Pagsayaatantayo no Nasingedtayo iti Maysa ken Maysa!

1-2. Ania ti maysa a banag a napateg ken Jehova, ken ania ti kayatna nga aramidentayo?

NAGPATEG ken Jehova no kasano ti panangtratotayo iti padatayo a tao. Insuro ni Jesus a masapul nga ayatentayo dagiti kaarrubatayo a kas iti panagayattayo iti bagitayo. (Mat. 22:​37-39) Karaman iti dayta ti panagbalintayo a naimbag uray kadagiti saantayo a kapammatian. No ipakitatayo ti kasta a kinaimbag, tultuladentayo ni Jehova a Dios ta “pagsilnagenna ti initna kadagiti dakes ken kadagiti naimbag ken pagtinnagenna ti tudo kadagiti nalinteg ken kadagiti nakillo.”—Mat. 5:45.

² Agpayso nga ay-ayaten ni Jehova ti amin a tattao. Ngem ad-adda nga ay-ayatenna dagiti agar-aramid iti umiso. (Juan 14:21) Kayatna a tuladentayo isuna. Parparegtaennatayo a ‘nauneg koma ti ayattayo’ kadagiti kakabsat ken ipakitatayo ti “nadungngo a panagayat.” (1 Ped. 4:8; Roma 12:10) Ti kasta a kita ti ayat ken kinadungngo ket kas iti panagayattayo iti ipatpategtayo a kapamiliatayo wenno iti maysa a nasinged a gayyemtayo.

3. Ania ti masapul a laglagipentayo maipapan iti ayat?

³ Ti ayat ket kas iti mula a masapul a mataripato tapno dumakkel. Imbalakad ni apostol Pablo kadagiti Kristiano: “Itultuloyyo ti agiinnayat kas agkakabsat.” (Heb. 13:1) Kayat ni Jehova nga itultuloytayo nga ipakita ti ayat iti sabsabali. Pagsasaritaantayo iti daytoy nga artikulo no apay a masapul a nasingsingedtayo kadagiti kapammatiantayo ken no kasanotayo nga itultuloy nga aramiden dayta.

NO APAY A MASAPUL A NASINGSINGEDTAYO ITI MAYSA KEN MAYSA

4. Sigun iti Salmo 133:​1, kasanotayo a maitultuloy nga ipateg ti panagkaykaysatayo kas agkakabsat? (Kitaen met dagiti ladawan.)

⁴ Basaen ti Salmo 133:1. Umanamongtayo iti insurat ti salmista a ti pudno a pannakigayyem kadagidiay mangay-ayat ken Jehova ket “nagsayaat” ken “makaay-ayo.” No inaldaw a makitkitam ti maysa, kas iti nagpintas a kayo, posible nga agbalinto laengen a gagangay dayta kenka. Kasta met ti mabalin a mapasamak iti panangipategtayo iti makaay-ayo a panagkaykaysatayo nga agkakabsat. Ngamin, masansan a makitkitatayo dagiti kakabsat iti kada lawas. Kasanotayo ngarud a maitultuloy a maipateg ida? Dumakkel a dumakkel ti ayattayo kadagiti kakabsat no iwayaantayo a panunoten no kasano kapateg kadatayo ken iti kongregasion ti tunggal maysa kadakuada.

5. Ania ti mabalin nga epektona iti dadduma no makitada ti panagiinnayattayo kas agkakabsat?

⁵ Dadduma a damoda ti makigimong ti talaga a masmasdaaw iti makitkitada nga ayattayo iti maysa ken maysa. Dayta laengen ket mabalin a pakakombinsiranda a nasarakandan ti kinapudno. Imbaga ni Jesus: “Maammuanto ti amin a dakayo dagiti adalak—no agiinnayatkayo.” (Juan 13:35) Kitaentayo ti kapadasan ni Chaithra nga estudiante idi iti unibersidad ken makipagad-adal kadagiti Saksi ni Jehova. Inawatna ti awis nga umatender iti rehional a kombension. Kalpasan ti umuna pay laeng nga aldaw, imbagana iti mangyad-adal kenkuana: “Didak pay pulos inar-arakup dagiti nagannakko. Ngem iti kombensionyo, namin-52 a naarakupak iti maysa laeng nga aldaw! Nariknak ti ayat ni Jehova iti daytoy a naespirituan a pamilia. Kayatko ti agbalin a paset dayta a pamilia.” Nagtultuloy a rimmang-ay ni Chaithra ket nagpabautisar idi 2024. Talaga a no makita dagiti kabbaro ti nagsayaat nga ar-aramidentayo, agraman ti ayattayo iti maysa ken maysa, kaaduanna a matignayda nga agserbi ken Jehova.—Mat. 5:16.

6. Apay nga agbalin a proteksiontayo no nasingedtayo kadagiti kakabsat?

⁶ Agbalin a proteksiontayo no nasingedtayo kadagiti kakabsat. Pinaregta ni Pablo dagiti kapammatianna: “Itultuloyyo ti agpipinnaregta iti kada aldaw . . . tapno awan kadakayo ti allilawen ti pannakabalin ti basol ket ipatangkenyo ti kayatyo.” (Heb. 3:13) No kasta unay ti pannakaupaytayo ken marigatantayon a mangaramid iti umiso, mabalin nga adda kapammatiantayo a makadlaw iti dayta ket tignayen ni Jehova a tumulong kadatayo. (Sal. 73:​2, 17, 23) Talaga a pagsayaatantayo ti kasta a tulong.

7. Ania ti koneksion ti ayat ken panagkaykaysa? (Colosas 3:​13, 14)

⁷ Pasettayo iti maysa a grupo dagiti tattao a mangikagkagumaan a mangipakita iti ayat iti maysa ken maysa, isu a nakaad-adu a bendision ti maaw-awattayo. (1 Juan 4:11) Kas pagarigan, gapu iti ayat, ‘itultuloytayo ti agiinnanus,’ ket makatultulong dayta iti panagkaykaysatayo kas agkakabsat. (Basaen ti Colosas 3:​13, 14; Efe. 4:​2-6) Isu a kadagiti gimongtayo, nakaragragsaktayo nga agkakadua nga agdaydayaw ken Jehova. Datayo laeng ti kasta iti intero a daga.

AGPIPINNADAYAWKAYO

8. Kasanonatayo a tultulongan ni Jehova nga agkaykaysa kas agkakabsat?

⁸ Nupay imperpektotayo, adda latta panagkaykaysatayo nga agkakabsat iti intero a lubong. Maysa dayta a milagro a gapuanan ni Jehova. (1 Cor. 12:25) Ibagbaga ti Biblia a ‘sinursuruannatayo ti Dios nga agiinnayat.’ (1 Tes. 4:9) Kaipapanan dayta nga us-usaren ni Jehova ti Biblia tapno ibagana kadatayo dagiti eksakto nga aramidentayo tapno agbalintayo a nasinged iti maysa ken maysa. Mabalinnatayo a ‘sursuruan ti Dios’ babaen ti panangadaltayo a naimbag kadagiti pannursurona ken panangyaplikartayo kadagita. (Heb. 4:12; Sant. 1:25) Ket kasta ti eksakto nga ikagkagumaan nga aramiden dagiti Saksi ni Jehova.

9. Ania ti masursurotayo iti Roma 12:​9-13 maipapan iti panagpipinnadayaw?

⁹ Ania ti isursuro kadatayo ti Sao ti Dios maipapan iti panagpipinnadayaw? Kitaentayo ti imbaga ni Pablo maipapan iti dayta iti Roma 12:​9-13. (Basaen.) Siputanyo ta inusarna dagiti sasao nga “iti panagpipinnadayaw, dakayo ti mangyun-una.” Ania ti kayatna a sawen? Datayo koma ti mangyun-una a mangipakita iti “nadungngo a panagayat” iti sabsabali iti nagduduma a pamay-an, kas iti panangpakawan, panagpadagus, ken panagbalin a naparabur. (Efe. 4:32) Saanmo koman nga urayen ti kabsat nga umasideg kenka. Sika koman “ti mangyun-una” a mangaramid iti dayta. No kasta ti aramidem, mariknam ti ikarkari ni Jesus idi imbagana: “Naragragsak ti mangted ngem ti umawat.”—Ara. 20:35.

10. Kasanotayo nga agbalin a nagaget “iti panagpipinnadayaw”? (Kitaen met ti ladawan.)

¹⁰ Makapainteres ta kalpasan unay nga imbaga ni Pablo a datayo ti mangyun-una iti panagpipinnadayaw, imbalakadna nga ‘agbalintayo a nagaget, saan a nasadut.’ Ti tao a nagaget ket naregta ken nasaet. No adda maipatrabaho kenkuana, sipapasnek nga aramidenna dayta. Iparparegta kadatayo ti Proverbio 3:​27, 28: “Dimo ipaidam ti naimbag kadagidiay rumbeng a pangipaayam iti dayta no kabaelam ti tumulong.” Isu a no adda makitatayo nga agkasapulan, aramidentayo ti amin a kabaelantayo a tumulong. Saantayo nga itantantan dayta; ditay met koma ipapan nga addanto sabali a mangaramid iti dayta.—1 Juan 3:​17, 18.

11. Ania ti makatulong tapno agbalintayo a nasingsinged iti maysa ken maysa?

¹¹ Ti maysa pay a pamay-an a maipakitatayo ti panagpipinnadayaw ket ti dagus a panangpakawan kadagiti nangpasakit kadatayo. Kuna ti Efeso 4:26: “Diyo ipalubos a lumnek ti init nga agung-ungetkay pay laeng.” Apay? Kuna ti bersikulo 27 a no ditay aramiden dayta, ‘ik-ikkantayo ti Diablo iti gundaway.’ Maulit-ulit nga ibagbaga ni Jehova iti Saona nga agpipinnakawantayo. Iparparegta ti Colosas 3:13 nga ‘itultuloytayo ti situtulok nga agpipinnakawan.’ Ti panangpakawan kadagiti kamali ken pagkurkurangan ti sabsabali ket maysa kadagiti kasayaatan a pamay-an tapno agbalintayo a nasingsinged kadakuada. No aramidentayo dayta, tumultulongtayo tapno ‘mataginayon ti panagkaykaysa a nagun-odantayo babaen ti nasantuan nga espiritu.’ (Efe. 4:3) Nalawag ngarud a no mangpakawantayo, direkta a tumultulongtayo tapno agtalinaed ti panagkaykaysa ken talna ti organisasiontayo.

12. Kasanonatayo a tultulongan ni Jehova nga agbalin a manangpakawan?

¹² Agpayso met ketdi nga adda rigrigatna ti mangpakawan kadagiti nangpasakit kadatayo. Ngem maaramidtayo dayta iti tulong ti espiritu ti Dios. Imbaga ti Biblia nga ‘ipakitatayo ti nadungngo a panagayat iti maysa ken maysa’ ken ‘agbalintayo a nagaget.’ Sa imbalakadna met: “Babaen ti espiritu, naregtakayo koma.” Kayat a sawen dayta a matulongannatayo ti nasantuan nga espiritu ti Dios tapno maipakitatayo ti kasta unay a kinaregta ken kinagagar a mangaramid iti umiso. (Roma 12:11) No kasta, maipakitatayo ti nadungngo a panagiinnayat ken sibubulos a panagpipinnakawan iti tulong ti espiritu ti Dios. Isu a sipapasnek nga ipakaasitayo ken Jehova a tulongannatayo.—Luc. 11:13.

“DIKAY KOMA MABINGBINGAY”

13. Apay a posible a mabingbingaytayo?

¹³ Ti kongregasion ket buklen “ti amin a kita ti tattao” manipud iti nagduduma a kultura, kasasaad ti biag, ken pannakapadakkel. (1 Tim. 2:​3, 4) Gapu iti dayta, agduduma ti desisiontayo maipapan iti panagbadbado, panaglanglanga, panangaywan iti salun-at, wenno paglinglingayan. No ditay agannad, dagita ti mabalin a makagapu a mabingbingaytayo. (Roma 14:4; 1 Cor. 1:10) Ngem gapu ta ‘sinursuruannatayo ti Dios nga agiinnayat,’ ditay ipapilit a nasaysayaat ti desision ken pilitayo ngem iti sabsabali.—Fil. 2:3.

14. Ania koma ti kanayon nga ikagumaantayo nga aramiden, ken apay?

¹⁴ No kanayon a pagreggetantayo ti agbalin a makaparegta ken makapabileg, maliklikantayo ti pannakabingay. (1 Tes. 5:11) Iti napalabas, nagsubli ti adu a di aktibo wenno naikkat iti kongregasion. Nakaragragsaktayo la ketdi ta nagsublida! (2 Cor. 2:8) Maysa a sister a 10 a tawen a di aktibo ti immatender manen iti Kingdom Hall. Imbagana, “Iniseman ken inalamanodak dagiti kakabsat.” (Ara. 3:19) Ania ti epekto kenkuana dagita a simple nga inaramid dagiti kakabsat? Imbagana, “Nariknak a kasla kinibinnak ni Jehova nga agsubli iti dalan ti kinaragsak.” No ikagumaantayo ti agbalin a makaparegta iti amin, mabalin nga usarennatayo ni Kristo a mangbang-ar kadagidiay “nabannog ken madagdagsenan.”—Mat. 11:​28, 29.

15. Ania pay ti mabalintayo nga aramiden tapno agtalinaed ti panagkaykaysatayo? (Kitaen met ti ladawan.)

¹⁵ Ti maysa a pamay-an a mapagtalinaedtayo ti panagkaykaysa ket babaen ti panagsasaotayo. Kuna ti Job 12:11: “Saan aya a ti sasao ket suboken ti lapayag a kas iti panangraman ti dila iti makan?” No aglutlutoka, ramanam nga umuna ti lutlutuem sakbay nga idasarmo dayta. Kayatmo ngamin a siguraduen a naimas dayta. Kasta met laeng no iti panagsasaotayo. Nasayaat no panunotentayo nga umuna ti ibagatayo sakbay nga agsaotayo. (Sal. 141:3) Ti koma kalattayo ket kanayon a siguraduentayo a dagiti ibagatayo ket makapabileg, makapabang-ar, ken ‘makagunggona kadagiti makangngeg.’—Efe. 4:29.

16. Siasino dagiti masapul a nangnangruna a mangikagumaan a makaparegta ti panagsasaoda?

¹⁶ Dagiti assawa a lallaki ken nagannak ti masapul a nangnangruna nga agannad tapno sigurado a makapabileg ti panagsasaoda. (Col. 3:​19, 21; Tito 2:4) Uray dagiti panglakayen ket masapul a gubuayan iti bang-ar ken liwliwa kas papastor ti arban ni Jehova. (Isa. 32:​1, 2; Gal. 6:1) Ipalagip kadatayo ti Biblia: “Anian a nagsayaat ti sao iti umiso a tiempo!”—Prov. 15:23.

AGAYAT “ITI ARAMID KEN KINAPUDNO”

17. Kasanotayo a masigurado a napudno ti panagayattayo kadagiti kakabsat?

¹⁷ Imparegta ni apostol Juan nga “agayattayo koma, saan nga iti sao wenno iti dila, no di ket iti aramid ken kinapudno.” (1 Juan 3:18) Kayattayo a napudno ti ayattayo kadagiti kakabsat. Kasanotayo a maipakita dayta? No ad-adu ti tiempotayo a makikadua kadakuada, nasingsingedtayo ken naun-unegto ti panagayattayo kadakuada. Mangyeskediultayo ngarud kadagiti tiempo a makikaduatayo kadagiti kapammatiantayo—kadagiti man gimong ken iti ministerio. Mangiwayatayo iti tiempo a mangsarungkar kadakuada. No aramidentayo dagita, ipakpakitatayo a ‘sinursuruannatayo ti Dios nga agiinnayat.’ (1 Tes. 4:9) Kanayon a mariknanto met ti tunggal maysa kadatayo nga “anian a nagsayaat ken anian a makaay-ayo ti sangsangkatunos a panagkakadua dagiti agkakabsat!”—Sal. 133:1.