Apay a Saan a Sungbatan ti Dios ti Amin a Kararag?

Sidadaan ken maragsakan ti nailangitan nga Amatayo a ni Jehova a Dios a dumngeg kadagiti naimpusuan a kararagtayo. Ngem adda dagiti rason a saanna a sungbatan dagiti kararagtayo. Ania dagita, ken ania dagiti laglagipentayo no agkararagtayo? Dagitoy ti sumagmamano nga ibaga ti Biblia.

Tattao iti simbaan a mangbasbasa iti kararag iti prayer book.

“No agkararagkayo, diyo ulit-uliten ti isu met laeng a sasao.”—Mateo 6:7.

Saan a kayat ni Jehova nga ulit-ulitentayo dagiti naikabesa a kararag wenno basaentayo dagita iti prayer book. Imbes ketdi, kayatna nga agkararagtayo a naimpusuan. Saan kadi a makapasuron no inaldaw nga ulit-uliten ti gayyemtayo ti ibagbagana? Dagiti nadekket nga aggayyem ket nawaya ken naimpusuan a mayebkasda ti rikriknada. No agkararagtayo iti bukodtayo a sasao, ibilbilangtayo a gayyem ti nailangitan nga Amatayo.

Lalaki a nakatangad bayat a kiskiskisanna ti tiket ti loto.

“Uray no dumawatkayo, awan ti maited kadakayo ta dakes ti panggepyo nga agdawat.”—Santiago 4:3.

Saantayo nga ekspektaren a sungbatan ti Dios dagiti kararagtayo no ti dawatentayo ket dagiti banag a saanna a kayat nga aramidentayo wenno maadda kadatayo. Kas pagarigan, no agkararag ti maysa a mannugal tapno dumawat iti suerte, sungbatan ngata ni Jehova dayta idinto ta kagurana ti kinaagum ken inaanito a pammati kas iti suerte? (Isaias 65:11; Lucas 12:15) Sigurado a saan a sungbatan ni Jehova dagiti kasta a kararag! Tapno sungbatan ti Dios dagiti kararagtayo, masapul a siguraduentayo a dagiti dawdawatentayo ket maitunos iti ibagbagana iti Biblia.

Padi a mangikarkararag kadagiti soldado.

“Ti saan a mangsurot iti linteg—makarimon uray ti kararagna.”—Proverbio 28:9.

Idi tiempo ti Biblia, saan a sinungbatan ti Dios ti kararag dagiti nangsukir kadagiti lintegna. (Isaias 1:15, 16) Saan a nagbalbaliw ti Dios. (Malakias 3:6) No kayattayo a sungbatan ti Dios dagiti kararagtayo, masapul nga ikagumaantayo a suroten dagiti lintegna. Kasano no nakaaramidtayo kadagiti kamali iti napalabas? Saan kadin a denggen ni Jehova dagiti kararagtayo? Siempre, saan! Siaayat a pakawanennatayo ti Dios no agbalbaliwtayo ken no aramidentayo ti amin a mangay-ayo kenkuana.—Aramid 3:19.