Salaknibannaka ni Jehova—Kasano?

1. Apay a kiniddaw ni Jesus ken Jehova a protektaranna dagiti adalanna?

ITI maudi a rabii ti panagbiag ni Jesus kas tao, pinampanunotna dagiti karit a pakaipasanguan dagiti adalanna. Gapu iti ayatna kadagiti gagayyemna, kiniddawna ken Amana a ‘protektaranna ida iti daydiay managdakdakes.’ (Juan 17:14, 15) Ammo ni Jesus a kalpasan nga agsubli idiay langit, itultuloy ni Satanas a Diablo ti makilaban iti asinoman a mangayat nga agserbi ken Jehova. Nalawag ngarud a kasapulan ti ili ni Jehova ti pannalaknib.

2. Kasano a masiguradotayo a sungbatan ni Jehova dagiti kararagtayo?

² Sinungbatan ni Jehova ti kararag ni Jesus gapu ta ay-ayatenna ti Anakna. No ikagumaantayo a paragsaken ni Jehova, ayatennatayto met, ken sungbatanna ti panangikararagtayo iti tulong ken proteksionna. Kas maseknan nga Ulo ti pamilia, itultuloy ni Jehova a siaayat nga aywanan dagiti annakna. Ti mismo a naganna, wenno reputasionna, ti nakataya!

3. Apay a kasapulantayo ita ti pannalaknib ni Jehova?

³ Kasapulantayo unay ita ti pannalaknib ni Jehova. Naitapuaken ni Satanas manipud langit isu a “kasta unay ti pungtotna.” (Apoc. 12:12) Naallilawna dagiti tattao a mangidaddadanes kadatayo a panunotenda a “mangipapaayda iti Dios iti sagrado a panagserbi.” (Juan 16:2) Idadanesdatayo ti dadduma a saan a mamati iti Dios ta ditay kayat ti agpaimpluensia iti daytoy a lubong. Aniaman ti rason, saantayo a mabuteng. Apay? Gapu ta kuna ti Sao ti Dios: “Matalek ti Apo, ket patibkerennakayto ken salaknibannakayto iti daydiay managdakdakes.” (2 Tes. 3:3) Kasano a salsalaknibannatayo ni Jehova? Pagsasaritaantayo ti dua a pamay-an.

NANGIPAAY NI JEHOVA ITI KABAL

4. Sigun iti Efeso 6:13-17, ania ti impaay ni Jehova tapno masalaknibantayo?

⁴ Inikkannatayo ni Jehova iti kabal a mangsalaknib kadatayo kadagiti iyaatake ni Satanas. (Basaen ti Efeso 6:13-17.) Natibker ken epektibo daytoy a naespirituan a kabal! Ngem masalaknibannatayo laeng no isuottayo ti tunggal paset dayta a kabal—ken no saantayo nga ik-ikkaten. Ania ti irepresentar ti tunggal pasetna? Pagsasaritaantayo dagita.

5. Ania ti barikes ti kinapudno, ken apay a masapul nga isuottayo dayta?

⁵ Ti barikes ti kinapudno irepresentarna dagiti kinapudno a masarakan iti Sao ti Dios, ti Biblia. Apay a masapul nga isuottayo daytoy a barikes? Gapu ta ni Satanas ti “ama ti kinaulbod.” (Juan 8:44) Rinibu a tawenen nga agul-ulbod ken al-allilawenna ti “intero a mapagnaedan a daga”! (Apoc. 12:9) Ngem salaknibannatayo dagiti kinapudno iti Biblia tapno saantay a maallilaw. Kasano a maisuottayo daytoy a simboliko a barikes? Babaen ti panangsursurotayo iti kinapudno maipapan ken Jehova, panagdaydayaw kenkuana iti “espiritu ken kinapudno,” ken panagbiagtayo a mapagtalkan iti amin a banag.—Juan 4:24; Efe. 4:25; Heb. 13:18.

6. Ania ti kinalinteg a proteksion ti barukong, ken apay a masapul nga isuottayo dayta?

⁶ Ti kinalinteg a proteksion ti barukong irepresentarna dagiti nalinteg a pagalagadan ni Jehova. Apay a masapul nga isuottayo ti proteksion ti barukong? No kasano a ti proteksion ti barukong protektaranna ti literal a puso ti maysa a soldado tapno saan a masalput, ti kinalinteg a proteksion ti barukong protektaranna met ti piguratibo a pusotayo, wenno ti makin-uneg a kinataotayo, tapno saan a maimpluensiaan iti kinadakes daytoy a lubong. (Prov. 4:23) Namnamaen ni Jehova nga ayaten ken pagserbiantayo isuna iti amin a pusotayo. (Mat. 22:36, 37) Ngem padpadasen ni Satanas a bingayen ti pusotayo tapno maimpluensiaannatayo a mangayat iti bambanag nga ididiaya ti lubong—bambanag a kagura ni Jehova. (Sant. 4:4; 1 Juan 2:15, 16) No saan nga agkurri dayta, idadanesnatayo tapno ditay suroten dagiti pagalagadan ni Jehova.

7. Kasano a maisuottayo ti proteksion ti barukong ti kinalinteg?

⁷ Maisuottayo ti kinalinteg a proteksion ti barukong no awatentayo dagiti pagalagadan ni Jehova maipapan iti umiso ken di umiso ken no surotentayo dagita a pagalagadan. (Sal. 97:10) Panagrikna ti dadduma, istrikto unay dagiti pagalagadan ni Jehova. Ngem no isardengtayo nga iyaplikar dagiti prinsipio ti Biblia, kaslatayto iti soldado a nangikkat iti proteksion ti barukongna bayat ti gubat gapu ta ipapanna a nadagsen unay dayta. Anian a kinamaag! Para kadagidiay mangay-ayat ken Jehova, dagiti bilinna ket “saan a makapadagsen,” no di ket makaisalakan iti biag.—1 Juan 5:3.

8. Ania ti kayat a sawen ti panangisuottayo iti sapatos ti kinagagar a mangipakaammo iti naimbag a damag?

⁸ Iparegta met kadatayo ni Pablo nga isuottayo ti sapatos ti kinagagar a mangipakaammo iti naimbag a damag ti talna. Iti sabali a pannao, kanayon koma a nakasaganatayo a mangikasaba iti naimbag a damag maipapan iti Pagarian. No ipakaammotayo ti mensahe ti Biblia, tumibker ti pammatitayo. Talaga a makaparegta a makita dagiti adipen ni Jehova iti intero a lubong a mangikagkagumaan a mangipakaammo iti naimbag a damag—iti pagtrabahuan, eskuelaan, lugar ti negosio, binalaybalay, iti panaggatang, panangpasiar iti di Saksi a kakabagian, pannakisarita kadagiti am-ammo, ken uray no dida pay la makaruar iti balayda. No agbutengtayo ket isardengtayo ti mangasaba, kaslatayto iti maysa a soldado a nangikkat kadagiti sapatosna bayat ti gubat; nalakanto a madangran dagiti sakana. Kas resultana, marigatan a mangidepensa iti bagina no maraut, ken dina masurot dagiti bilin ti komanderna.

9. Apay a masapul nga awitentayo ti dakkel a kalasag ti pammati?

⁹ Ti dakkel a kalasag ti pammati irepresentarna ti pammatitayo ken Jehova. Agtalektayo a tungpalennanto ti amin a karina. Dayta a pammati ti tumulong tapno kayatayo a “depdepen ti amin nga umap-apuy a pana daydiay managdakdakes.” Apay a masapul nga awitentayo daytoy dakkel a kalasag? Gapu ta maprotektarannatayo kadagiti makaallilaw a sursuro dagiti apostata wenno tapno ditay maupay no uyawen dagiti tattao dagiti patpatientayo. No awan ti pammatitayo, awanto ti bilegtayo nga agibtur no impluensiaandatayo dagiti tattao a mangsukir kadagiti pagalagadan ni Jehova. Ngem kada itakderantayo ti pammatitayo iti pagtrabahuan wenno iti eskuelaan, aw-awitentayo ti kalasagtayo. (1 Ped. 3:15) Kada ditay awaten ti dakdakkel ti sueldona a trabaho a manglapped iti rutinatayo iti panagdaydayaw, aw-awitentayo ti kalasagtayo. (Heb. 13:5, 6) Ken kada itultuloytay ti agserbi ken Jehova uray adda ibubusor, protprotektarannatayo ti kalasagtayo.—1 Tes. 2:2.

10. Ania ti helmet ti pannakaisalakan, ken apay a masapul nga isuottayo dayta?

¹⁰ Ti helmet ti pannakaisalakan ket ti namnama nga impaay ni Jehova—ti namnama nga isalakannatayto ken patay ken gunggonaanna ti amin a mangar-aramid iti pagayatanna. (1 Tes. 5:8; 1 Tim. 4:10; Tito 1:1, 2) No kasano a ti literal a helmet protektaranna ti ulo ti soldado, ti namnama a pannakaisalakan protektaranna met ti abilidadtayo nga agpanunot. Kasano? Tulongannatayo dayta a namnama nga agpokus kadagiti kari ti Dios ken umiso ti panangmatmattayo kadagiti problema. Kasano a maisuottayo daytoy a helmet? No itultuloytayo a tuladen ti panagpampanunot ti Dios. Kas pagarigan, mangnamnamatayo iti Dios, saan nga iti di agpaut a kinabaknang.—Sal. 26:2; 104:34; 1 Tim. 6:17.

11. Ania ti espada ti espiritu, ken apay a masapul nga usarentayo dayta?

¹¹ Ti espada ti espiritu ket ti Sao ti Dios, ti Biblia. Kabaelan dayta nga espada nga ibutaktak ti amin a kita ti panangallilaw ken mawayawayaanna dagiti tattao iti ulbod a sursuro ken dakes nga ar-aramid. (2 Cor. 10:4, 5; 2 Tim. 3:16, 17; Heb. 4:12) Masursurotayo nga usaren a siuumiso dayta nga espada babaen ti personal a panagadal ken panangsanay kadatayo ti organisasion ti Dios. (2 Tim. 2:15) Malaksid iti dayta a kompleto a kabal, adda pay impaay ni Jehova a nabileg a proteksion. Ania dayta?

DITAY AGMAYMAYSA A MAKILABAN

12. Ania pay ti kasapulantayo, ken apay?

¹² Ammo ti eksperiensiado a soldado a dina malabanan nga agmaymaysa ti nakadakdakkel nga armada; kasapulanna ti tulong dagiti padana a soldado. Umasping iti dayta, ditay malabanan a datdatayo ni Satanas ken dagiti pasurotna; kasapulantayo ti suporta dagiti kakabsattayo. Impaay ni Jehova dagiti ‘kakabsattayo’ iti intero a lubong a sisasagana a tumulong kadatayo.—1 Ped. 2:17.

13. Sigun iti Hebreo 10:24, 25, ania dagiti pagsayaatan ti pannakigimongtayo?

¹³ Ti maysa a pamay-an nga umaw-awattayo iti suporta ket ti pannakigimongtayo. (Basaen ti Hebreo 10:24, 25.) Gagangay laeng a maupaytayo no dadduma, ngem maparegtadatayo dagiti gimong. Maparegtatayo kadagiti naimpusuan a komento dagiti kakabsattayo. Dagiti naibatay-Biblia a palawag ken presentasionda ti mangpabileg iti determinasiontayo nga agserbi ken Jehova. Maparegtatayo met kadagiti makapabileg a panagsasaritatayo sakbay ken kalpasan ti gimong. (1 Tes. 5:14) Kanayonanna, kadagiti gimong, adda gundawaytayo a tumulong iti sabsabali isu nga agbalintayo a naragsak. (Ara. 20:35; Roma 1:11, 12) Tultulongandatayo met dagiti gimongtayo iti dadduma pay a pamay-an. Pasayaatenda ti abilidadtayo a “makilaban” ta tulongandatayo nga agbalin a mas epektibo iti ministerio. Kas pagarigan, masursurotayo nga usaren a sieepektibo dagiti alikamen iti Toolbox iti Panangisuro. Isu nga agsaganaka a naimbag para kadagiti gimong ti kongregasion. Dumngegka a naimbag bayat ti gimong. Kalpasan ti gimong, iyaplikarmo ti panangsanay a naawatmo. No aramidem dagita, agbalinka a “pudno a soldado ni Kristo Jesus.”—2 Tim. 2:3.

14. Ania pay a tulong ti magun-odantayo?

¹⁴ Tultulongandatayo met ti minilion a mannakabalin nga anghel. Panunotem laengen ti kaya nga aramiden ti maysa nga anghel! (Isa. 37:36) Ita, panunotem ti maaramidan ti nabileg nga armada dagiti anghel. Awan kaimudingan ti maysa a tao wenno demonio iti nabileg nga armada ni Jehova. Naikuna a ti maysa a matalek a Saksi a kaduana ni Jehova ket kanayon a nabilbileg ngem iti uray asino. (Uk. 6:16) Masiguradotayo a kasta! Laglagipem dagita no maupayka iti ibaga wenno aramiden ti maysa a katrabahuam, kaeskuelaam, wenno di manamati a kabagiam. Laglagipem a dika agmaymaysa iti daytoy a laban. Sursurotem ti panangiwanwan ni Jehova, isu a sigurado a tulongannaka.

ITULTULOYNATAYO A SALAKNIBAN NI JEHOVA

15. Sigun iti Isaias 54:15, 17, apay a dinto pulos mapagulimek ti ili ni Jehova?

¹⁵ Adu ti rason a gurguraennatayo ti lubong a kontrolado ni Satanas. Agtultuloytayo a neutral iti politika ken ditay makiramraman iti gubat. Ipakpakaammotayo ti nagan ti Dios, supsuportarantayo ti Pagarianna kas kakaisuna a namnama ti talna, ken sursurotentayo dagiti nalinteg a pagalagadanna. Ibutbutaktaktayo a ti agturay iti lubong ket nakaul-ulbod ken mammapatay. (Juan 8:44) Ken ipakpakaammotayo ti asidegen a pannakadadael ti lubong ni Satanas. Ngem dinatay pulos mapagulimek ni Satanas ken dagiti pasurotna. Itultuloytay ketdi nga idaydayaw ni Jehova, nga usarentayo ti aniaman a pamay-an a mangaramid iti dayta! Uray no adda pannakabalin ni Satanas, dina malapdan ti pannakaidanon ti mensahe ti Pagarian kadagiti tattao iti intero a lubong. Posible dayta gapu laeng iti pannalaknib ni Jehova.—Basaen ti Isaias 54:15, 17.

16. Kasano nga isalakan ni Jehova ti ilina inton dakkel a rigat?

¹⁶ Ania ti mapasamak iti masanguanan? Bayat ti dakkel a rigat, isalakannatayto ni Jehova iti dua a nakaskasdaaw a pamay-an. Umuna, isalakanna dagiti matalek nga adipenna inton tignayenna dagiti ari ti daga a mangdadael iti Babilonia a Dakkel, ti imperio ti ulbod a relihion. (Apoc. 17:16-18; 18:2, 4) Kalpasanna, isalakanna ti ilina inton dadaelenna ti nabatbati a paset ti lubong ni Satanas inton Armagedon.—Apoc. 7:9, 10; 16:14, 16.

17. Ania ti maitulong ti panagtalinaedtayo a nasinged ken Jehova?

¹⁷ No agtalinaedtayo a nasinged ken Jehova, dinatay permanente a madangran ni Satanas. Kinapudnona, isunto ketdi ti madadael iti agnanayon. (Roma 16:20) Isuotmo ngarud ti kompleto a kabal—ken saanmo nga ik-ikkaten dayta! Dimo padasen ti lumaban a siksika. Suportaram dagiti kapammatiam. Ken surotem ti panangiwanwan ni Jehova. No aramidem dayta, masiguradom a pabilgen ken salaknibannaka ti nadungngo a nailangitan nga Amatayo.—Isa. 41:10.