiti ar-aramiden ti dadduma. Ipapaay laeng dayta ni Jehova kadagiti agpampannuray kenkuana. Ipapaayanna ida iti “agtultuloy a talna” uray kadagiti karirigatan a situasion. (Basaen ti Isaias 26:3.) Ti maysa a pamay-an nga ar-aramiden dayta ni Jehova ket ti panangipalagipna kadatayo kadagiti makaliwliwa a teksto. Dagita ti mangpakalma iti isip ken pusotayo. Ebkas dagita ti ayat ken pannakaseknan ni Jehova ta kayatna nga agballigitayo.—Sal. 62:​1, 2.

6. Ania dagiti mabalinmo nga ikararag? (Kitaen met ti ladawan.)

⁶ Ti mabalinmo nga aramiden. No adda problemam, ibagam ken Jehova ti marikriknam. “Ipalladawmo ken Jehova ti dadagsenmo” ken ikararagmo nga ipaayannaka iti talna. (Sal. 55:22) Kiddawem met ti sirib a kasapulam tapno ammom ti aramidem iti problemam. (Prov. 2:​10, 11) No agkararagka, saan la koma a panagpakpakaasi ti iramanmo. Imbes ketdi, saanmo met koma a liplipatan ti agyaman. (Fil. 4:6) Kitaem met no kasanonaka a tultulongan ni Jehova iti inaldaw ken agyamanka kadagiti tulongna. Dimo koma ipalubos a dagiti pakarigatan ti mangpakudrep iti panagkitam kadagiti maaw-awatmo a bendision.—Sal. 16:​5, 6.

SAO TI DIOS

7. Kasano a makatulong ti panagadal iti Biblia tapno makapagibturtayo?

⁷ Impaay ni Jehova ti Saona a makatulong kadatayo nga agibtur. Naglaon ti Biblia iti adu a teksto a mangipasigurado a tulongannatayo ni Jehova. Kitaentayo ti maysa a pagarigan. Kuna ti Mateo 6:8: “Ammo ni Amayo ti kasapulanyo sakbay pay a kiddawenyo.” Ni Jesus a mismo ti nangibaga kadagita, ket awanen ti mas makaam-ammo pay ken Jehova no di isuna. Talaga ngarud a masiguradotayo a no agrigrigattayo, ammo ni Jehova ti kasapulantayo ket tulongannatayo. Naglaon ti Biblia iti adu a makaliwliwa a kari ni Jehova a mangpabileg iti determinasiontayo nga agibtur.—Sal. 94:19.

8. (a) Mangted iti maysa a prinsipio ti Biblia a makatulong kadatayo nga agibtur. (b) Ania ti makatulong tapno malagiptayo dagiti prinsipio ti Biblia inton kasapulantayo dagita?

⁸ Dagiti prinsipio ti Biblia ket makatulong kadatayo nga agibtur. Ngamin, naglaonda iti praktikal a sirib a makatulong tapno makaaramidtayo kadagiti nainsiriban a desision. (Prov. 2:​6, 7) Kas pagarigan, iparparegta ti Biblia a saantayo a madanagan iti mabalin a mapasamak iti masanguanan, no di ket inaldaw nga agpannuraytayo ken Jehova. (Mat. 6:34) No iyugalitayo ti inaldaw nga agbasa iti Biblia ken agutob, nalaklakatayo a malagip dagiti prinsipio a nasursurotayo inton kasapulantayo dagita.

9. Ania ti epekto kadatayo ti panangbasatayo kadagiti salaysay iti Biblia maipapan iti panangtulong ni Jehova kadagiti adipenna?

⁹ Naglaon met ti Biblia kadagiti pudno a pakasaritaan iti biag dagiti ordinario a tattao a tinulongan ni Jehova gapu ta nagtalekda kenkuana. (Heb. 11:​32-34; Sant. 5:17) No panunotentayo dagita a pasamak, tumibker ti panagtalektayo ken Jehova a tulongannatayo met. Ngamin, isu ti “kamang ken pigsatayo, nakasagana a tumulong kadagiti tiempo ti rigat.” (Sal. 46:1) Bayat a pampanunotentayo no kasano nga impakita dagiti adipen ni Jehova ti pammatida kenkuana ken ti panagtultuloyda nga agserbi uray adda rigat, maparegtatayo a mangtulad kadakuada.—Sant. 5:​10, 11.

10. Ania ti aramidem tapno mas magunggonaanka iti Sao ti Dios?

¹⁰ Ti mabalinmo nga aramiden. Inaldaw a basaem ti Biblia ken ilistam dagiti teksto a nakitam a makatulong kenka. Para iti adu, nakitada nga epektibo ti panagbasa iti teksto iti inaldaw kada agsapa. Iti kasta, adda makaparegta a pampanunotenda iti agmalmalem. Napaneknekan dayta ti sister a ni Marie.a Agpada nga adda kanser da tatang ken nanangna. Ania ti nakatulong kenkuana nga agibtur bayat nga ay-aywananna ida kadagiti maudi a bulan ti biagda? “Kada agsapa, basaek ti teksto manipud iti Panangsukimat iti Kasuratan iti Inaldaw ken utobek dayta,” imbagana. “Dayta ti timmulong kaniak tapno inaldaw a mapanunotko ni Jehova ken dagiti nagsayaat nga isursurona iti Saona, imbes a sangkapanunotko ti nagrigat a kasasaadko.”—Sal. 61:2.

DAGITI KAPAMMATIAN

11. Apay a makaparegta a maammuan a saan la a datdatayo ti agib-ibtur kadagiti pakarigatan?

¹¹ Us-usaren ni Jehova dagiti kakabsat iti intero a lubong a tumulong kadatayo nga agibtur. Nupay makapaspasartayo iti rigat, mariknatayo a saantayo nga agmaymaysa ta ammotayo a ‘kasta met laeng ti sagsagabaen ti amin a kakabsattayo.’ (1 Ped. 5:9) Kinaagpaysuanna, aniaman a situasion a maipasango kadatayo ket napadasanen dagiti kakabsat. Ket gapu ta nakapagibturda, sigurado met a makapagibturtayo!—Ara. 14:22.

12. Kasanodatayo a matulongan dagiti kapammatiantayo, ken kasanotayo met ida a matulongan? (2 Corinto 1:​3, 4)

¹² Mapabilegdatayo dagiti kakabsat bayat nga ib-ibturantayo dagiti pakarigatan. Napaneknekan a mismo dayta ni apostol Pablo. Kadagiti suratna, dinakamatna ti nagan dagiti timmulong kenkuana bayat a nakabalud iti balay. Masansan a nagyaman kadakuada gapu ta liniwliwa, pinaregta, ken tinulonganda isuna. (Fil. 2:​25, 29, 30; Col. 4:​10, 11) Ita, maliwliwa ken matulongandatayo met dagiti kakabsat bayat nga ib-ibturantayo dagiti pakarigatan. Ket no bilang isudanto met ti agrigat, datayto met ti adda iti abayda a tumulong kadakuada.—Basaen ti 2 Corinto 1:​3, 4.

13. Ania ti nakatulong iti sister a ni Maya nga agibtur?

¹³ Idi 2020, bigla a sinerrek dagiti polis ti Russia ti balay ti maysa a sister a ni Maya tapno sukisokenda. Naidarum ni Maya gapu iti panangiranudna iti pammatina. “Iti dayta a tiempo, aglalaok ti marikriknak, nabannogak, madandanaganak, ken nalidayak. Ngem tinawagan ken sinuratandak dagiti kakabsat. Imbagada nga ay-ayatendak,” imbaga ni Maya. “Ammok met ketdi nga addaanak iti nagdakkel a pamilia a mangay-ayat kaniak. Ngem idi 2020, ad-adda pay a napaneknekak dayta.”

14. Ania ti aramidentayo tapno matulongandatayo dagiti kapammatiantayo bayat nga agib-ibturtayo? (Kitaen met ti ladawan.)

¹⁴ Ti mabalinmo nga aramiden. No adda dagiti rigat nga ib-ibturam, agtalinaedka a nasinged kadagiti kakabsat. Saanka koma a mabain nga agpatulong kadagiti panglakayen. Agbalinda a “paglemmengan no agangin, maysa a pagkamangan no agbagyo.” (Isa. 32:2) Kasta met, laglagipem nga adda met dagiti rigat nga ib-ibturan dagiti kapammatiam. Isu a no agaramidka iti naimbag kadakuada, agbalinka a naragsak ket daytanto met ti tumulong kenka nga agibtur.—Ara. 20:35.

TI NAMNAMATAYO

15. Kasano a nakatulong ken Jesus ti namnama, ken kasanonto met a makatulong dayta kadatayo? (Hebreo 12:2)

¹⁵ Inikkannatayo ni Jehova iti sigurado a namnama a makatulong kadatayo nga agibtur. (Roma 15:13) Nakatulong idi ken Jesus ti namnama tapno maibturanna ti karirigatan nga aldaw ti biagna ditoy daga. (Basaen ti Hebreo 12:2.) Ammo ni Jesus a no agtalinaed a matalek, makatulong dayta iti pannakasantipikar ti nagan ni Jehova. Padpadaanan met idi ni Jesus ti pannakikaduana manen ken Amana ken ti panagturaynanto a kadua ti 144,000 iti nailangitan a Pagarian. Kasta met, no panunotentayo ti namnamatayo nga agbiagtayto nga agnanayon iti baro a lubong nga inkari ti Dios, makatulong dayta tapno maibturantayo ti aniaman a pakarigatan a mapasarantayo iti daytoy a lubong ni Satanas.

16. Kasano a nakatulong ti namnama iti maysa a sister tapno makapagibtur, ken ania ti masursurom iti imbagana?

¹⁶ Kitaentayo no kasano a nakatulong ti namnama ken Anna a maysa a sister idiay Russia. Naaresto ni lakayna ken naibalud bayat nga ur-urayenna ti sentensiana. Idi napasamak dayta, imbaga ni Anna: “Saanak unay a maup-upay ta kanayonko nga ikarkararag ken Jehova ti maipapan iti namnama nga inkarina. Kanayon met nga ut-utobek dayta. Ammok nga agpatingganto met laeng dagiti rigat a mapaspasarantayo. Agballiginto ni Jehova, ken uray datayo.”

17. Kasanotayo a maipakita nga agyamyamantayo iti namnamatayo? (Kitaen met ti ladawan.)

¹⁷ Ti mabalinmo nga aramiden. Iwayaam a panunoten dagiti nagsayaat nga inkari ni Jehova iti masanguanan. Imadyinem ti bagim nga addakan iti nakapimpintas a baro a lubong a kaduam dagiti gagayyem ken kapamiliam. Nakaragragsak ti amin. Dagiti rigat a mapaspasaram ita ket “apagbiit ken nalag-an” laeng no ikomparam iti panagbiagmonto nga agnanayon iti Paraiso. (2 Cor. 4:17) Kasta met, iranudmo ti namnamam iti dadduma. Panunotem ti nagrigat a biag dagiti saan nga agserserbi ken Jehova. Nakaad-adu ti problemada iti daytoy a lubong ni Satanas. Ngem saanda man la nga ammo ti panggep ti Dios para iti masanguanan. Isu nga uray no apagbiit laeng nga ibagam kadakuada dagiti kari ti Dios iti masanguanan, mabalin a makatulong daytan kadakuada nga aginteres iti Pagarian ni Jehova ken kadagiti karina.

18. Apay a makapagtalektayo a tungpalento ni Jehova dagiti karina?

¹⁸ Kalpasan a naibturan ni Job ti amin a rigat a nakaipasanguanna, imbagana ken Jehova: “Ammok itan a kabaelam nga aramiden ti amin a bambanag ken iti amin a pampanunotem nga aramiden, awan ti imposible kenka.” (Job 42:2) Nasursuro ni Job nga awan ti aniaman a makalapped ken Jehova a mangtungpal iti panggepna. No panunotentayo dayta, mapabilegtayo met nga agibtur. Kas panangyilustrar, imadyinem ti maysa a babai nga adda sakitna. Maup-upay ta nakaad-adun a doktor ti napananna ngem saan met latta nga immimbag. Idi kuan, adda nabirokanna a maysa a nalaing a doktor a talaga nga eksperto iti sakitna ken no kasano a maagasan. Ania ti resultana? Uray no saan pay met a dagus nga umimbag, dagus a limmag-an ti riknana ken rimmagsak. Mas kayanan ti agibtur ta addan namnamana nga umimbagto met laeng. Kasta met laeng kadatayo. Makapagibturtayo gapu ta siguradotayo a tungpalento ti Dios ti karina a Paraiso.

19. Ania dagiti kasapulantayo tapno makapagibturtayo?

¹⁹ Kas nakitatayon, tultulongannatayo ni Jehova a mangibtur kadagiti pakarigatantayo babaen ti kararag, ti Saona, dagiti kapammatiantayo, ken ti namnamatayo. No aramidentayo ti amin a kabaelantayo a magunggonaan kadagitoy a probision ni Jehova, matulongannatayo nga agibtur, aniaman a rigat ti mapasarantayo ita. Maitultuloytayo ti agibtur agingga nga awanen daytoy a lubong ni Satanas ken ti amin a panagrigrigattayo.—Fil. 4:13.