No Kasano a Maipakita ti Ayat ken Asi Kadagiti Nakabasol

1. Ania ti mapasamak no makaaramid ti maysa iti nadagsen a basol?

ITI napalabas nga artikulo, nakitatayo no kasano a tinaming ni apostol Pablo ti kaso ti nakaaramid iti nadagsen a basol iti Corinto. Saan idi nga agbabbabawi ti nakabasol isu a masapul a maikkat iti kongregasion. Ngem kas ipakita ti pannakatema a tekstotayo, dadduma a nakaaramid iti nadagsen a basol ket mabalin a matulongan nga agbabawi. (Roma 2:4) Kasano a matulongan ida dagiti panglakayen nga agbabawi?

2-3. Ania ti masapul nga aramidentayo no maammuantayo a nakaaramid iti nadagsen a basol ti maysa a kapammatiantayo, ken apay?

² No saan nga ammo dagiti panglakayen a nakaaramid iti nadagsen a basol ti maysa a kabsat, saanda a matulongan. Isu nga ania ti masapul nga aramidentayo no maammuantayo a nakaaramid iti nadagsen a basol ti maysa a kapammatiantayo a mabalin a pakaikkatanna iti kongregasion? Masapul a paregtaentayo isuna nga umasideg kadagiti panglakayen tapno agpatulong.—Isa. 1:18; Ara. 20:28; 1 Ped. 5:2.

³ Ngem kasanon no saan a kayat ti nakabasol ti makisarita kadagiti panglakayen? Masapul a datayon ti umasideg kadagiti panglakayen tapno masiguradotayo a magun-odan ti kabsat ti kasapulanna a tulong. No aramidentayo dayta, ipakpakitatayo nga ay-ayatentayo ti kabsat ta ammotayo a matulongan isuna dagiti panglakayen. No itultuloy ti nakabasol ti dakes nga ar-aramidenna, lallalo a pagpegpeggadenna ti relasionna ken Jehova. Mabalin met a madadael ti reputasion ti kongregasion. Isu nga uray no mabalin a narigat, situtured nga umasidegtayo kadagiti panglakayen ta ay-ayatentayo ni Jehova ken ti kabsat.—Sal. 27:14.

NO KASANO A MATULONGAN DAGITI PANGLAKAYEN DAGITI NAKAARAMID ITI NADAGSEN A BASOL

4. Ania ti panggep dagiti panglakayen no kasaritada ti maysa a nakaaramid iti nadagsen a basol?

⁴ No adda kabsat a nakaaramid iti nadagsen a basol, mangpili ti bagi dagiti panglakayen iti tallo kadakuada a kualipikado nga agserbi kas komite.a Masapul a naemma ken napakumbaba dagitoy a kakabsat. Bayat a tultulonganda ti nakabasol nga agbabawi, laglagipenda koma a saanda a mapuersa ti maysa nga agbalbaliw. (Deut. 30:19) Masapul a bigbigen dagiti panglakayen a saan nga amin a nakaaramid iti nadagsen a basol ket agbabawi a kas ken Ari David. (2 Sam. 12:13) Mabalin a saan a kayat ti dadduma a nakabasol nga ipangag dagiti pammagbaga ni Jehova. (Gen. 4:​6-8) Nupay kasta, ti panggep dagiti panglakayen ket tulongan ti nakabasol nga agbabawi agingga a posible. Ania dagiti prinsipio a makatulong kadakuada no kasaritada ti nakabasol?

5. Ania dagiti kualidad a masapul nga ipakita dagiti panglakayen no kasaritada ti nakabasol? (2 Timoteo 2:​24-26) (Kitaen met ti ladawan.)

⁵ Masapul nga ibilang dagiti panglakayen ti nakabasol a kas napukaw a karnero, ngem napateg latta ken Jehova. (Luc. 15:​4, 6) No ngarud kasaritada ti nakabasol, saan koma a nasakit ti panagsasaoda. Nasayaat koma ti panangtratoda kenkuana. Saanda koma met nga ibilang ti pannakisaritada iti nakabasol a basta laeng panagimbestigar tapno masurot ti proseso. Imbes ketdi, masapul nga ipakitada dagiti kualidad a masarakan iti 2 Timoteo 2:​24-26. (Basaen.) Naalumamay ken naasi latta koma dagiti panglakayen bayat nga ikagkagumaanda a danonen ti puso ti nakabasol.

6. Kasano a maisagana dagiti panglakayen ti pusoda sakbay a kasaritada ti nakabasol? (Roma 2:4)

⁶ Masapul nga isagana dagiti panglakayen ti pusoda. Ikagumaanda a tuladen ti panangtrato ni Jehova kadagiti nakabasol, a laglagipenda ti imbaga ni Pablo: ‘Naimbag ti Dios ta kayatnaka a tulongan nga agbabawi.’ (Basaen ti Roma 2:4.) Masapul a laglagipen dagiti panglakayen a ti kangrunaan a trabahoda ket agserbi kas papastor. Surotenda ti panangiwanwan ni Jesus ken tuladenda ti panangaywanna iti kongregasion. (Isa. 11:​3, 4; Mat. 18:​18-20) Sakbay a kasaritada ti nakabasol, ikararag ti komite ken Jehova nga agballigi koma ti panggepda: matulongan ti nakabasol nga agbabawi. Ag-research-da iti Biblia ken kadagiti publikasiontayo ken ikararagda met ken Jehova a tulonganna ida tapno maawatanda ti nakabasol ken ti napasamak. Pagsasaritaanda dagiti ammodan ken dagiti masapul pay a maammuanda maipapan iti kinatao ken iti pannakapadakkel ti nakabasol a posible a nangimpluensia iti panagpampanunot, ugali, ken kababalinna.—Prov. 20:5.

7-8. Kasano a matulad dagiti panglakayen ti kinaanus ni Jehova no kasaritada ti nakabasol?

⁷ Masapul a tuladen dagiti panglakayen ti kinaanus ni Jehova. Laglagipenda koma no kasano ti panangtrato ni Jehova kadagiti nakabasol iti napalabas. Kas pagarigan, inan-anusan ni Jehova ni Cain. Imbagana kenkuana no ania ti mapasamak no saan nga agbalbaliw ken impanamnamana a bendisionanna no agtulnog. (Gen. 4:​6, 7) Imbaon met ni Jehova ni propeta Natan a mangbalakad ken David. Nangusar ni Natan iti maysa nga ilustrasion a timmulong ken David nga agbabawi. (2 Sam. 12:​1-7) ‘Maulit-ulit a nangibaon’ ni Jehova kadagiti propetana iti nasukir a nasion ti Israel. (Jer. 7:​24, 25) Saannan nga inuray ti ilina nga agbabawi sakbay pay a tulonganna ida. Imbes ketdi, isuna ti immunan a nagtignay tapno kombinsirenna ida nga agbabawi.

⁸ Tultuladen dagiti panglakayen ti ulidan ni Jehova no tultulonganda ti maysa a nakaaramid iti nadagsen a basol. Ibaga ti 2 Timoteo 4:2 a tratuenda “buyogen ti kinaanus” ti madagdagsenan a kapammatianda. Isu a masapul a kanayon a kalmado ken naanus ti panglakayen tapno matulonganna ti nakabasol a mangaramid iti umiso. No makaunget wenno masuron ti panglakayen, baka saan a denggen ti nakabasol ti balakadna wenno baka saanna pay ketdin a kayat ti agbabawi.

9-10. Kasano a matulongan dagiti panglakayen ti nakabasol tapno mabigbigna a dagiti desisionna ti rason a kimmapuy ti relasionna ken Jehova isu a nakaaramid iti basol?

⁹ Ikagumaan dagiti panglakayen nga ammuen dagiti kasasaad a nangituggod kenkuana nga agbasol. Kas pagarigan, in-inut kadi a kimmapuy ti relasionna ken Jehova? Insardengna kadin ti regular a panagadalna iti Biblia ken pannakiramanna iti ministerio? Manmano kadin ken parparawpaw laengen ti panagkararagna ken Jehova? Insardengna kadin a labanan dagiti di umiso a tarigagayna? Siasino dagiti pakikadkaduaanna? Ania dagiti magusgustuanna a paglinglingayan? Kasano a dagita ti nakaimpluensia iti puso ken isipna? Maawatanna kadi a dagiti nabiit pay a desision ken inaramidna ti nangpaliday ken Amana a ni Jehova?

¹⁰ Mabalin a saludsodan dagiti panglakayen ti nakabasol tapno mabigbigna no ania dagiti nangpakapuy iti relasionna ken Jehova isu a nagbasol. Masapul nga aramidenda dayta iti naayat a pamay-an ken saanda nga agpalutpot kadagiti personal a detalye a saanda met a kasapulan a maammuan. (Prov. 20:5) Kas iti inaramid ni Natan idi tinulonganna ni David, mabalinda met ti agusar iti ilustrasion tapno matulonganda ti nakabasol a mangamiris iti kadagsen ti inaramidna. Bayat ti damo a pannakisaritada, mabalin a talaga a pagladingitanen ti nakabasol ti inaramidna. Mabalin pay ketdi nga agbabawi.

11. Kasano idi ti panangtulong ni Jesus kadagiti managbasol?

¹¹ Ikagumaan dagiti panglakayen a tuladen ni Jesus. Idi napagungaren ni Jesus, tinulonganna ni Saulo a taga-Tarso babaen iti daytoy mamagpanunot a saludsod: “Saulo, Saulo, apay nga idaddadanesnak?” Babaen iti dayta a saludsod, tinulongan ni Jesus ni Saulo a mangbigbig a dakes ti ar-aramidenna. (Ara. 9:​3-6) Maipapan met iti “dayta a babai a Jezebel,” imbaga ni Jesus: “Inikkak iti tiempo nga agbabawi.”—Apoc. 2:​20, 21.

12-13. Kasano a maikkan dagiti panglakayen ti nakabasol iti tiempo nga agbabawi? (Kitaen met ti ladawan.)

¹² Kas panangtulad ken Jesus, saan koma a dagus nga agkonklusion dagiti panglakayen a saanen nga agbabawi ti nakabasol. Nupay adda dagiti mabalin nga agbabawin bayat ti damo pay laeng a pannakisarita kenkuana ti komite, adda met dagiti agkasapulan iti ad-adu pay a tiempo. Masapul ngarud nga iyurnos dagiti panglakayen ti saan la a mammaminsan a pannakisaritada iti nakabasol. Mabalin nga iti damo a pannakisaritada, mangrugin a mabigbig ti nakabasol ti kadagsen ti naaramidna sigun iti naibaga kenkuana. Mabalin nga agpakumbaba ken dumawat ken Jehova iti pammakawan babaen ti kararag. (Sal. 32:5; 38:18) Isu nga iti sumaruno a pannakisaritada, mabalin a naiduman ti kababalin ti nakabasol no ikompara iti damo a pannakisaritada.

¹³ Tapno matulongan ti nakabasol nga agbabawi, masapul nga ipakita dagiti panglakayen ti empatia ken asi. Mangnamnama ken ikararagda ken Jehova a bendisionanna ti panagreggetda a tumulong iti nayaw-awan a Kristiano tapno agsubli ti nasimbeng a panunotna ken agbabawi.—2 Tim. 2:​25, 26.

14. Asino ti maidaydayaw no agbabawi ti nakabasol, ken apay?

¹⁴ Maragsakantayo unay no agbabawi ti nakabasol! (Luc. 15:​7, 10) Asino ti maidaydayaw? Dagiti kadi panglakayen? Lagipentayo ti insurat ni Pablo maipapan kadagiti nakabasol: “Bareng no palubosan ida ti Dios nga agbabawi.” (2 Tim. 2:25) Isu a ni Jehova, saan a ti asinoman a tao, ti tumultulong iti maysa a Kristiano a mangbalbaliw iti panunot ken kababalinna. Inlawlawag ni Pablo nga adda dagiti nasayaat a mapasamak no agbabawi ti nakabasol. Ad-adda nga umuneg ti pannakatarusna iti kinapudno, makapagpanunot a siuumiso, ken ammonanton a lisian dagiti silo ni Satanas.

15. Kasano nga agtultuloy a matulongan dagiti panglakayen ti agbabbabawi a nakabasol?

¹⁵ No agbabawi ti nakabasol, iyurnos ti komite ti panag-shepherding iti nakabasol tapno agtultuloy a maawatna ti tulong a kasapulanna. Iti kasta, malabananna ti sulisog ni Satanas ken maaramidna ti umiso. (Heb. 12:​12, 13) Siempre, saan nga ibaga dagiti panglakayen iti asinoman dagiti detalye ti naaramid ti nakabasol. Ania ngarud ti mabalin a maipakaammo iti kongregasion?

“TUBNGAREM . . . ITI SANGUANAN TI AMIN”

16. Sigun iti 1 Timoteo 5:​20, ania ti kayat a sawen ni Pablo idi imbagana ti sasao a “sanguanan ti amin”?

¹⁶ Basaen ti 1 Timoteo 5:20. Insurat ni Pablo dagita a sasao para iti padana a panglakayen a ni Timoteo maipapan iti panangtaming iti kaso dagidiay “mangyugali iti basol.” Ania ti kayatna a sawen? Idi insuratna dagiti sasao a “sanguanan ti amin,” saanna met ketdi a tuktukoyen ti intero a kongregasion. Ti tuktukoyenna ket ti amin a nakaammon iti basol, kas koma dagiti nakasaksi wenno dagiti nangibagaan ti nakabasol iti naaramidanna. Isuda laeng ngarud ti pangibagaan dagiti panglakayen a natamingen ti kaso ken nailintegen ti nakabasol.

17. No adu iti kongregasion ti nakaammo iti naaramid a nadagsen a basol wenno mabalin a maammuanto met la dayta inton agangay, ania ti masapul a maipakaammo iti kongregasion, ken apay?

¹⁷ No dadduma, mabalin nga adu iti kongregasion ti nakaammo maipapan iti naaramid a nadagsen a basol wenno mabalin a maammuanto met laeng dayta inton agangay. Kadagita a situasion, ti sasao a “sanguanan ti amin” ket agaplikar iti intero a kongregasion. Isu a maysa a panglakayen ti mangipakaammo iti kongregasion a natubngar ti maysa a kabsat. Apay? Imbaga ni Pablo: Dayta ket “pakdaar iti dadduma” tapno saanda a makaaramid iti nadagsen a basol.

18. Kasano ti panangtaming dagiti panglakayen kadagiti kaso a nakairamanan dagiti bautisado a menor de edad? (Kitaen met ti ladawan.)

¹⁸ No ngay dagiti bautisado a menor de edad—dagiti awan pay 18 ti tawenna—ti makaaramid iti nadagsen a basol? Iyurnos ti bagi dagiti panglakayen nga adda dua a panglakayen a makisarita iti menor de edad a kadua dagiti Kristiano a nagannakna.b Ammuen dagiti panglakayen no ania ti inaramiden dagiti nagannak tapno matulongan ti anakda nga agbabawi. No ipangag ti menor de edad ti pammagbaga dagiti nagannakna ken balbaliwannan ti panagpampanunot ken kababalinna, mabalin nga agdesision ti dua a panglakayen a dagiti laengen Kristiano a nagannakna ti agtultuloy a tumulong kenkuana. Dagiti ngamin nagannak ti nangtedan ti Dios iti responsabilidad a mangipaay iti naayat a disiplina kadagiti annakda. (Deut. 6:​6, 7; Prov. 6:20; 22:6; Efe. 6:​2-4) Kalpasanna, sagpaminsan a komustaen dagiti panglakayen dagiti nagannak tapno masiguradoda nga umaw-awat ti menor de edad iti naespirituan a tulong a kasapulanna. Ngem no ngay saan nga agbabbabawi ti bautisado a menor de edad ken itultuloyna latta ti dakes nga ar-aramidenna? No kasta, maysa a komite a buklen ti tallo a panglakayen ti makisarita kenkuana a kadua dagiti Kristiano a nagannakna.

“NI JEHOVA KET NADUNGNGO UNAY KEN NAASI”

19. Kasano a matulad dagiti panglakayen ti panangtrato ni Jehova kadagiti nakaaramid iti nadagsen a basol?

¹⁹ No agserbi dagiti panglakayen iti komite, responsabilidadda ken Jehova a pagtalinaeden a nadalus ti kongregasion. (1 Cor. 5:7) Kayatda met a tulongan ti nakabasol nga agbabawi agingga a posible. Bayat a tultulonganda ti nakabasol, mangnamnamada nga agbalbaliwto met laeng. Apay? Tultuladenda ngamin ni Jehova a “nadungngo unay ken naasi.” (Sant. 5:11) Kasta ti panangtrato ti lakay idin a ni apostol Juan kadagiti kakabsat. Insuratna: “Ay-ayatek nga annak, isursuratko kadakayo dagitoy tapno dikay agbasol. Ngem no adda asinoman nga agbasol, addaantayo iti katulongan a kadua ti Ama, ni Jesu-Kristo, daydiay nalinteg.”—1 Juan 2:1.

20. Ania ti pagsasaritaantayo iti maudi nga artikulo daytoy a serye?

²⁰ Makapaladingit ta adda dagiti gundaway a saan a kayat ti maysa a Kristiano ti agbabawi. No kasta, masapul a maikkat iti kongregasion. Kasano ti panangtaming dagiti panglakayen kadagiti kasta a kaso? Dayta ti pagsasaritaantayo iti maudi nga artikulo daytoy a serye.