Sieemma nga Akseptarem nga Adda Dagiti Saanmo nga Ammo

1. Ania dagiti abilidad nga inted kadatayo ni Jehova, ken apay?

PINARSUANATAYO ni Jehova nga addaan iti abilidad nga agpanunot, agsursuro, ken mangtarus no kasanotayo a mayaplikar dagiti nasursurotayo. Apay a kasta ti panangaramidna kadatayo? Kayatna ngamin a ‘masarakantayo ti pannakaammo maipapan Kenkuana’ ken agserbitayo kenkuana babaen ti panangusartayo iti abilidadtayo nga agpanunot.—Prov. 2:​1-5; Roma 12:1.

2. (a) Ania dagiti limitasiontayo? (Job 37:​23, 24) (Kitaen met ti ladawan.) (b) Ania dagiti pagsayaatanna no sieemma nga akseptarentayo dagiti limitasiontayo?

² Nupay adda abilidadtayo nga agsursuro, limitado laeng dagiti ammotayo. (Basaen ti Job 37:​23, 24.) Kitaentayo ti kapadasan ni Job. Nagadu ti insaludsod kenkuana ni Jehova a nakatulong tapno makitana nga adu pay ti saanna nga ammo. Dayta ti namagpakumbaba kenkuana ken nangilinteg iti panagpampanunotna. (Job 42:​3-6) Pagsayaatantayo met no sieemma a bigbigentayo nga adu pay ti saantayo nga ammo. Dayta ti mangtignay kadatayo nga agtalek nga ipakaammo ni Jehova no ania laeng dagiti masapul a maammuantayo tapno makaaramidtayo kadagiti umiso a desision.—Prov. 2:6.

3. Ania ti pagsasaritaantayo iti daytoy nga artikulo?

³ Iti daytoy nga artikulo, pagsasaritaantayo ti dadduma a banag a ditay ammo ken dagiti pakarigatan a maipasango kadatayo kas resultana. Kitaentayo met no apay a nasayaat a ditay ammo ti dadduma a banag. No pagsasaritaantayo dagita, ad-adda a makapagtalektayo a dagiti laeng masapul a maammuantayo ti ipakaammo kadatayo ni Jehova, “Daydiay perpekto ti pannakaammona.”—Job 37:16.

SAANTAYO NGA AMMO NO KAANO TI PANUNGPALAN

4. Sigun iti Mateo 24:​36, ania ti maysa a banag a saantayo nga ammo?

⁴ Basaen ti Mateo 24:36. Saantayo nga ammo no kaano ti panungpalan daytoy a sistema ti bambanag. Idi adda ni Jesus ditoy daga, dina met ammo ti “aldaw ken oras” ti panungpalan.a Imbaga ni Jesus kadagiti apostolna a ni Jehova “ti addaan kalintegan” wenno autoridad a “mangikeddeng” no kaano a mapasamak dagiti bambanag. Ngamin, isu ti Naindaklan a Manangikeddeng iti Tiempo. (Ara. 1:​6, 7) Inyeskediulen ni Jehova ti panungpalan daytoy a sistema. Ngem awan ti kalintegantayo a mangammo no kaano nga eksakto a mapasamak dayta.

5. Gapu ta ditayo ammo no kaano ti panungpalan, ania dagiti mabalin nga epektona dayta kadatayo?

⁵ Maibatay iti imbaga ni Jesus, saantayo nga ammo no kasano pay kabayag nga aguraytayo sakbay a dumteng ti panungpalan. Gapu iti dayta, baka maupaytayo wenno saantayon a makaan-anus, nangnangruna no nabayagtayon nga agur-uray iti aldaw ni Jehova. Wenno baka marigatantayon a mangibtur iti pananguy-uyaw dagiti kapamiliatayo wenno ti dadduma. (2 Ped. 3:​3, 4) Baka mariknatayo a nasaysayaat koma nga ammotayo no kaano ti panungpalan tapno mas makapaganustayo ken nalaklakatayo nga ibturan ti pananguy-uyawda kadatayo.

6. Apay a nasayaat a ditay ammo no kaano a dumteng ti panungpalan?

⁶ Gapu ta saan nga imbaga ni Jehova ti petsa ti panungpalan, ik-ikkannatayo iti gundaway a mangipakita nga agserserbitayo gapu ta ay-ayatentayo isuna ken agtaltalektayo kenkuana. Saantayo nga agserserbi ken Jehova gapu laeng iti petsa, a kas man la adda expiration wenno pagpatinggaan ti pammatitayo kenkuana. Imbes ketdi, kayattayo ti agserbi kenkuana iti agnanayon. Imbes a sangkapanunottayo no kaano a dumteng “ti aldaw ni Jehova,” nasaysayaat nga agpokustayo kadagiti agkakaimbag nga ibanag dayta nga aldaw. No aramidentayo ti kasta, agtultuloy a bumileg ti debosiontayo iti Dios ken aramidentayo ti amin a kabaelantayo a mangparagsak kenkuana.—2 Ped. 3:​11, 12.

7. Ania ti ammotayo?

⁷ Nasaysayaat no agpokustayo iti ammotayo—a ti maudi nga al-aldaw ket nangrugin idi 1914. Nangipaay ni Jehova kadagiti padto iti Biblia a mangpaneknek a dayta a tawen ti panangrugi ti maudi nga al-aldaw. Ngem saan la a dayta. Detalyado met a dineskribir dagiti padto no anianto dagiti kasasaad ti lubong sipud iti dayta a tiempo. Gapu iti dayta, kombinsidotayo nga “asidegen ti dakkel nga aldaw ni Jehova.” (Sof. 1:14) Ammotayo pay no ania a trabaho ti kayat ni Jehova nga aramidentayo. Kayatna nga ipakaammotayo “ti naimbag a damag maipapan iti Pagarian” iti adu a tattao agingga a posible. (Mat. 24:14) Maikaskasaban daytoy a mensahe iti agarup 240 a pagilian ken iti nasurok a 1,000 a lengguahe. Saantayo a masapul a maammuan ti “aldaw ken oras” tapno laeng sireregta a makiramantayo iti daytoy a napateg a trabaho.

SAANTAYO A KANAYON NGA AMMO TI ARAMIDEN NI JEHOVA

8. Ania ti tuktukoyen ti sasao a “ti aramid ti pudno a Dios”? (Eclesiastes 11:5)

⁸ Saantayo a kanayon nga ammo “ti aramid ti pudno a Dios.” (Basaen ti Eclesiastes 11:5.) Tuktukoyen dagita a sasao dagiti aramid ni Jehova wenno dagiti ipalpalubosna a mapasamak tapno matungpal ti pagayatanna. Saantayo a masigurado no apay nga ipalpalubos ni Jehova a mapasamak ti maysa a banag wenno no ania ti eksakto nga aramidenna tapno matulongannatayo. (Sal. 37:5) Narigattayo a maawatan dayta no kasano a saan met a naan-anay a matarusan dagiti sientista no kasano a mabukel ti maysa a sikog iti aanakan ti inana.

9. Gapu ta ditay ammo no ania ti eksakto nga aramiden ni Jehova, ania dagiti mabalin nga epekto dayta kadatayo?

⁹ Gapu ta ditay ammo no ania ti eksakto nga aramiden ni Jehova a panangtulong kadatayo, baka marigatantayo nga agdesision. Baka agpangaduatayo a mangpalawa iti ministeriotayo, mangpasimple iti biagtayo, wenno umakar iti lugar nga agkasapulan iti ad-adu nga agibumbunannag. Wenno baka mariknatayo nga awan ti anamong ti Dios kadatayo no ditay maragpat dagiti naespirituan a kalattayo, no saantayo a makabirok kadagiti iyad-adalan iti Biblia uray nakagaggagettayo iti ministerio, wenno no nakaad-adu latta ti problematayo uray no ikagkagumaantayo ti makipaset kadagiti espesial a proyekto ti organisasion.

10. Ania dagiti napateg a kualidad a mapatanortayo no saantayo nga ammo ti eksakto nga aramiden ni Jehova?

¹⁰ Gapu ta saantayo nga ammo ti eksakto nga aramiden ni Jehova, mapatanortayo dagiti napateg a kualidad a kas iti kinapakumbaba ken kinaemma. Maawatantayo a nangatngato ti pampanunot ken daldalan ni Jehova. (Isa. 55:​8, 9) Masursurotayo met ti naan-anay nga agtalek ken Jehova ken agpannuray kenkuana iti panagballigitayo. No nasayaat dagiti resulta ti ministeriotayo wenno dagiti proyekto ti organisasion a pakipaspasetantayo, umiso laeng nga itedtayo ken Jehova ti dayaw. (Sal. 127:1; 1 Cor. 3:7) No saan a mapasamak ti ekspektarentayo, laglagipentayo a kontrolado latta ni Jehova ti bambanag. (Isa. 26:12) Aramidentayo ti pasettayo ken itultuloytayo ti agtalek nga aramiden met ni Jehova ti pasetna. Masiguradotayo nga iwanwannatayo uray no saanen a mangaramid iti milagro a kas iti inaramidna iti dadduma.—Ara. 16:​6-10.

11. Ania dagiti napateg a banag nga ammotayo?

¹¹ Ammotayo a ni Jehova ket kanayon a naayat, patas, ken masirib. Ipatpategna unay dagiti maar-aramidantayo para kenkuana ken kadagiti kapammatiantayo. Kanayon met a gunggonaanna dagiti matalek kenkuana.—Heb. 11:6.

SAANTAYO NGA AMMO TI MAPASAMAK INTON BIGAT

12. Sigun iti Santiago 4:​13, 14, ania dagiti saantayo nga ammo?

¹² Basaen ti Santiago 4:​13, 14. Daytoy ti nalawag a kinapudno: Saantayo nga ammo ti biagtayo inton bigat. Iti daytoy a sistema dagiti bambanag, adda dagiti “tiempo ken di ninamnama a pasamak” a dumteng kadatayo. (Ecl. 9:11) Kas resultana, saantayo nga ammo no agballiginto dagiti planotayo wenno no sibibiagtayonto pay agingga a malpastayo dagiti planotayo.

13. Gapu ta saantayo nga ammo ti mapasamak iti masanguanan, ania ti epektona dayta kadatayo?

¹³ Gapu ta saantayo nga ammo ti eksakto a mapasamak iti masanguanan, mabalin a marigatantayo nga agibtur. Kasano? Ngamin, no madanagantayo unay kadagiti posible a mapasamak, baka daytan ti mangpukaw iti rag-otayo. Mabalin nga agladingit ken maupaytayo gapu kadagiti bigla a trahedia ken di ninamnama a pasamak. Ket no saan a mapasamak dagiti ekspektarentayo, mabalin a mapaay ken maupaytayo.—Prov. 13:12.

14. Ania ti masapul nga aramidentayo tapno agbalintayo a pudpudno a naragsak? (Kitaen met dagiti ladawan.)

¹⁴ No ibturantayo dagiti pakarigatan, mapaneknekantayo nga aniaman ti mapasamak, agserserbitayo iti nailangitan nga Amatayo gapu ta ay-ayatentayo isuna. Ipakita dagiti salaysay iti Biblia a saantayo koma nga ekspektaren a protektarannatayo ni Jehova iti amin a pakarigatantayo ken saanna a nasaksakbay a plinano dagiti mapasamak iti biagtayo. Ammona a ti kinaragsaktayo ket saan a nakadepende iti pannakaammotayo iti mapasamak kadatayo iti masanguanan. Imbes ketdi, naragsaktayo no itultuloytayo ti agpaiwanwan ken agtulnog kenkuana. (Jer. 10:23) No agpaiwanwantayo kenkuana no agar-aramidtayo kadagiti desision, kas man la ibagbagatayo: “No pagayatan ni Jehova, agbiagkami ket aramidenmi daytoy wenno dayta.”—Sant. 4:15.

15. Ania ti ammotayo maipapan iti masanguanan?

¹⁵ Uray no saantayo nga ammo ti mapasamak iti tunggal aldaw, ammotayo nga inkari ni Jehova nga agbiagtayo iti agnanayon—idiay man langit wenno ditoy daga. Ammotayo a saan nga agulbod ken awan a pulos ti makalapped kenkuana a mangtungpal iti amin nga inkarina. (Tito 1:2) Isu laeng ti ‘makaipadto iti mapasamak, ken nabayagen nga imbagana dagiti saan pay a napasamak.’ Pimmayso ti amin nga impadtona idi, ket sigurado a matungpalto met ti amin nga impadtona a mapasamak iti masanguanan. (Isa. 46:10) Masiguradotayo nga awan ti makalapped ken Jehova a mangayat kadatayo. (Roma 8:​35-39) Itedna kadatayo ti sirib, liwliwa, ken bileg a kasapulantayo tapno maibturantayo ti aniaman a mapasamak kadatayo. Masiguradotayo a tulongan ken bendisionannatayo ni Jehova.—Jer. 17:​7, 8.

SAANTAYO A NAAN-ANAY A MATARUSAN NO KASANO NGA AM-AMMONATAYO UNAY NI JEHOVA

16. Kas naibaga iti Salmo 139:​1-6, ania ti ammo ni Jehova a ditay naan-anay a maawatan?

¹⁶ Basaen ti Salmo 139:​1-6. Ammo ti Namarsua kadatayo ti amin maipapan kadatayo. Ammona no apay a kastoy ken kasdiay ti panagpampanunot ken rikriknatayo. Ammona dagiti ibagbaga ken no apay nga ibagbagatayo dagita. Ammona met ti amin nga ar-aramidentayo ken no apay nga ar-aramidentayo dagita. Imbaga ni Ari David a kanayon a nakasagana ni Jehova a tumulong, ken kabaelannatayo a tulongan sadinoman ti ayantayo. Nagmayat a panunoten a ti Kangatuan nga Apo iti uniberso, ti mannakabalin-amin a Namarsua iti langit ken daga, ket interesado unay kadatayo! Imbaga ni David: “Diak maawatan dayta a pannakaammom. Nakaun-uneg ket diak matukod.”—Sal. 139:​6, ftn.

17. Apay a mabalin a marigatantayo a mamati nga am-ammonatayo unay ni Jehova?

¹⁷ Mabalin a gapu iti pannakapadakkeltayo, kulturatayo, wenno dati a pammatitayo, baka marigatantayo a mamati a ti nailangitan nga Amatayo a ni Jehova ket interesado kadatayo. Wenno baka mapampanunottayo a nakaad-adayo kadatayo ti Dios ken imposible a kayatnatayo a maam-ammo gapu kadagiti nagdakes a naaramidantayo iti napalabas. Adda met idi dagiti tiempo a kasta ti narikna ti David. (Sal. 38:​18, 21) Wenno baka kastoy ti mapanunot ti maysa a mangikagkagumaan a mangbalbaliw iti biagna tapno masurotna dagiti nalinteg a pagalagadan ti Dios: ‘No talaga a maawatannak ti Dios, apay ngarud nga ekspektarenna a balbaliwak ti nakairuamakon a klase ti biag?’

18. Ania ti pagimbaganna no mamatitayo a mas am-ammonatayo ni Jehova ngem iti pannakaam-ammotayo iti bagitayo? (Kitaen met dagiti ladawan.)

¹⁸ Masursurotayo a patien a mas am-ammonatayo ni Jehova ngem iti pannakaam-ammotayo iti bagitayo ken makitkitana dagiti nasayaat a kualidadtayo a ditay makitkita. Makitkitana met dagiti pagkamkamaliantayo. Ngem ammona no ania a kita ti tao ti kayattayo a pagbalinan isu nga ay-ayatennatayo latta. (Roma 7:15) No talaga a maawatantayo a makitkita ni Jehova ti potensialtayo, dumakkel ti panagtalektayo kenkuana bayat a simamatalek ken siraragsak nga agserserbitayo kenkuana.

19. Ania ti sigurado nga ammotayo maipapan ken Jehova?

¹⁹ Ammotayo a ni Jehova ket ayat. Ditay pulos pagduaduaan dayta. (1 Juan 4:8) Ammotayo a dagiti nalinteg a pagalagadanna ket pakakitaan nga ay-ayatennatayo ken kanayon a kayatna ti kasayaatan para kadatayo. Ammotayo a kayat ni Jehova nga agbiagtayo nga agnanayon ket impaayna ti subbot tapno mapasamak dayta. Ipasigurado ti sagutna a subbot a makapagballigitayo uray no saantayo a perpekto. (Roma 7:​24, 25) Ammotayo met a “dakdakkel ti Dios ngem ti pusotayo ken ammona ti amin a banag.” (1 Juan 3:​19, 20) Makitkita ni Jehova ti amin maipapan kadatayo, ken agtalek nga agballigitayo a mangaramid iti pagayatanna.

20. Ania ti makatulong tapno ditay unay pagdanagan dagiti ditay ammo?

²⁰ Saan nga iyim-imut ni Jehova ti aniaman nga impormasion a talaga a kasapulantayo a maammuan. No sieemma a patientayo dayta a kinapudno, ditay unay pagdanagan dagiti bambanag a ditay kontrolado. Makapagpokustayo kadagiti napatpateg a bambanag. No aramidentayo dayta, ipakpakitatayo a naan-anay nga agtalektayo ken Jehova, “Daydiay perpekto ti pannakaammona.” (Job 36:4) Uray no saantayo pay ita a maawatan ti dadduma a bambanag, padpadaanantayo ti tiempo nga agnanayonton a suruannatayo ni Jehova kadagiti baro a bambanag ken makasursurotayo maipapan iti Naindaklan a Diostayo.—Ecl. 3:11.