“Ikawesyo ti Naan-anay a Kabal a Naggapu iti Dios”
NAKABALAN a Kristiano? Apay nasken nga ikawesda ti kasta a kasla pakigubat nga aruaten? Saan kadi a managayatda iti kappia? (2 Timoteo 2:24) Wen. Nupay kasta, makipaspaset dagiti amin a pudno a Kristiano iti maysa a pannakidangadang—maysa nga ikagumaanda a, saan a mangpapatay, no di agballigi.
No saan nga immalsa ni Satanas, saan koma a kasapulan ti kasta a pannakiranget. Ngem immalsa, ket inallilawna da Adan ken Eva a kimmappon kenkuana. Sipud idin ti timmaud a sistema ti lubong ket adda iti babaen ti pannakabalin “ti managdakdakes,” ni Satanas a Diablo. (1 Juan 5:19) Dagidiay agpasakop iti nainkalintegan a Soberano, ni Jehova, masapul a sarangtenda ti impluensia ti lubong ken ti agturayna. Nasken a makidangadangda maipaay iti naespirituan a biagda. Gapu itoy, maparegta dagiti Kristiano: “Ikawesyo ti naan-anay a kabal a naggapu iti Dios tapno mabalinyo ti agtakder a sititibker a maibusor iti panangallilaw ti Diablo.”—Efeso 6:11.
Ti Kabal
Paliiwenyo a masapultayo “ti naan-anay a kabal a naggapu iti Dios” tapno siuumiso a masalaknibantayo. Usigentayo, ngarud, ti tunggal paset daytoy a kabal kas inladawan ni apostol Pablo ket sukimatentayo a sipupudno ti bagitayo no nakabalantayo met laeng a naan-anay maipaay iti naespirituan a pannakigubattayo.—Efeso 6:14-17.
“Agtakderkayo, ngarud, a sititibker, a sibabarikeskayo iti kinapudno.” (Efeso 6:14a) Idi tiempo ti Biblia agaruat dagiti soldado iti barikes a lalat a 15 sentimetros ti kaakabana. Tumulong ti barikes a mangsalaknib iti lomo. No pairutan ti soldado ti barikesna, kayatna a sawen a nakasagana a makigubat.
Maitutop, ngarud, a ti nadiosan a kinapudno maiyasping iti barikes ti soldado! Iyilustrar daytoy a nasken a nadekket unay koma kadatayo ti Sao ti Dios ti kinapudno, a kasla nabarikesantayo iti dayta. Masapul nga utobentayo ti kababagas ti linaon ti Sao ti Dios. Daytoy ti mangsalaknibto kadatayo manipud panangiyaw-awan dagiti kinaulbod ken panangallilaw. Maysa pay, dagiti sasao ni Jehova saranayennatayo ken pabilgennatayo iti naespirituan ken patibkerenna ti kinatarnawtayo.
“Sikakaweskayo iti kabal ti kinalinteg.” (Efeso 6:14b) Ti kabal ti soldado salaknibanna ti maysa a napateg nga organo—ti puso. Iti inted-Dios a naespirituan a kabaltayo, ngarud, ti kinalinteg salaknibanna ti pusotayo. Iti nainkasuratan a pamay-an, ti puso maitutop a simbolo ti no aniatayo iti uneg—dagiti rikna, panunot, ken tarigagaytayo. Yantangay kunaen met ti Biblia a ti puso agiray iti kinadakes, napateg a patanorentayo ti determinasion a salimetmetan ti pagalagadan ni Jehova iti kinalinteg. (Jeremias 17:9) Ti panagtulnog iti Dios di rumbeng a pammarang laeng; nasken a daytat’ naimpusuan. Kalikagumanna a patanorentayo ti nasged nga ayat iti kinalinteg ken ti isu met la a nasged a pananggura iti kinadakes. (Salmo 45:7) Gapuna masalaknibanto ti pusotayo.
“Sisasapatoskayo iti pannakaisagana ti naimbag a damag ti kappia.” (Efeso 6:15) Nasapatosankayo aya iti kastoy a pamay-an? Kanayon kadi nga ipandakayo dagiti sakayo iti tay-ak ti ministerio a mangirakurak iti naimbag a damag? Ikagkagumaanyo met laeng a parang-ayen ti kalidad ti panangasaba ken panangisuroyo? Pudno, addada teritoria a di unay mangipangpangag. Mabalin nga indiperente, aleng-aleng, wenno bumusor dagiti tao. Mabalin nga idadanesdatayo gapu iti panangasabatayo. Ngem babaen ti panagtalinaed, mapatanor dagiti Krsitiano ti panagibtur, maysa a galad a mangsalaknib maibusor kadagiti panangatake ni Satanas. Nupay naidaddadanes, ni Pablo ket maysa a naregget a manangaskasaba, ket maparegtatayo nga ‘agbalin a tumutulad kenkuana, a kas ti panangtuladna ken Kristo.’—1 Corinto 11:1.
Ti kinakupado iti trabaho a panangasaba iti Pagarian patibkerenna ti panagtalektayo iti naimbag a damag. Mainayon pay, palubosanna ti espiritu ni Jehova nga agtignay kadatayo tapno maibanag ti pagayatanna. Kinapudnona, ti kasta a trabaho pagbalinennatay a kadua nga agtartrabaho dagiti anghel—uray ni Jehova a Dios a mismo. (1 Corinto 3:9; Apocalipsis 14:6) Ket ti panagbalin nga ‘aduan iti aramid ti Apo’ pagbalinennatayo a “natibker, saan a magaraw.” (1 Corinto 15:58) Anian a nakaskasdaaw a proteksion ti ipaay daytoy!
“Alaenyo ti dakkel a kalasag ti pammati.” (Efeso 6:16) Nakabalan iti dakkel a kalasag, masalakniban ti maysa a soldado idi immuna a panawen ti bagina manipud gayang ken pana. No saanna nga aramaten ti kalasagna, mabalin a masugatan iti grabe wenno mapapatay pay ketdi. Dagiti Kristiano maipasangoda kadagiti napegpeggad pay nga igam—“[dagiti] dumardarang a gayang ti dakes.” Ramanen dagitoy ti isuamin a pamusposan ni Satanas a mangpakapuy iti pammatitayo ken mangpapatay kadatayo iti naespirituan. Ramanenda ti pannakaidadanes, kinaulbod, makaallilaw a nailubongan a pilosopia, materialismo, ken sulisog nga agaramid iti imoralidad. Tapno masalaknibantayo maibusor kadagitoy amin, kasapulantayo ti dakkel a kalasag. Nasken a masalakniban ti intero a bagitayo.
Addaan da Abraham ken ti asawana, ni Sara, iti natibker a pammati. Nupay nalabsandan ti tawen a maaddaan iti anak, namatida iti kari ti Dios a maiyanakto kadakuada ti maysa a bin-i. Idi agangay, impakita ni Abraham ti naisangsangayan a pammati idi tinungpalna ti kalikagum nga idatonna ni Isaac, ti kakaisuna nga anakna babaen ken dinungdungngona a Sara. Inggawid ni Jehova ti ima ni Abraham ken nangipaay iti sandi a daton. Ngem madadaan ni Abraham nga agtulnog. Apay? Gapu ta addaan naan-anay a pammati a ni Jehova kabaelanna a pagungaren ti anakna ken tungpalen dagiti karina maipanggep kenkuana.—Roma 4:16-21; Hebreo 11:11, 12, 17-19.
Addaan met ni Moises iti kita ti pammati a kasapulantayo. Inwaksina ti kinabaknang ti Egipto, a pinilina ti makipagsagaba kadagiti tattao ti Dios iti pannakairurumen. Apay? Ngamin patienna nga adda ni Jehova ken isalakannanto dagiti Israelita. Nakabilbileg ti pammati ni Moises a ta “nagtalinaed a kasla kitkitaenna ti saan a makita.”—Hebreo 11:6,24-27.
Addaantay aya iti kasta a pammati ken Jehova? Nasinged aya unay ti relasiontayo ken Jehova a kasla tay isut’ makitkitatayo? Situtuloktayo met laeng nga agsakripisio wenno ibturan ti aniaman a pakarigatan tapno mataginayontayo ti relasiontayo iti Dios? Addaantay kadi iti naan-anay a pammati ken Jehova? (Hebreo 11:1) No wen, saan a sumalpot dagiti dumardarang a gayang ni Satanas iti dakkel a kalasag ti pammatitayo.
“Awatenyo a pannakakabal ti ulo ti pannakaisalakan.” (Efeso 6:17a) Ti kabal ti ulo ti maysa a soldado salaknibanna ti ulo ken utekna—ti organo ti panagpanunot. Ti Nakristianuan a namnama ti pannakaisalakan maiyarig iti kabal ti ulo gapu ta salaknibanna ti isip. Napabaron ti panunot ti maysa a Kristiano babaen ti umiso a pannakaammo, ngem kukua pay laeng dayta ti nalap-it ken imperpekto a tao. (Roma 7:18; 12:2) No pakanentayo ti isiptayo iti makadadael-pammati a narugit a panunot nga agtaud iti espiritu ti lubong, kumudrep ti panagtalektayo iti pannakaisalakan ken nalabit maiddep inton agangay. Iti kasumbangirna, no naynay a pakanentayo ti isiptayo iti makapabileg a sasao ti Dios, agtalinaed a naraniag ken nalawag ti namnamatayo. Tagtaginayonenyo met laeng a nairut ti pannakaisalakan kas pannakakabal ti uloyo?
“Ti kampilan ti espiritu, nga isu ti sao ti Dios.” (Efeso 6:17b) Ti pagsasao a ti kasayaatan a depensa isu ti nasayaat a panangdarup ket pudno iti Nakristianuan a pannakidangadang. Bayat nga ipannatayo dagiti sakatayo, a nakabalan iti naimbag a damag ti kappia, kadagiti di mamati, addaantayo iti igam. Ti Sao ti Dios, ti Biblia, agtignay kas nabileg a kampilan a mangtagbat kadagiti naespirituan a kinaulbod ken panangallilaw ken tumulong kadagiti nalinteg-panagpuspusona a tattao a mangsapul iti naespirituan a wayawaya.—Juan 8:31, 32.
Impakita ni Jesus ti pannakabalin daytoy nga igam idi, kaiyariganna nakiranget ken Satanas a Diablo. Idi nasulisog idiay let-ang, sinalakniban ni Jesus ti bagina maibusor iti tallo a sataniko a panangraut babaen ti siepektibo a panagusarna iti Sao ti Dios a kunkunana: “Adda a naisurat.” (Mateo 4:1-11) No sursuruentayo nga aramaten daytoy a kampilan a sisisigo, matulongantayo dagiti nanumo a tattao a lumapsut iti pannakabalin ni Satanas. Kasta met, aramaten dagiti panglakayen iti kongregasion ti Sao ti Dios a mangsalaknib iti arban manipud kadagiti indibidual a mangpadas a mangrakrak iti pammati dagiti nakapkapsut.—Aramid 20:28-30.
Saan a giddato a nasigo ti soldado a mangaramat iti kampilan. Ti panagsanay ken napaut, naipamaysa a panagusar ket kasapulan iti nasigo a panangaramat iti dayta. Kasta met, iti naespirituan a pannakidangadang kasapulan ti adu a panagadal ken kanayon a panagsanay iti ministerio tapno agbalin a nasigo a mangaramat iti Sao ti Dios. Pagreggetantayo ti agbalin a nasigo a naespirituan a managtagikampilan, a makabael a “mangaramat iti umiso ti sao ti kinapudno.”—2 Timoteo 2:15.
Itultuloyyo ti Agkararag, Agtalinaedkayo a Sititibker
Napateg amin a paset ti naespirituan a kabaltayo iti panangsalimetmet iti kinatarnaw iti Dios. Ngem kasanotayo a mataginayon daytoy a kabal? Ti regular a panagadal iti Biblia, panagsagana kadagiti Nakristianuan a gimong, ken ti panagimdeng a naimbag ken naganetget a pannakipaset kadagita tulongannatayo a mangtaginayon iti kabaltayo. (2 Timoteo 3:16; Hebreo 10:24, 25) Ti regular ken naregget a pannakiraman iti tay-ak ti ministerio agraman ti nasayaat a Nakristiannuan a pannakilangen tulongannatay met a mangsalimetmet iti naespirituan nga igamtayo a pangsaranget ken pangsalaknib.—Proverbio 13:20; Roma 15:15, 16; 1 Corinto 15:33.
Napateg met ti panangpatanor iti umiso a panagpampanunot. Nasken a saantay a palubosan dagiti pangallukoy ti lubong a mangsinga kadatayo. Imbes ketdi, salimetmetantayo ti ‘nadalus a mata.’ (Mateo 6:19-24) Kas panangtulad ken Jesu-Kristo, masapul a sursuruentayo nga ayaten ti kinalinteg ken guraen ti kinadakes. (Hebreo 1:9) Amin dagitoy tulongannatay a mangtaginayon iti inted-Dios a naespirituan a kabaltayo.
Kalpasan panangsalaysayna iti tunggal paset ti naespirituan a kabal, ingngudo ni Pablo a kunkunana: “Agdawdawatkayo a kankanayon babaen ti espiritu kadagiti dawdawat ken karkararag ket agsalukagkayo ti maipaay itoy a mabuyogan ti amin a panagtalinaed ken panangidawdawat kadagiti isuamin a sasanto.” (Efeso 6:18) Dagiti nasungdo a soldado kanayonda a makikomunikar iti hedkuarters ti armada ken agtungpal kadagiti bilin. Kas Kristiano a soldado, nasken a kanayontay a makikomunikar iti Soberanotayo, ni Jehova a Dios, babaen ti natan-ok nga “agturay[na] kadagiti il-ili,” ni Jesu-Kristo. (Isaias 55:4) Maaramidan daytoy, saan a babaen ti parparawpaw a kararag, no di babaen ti naimpusuan a panagdawat a mangisilnag iti kinasinged ken nasged a debosion ken Jehova. Babaen ti regular a pannakisao ken Jehova, makaawattayo iti bileg iti inaldaw a mangsaranay kadatayo iti pannakidangadang.
Kinuna ni Jesus: “Naparmekkon ti lubong.” (Juan 16:33) Tarigagayan met ni Jehova nga agballigitayo. Bayat ti iyaadani ti ipapatay ni apostol Pablo, mabalinna a kunaen: “Nakirupakak iti nasayaat a pannakidangadang, naturposko ti tarayek, inaywanak ti pammati.” (2 Timoteo 4:7) Kasta met koma ti makunatayo maipapan iti pasettayo iti pannakidangadang. No pudno met laeng a tarigagayantayo daytoy, “agtalinaed[tayo] a sititibker a bumusor kadagiti pangallilaw ti Diablo” babaen panangsalimetmet iti naan-anay a kabal a naggapu iti Dios.—Efeso 6:11.