Ti Ayat Tulongannatayo a Mangibtur iti Gura

1. Sigun iti Mateo 24:9, apay a ditay koma pagsiddaawan no guraennatayo ti lubong?

PINARSUANATAYO ni Jehova nga agayat ken maayat. Isu a no adda manggura kadatayo, masaktantayo ken nalabit agbutengtay pay ketdi. Kas pagarigan, imbaga ti kabsat nga agnagan Georgina a taga-Europe: “Idi 14 ti tawenko, ginuranak ni nanangko gapu ta agserserbiak ken Jehova. Nakalidlidayak ken panagriknak, kasla saanak a nasayaat a tao.”b Insurat ti kabsat nga agnagan Danylo: “Idi kinabildak dagiti soldado, ininsultodak, ken pinangtaandak gapu ta maysaak a Saksi ni Jehova, nabutngan ken naibabainak.” Nasakit ti kasta a pannakagura, ngem ditay pakasdaawan dayta. Impakpakauna ni Jesus a guraendatayo dagiti tattao.—Basaen ti Mateo 24:9.

2-3. Apay a magurgura dagiti pasurot ni Jesus?

² Ti lubong gurguraenna dagiti pasurot ni Jesus. Apay? Gapu ta kas ken Jesus, ‘saantayo a paset ti lubong.’ (Juan 15:17-19) Kas resultana, nupay raraementayo dagiti gobierno ti tao, saantayo a pagdaydayawan ida wenno dagiti banag a mangirepresentar kadagita. Ipapaaytayo ken Jehova ti naipamaysa a debosiontayo. Supsuportarantayo ti kalintegan ti Dios a mangituray iti sangatauan —kalintegan a karkariten ni Satanas ken ti “kaputotanna.” (Gen. 3:1-5, 15) Ikaskasabatayo a ti Pagarian ti Dios ti kakaisuna a namnama ti sangatauan ken asidegen a dadaelen ti Pagarian ti amin a bumusbusor iti dayta. (Dan. 2:44; Apoc. 19:19-21) Naimbag a damag dayta kadagiti naemma ngem dakes a damag kadagiti managdakdakes.—Sal. 37:10, 11.

³ Magurguratayo met gapu ta sursurotentayo dagiti nalinteg a pagalagadan ti Dios. Naiduma unay dagitoy a pagalagadan iti nababa a moralidad ti lubong. Kas pagarigan, adu a tattao ita ti mangakseptar iti sobra ti kinaimmoralna nga ar-aramid, a kas iti inaramid dagiti tattao idiay Sodoma ken Gomorra isu a dinadael ida ti Dios! (Jud. 7) Gapu ta sursurotentayo dagiti pagalagadan ti Biblia maipapan kadagita nga aramid, adu a tattao ti manguy-uyaw ken mangibilang kadatayo a panatiko.—1 Ped. 4:3, 4.

4. Ania dagiti kualidad a makatulong kadatayo nga agibtur no guraendatayo dagiti tattao?

⁴ Ania dagiti makatulong kadatayo nga agibtur no guraen ken insultuendatayo dagiti tattao? Masapul a nabileg ti pammatitayo a tulongannatayo ni Jehova. Kas iti kalasag, kabaelan ti pammatitayo a “depdepen ti amin nga umap-apuy a pana.” (Efe. 6:16) Ngem saan la a pammati ti kasapulantayo. Kasapulantayo met ti ayat. Apay? Gapu ta ti ayat ket “saan a nalaka nga agpungtot.” Anusan ken ibturanna ti amin a makapasakit a banag. (1 Cor. 13:4-7, 13) Kitaentayo no kasano a ti ayat ken Jehova, kadagiti kapammatiantayo, ken uray kadagiti bumusbusor kadatayo ket makatulong tapno maibturantayo ti gura.

MATULONGANNATAYO TI AYAT KEN JEHOVA A MANGIBTUR ITI GURA

5. Kasano a napabileg ni Jesus gapu iti ayatna ken Amana?

⁵ Imbaga ni Jesus kadagiti matalek a pasurotna iti rabii sakbay a patayen dagiti kabusorna: “Ay-ayatek ti Ama, [isu a] tungtungpalek ti imbilin kaniak ti Ama.” (Juan 14:31) Ti ayat ni Jesus ken Jehova ti nangpabileg kenkuana a mangsango kadagiti nakaro a suot. Kasta met ti maitulong ti ayattayo ken Jehova.

6. Sigun iti Roma 5:3-5, ania ti pangibilangan dagiti adipen ni Jehova iti panangibturda iti gura ti lubong?

⁶ Ti ayat iti Dios ti kanayon a timmulong kadagiti adipen ni Jehova a mangibtur iti pannakaidadanes. Kas pagarigan, idi a ti napigsa ti impluensiana a korte suprema dagiti Judio binilinna dagiti apostol nga isardengda ti mangasaba, ti ayat iti Dios ti nangtignay kadakuada nga ‘agtulnog iti Dios kas agturay imbes a kadagiti tattao.’ (Ara. 5:29; 1 Juan 5:3) Ti kasta a nakatibtibker nga ayat ti mangpabpabileg met kadagiti kakabsattayo ita, nga adu kadakuada ti simamatalek nga agib-ibtur iti panangidadanes dagiti naulpit ken nabileg a gobierno. Imbes a maupaytayo, ibilangtayo a maysa a pribilehio ti mangibtur iti gura ti lubong.—Ara. 5:41; basaen ti Roma 5:3-5.

7. Ania koma ti reaksiontayo no busorendatayo dagiti kapamiliatayo?

⁷ Nalabit ti maysa kadagiti karigatan a suot ket agtaud kadagiti mismo a kapamiliatayo. No mangrugin nga ipakitatayo nga aginterestayo iti kinapudno, baka panunoten ti dadduma kadakuada a naallilaw ken nadadaelen ti panunottayo. (Idilig ti Marcos 3:21.) Baka siraranggas pay ketdi a busorendatayo. Ditay koma pakasdaawan daytoy a negatibo a reaksion. Imbaga ni Jesus: “Dagiti kabusor ti maysa a tao ket dagitinto miembro ti pamiliana.” (Mat. 10:36) Siempre, aniaman ti reaksion dagiti kabagiantayo, ditay koma tratuen ida kas kabusor. Imbes ketdi, bayat nga umun-uneg ti panagayattayo ken Jehova, kasta met koma ti panagayattayo kadagiti tattao. (Mat. 22:37-39) Ngem ditay pulos sukiren dagiti linteg ken prinsipio ti Biblia tapno laeng mapagustuan ti maysa a tao.

8-9. Ania ti nakatulong iti maysa a kabsat tapno agtalinaed a matalek iti laksid ti nakaro nga ibubusor?

⁸ Ni Georgina a nadakamat itay ket nagtalinaed a matalek iti laksid ti nakaro nga ibubusor ni nanangna. Inlawlawag ni Georgina: “Nangrugikami ken Nanang a makipagadal iti Biblia kadagiti Saksi. Ngem innem a bulan kalpasanna, idi kayatkon ti makigimong, bigla a nagbaliw ti kababalinna. Nadiskobrek a makisarsarita kadagiti apostata ken inusarna dagiti argumentoda iti pannakisaritana kaniak. Insultuennak met, pungotennak, bekkelennak, ken ibellengna dagiti publikasionko. Idi agtawenakon iti 15, nagpabautisarak. Tapno mapasardengnak nga agserbi ken Jehova, impannak iti maysa nga institusion a para kadagiti rebelioso a tin-edyer, nga agdrogdroga ken agar-aramid iti krimen ti dadduma kadakuada. Nagrigat nga ibturan ti ibubusor nangruna no aramiden dayta ti maysa a rumbeng koma a mangay-ayat ken mangay-aywan kenka.”

⁹ Kasano a nakapagibtur ni Georgina? Imbagana: “Idi aldaw a binusornak ni Nanang, kalkalpasko a binasa ti intero a Biblia. Kombinsidoak idin a nasarakakon ti kinapudno, ken nariknak a nakasingsingedak ken Jehova. Masansan a nagkarkararagak kenkuana ket dinengngegnak. Idi addaak iti daydi nga institusion, adda kabsat a babai a nangawis kaniak iti balayna, ket nagkaduakami a nangadal iti Biblia. Pinabilegdak met dagiti kakabsat idiay Kingdom Hall. Imbilangdak a kapamiliada. Nakitak a mismo a nabilbileg ni Jehova ngem kadagiti bumusbusor kadatayo, uray asinoda man.”

10. Apay a kanayon a makapagtalektayo ken Jehova a Diostayo?

¹⁰ Insurat ni apostol Pablo nga awan ti ‘makaisina kadatayo iti ayat ti Dios nga adda ken Kristo Jesus nga Apotayo.’ (Roma 8:38, 39) Uray no adda tiempo nga agsagabatayo, kanayon nga adda ni Jehova iti sibaytayo a mangliwliwa ken mangpabileg kadatayo. Ket kas ipakita ti kapadasan ni Georgina, tulongannatay met ni Jehova babaen ti ipatpategtayo a naespirituan a pamilia.

TI AYAT KADAGITI KAPAMMATIAN TULONGANNATAYO A MANGIBTUR ITI GURA

11. Kasano a nakatulong kadagiti adalan ni Jesus ti ayat a dineskribirna iti Juan 15:12, 13? Mangted iti pagarigan.

¹¹ Iti rabii sakbay ti ipapatay ni Jesus, impalagipna kadagiti adalanna nga agiinnayatda. (Basaen ti Juan 15:12, 13.) Ammona a dayta a managsakripisio nga ayat ti makatulong kadakuada nga agtalinaed nga agkaykaysa ken mangibtur iti gura ti lubong. Alaentayo a pagarigan ti kongregasion ti Tesalonica. Sipud idi nabuangay, naidaddadanesen dagiti miembrona. Nupay kasta, dagiti kakabsat sadiay ket nagbalin nga ulidan iti panagibtur ken ayat. (1 Tes. 1:3, 6, 7) Pinaregta ida ni Pablo nga “ad-adda pay” nga ipakitada ti ayat. (1 Tes. 4:9, 10) Ayat ti nakatignayanda a mangliwliwa kadagiti malmaldaangan ken mangsaranay kadagiti nakapuy. (1 Tes. 5:14) Sinurotda dagiti instruksion ni Pablo ta naibagana iti maikadua a suratna agarup makatawen kalpasanna: “Dumakdakkel ti ayat ti tunggal maysa kadakayo para iti amin.” (2 Tes. 1:3-5) Ti ayatda ti nakatulong tapno maibturanda ti rigat ken pannakaidadanes.

12. Bayat ti gubat, kasano nga impakita dagiti kakabsat iti maysa a pagilian ti ayatda iti maysa ken maysa?

¹² Usigentayo ti kapadasan ti nadakamat itayen a ni Danylo ken ni baketna. Idi nairaman ti ilida iti gubat, intultuloyda ti makigimong, inkagumaanda ti mangasaba, ken imbingayda ti taraonda kadagiti kapammatianda. Pagammuan ta maysa nga aldaw, immasideg ken Danylo dagiti armado a soldado. “Imbagada a tallikudakon ti pammatik,” kinuna ni Danylo. “Gapu ta diak kayat, kinabkabildak ken tinutokandak iti paltog sada pinaputok iti ngatuen ti ulok tapno butbutngendak. Sakbay a pimmanawda, impangtada nga agsublida tapno ramesenda ni baketko. Ngem insigida a nagtignay dagiti kakabsattayo ket impalugandakami iti tren a mapan iti sabali nga ili. Diak pulos malipatan ti ayat dagidiay a patpatgek a kakabsat. Idi nakasangpetkamin iti sabali nga ili, inikkandakami dagiti lumugar a kakabsat iti taraon ken tinulongandak nga agbirok iti trabaho ken pagtaengan! Kas resultana, naaddaankami iti pagtaengan a nagkamangan ti dadduma pay a kakabsat a timmalaw iti lugar a paggugubatan.” Ipakita dagita a kapadasan a matulongannatayo ti Nakristianuan nga ayat tapno maibturantayo ti gura.

TI AYAT KADAGITI BUMUSBUSOR KADATAYO TULONGANNATAYO A MANGIBTUR ITI GURA

13. Kasano a matulongannatayo ti nasantuan nga espiritu nga agibtur iti panagserbitayo ken Jehova uray no gurguraendatayo?

¹³ Imbaga ni Jesus kadagiti pasurotna nga ayatenda dagiti bumusbusor kadakuada. (Mat. 5:44, 45) Nalaka kadi nga aramiden dayta? Saan! Ngem posible iti tulong ti nasantuan nga espiritu ti Dios. Ti bunga ti espiritu ti Dios ramanenna ti ayat kasta met ti kinaanus, kinaimbag, kinaalumamay, ken panagteppel. (Gal. 5:22, 23) Makatulong kadatayo dagita a kualidad tapno maibturantayo ti gura. Nagbalbaliw ti adu a bumusbusor gapu ta impakita dagiti kapammatiantayo nga asawada, anakda, wenno kaarrubada dagita a kualidad ti Dios. Nagbalin pay ketdin a patpatgentayo a kakabsat ti adu a dati a bumusbusor. Isu a no marigatanka a mangayat kadagidiay manggurgura kenka gapu ta agserserbika ken Jehova, ikararagmo ti nasantuan nga espiritu. (Luc. 11:13) Ken naan-anay koma a kombinsidoka a ti dalan ti Dios ti kanayon a kasayaatan.—Prov. 3:5-7.

14-15. Kasano a nakatulong ken Yasmeen ti Roma 12:17-21 tapno ipakitana latta ti ayat uray nakaro ti ibubusor ni lakayna?

¹⁴ Usigentayo ti kapadasan ni Yasmeen a taga-Middle East. Idi nagbalin a Saksi ni Jehova, impagarup ni lakayna nga isu ket naallilaw, ken pinadasna a pasardengen iti panagserbina iti Dios. Ininsultona ni Yasmeen. Sinugsoganna pay dagiti kabagianda agraman ti lider ti relihionda ken ti maysa a mangkukulam a mangbutbuteng ken Yasmeen ken mangakusar kenkuana a daddadaelenna kano ti pamiliana. Pinagsasawan pay ketdi ni lakayna dagiti kakabsat bayat ti gimong ti kongregasion! Masansan a nagsangsangit ni Yasmeen gapu iti naulpit a pannakatratona.

¹⁵ Iti Kingdom Hall, ni Yasmeen ket liniwliwa ken pinabileg ti naespirituan a pamiliana. Pinaregta dagiti panglakayen nga iyaplikarna ti kuna ti Roma 12:17-21. (Basaen.) “Nagrigat,” kinuna ni Yasmeen. “Ngem nagpatulongak ken Jehova ket inkagumaak nga iyaplikar ti ibagbaga ti Biblia. Uray igagara idi ni lakayko ti agiwara iti rugit iti kosina, dalusak dayta. Uray insultuennak, sumungbatak a siaalumamay. Ket no agsakit, aywanak.”

16-17. Ania ti masursurom iti ulidan ni Yasmeen?

¹⁶ Nagunggonaan ni Yasmeen iti panangipakitana iti ayat ken lakayna. Imbagana: “Dimmakkel ti panagtalek kaniak ni lakayko gapu ta ammona a kanayon nga ibagak ti pudno. No pagsaritaanmi ti maipapan iti relihion, raraemennakon ket imbagana a dinakon ap-apaen. Ita, isu pay ketdin ti mangibaga a mapanakon makigimong. Dakkel ti simmayaatan ti biag ti pamiliami, ket talaga a timmalnan ti biagmi. Sapay koma ta akseptarenton ni lakayko ti kinapudno tapno agkaduakamin nga agserbi ken Jehova.”

¹⁷ Ipakita ti ulidan ni Yasmeen a ti ayat “anusanna ti amin a banag, . . . namnamaenna ti amin a banag, ibturanna ti amin a banag.” (1 Cor. 13:4, 7) Mabalin a nabileg ken makapasakit ti gura, ngem nabilbileg nga amang ti ayat. Mabalbaliwanna ti puso ti tao ken maparagsakna ti puso ni Jehova. Ngem uray gurguraendatayo dagiti bumusbusor, naragsaktayo latta. Apay?

NARAGSAK URAY MAGURA

18. Apay a naragsaktayo uray magurguratayo?

¹⁸ Imbaga ni Jesus: “Naragsakkayo no guraendakayo dagiti tattao.” (Luc. 6:22) Ditay kayat ti magura. Ditay padpadasen ti agbalin a martir. Apay ngarud a naragsaktayo uray magurguratayo? Gapu iti tallo a rason. Umuna, no agibturtayo, magun-odantayo ti pabor ti Dios. (1 Ped. 4:13, 14) Maikadua, sumayaat ti kualidad ti pammatitayo ken bumileg dayta. (1 Ped. 1:7) Ken maikatlo, magun-odantayo ti di magatadan a gunggona—ti biag nga awan inggana.—Roma 2:6, 7.

19. Apay a naragsak dagiti apostol kalpasan a nasapsaplitda?

¹⁹ Di nagbayag kalpasan ti panagungar ni Jesus, narikna dagiti apostol ti ragsak nga imbagana. Kalpasan a nasapsaplitda ken naibilin nga isardengda ti mangasaba, nagrag-oda. Apay? “Gapu ta naibilangda a maikari a maibabain maigapu iti nagan [ni Jesus].” (Ara. 5:40-42) Ti panagayatda iti Apoda ket nabilbileg ngem iti panagbutengda iti gura dagiti bumusbusor kadakuada. ‘Intultuloyda’ nga impakaammo ti naimbag a damag kas panangipakitada iti ayat. Adu a kakabsattayo ita ti agtultuloy nga agserserbi a simamatalek iti laksid dagiti pakarigatan. Ammoda a saan a lipaten ni Jehova ti aramid ken ayatda para iti naganna.—Heb. 6:10.

20. Ania ti usigentayo iti sumaruno nga artikulo?

²⁰ Agingga nga adda pay laeng daytoy a sistema, itultuloynatayo a guraen ti lubong. (Juan 15:19) Ngem ditay koma agbuteng. Kas ipakita ti sumaruno nga artikulo, ni Jehova ‘patibkeren ken salaknibanna’ dagiti matalek nga adipenna. (2 Tes. 3:3) Itultuloytayo ngarud nga ayaten ni Jehova, dagiti kakabsattayo, ken uray dagiti bumusbusor kadatayo. No surotentayo daytoy a balakad, agtalinaedtayo nga agkaykaysa ken nabileg iti naespirituan, maidaydayawtayo ni Jehova, ken mapaneknekantayo a nabilbileg nga amang ti ayat ngem iti gura.