Saan a Pulos nga Ababa ti Ima ni Jehova

1. Kasano nga impakita ni Moises ti panagtalekna ken Jehova idi indauluanna dagiti Israelita a pumanaw iti Egipto?

ITI libro a Hebreo, adu a tattao ti nadakamat a nangipakita iti naisangsangayan a pammati ken Jehova. Maysa kadakuada ni Moises. (Heb. 3:​2-5; 11:​23-25) Impakitana ti pammati idi indauluanna dagiti Israelita a pumanaw iti Egipto. Saan a nagbuteng ken Faraon ken iti armadana. Naan-anay a nagtalek ken Jehova. Indauluanna dagiti Israelita a lumasat iti Nalabaga a Baybay ken iti let-ang idi agangay. (Heb. 11:​27-29) Nagduadua ti kaaduan nga Israelita iti pannakabalin ni Jehova a mangaywan kadakuada. Ngem intultuloy ni Moises ti agtalek iti Dios. Saan a naupay ni Moises ta simimilagro nga impaay ti Dios ti taraon ken danum a kasapulan dagiti Israelita tapno agbiagda iti let-ang.a—Ex. 15:​22-25; Sal. 78:​23-25.

2. Apay nga insaludsod ti Dios ken Moises: “Ababa kadi unay ti ima ni Jehova?” (Numeros 11:​21-23)

² Natibker ti pammati ni Moises. Ngem kalpasan ti agarup makatawen sipud idi simimilagro nga insalakan ni Jehova dagiti Israelita, pinagduaduaanna no kabaelan ni Jehova ti mangted iti karne iti ilina. Para ken Moises, nagrigat a panunoten no kasano a maipaay ni Jehova ti umdas a karne a mangpennek iti minilion a tattao iti let-ang. Kas sungbat, insaludsod ni Jehova ken Moises: “Ababa kadi unay ti ima ni Jehova?” (Basaen ti Numeros 11:​21-23.) Ti sasao ditoy a “ti ima ni Jehova” ket tumukoy iti nasantuan nga espiritu ti Dios, wenno ti aktibo a puersana. Kas man la isalsaludsod ni Jehova ken Moises, ‘Diak kadi kabaelan nga aramiden ti imbagak nga aramidek?’

3. Apay a masapul a pagpanunotantayo ti napasamak ken Moises ken kadagiti Israelita?

³ Napampanunotmo kadin no maipaay met la ngata ni Jehova dagiti material a kasapulam wenno ti pamiliam? Napanunotmo man dayta wenno saan, usigentayo ti napasamak ken Moises ken kadagiti Israelita a saan a nagtalek iti pannakabalin ni Jehova a mangipaay kadagiti kasapulanda. Kitaentayo dagiti prinsipio ti Biblia a makatulong tapno bumileg ti panagtalektayo a saan a pulos nga ababa ti ima ni Jehova.

AGSURSURO KEN MOISES KEN KADAGITI ISRAELITA

4. Apay a nagduadua ti adu nga Israelita iti pannakabalin ni Jehova a mangipaay iti material a kasapulanda?

⁴ Kitaem ti konteksto. Dagiti Israelita ken ti “adu pay a sabali a tattao” a saan nga Israelita a pimmanaw iti Egipto ket magmagnada iti nalawa a let-ang iti sumagmamano a tiempo bayat nga agturturongda iti Naikari a Daga. (Ex. 12:38; Deut. 8:15) Dagiti saan nga Israelita ken ti adu nga Israelita ket nauman iti manna a kankanenda isu a nangrugidan nga agreklamo. (Num. 11:​4-6) Mailiwdan kadagiti taraonda idi idiay Egipto. Gapu ta nagreklamo dagiti tattao ken Moises, impagarupna nga isu ti mangipaay iti karne para kadakuada. Ngem saanna nga ammo no pangalaanna iti dayta.—Num. 11:​13, 14.

5-6. Ania a kababalin dagiti saan nga Israelita ti nakaapektar kadagiti Israelita, ken ania ti masursurotayo iti dayta?

⁵ Agparang a naapektaran dagiti Israelita iti kinaawan ti apresasion dagiti saan nga Israelita. Mabalin met a maimpluensiaantayo iti kinaawan panagyaman ti dadduma isu a saantayon a mapmapnek kadagiti ipapaay ni Jehova. Mabalin a mapasamak dayta kadatayo no mailiwtayo kadagiti adda idi kadatayo ken no apalantayo dagiti adda iti sabsabali. Nupay kasta, naragragsaktayo no kanayon a kontentotayo aniaman ti kasasaadtayo.

⁶ Pinanunot koma dagiti Israelita ti impasigurado ti Dios kadakuada nga inton makadanonda iti baro a pagnaedanda, matagiragsakda ti aglaplapusanan a material a bambanag. Matungpal dayta inton addadan iti Naikari a Daga, saan a bayat nga addada pay laeng iti let-ang. Kasta met, imbes a pakaringgorantayo dagiti awan kadatayo iti daytoy a sistema ti bambanag, naragragsaktayo no agpokustayo kadagiti inkari ni Jehova nga ipaaynanto iti baro a lubong. Mabalintayo met nga utoben dagiti teksto a makatulong tapno bumileg ti panagtalektayo ken Jehova.

7. Apay a masiguradotayo a saan a pulos nga ababa ti ima ni Jehova?

⁷ Ngem baka mapampanunotmo latta no apay nga insaludsod ti Dios ken Moises: “Ababa kadi unay ti ima ni Jehova?” Posible a tultulongan ni Jehova ni Moises a mangpanunot saan laeng a no kasano kabileg ti mannakabalin nga imana, no di ket uray pay iti kabaelan dayta a danonen. Isu nga uray no adda dagiti Israelita iti tengnga ti let-ang, kabaelan ni Jehova nga ipaayan ida iti aglaplapusanan a karne. Impakita ti Dios ti bilegna babaen ‘ti mannakabalin nga ima ken nabileg [nakaunnat] a takiagna.’ (Sal. 136:​11, 12, ftn.) Isu nga uray no maipaspasangotayo iti pakasuotan, ditay koma agduadua a kabaelan ti ima ni Jehova a danonen ti tunggal maysa kadatayo.—Sal. 138:​6, 7.

8. Kasanotayo a maliklikan ti kamali nga inaramid ti adu bayat ti kaaddada iti let-ang? (Kitaen met ti ladawan.)

⁸ Tinungpal ni Jehova ti karina ket inikkanna ti ilina iti nakaad-adu a pugo. Ngem saan a nagyaman dagiti Israelita iti Dios iti dayta a milagro. Imbes ketdi, adu kadakuada ti nagbalin a naagum. Nagmalmalem ken nagpatpatnag a nagtiltiliw dagiti tattao iti pugo. Nakapungtot ni Jehova ‘kadagiti tattao a managimbubukodan ti tarigagayda,’ isu a dinusana ida. (Num. 11:​31-34) Adda masursurotayo iti dayta a pasamak. Masapul nga agannadtayo tapno saantayo nga agbalin a naagum. Napanglawtayo man wenno nabaknang, ti koma prioridadtayo ket ti panagurnong iti “kinabaknang idiay langit.” Agbalin a posible dayta no pabilgentayo ti nasinged a relasiontayo kada Jehova ken Jesus. (Mat. 6:​19, 20; Luc. 16:9) No aramidentayo dayta, masiguradotayo nga ipaay ni Jehova dagiti kasapulantayo.

9. Ania ti masiguradotayo maipapan iti tulong ti Dios?

⁹ Kanayon a nakasagana ti ima ni Jehova a tumulong kadagiti adipenna ita. Nupay kasta, saanna a kayat a sawen a saantayon a mapadasan ti maawanan iti kuarta wenno agbisin.b Ngem saannatayto a pulos baybay-an ni Jehova. Kanayon nga ipaayna ti tulong a kasapulantayo, aniaman a problema ti pakaipasanguantayo. Kasanotayo a maipakita nga agtaltalektayo ken Jehova nga ipaayna dagiti kasapulantayo? Kitaentayo ti dua a situasion: (1) no agproblematayo iti pinansial ken (2) no agplamplanotayo para iti material a kasapulantayo iti masanguanan.

NO AGPROBLEMATAYO ITI PINANSIAL

10. Ania dagiti problema a mabalin a maipasango kadatayo no maipapan iti pinansial?

¹⁰ Bayat nga umas-asideg ti panungpalan daytoy a sistema ti bambanag, ekspektarentayo a rumigat pay a rumigat ti biagtayo. Gapu kadagiti gubat, didigra, agbaliwbaliw a gobierno, wenno baro a pandemia, baka bigla a maawanantayo iti trabaho wenno sanikua. Mabalin met a masapul nga agbiroktayo iti baro a trabaho iti lugartayo wenno umakartayo a sangapamiliaan iti sabali a lugar tapno maipaay dagiti kasapulanda. Ania ti makatulong kadatayo a mangaramid kadagiti desision a mangipakita nga agtaltalektayo iti ima ni Jehova?

11. Ania ti makatulong tapno mapagballigiam dagiti problema iti pinansial? (Lucas 12:​29-31)

¹¹ Ti kangrunaan a pamay-an ket ikararagmo ken Jehova dagiti pakadanagam. Nagdakkel ti maitulong dayta kenka. (Prov. 16:3) Dumawatka iti kasapulam a sirib tapno makaaramidka iti nasayaat a desision. Dawatem met a maaddaanka iti kalmado a puso tapno saanka nga “agdanag unay” iti situasionmo. (Basaen ti Lucas 12:​29-31.) Ipakaasim a tulongannaka a makontento kadagiti talaga a kasapulam. (1 Tim. 6:​7, 8) Agsukimatka kadagiti publikasiontayo no kasano a mapagballigiam dagiti problemam iti pinansial. Adun ti natulongan dagiti video ken artikulo iti jw.org maipapan iti problema iti pinansial.

12. Ania dagiti mabalin nga isaludsod ti maysa a Kristiano iti bagina tapno makaaramid iti kasayaatan a desision para iti pamiliana?

¹² Adda dagiti nangawat kadagiti trabaho a nangyadayo kadakuada kadagiti kapamiliada. Ngem napaneknekan ti adu a saan a nainsiriban a desision dayta. Sakbay nga awatem ti maysa a trabaho, panunotem nga umuna no apektarannanto ti espiritualidadmo ken ti pamiliam, saan laeng a no kasanonto kadakkel ti sueldom. (Luc. 14:28) Isaludsodmo iti bagim: ‘No aginnaddayokaminto iti asawak, anianto ngata ti mapasamak iti relasionmi? Makagimong, makapangasaba, ken addanto kadi tiempok a makilangen kadagiti kakabsat?’ No adda annakmo, napateg nga isaludsodmo met iti bagim: ‘Kasanokto a mapadakkel dagiti annakko “iti disiplina ken pammagbaga ni Jehova” no awanak iti dennada?’ (Efe. 6:4) No agar-aramidka iti desision, agpaiwanwanka iti Dios, saan a kadagiti kapamiliam wenno gagayyemmo a saan a mangsursurot kadagiti prinsipio ti Biblia.c Ni Tony a taga-makinlaud nga Asia ket naikkan iti adu nga oportunidad nga agtrabaho iti abrod ken makaurnong iti adu a kuarta. Ngem kalpasan nga inkararagna dayta ken nagsaritaanda nga agassawa, nagdesision a saanna nga awaten dayta. Imbes ketdi, nagsaritaanda no kasanoda nga agin-inut tapno maksayan dagiti paggastuan ti pamiliada. Imbaga ni Tony: “Gapu iti dayta a desisionmi, adda dagiti natulongak a mangam-ammo ken Jehova. Maragragsakan unay dagiti annakmi nga agserserbi ken Jehova. Napaneknekanmi a sangapamiliaan a no la ketdi ta iyaplikarmi ti Mateo 6:​33, saannakami a baybay-an ni Jehova.”

NO AGPLAMPLANOTAYO PARA ITI MATERIAL A KASAPULANTAYO ITI MASANGUANAN

13. Ania dagiti mabalintayo nga aramiden itan tapno addanto umdas nga usarentayo a kuarta inton nataengantayon?

¹³ Mabalin a masubok ti panagtalektayo iti ima ni Jehova bayat nga agplamplanotayo para iti material a kasapulantayo inton nataengantayon. Parparegtaennatayo ti Biblia nga aggaggagettayo tapno addanto umdas a kuarta nga usarentayo para kadagiti kasapulantayo iti masanguanan. (Prov. 6:​6-11) No posible, nasayaat met ngarud no agurnongtayo iti kuarta para iti masanguanan. Ngamin, makaited dayta iti proteksion. (Ecl. 7:12) Nupay kasta, saan koma a ti kuarta ti agbalin a kapatgan iti biagtayo.

14. Kasano a makatulong kadatayo ti Hebreo 13:5 no agplamplanotayo para iti material a kasapulantayo iti masanguanan?

¹⁴ Iti maysa nga ilustrasion ni Jesus, impakitana a ti tao nga agur-urnong iti kuarta, ngem saan a “nabaknang iti imatang ti Dios,” ket maibilang a maag. (Luc. 12:​16-21) Awan ti makaammo no ania ti mapasamak kadatayo inton bigat. (Prov. 23:​4, 5; Sant. 4:​13-15) Imbaga met ni Jesus nga amin a mayat nga agbalin a pasurotna ket masapul a nakasagana a “mangpanaw” iti amin a sanikuada. (Luc. 14:33.) Kasta ti napasamak kadagiti Kristiano idiay Judea idi umuna a siglo, ngem nagtalinaedda latta a naragsak. (Heb. 10:34) Iti kaaldawantayo, adu a kakabsat ti naawanan iti trabaho gapu ta awan ti sinuportaranda a partido ti politika. (Apoc. 13:​16, 17) Ania ti nakatulong kadakuada a mangaramid iti dayta? Naan-anay a nagtalekda iti kari ni Jehova: “Saankanto a pulos panawan ken saankanto a pulos baybay-an.” (Basaen ti Hebreo 13:5.) Isu nga aramidentayo ti amin a kabaelantayo nga agplano para kadagiti kasapulantayo iti masanguanan. Ket no bilang addanto dagiti mapasamak a ditay ninamnama, naan-anay nga agtalektayo a tulongannatayo ni Jehova.

15. Kasano koma ti masapul a panangmatmat dagiti nagannak kadagiti annakda? (Kitaen met ti ladawan.)

¹⁵ Iti dadduma a kultura, ti kangrunaan a rason a kayat dagiti agassawa ti maaddaan iti annak ket tapno addanto mangsustento kadakuada inton nataengandan. Kas man la ibagbagada a dagiti annakda ti mangtedto iti “pensionda.” Ibagbaga ti Biblia a dagiti nagannak ti agurnong para iti kasapulan dagiti annakda. (2 Cor. 12:14) Siempre, inton nataenganen dagiti nagannak, baka kasapulandanto met ti tulong dagiti annakda no maipapan iti pinansial ken dadduma pay a banag. Ket adu nga annak ti maragsakan a mangaramid iti kasta. (1 Tim. 5:4) Ngem ammo dagiti Kristiano a nagannak a naragragsakda nga amang no tulonganda dagiti annakda nga agserbi ken Jehova, imbes a padakkelenda ida a ti panggepda ket addanto mangsustento kadakuada inton nataengandan.—3 Juan 4.

16. Kasano a maisagana dagiti nagannak dagiti annakda tapno masuportaranda ti bagida iti pinansial inton adultodan? (Efeso 4:28)

¹⁶ Bayat nga isursuroyo dagiti annakyo no kasanoda a masuportaran ti bagida iti pinansial inton adultodan, ipakitayo babaen ti ulidanyo nga agtaltalekkayo ken Jehova. Uray ubingda pay laeng, isuroyon kadakuada ti pateg ti kinagaget. (Prov. 29:21; basaen ti Efeso 4:28.) Bayat a dumakdakkelda, tulonganyo ida nga agadal a naimbag iti eskuelaan. Nasayaat no ag-research dagiti Kristiano a nagannak kadagiti prinsipio ti Biblia a makatulong kadagiti annakda nga agdesision no kasanoda nga usaren a naimbag ti edukasionda. Makatulong dayta kadagiti annak tapno masuportaranda ti bagida ken tapno ad-adunto ti tiempoda a mangasaba, wenno makapagpayunirdanto pay ketdi.

17. Ania ti masiguradotayo?

¹⁷ Masigurado dagiti napudno nga adipen ni Jehova a kabaelan ken kayat ni Jehova a penken dagiti material a kasapulanda. Bayat nga umas-asidegtayo iti panungpalan daytoy a sistema ti bambanag, ekspektarentayo a masubok ti panagtalektayo ken Jehova. Ngem aniaman ti mapasamak, determinadotayo koma nga agtalek nga usaren ni Jehova ti pannakabalinna a mangipaay iti material a kasapulantayo. Masiguradotayo a saan a pulos nga ababa ti mannakabalin nga imana ken nakaunnat a takiagna tapno madanonnatayo.