“Pilienyo . . . No Asino ti Pagserbianyo”

1. Ania ti masapul nga aramidentayo tapno agbalintayo a pudpudno a naragsak, ken apay? (Isaias 48:​17, 18)

AY-AYATENNATAYO unay ti nailangitan nga Amatayo, ken kayatna a matagiragsaktayo ti biag ita ken iti masanguanan. (Ecl. 3:​12, 13) Pinarsuanatayo nga addaan kadagiti naisangsangayan nga abilidad. Ngem saannatayo nga inikkan iti abilidad a mangituray iti bagitayo, wenno abilidad a mangikeddeng no ania ti umiso ken di umiso. (Ecl. 8:9; Jer. 10:23) Ammona a tapno agbalintayo a pudpudno a naragsak, masapul nga agserbitayo kenkuana ken surotentayo dagiti pagalagadanna.—Basaen ti Isaias 48:​17, 18.

2. Ania ti kayat ni Satanas a patientayo, ket ania ti inaramid ni Jehova tapno mapaneknekan nga ulbod ni Satanas?

² Kayat ni Satanas a patientayo a naragsaktayo latta uray saantayo nga agserbi ken Jehova, ken kabaelan dagiti tattao nga iturayan ti bagbagida. (Gen. 3:​4, 5) Tapno mapaneknekan nga ulbod ni Satanas, impalubos ni Jehova nga iturayan dagiti tattao ti bagbagida iti sumagmamano a tiempo. Nalawag a makitkitatayo a saan a naballigi ti turay ti tao. Nupay kasta, dinakamat ti Biblia ti adu a tattao a naragsak gapu ta nagserbida ken Jehova. Ni Jesu-Kristo ti kararagsakan kadakuada. Iti daytoy nga artikulo, ammuentayo nga umuna no apay a pinili ni Jesus ti agserbi ken Jehova. Kalpasanna, kitaentayo no apay a ti nailangitan nga Amatayo ket maikari unay iti panagdaydayawtayo. Kamaudiananna, repasuentayo ti sumagmamano a rason no apay a pinilitayo ti agserbi ken Jehova.

NO APAY A PINILI NI JESUS TI AGSERBI KEN JEHOVA

3. Ania ti indiaya ni Satanas ken Jesus, ngem ania ti pinili ni Jesus?

³ Idi adda ni Jesus ditoy daga, kanayon nga impakitana a ni Jehova ti pinilina a pagserbian. Di nagbayag kalpasan a nabautisaran ni Jesus, indiaya ni Satanas ti amin a pagarian iti lubong ket imbagana nga itedna dagita ken Jesus no agdayaw kenkuana uray maminsan laeng. Insungbat ni Jesus: “Pumanawka, Satanas! Ta kuna ti Kasuratan: ‘Ni laeng Jehova a Diosmo ti masapul a pagdayawam, ket isu laeng ti masapul a pangipaayam iti sagrado a panagserbi.’” (Mat. 4:​8-10) Apay a pinili ni Jesus ti agserbi ken Jehova? Kitaentayo ti sumagmamano a rason.

4-5. Ania ti sumagmamano a rason a pinili ni Jesus ti agserbi ken Jehova?

⁴ Ti kangrunaan a rason a pinili ni Jesus ti agserbi ken Jehova ket gapu iti ayat. Ay-ayaten la unay ni Jesus ni Amana. (Juan 14:31) Agserserbi met ni Jesus ken Jehova gapu ta ammona a dayta ti umiso nga aramidenna. (Juan 8:​28, 29; Apoc. 4:11) Ammona a ni Jehova ti Ubbog ti biag ken isu ket mapagtalkan ken naparabur. (Sal. 33:4; 36:9; Sant. 1:17) Kanayon nga ibagbaga ni Jehova ken Jesus ti kinapudno ken naggapu kenkuana ti amin nga adda ken Jesus. (Juan 1:14) Ngem interamente a naiduma ni Satanas ken Jehova. Gapu kenkuana, agbasbasol ken matmatay dagiti tattao. Isu ket ulbod, naagum, ken bagina laeng ti pampanunotenna. (Juan 8:44) Am-ammo a naimbag ni Jesus ni Jehova ken am-ammona met unay ni Satanas. Ngem dina pulos kayat a tuladen ni Satanas ken agrebelde ken Jehova.—Fil. 2:​5-8.

⁵ Ti sabali pay a rason a pinili ni Jesus ti agserbi ken Jehova ket gapu ta ammona nga adu ti nasayaat a resulta ti napudno a panagserbina. (Heb. 12:2) Ammona a no agtalinaed a matalek, masantipikarna ti nagan ni Amana ken agbalin a posible a mapukaw ti amin a rigat a gapuanan ti Diablo.

NO APAY A MAIKARI NI JEHOVA A PAGDAYDAYAWANTAYO

6-7. Apay nga adu ita ti saan nga agserserbi ken Jehova, ngem apay a maikari isuna a pagdaydayawantayo?

⁶ Adu ita ti saan nga agserserbi ken Jehova gapu ta dida pay ammo dagiti makaay-ayo a kualidadna ken ti amin a nasayaat nga ar-aramidenna para kadakuada. Kasda la kadagiti tattao a kinasabaan ni apostol Pablo idiay Atenas.—Ara. 17:​19, 20, 30, 34.

⁷ Inlawlawag ni Pablo kadagiti agdengdengngeg kenkuana a ti pudno a Dios “ti mangipapaay iti biag ken anges ken amin a banag iti amin a tattao.” Innayonna: “Gapu kenkuana, adda biagtayo, makagunay ken addatayo.” Ti Dios ti Namarsua, ket “inaramidna ti tunggal nasion dagiti tattao manipud iti maysa a tao,” isu a maikari isuna a pagdaydayawantayo.—Ara. 17:​25, 26, 28.

8. Ania ti saan a pulos nga aramiden ni Jehova? Ilawlawag.

⁸ Kas ti Namarsua ken ti Kangatuan iti Uniberso, mabalin koma a piliten ni Jehova dagiti tattao nga agserbi kenkuana. Ngem saan a pulos nga aramiden dayta ni Jehova. Imbes ketdi, nakaad-adu nga ebidensia ti ipapaayna nga adda isuna ken dungdungnguenna unay ti tunggal maysa kadatayo. Kayatna nga adu a tattao agingga a posible ti agbalin a gagayyemna iti agnanayon. (1 Tim. 2:​3, 4) Gapu iti dayta, sansanayennatayo ni Jehova a mangisuro iti dadduma maipapan kadagiti panggepna ken mangipakaammo maipapan kadagiti nagsasayaat nga aramidennanto para kadagiti tattao. (Mat. 10:​11-13; 28:​19, 20) Inorganisarna dagiti kongregasion para kadatayo a mabalin a pagdaydayawantayo kenkuana ken inyurnosna nga aywanandatayo dagiti naayat a panglakayen.—Ara. 20:28.

9. Kadagiti ania a pamay-an nga ipakpakita ni Jehova ti ayatna iti amin a tattao?

⁹ Ipakpakita ni Jehova ti naisangsangayan nga ayatna kadagiti saan a mamati nga adda isuna. Panunotem daytoy: Rinibun a tawen a binilion a tattao a ti la kayatda ti sursurotenda imbes nga agtulnogda ken Jehova. Nupay kasta, naimbag latta ni Jehova kadakuada ta ipapaayanna ida kadagiti kasapulanda tapno agbiagda ken agbalinda a naragsak. (Mat. 5:​44, 45; Ara. 14:​16, 17) Gapu kenkuana, maaddaanda kadagiti gagayyem ken kapamilia a mangay-ayat kadakuada, maaddaanda kadagiti annak, makapagtrabahoda, ken matagiragsakda ti nagbannoganda. (Sal. 127:3; Ecl. 2:24) Nalawag nga ipakita dagiti ebidensia nga ay-ayaten ti nailangitan nga Amatayo ti amin a tattao. (Ex. 34:6) Repasuentayo ngarud ita ti dadduma a rason no apay a pinilitayo ti agserbi ken Jehova ken no kasano a bembendisionanna dagiti pinilida ti agserbi kenkuana.

NO APAY A PINILITAYO TI AGSERBI KEN JEHOVA

10. (a) Ania ti kangrunaan a rason nga agserserbitayo ken Jehova? (Mateo 22:37) (b) Kasanoka a nagunggonaan iti kinaanus ni Jehova? (Salmo 103:​13, 14)

¹⁰ Kas ken Jesus, ti kangrunaan a rason nga agserserbitayo ken Jehova ket gapu ta ay-ayaten ken dungdungnguentayo la unay isuna. (Basaen ti Mateo 22:37.) Umuneg nga umuneg ti ayattayo ken Jehova bayat nga umadu nga umadu dagiti maammuantayo maipapan kadagiti kualidadna. Kas pagarigan, nakaan-anus kadatayo ni Jehova. Idi nagsukir dagiti Israelita kenkuana, impakaasina kadakuada: “Pangngaasiyo ta isardengyo dagiti dakes nga aramidyo.” (Jer. 18:11) Sipapanunot ni Jehova nga imperpektotayo, a tapoktayo laeng. (Basaen ti Salmo 103:​13, 14.) No utobem ti kinaanus ni Jehova ken ti dadduma pay a makaay-ayo a kualidadna, saanka kadi a matignay nga agserbi kenkuana iti agnanayon?

11. Ania ti dadduma pay a rason a pinilitayo ti agserbi iti nailangitan nga Amatayo?

¹¹ Kayattayo met ti agserbi ken Jehova gapu ta ammotayo a dayta ti umiso nga aramidentayo. (Mat. 4:10) Kasta met, ammotayo nga adu ti nasayaat a resulta ti napudno a panagserbitayo kenkuana. Ti kinamatalektayo ken Jehova ket makatulong iti pannakasantipikar ti naganna, iti panangpaneknek nga ulbod ti Diablo, ken iti panangparagsak iti puso ti Amatayo. Ket no pilientayo ti agserbi ken Jehova ita, maaddaantayo iti namnama nga agserbi kenkuana iti agnanayon!—Juan 17:3.

12-13. Ania ti masursurotayo iti kapadasan da Jane ken Pam?

¹² Uray no ubing pay laeng ti maysa, mabalinnan ti maaddaan iti nauneg nga ayat ken Jehova, ayat nga agtultuloy nga umuneg nga umuneg bayat a tumataengantayo. Kitaentayo ti kapadasan ti agkabsat a da Jane ken Pam.a Agtawen idi ni Jane iti 11 ken 10 met ni Pam idi damoda ti makipagadal iti Biblia. Nupay saan nga interesado dagiti nagannakda iti panagadal, pinalubosanda da Jane ken Pam a makipagadal kadagiti Saksi basta makimisada a kadua ti pamiliada kada ngudo ti lawas. “Ti insuro kaniak dagiti Saksi manipud iti Biblia,” kuna ni Jane, “ti nakatulong kaniak a manglaban iti panangpilit dagiti gagayyemko nga agdroga ken agaramid iti immoralidad.”

¹³ Kalpasan ti sumagmamano a tawen, nagbalindan nga agibumbunannag. Idi agangay, nagpayunirda bayat nga ay-aywananda dagiti nataenganen a nagannakda. No lagipen ni Jane ti kapadasanda, imbagana: “Aktual a napaneknekak a napudno ni Jehova kadagiti gagayyemna ta ay-aywananna ida. Kas ibaga ti 2 Timoteo 2:​19, ‘Ammo ni Jehova dagidiay kukuana.’” Nalawag a kanayon nga ay-aywanan ni Jehova dagidiay pinilida ti mangayat ken agserbi kenkuana!

14. Kasanotayo a maidepensa ti nagan ni Jehova iti sasao ken aramidtayo? (Kitaen met dagiti ladawan.)

¹⁴ Kayattayo nga idepensa ti nagan ni Jehova iti amin a pammadakes kontra kenkuana. Kitaentayo daytoy nga eksena: Adda nasinged a gayyemmo a nasingpet, naparabur, ken manangpakawan. Maysa nga aldaw, nangngegmo nga adda mangak-akusar kenkuana a nauyong kano ken saan a mapagtalkan. Ania ti aramidem? Siempre, idepensam. Kasta met, no adda mangngegtayo a kinaulbod maipapan ken Jehova, idepensatayo isuna babaen ti panangibagatayo iti kinapudno maipapan Kenkuana. (Sal. 34:1; Isa. 43:10) Iti kasta, ipakpakitatayo a kayattayo ti naimpusuan nga agserbi ken Jehova iti man panagsasao ken ar-aramidtayo.

15. Ania ti dadduma a nasayaat a napasamak ken apostol Pablo gapu ta binalbaliwanna dagiti kalatna? (Filipos 3:​7, 8)

¹⁵ Situtuloktayo a mangbalbaliw iti kalattayo iti biag tapno maparagsaktayo ni Jehova wenno tapno ad-adda pay a makapagserbitayo kenkuana. Kas pagarigan, pinili ni apostol Pablo a tallikudan ti kinaprominentena iti lugarda tapno surotenna ti Kristo ken agserbi ken Jehova. (Gal. 1:14) Kas resultana, naaddaan iti makapnek a biag ken oportunidad a makipagturayto ken Kristo idiay langit. Dina pulos nagbabawyan ti desisionna nga agserbi ken Jehova, ket kastatayo met.—Basaen ti Filipos 3:​7, 8.

16. Ania ti masursurotayo iti kapadasan ni Julia? (Kitaen met dagiti ladawan.)

¹⁶ No prioridadtayo ti panagserbi ken Jehova, maaddaantayo iti makapnek a biag ita ken iti masanguanan. Kitaentayo ti kapadasan ti maysa a sister a ni Julia. Ubing pay idi ngem miembron iti choir ti simbaanda. Nalaing nga agkanta ket adda nangsanay kenkuana nga agbalin nga opera singer. Di nagbayag, nagbalinen a nalatak ni Julia ken agkankantan kadagiti mabigbigbig a pagkonsiertuan. Bayat nga ages-eskuela iti nalatak a music school, adda kaklasena a nakisarita kenkuana maipapan iti Dios ken inlawlawagna a Jehova ti nagan ti Dios. Di nagbayag, nakipagadalen ni Julia iti Biblia mamindua iti makalawas. Idi agangay, nagdesision nga agserbi laengen ken Jehova imbes nga itultuloyna ti karerana iti panagkanta. Saan a nalaka dayta a desisionna. “Adu a tattao ti mangibagbaga a sinayangko kano ti laingko,” imbagana, “ngem kayatko nga usaren a naan-anay ti biagko nga agserbi ken Jehova.” Ania ti panagriknana itan iti desision nga inaramidna nasurok a 30 a tawenen ti napalabas? “Natalna ti panunotko, ken agtalekak a penkento ni Jehova ti amin a tarigagay ti pusok.”—Sal. 145:16.

ITULTULOYTAYO TI AGSERBI KEN JEHOVA

17. (a) Ania ti masapul nga aramiden dagidiay saan pay nga agserserbi ken Jehova, ken apay? (b) Ania ti ammo dagidiay pinilida ti agserbi ken Jehova?

¹⁷ Dandanin ti panungpalan daytoy a sistema ti bambanag. Insurat ni apostol Pablo: “Ta ‘apagbiit laengen’ ket ‘sigurado a sumangpet daydiay um-umay ken saan a mataktak.’” (Heb. 10:37) Ania ti kayat a sawen dayta? Nagbassiten ti nabati a tiempo para kadagidiay saan pay nga agserserbi ken Jehova, isu a masapul nga agtignaydan agingga a posible pay. (1 Cor. 7:29) Ket no pinilitayo metten ti agserbi iti Dios, ammotayo nga uray no adda dagiti pakasuotan nga ibturantayo, “apagbiit laengen” dagita.

18. Ania ti kayat da Jesus ken Jehova nga aramidentayo?

¹⁸ Pinaregta ni Jesus dagiti adalanna a saanda laeng a basta suroten no di ket itultuloyda a suroten. (Mat. 16:24) Isu a no adun a tawen nga agserserbitayo ken Jehova, determinadotayo koma a saan a sumardeng. Aramidentayo ti amin a kabaelantayo nga agtultuloy nga agserbi ken Jehova. Mabalin a saan a nalaka dayta, ngem makaawattayo iti adu a bendision ken maaddaantayo iti makapnek a biag, uray pay itan!—Sal. 35:27.

19. Ania ti masursurotayo iti kapadasan ni Gene?

¹⁹ Marikna ti dadduma a no agserbida ken Jehova, adu unay ti masapul nga isakripisioda. No agtutuboka pay, mariknam kadi nga adda dagiti pakaikapisam no agserbika ken Jehova? Imbaga ti maysa nga agtutubo a brother a ni Gene: “Impagarupko idi a saan a makaparagsak ti agbalin a Saksi ni Jehova. Adu ngamin a kasadarak ti kasla agen-enjoy a maki-party, makiinnarem, wenno agay-ayam kadagiti naranggas a video game, idinto ta masapul a makigimong ken mangasabaak.” Ania ti epekto dayta ken Gene? “Doble kara idi ti panagbiagko,” imbagana. “Naragsakak met ketdi idi damo ngem saan a nagpaut dayta. Pinanunotko manen dagiti naadalko iti Biblia a diak idi impappapuso ket nagdesisionak nga agserbi ken Jehova iti amin a puso. Sipud idin, nariknak a sungsungbatan ni Jehova ti amin a kararagko.”

20. Ania koma ti determinasiontayo?

²⁰ Inkanta ti maysa a salmista ken Jehova: “Naragsak daydiay piliem ken paasitgem nga agnaed iti paraanganmo.” (Sal. 65:4) Tuladentayo koma daytoy a determinasion ni Josue: “No siak ken ti sangakabbalayak, agserbikami ken Jehova.”—Jos. 24:15.