Itultuloymo ti Mangasaba Gapu iti Ayat!

1. Ania ti naammuantayo iti 2023 a tinawen a miting?

ITI 2023 a tinawen a miting,a nalawlawagan ti dadduma kadagiti patpatientayo. Adda met makaparagsak a pakaammo maipapan iti ministeriotayo. Kas pagarigan, naammuantayo a mabalin nga adda pay gundaway ti dadduma a makikadua iti ili ni Jehova uray kalpasan ti pannakadadael ti Babilonia a Dakkel. Naammuantayo met a nangrugi idi Nobiembre 2023, saanen a kasapulan nga ireport dagiti agibumbunannag ti amin a nagapuananda iti ministerio. Kayat kadi a sawen dayta a saan unayen nga importante ti ministeriotayo isu a saantayon nga iyapura ti mangasaba? Saan!

2. Apay a masapul a lallalo nga iyapuratayo ti mangasaba kada aldaw? (Marcos 13:10)

² Kada lumabas ti maysa nga aldaw, lallalo met a masapul nga iyapuratayo ti mangasaba. Apay? Ngamin, bumasbassiten ti nabati nga oras. Kitaentayo ti impakpakauna ni Jesus maipapan iti trabaho a panangasaba iti maudi nga al-aldaw. (Basaen ti Marcos 13:10.) Iti met salaysay ni Mateo, imbaga ni Jesus a maikaskasaba ti naimbag a damag iti intero a daga sakbay “ti panungpalan.” (Mat. 24:14) Ti panungpalan ket tumukoy iti naan-anay a panagpatingga ti dakes a sistema ni Satanas. Addan ti inkeddeng ni Jehova nga “aldaw ken oras” a mapasamak dayta. (Mat. 24:36; 25:13; Ara. 1:7) Iti tunggal aldaw nga aglabas, umas-asideg met dayta a tiempo. (Roma 13:11) Isu a masapul nga itultuloytayo ti mangasaba agingga iti panungpalan.

3. Apay a mangaskasabatayo?

³ Bayat a pampanunotentayo ti ministeriotayo, nasayaat no isaludsodtayo iti bagitayo: Apay a mangaskasabatayo? Ti simple a sungbat ket gapu iti ayat. No mangaskasabatayo, ipakpakitatayo ti ayattayo—ayat para iti naimbag a damag, ayat para kadagiti tattao, ken kapatgan iti amin, ayat para ken Jehova ken iti naganna. Saggaysaentayo a pagsasaritaan dagita.

MANGASKASABATAYO GAPU ITI AYATTAYO ITI NAIMBAG A DAMAG

4. Ania ti reaksiontayo no adda maammuantayo a naimbag a damag?

⁴ Malagipmo pay kadi ti nariknam idi adda naammuam a naimbag a damag—kas koma idi naammuam a naganaken ti maysa a kapamiliam wenno idi naawatka iti trabaho a kasapulam unay? Sigurado nga eksaytedka a mangipadamag iti dayta kadagiti kapamiliam ken gagayyemmo. Kasta met kadi ti nariknam idi naammuam ti kasayaatan a damag—ti naimbag a damag maipapan iti Pagarian ti Dios?

5. Ania ti nariknam idi damo a naammuam ti kinapudno? (Kitaen met dagiti ladawan.)

⁵ Lagipem ti nariknam idi damo a naammuam ti kinapudno. Naammuam nga ay-ayatennaka ti nailangitan nga Amam, a kayatna nga agbalinka a paset ti pamiliana nga agdaydayaw kenkuana. Naammuam met nga inkarina nga ikkatennanto ti pakaigapuan ti amin nga ut-ot ken panagrigrigat, ken manamnamam a makitamto manen dagiti natay nga ay-ayatem inton mapagungarda iti baro a lubong. (Mar. 10:​29, 30; Juan 5:​28, 29; Roma 8:​38, 39; Apoc. 21:​3, 4) Nagadu ti naammuam a kinapudno ket permi la ketdi ti ragsakmo idi naammuam dagita! (Luc. 24:32) Sigurado nga ipatpategmo dagiti naammuam, ket kayatmo la unay nga ipakaammo dagita iti dadduma!—Idilig ti Jeremias 20:9.

6. Ania ti masursurom iti kapadasan da Ernest ken Rose?

⁶ Kitaentayo daytoy a kapadasan. Natay ti tatang ti brother a ni Ernestb idi ag-10 ti tawenna. Imbaga ni Ernest: “Pinampanunotko: ‘Adda kadin idiay langit? Wenno awanen iti agnanayon?’ Umapalak kadagiti ubbing nga addaan iti amma.” Dandani inaldaw a napan ni Ernest iti sementerio. Agparintumeng iti tanem ni tatangna sa ikararagna: “Apo, pangngaasim ta ibagam no ayan ni tatangko.” Agarup 17 a tawen kalpasan a natay ni tatangna, naawis a makipagadal iti Biblia ket dagus nga inawatna dayta. Permi ti ragsakna idi naammuanna nga awanen ti ammo dagiti natay, a kasla naimas laeng ti turogda, ken ikarkari ti Biblia nga addanto panagungar. (Ecl. 9:​5, 10; Ara. 24:15) Nasungbatan met laengen dagiti nabayagen nga isalsaludsodna! Permi ti ragsakna kadagiti naammuanna a kinapudno iti Biblia. Nakipagadal met iti Biblia ti baketna a ni Rose ket nagustuanna met laeng ti kinapudno a naammuanna. Idi 1978, nagpabautisarda. Nakaregregtada a nangibaga kadagiti kapamilia, gagayyemda, ken iti dadduma pay a mayat a dumngeg maipapan kadagiti nasursuroda. Gapu iti dayta, nasurok a 70 ti natulongan da Ernest ken Rose nga agpabautisar.

7. Ania ti mapasamak no ti kinapudno ket agramut iti pusotayo? (Lucas 6:45)

⁷ No ti ayattayo iti kinapudno ket agramut iti pusotayo, sigurado nga ipakaammotayo dayta iti sabsabali. (Basaen ti Lucas 6:45.) Mariknatayo la ketdi ti kas iti narikna dagiti adalan ni Jesus idi umuna a siglo. Imbagada: “Saan a mabalin nga isardengmi nga ibaga ti bambanag a nakita ken nangngegmi.” (Ara. 4:20) Ipatpategtayo unay ti kinapudno isu a kayattayo nga ipakaammo dayta iti adu a tattao agingga a posible.

MANGASKASABATAYO GAPU TA AY-AYATENTAYO DAGITI TATTAO

8. Apay a kayattayo nga ikasaba ti naimbag a damag kadagiti tattao? (Kitaen ti kahon nga “Ayatem Dagiti Tattao—Agaramid iti Adalan.”) (Kitaen met ti ladawan.)

⁸ Kas ken Jehova ken ti Anakna, ay-ayatentayo dagiti tattao. (Prov. 8:31; Juan 3:16) Maasiantay unay kadagidiay “awanan iti namnama ken awanan iti Dios.” (Efe. 2:12) Kasda la adda iti nakaun-uneg nga abut gapu ta nakaad-adu ti problemada. Ngem adda kadatayo ti arig tali a mangyaon kadakuada—ti naimbag a damag maipapan iti Pagarian ti Dios. Ay-ayatentayo ida ken maasiantayo kadakuada isu nga ikagumaantayo nga ipakaammo ti naimbag a damag. No maammuanda dayta, maaddaanda iti namnama ken agbalinda a naragsak uray itan. Adda met gundawayda a maaddaan iti “pudpudno a biag”—ti agnanayon a biag iti baro a lubong nga inkari ti Dios.—1 Tim. 6:19.

9. Ania ti ipakpakdaartayo maipapan iti masanguanan, ken apay? (Ezekiel 33:​7, 8)

⁹ Ay-ayatentayo dagiti tattao isu a kayattayo a pakdaaran ida maipapan iti asidegen a panungpalan daytoy dakes a lubong. (Basaen ti Ezekiel 33:​7, 8.) Maasiantayo iti amin a tattao agraman kadagiti kapamiliatayo a saan pay nga agserserbi ken Jehova. Saan man la nga ammo ti adu kadakuada ti asidegen a dumteng—ti “dakkel a rigat a saan pay a napaspasamak manipud idi panangrugi ti lubong agingga ita, ken dinto met mauliten.” (Mat. 24:21) Kayattayo a maammuanda dagiti mapasamak bayat ti tiempo ti panangukom: madadaelto ti ulbod a relihion ket kalpasanna, madadael met ti intero a dakes a sistema inton Armagedon. (Apoc. 16:​14, 16; 17:​16, 17; 19:​11, 19, 20) Ikarkararagtayo nga agingga a posible, adu ti dumngeg iti pakdaar ken makikadua kadatayo iti nadalus a panagdaydayaw ken Jehova ita. Ngem anianto ngay ti mapasamak kadagiti saan a dumngeg iti pakdaar ita, agraman dagiti ipatpategtayo a kapamiliatayo?

10. Apay a masapul nga itultuloytayo a pakdaaran dagiti tattao?

¹⁰ Kas nailawlawag iti napalabas nga artikulo, mabalin a pagayatan ni Jehova nga isalakan dagiti tattao a sada la maaddaan iti pammati kenkuana inton makitada ti pannakadadael ti Babilonia a Dakkel. No kasta, masapul a lallalo nga itultuloytayo ti mangpakdaar. Panunotentayo daytoy: Dagiti ibagatayo ita kadakuada ket mabalin a malagipdanto. (Idilig ti Ezekiel 33:33.) Baka malagipdanto ti pakdaar a nangngegda kadatayo ket kayatdanto met laengen ti makikadua iti nadalus a panagdaydayaw sakbay a naladawen ti amin. Adda idi guardia idiay Filipos a sa la naaddaan iti pammati iti Dios kalpasan a “bigla a nagginggined.” Kas kenkuana, baka ti dadduma a saan a dumdumngeg ita ket maaddaanto met laeng iti pammati ken Jehova kalpasan ti makapakigtot a pannakadadael ti Babilonia a Dakkel.—Ara. 16:​25-34.

MANGASKASABATAYO GAPU TA AY-AYATENTAYO NI JEHOVA KEN TI NAGANNA

11. Kasanotayo a maipaay ken Jehova ti dayag, dayaw, ken pannakabalin? (Apocalipsis 4:11) (Kitaen met dagiti ladawan.)

¹¹ Ti kapatgan a rason nga ikaskasabatayo ti naimbag a damag ket gapu ta ay-ayatentayo ni Jehova a Dios ken ti nasantuan a naganna. Ibilangtayo ti ministeriotayo kas maysa a pamay-an a maidaydayaw ti ay-ayatentayo a Dios. (Basaen ti Apocalipsis 4:11.) Naimpusuan nga umanamongtayo a maikari ni Jehova a Dios nga umawat iti dayag, dayaw, ken pannakabalin manipud kadagiti napudno nga agdaydayaw kenkuana. Ipapaaytayo kenkuana ti dayag ken dayaw no ipakpakaammotayo dagiti makakombinsir nga ebidensia a ‘pinarsuana ti amin a banag’ ken utangtayo kenkuana ti biagtayo. Ipapaaytayo kenkuana ti pannakabalin—ti pannakabalintayo—no naan-anay nga us-usarentayo ti tiempo, pigsa, ken sanikuatayo a makiraman iti ministerio agingga nga ipalubos ti situasiontayo. (Mat. 6:33; Luc. 13:24; Col. 3:23) Iti simple a pannao, kaykayattayo nga ipakaammo ti maipapan iti ay-ayatentayo a Dios. Kayattayo met nga ipakaammo ti maipapan iti naganna ken iti kinasiasinona. Apay?

12. Kasanotayo a masantipikar ti nagan ni Jehova no mangaskasabatayo?

¹² Ay-ayatentayo ni Jehova isu a kayattayo a masantipikar ti naganna. (Mat. 6:9) Kayattayo ti makiraman iti panangpaneknek nga ulbod ti amin a pammadakes ni Satanas tapno madalusan ti nagan ti Diostayo. (Gen. 3:​1-5; Job 2:4; Juan 8:44) No mangaskasabatayo, magagarantayo a mangipakaammo iti amin a dumngeg no asino ni Jehova ken no ania dagiti kinapudno maipapan kenkuana. Kayattayo a maammuan ti amin a ti kangrunaan a kualidadna ket ayat, ken nalinteg ken patas ti pamay-an ti panangiturayna. Kayattayo met nga ipakaammo nga asidegen a pagpatinggaen ti Pagarianna ti amin a rigat ken iyegna ti talna ken kinaragsak iti amin a tattao. (Sal. 37:​10, 11, 29; 1 Juan 4:8) No idepdepensatayo ti reputasion ni Jehova bayat a mangaskasabatayo, masantipikartayo ti naganna. Naragsaktayo met ta ammotayo a pampaneknekantayo a datayo dagiti saksina. Kasano?

13. Apay nga ibilangtayo a pakaidayawan ti agbalin a Saksi ni Jehova? (Isaias 43:​10-12)

¹³ Pinilinatayo ni Jehova nga agbalin a ‘saksina.’ (Basaen ti Isaias 43:​10-12.) Sumagmamano a tawenen ti napalabas, insurat ti Bagi a Manarawidwid: “Ti katan-okan a dayaw a mabalin a tagiragsaken ti siasinoman kadatayo ket ti pannakaawag[tayo] kas maysa kadagiti Saksi ni Jehova.”c Apay? Kitaentayo daytoy a pagarigan. Ipapantayon a naidarumka gapu iti pammabasol a saanmo met nga inaramid. Kasapulam ti maysa a testigo a mangipakaammo nga ulbod ti nayakusar kenka ken talaga a saanmo nga inaramid ti naipabasol kenka. Asino ti piliem? Sigurado a daydiay am-ammom, pagtaltalkam, ken nasayaat ti reputasionna tapno patienda ti testimoniana. Idi pinilinatayo ni Jehova nga agbalin a Saksina, impakitana nga am-ammonatayo a naimbag, ken agtalek a paneknekantayo nga isu laeng ti pudno a Dios. Ibilangtayo a pakaidayawan ti agbalin a Saksina, isu a gundawayantayo ti amin a tiempo tapno maipakaammo ti naganna. Kayattayo met a paneknekan a kinaulbod ti amin a pammadakes maipapan kenkuana. Iti kasta, pampaneknekantayo a pudno ti ipagpannakkeltayo unay a naipanagan kadatayo, Dagiti Saksi ni Jehova!—Sal. 83:18; Roma 10:​13-15.

ITULTULOYTAYO TI MANGASABA AGINGGA ITI PANUNGPALAN

14. Ania dagiti makapagagar nga asidegen a mapasamak?

¹⁴ Makapagagar dagiti asidegen a mapasamak! Iti tulong ni Jehova, sapay koma ta adu pay ti umawat iti kinapudno sakbay a mangrugi ti dakkel a rigat. Maragsakantayo met ta posible a bayat ti dakkel a rigat—ti karirigatan a tiempo iti intero a pakasaritaan ti tao—mabalin nga adunto pay ti pumanaw iti dandanin madadael a lubong ni Satanas tapno makikadua kadatayo a mangidaydayaw ken Jehova!—Ara. 13:48.

15-16. Ania ti itultuloytayo nga aramiden ken agingga kaano?

¹⁵ Kabayatanna, adda pay dagiti masapul nga aramidentayo. Pribilehiotayo ti makipaset iti trabaho a dinto pulos mauliten—ti panangikasaba iti naimbag a damag maipapan iti Pagarian ti Dios iti intero a daga. Malaksid iti dayta, masapul nga itultuloytayo ti mangpakdaar. Masapul a maammuan dagiti tattao nga umas-asidegen ti panungpalan daytoy dakes a sistema ti bambanag. Ket inton dumtengen ti tiempo ti panangukom, maammuandanto a naggapu ken Jehova a Dios ti mensahe nga inkaskasabatayo.—Ezek. 38:23.

¹⁶ Ania ngarud ti determinasiontayo? Gapu iti ayat—ayat para iti naimbag a damag, ayat para kadagiti tattao, ken kangrunaan iti amin, ayat para ken Jehova a Dios ken iti naganna—itultuloytayo ti sireregta ken sigagagar a mangasaba, ken iyapuratayo nga aramiden dayta agingga nga ibaga ni Jehova, “Nalpasen!”