Salsaludsod Dagiti Agbasbasa
Ania ti kayat a sawen ni Jesus idi imbagana: “Diyo panunoten nga immayak mangyeg iti talna”?
Insuro ni Jesus kadagiti tattao a maaddaanda iti natalna a relasion iti dadduma. Ngem naminsan, imbagana kadagiti apostolna: “Diyo panunoten nga immayak mangyeg iti talna ditoy daga; saanak nga immay a mangyeg iti talna, no di ket panagsisina. Immayak a mangpataud iti panagsisina: ti anak a lalaki kontra iti amana, anak a babai kontra iti inana, ken manugang a babai kontra iti katuganganna a babai.” (Mat. 10:34, 35) Ania ti kayat a sawen ni Jesus?
Saan a kayat ni Jesus a pagsisinaen dagiti miembro ti pamilia, ngem ammona a dagiti pannursurona ti mamagsisina iti dadduma a pamilia. Ngarud, dagidiay kayatda ti agbalin nga adalan ni Kristo ken agpabautisar masapul nga ammoda dagiti resulta ti desisionda. No busoren ida ti saan a Saksi nga asawa wenno kapamiliada, mabalin a marigatanda nga agtultuloy a mangsurot kadagiti pannursuro ni Kristo.
Iparparegta ti Biblia kadagiti Kristiano a ‘makikappiada iti amin a tao.’ (Roma 12:18) Ngem dagiti pannursuro ni Jesus ket agbalin a kas “espada” iti dadduma a pamilia. Mapasamak dayta no ti maysa a miembro ti pamilia awatenna dagiti pannursuro ni Jesus ngem busoren wenno saan nga awaten dagita ti dadduma. No kasta, dagiti kakabagian—dagiti miembro ti pamilia—ti agbalin a “kabusor” daydiay agad-adal iti Biblia.—Mat. 10:36.
No dadduma, dagiti adalan ni Kristo a saanda a karelihionan ti pamiliada ket maipasango kadagiti situasion a mangsubok iti panagayatda ken Jehova ken ni Jesus. Kas pagarigan, mabalin a piliten ida dagiti saan a Saksi a kabagianda a makiraman kadagiti narelihiosuan a selebrasion. No masubokda, asino ti paragsakenda? Imbaga ni Jesus: “Ti dakdakkel ti panagayatna iti ama wenno inana ngem kaniak, saan a maikari kas adalak.” (Mat. 10:37) Siempre, saan nga imbaga ni Jesus a tapno maikaritayo nga agbalin nga adalanna, saantayo unayen nga ayaten dagiti nagannaktayo. Imbes ketdi, insurona no ania ti masapul a kapatgan iti biagtayo. No busoren dagiti saan a Saksi a kapamiliatayo ti panagdaydayawtayo ken Jehova, itultuloytayo ida nga ayaten, ngem laglagipentayo a ti Dios ti iyun-unatayo nga ayaten.
Talaga a nakasaksakit no busorendatayo dagiti kapamiliatayo. Ngem laglagipen dagiti adalan ni Jesus ti imbagana: “Ti saan a mangibaklay iti kayo a pagtutuokan ken saan a sumurot kaniak, saan a maikari kas adalak.” (Mat. 10:38) Kayatna a sawen, ibilang dagiti Kristiano a ti ibubusor ti pamilia ket karaman kadagiti sagabaen dagiti adalan ni Kristo a situtulok nga ibturanda. Ngem namnamaenda met a ti nasayaat a kababalinda ti mangtignayto kadagiti dida kapammatian a kapamiliada a mangbalbaliw iti panunotda ken mangadal iti mensahe ti Biblia.—1 Ped. 3:1, 2.