‘Ti Iyaasidegtayo iti Dios ket Pagimbagantayo’!

1-2. (a) Ania ti masapul nga aramidentayo tapno maaddaantayo iti nasinged a pannakigayyem iti maysa? (b) Ania ti adalentayo iti daytoy nga artikulo?

ADDA kadi nasinged a gayyemmo? Ania ti inaramidmo tapno agbalinkayo nga aggayyem? Posible a nangiwayaka iti tiempo a nakikadua kenkuana, naammuam dagiti napasaranna, ken kasta met dagiti kayatna ken dina kayat. Naammuam met dagiti makaay-ayo a kualidadna a kayatmo a tuladen. Isu nga inayatmo ti gayyemmo.

² Tapno agbalin a nasinged a gayyemtayo ti maysa, kasapulan ti tiempo ken panagregget. Kasta met laeng ti aramidentayo tapno agbalin a nasinged a gayyemtayo ni Jehova a Dios. Iti daytoy nga artikulo, adalentayo no kasanotayo nga ad-adda a makaasideg iti Diostayo ken no ania dagiti magunggonatayo iti panangaramidtayo iti dayta. Umuna, kitaentayo no apay a pagimbagantayo ti iyaasidegtayo iti kasayaatan a Gayyemtayo, ni Jehova.

3. Apay a masapul nga utobentayo dagiti magunggonatayo iti iyaasidegtayo ken Jehova? Mangted iti pagarigan.

³ Sigurado nga umanamongka a ti iyaasideg ken Jehova ket naimbag. Ngem no utobentayo no kasano a talaga a pagimbagantayo dayta, matignaytayo nga agtultuloy nga umasideg kenkuana. (Sal. 63:​6-8) Kas pagarigan, ammotayo a pagsayaatantayo no mangantayo iti nasustansia, agehersisiotayo, umdas ti inanatayo, ken uminumtayo iti umdas a danum. Ngem adu ti saan unay a mangpampanunot kadagita isu a nabaybay-anda ti salun-atda. Ngem no kanayon a pampanunotentayo a pagimbagan ti salun-attayo no aramidentayo dagita, posible nga itultuloytayo nga aramiden dagita. Kasta met, mabalin nga ammotayo a pagimbagantayo ti iyaasideg ken Jehova. Ngem no utobentayo dagiti magunggonatayo no aramidentayo dayta, matignaytayo nga agtultuloy nga umasideg iti Gayyemtayo.—Sal. 119:​27-30.

4. Ania ti narikna ti nangisurat iti Salmo 73:28?

⁴ Basaen ti Salmo 73:28. Ti nangisurat iti Salmo 73 ket maysa a Levita ken musikero iti templo ni Jehova. Mabalin nga adun a tawen a simamatalek nga agserserbi ken Jehova. Ngem masapul latta a palagipanna ti bagina ken ti dadduma a pagimbaganda ‘ti iyaasidegda iti Dios.’ Ania dagiti magunggonatayo no aramidentayo dayta?

‘TI IYAASIDEG ITI DIOS’ KET MANGYEG ITI KINARAGSAK

5. (a) Apay a naragsaktayo no nasingsingedtayo ken Jehova? (b) Sigun iti Proverbio 2:​6-16, kasano a matulongan ken maprotektarannaka ti sirib nga aggapu ken Jehova?

⁵ No nasingsingedtayo ken Jehova, naragragsaktayo. (Sal. 65:4) Adu ti rasontayo nga agbalin a naragsak. Kas pagarigan, magunggonaantayo no iyaplikartayo dagiti praktikal a sirib a masarakantayo iti Saona, ti Biblia. Protektarannatayo ti kasta a sirib manipud kadagiti dakes nga impluensia ken tapno maliklikantayo ti agaramid kadagiti nadagsen a basol. (Basaen ti Proverbio 2:​6-16.) Umiso la ngarud nga ibaga ti Biblia: “Naragsak ti tao a makasarak iti sirib, ken ti tao a makagun-od iti pannakatarus.”—Prov. 3:13.

6. Apay a napukaw ti salmista ti rag-ona?

⁶ No dadduma, maladingitan met uray dagiti gagayyem ni Jehova. Napukaw ti mannurat iti Salmo 73 ti rag-ona idi nangrugi nga agpanunot iti negatibo. Nasuron ken immapal gapu ta pinampanunotna a rumangrang-ay dagiti dakes a tattao a saan a mangikankano iti Dios ken saan a mangsursurot kadagiti pagalagadanna. Impagarupna a dagiti naranggas ken natangsit ti bumakbaknang, ken nasalsalun-at, ken saan pay ketdi nga agrigrigat. (Sal. 73:​3-7, 12) Nariribukan unay ti salmista nga uray la napanunotna a sayang laeng ti panagserbina ken Jehova. Permi ti ladingitna ket imbagana: “Sayang laeng a pinagbalinko a nadalus ti pusok ken binugguak dagiti imak tapno nadalusak.”—Sal. 73:13.

7. Ania dagiti mabalin nga aramidentayo no nalidaytayo? (Kitaen met ti ladawan.)

⁷ Uray no naliday ti salmista, nangaramid iti pamay-an tapno mabalbaliwanna ti panagpampanunotna. ‘Simrek iti naindaklan a santuario ti Dios,’ ket inlinteg ni Jehova ti panagpampanunotna. (Sal. 73:​17-19) No nalidaytayo, ammo dayta ti kasayaatan a Gayyemtayo a ni Jehova. Isu nga agkararag ken agpatulongtayo kenkuana tapno ammotayo ti aramidentayo. Makatulong dagiti balakad iti Saona ken ti pammaregta dagiti kakabsat tapno adda bilegtayo nga agtultuloy nga agserbi kenkuana uray no nalidaytayo. Uray no umadu dagiti pakadanagantayo, kabaelannatayo a liwliwaen ken paragsaken ni Jehova.—Sal. 94:19.a

‘TI IYAASIDEG ITI DIOS’ KET MANGYEG ITI MAKAPNEK A BIAG KEN NAMNAMA

8. Ania ti dadduma a napateg a pamay-an a ti iyaasideg iti Dios ket pagimbagantayo?

⁸ Ti iyaasideg iti Dios ket pagimbagantayo iti dua pay a napateg a pamay-an. Umuna, maaddaan iti direksion ti biagtayo. Maikadua, mangyeg dayta iti sigurado a namnama para iti masanguanan. (Jer. 29:11) Kitaentayo pay a naimbag ti pagsayaatan dagita.

9. Kasano nga agbalintayo a naragragsak no umasidegtayo ken Jehova?

⁹ No nasinged a gayyemtayo ni Jehova, maaddaan iti direksion ti biagtayo. Adu a tattao ita ti saan a mamati iti Dios. Pampanunotenda nga awan ti panggep ti biag ken mamatida nga in-inut a mapukaw dagiti tattao. Ngem gapu iti panagadaltayo iti Sao ti Dios, kombinsidotayo nga adda Dios. Ken saan a sayang ti aniaman nga aramidentayo para kenkuana ta “isu ti manggunggona kadagidiay napasnek a mangsapsapul kenkuana.” (Heb. 11:6) Uray ita, naragragsak ti biagtayo gapu ta ar-aramidentayo ti panggep a naparsuatayo—ti agserbi iti nailangitan nga Amatayo a ni Jehova.—Deut. 10:​12, 13.

10. Sigun iti Salmo 37:​29, ania ti masakbayan dagidiay mangnamnama ken Jehova?

¹⁰ Kaaduan a tattao ita ket awanan iti pudpudno a namnama. Nakapokus laeng ti biagda iti trabaho, panagasawa, panangpadakkel kadagiti annak, ken panagurnong iti kuarta tapno addanto usarenda inton agretirodan. Saanda nga iramraman ti Dios iti biagda. Ngem naiduma dagiti agserserbi ken Jehova ta mangnamnamada kenkuana. (Sal. 25:​3-5; 1 Tim. 6:17) Agtaltalektayo iti Dios ken Gayyemtayo, ken ammotayo a tungpalennanto dagiti inkarina kadatayo. Nakaad-adu dagiti nasayaat a bambanag a padpadaanantayo. Karaman iti dayta ti panagdaydayawtayo kenkuana iti agnanayon iti Paraiso a daga.—Basaen ti Salmo 37:29.

11. Ania ti mapasamak no umasidegtayo iti Dios, ken ania met ti mariknana no aramidentayo dayta?

¹¹ Pagimbagantayo iti adu a pamay-an no umasidegtayo iti Dios. Kas pagarigan, ikarkari ni Jehova a pakawanenna dagiti basoltayo no agbabawitayo. (Isa. 1:18) Kas resultana, lumag-an ti riknatayo ta saantayo a masapul a makonkonsiensia lattan gapu kadagiti naaramidantayo a basol. (Sal. 32:​1-5) Kasta met, maragsakan kadatayo ni Jehova. (Prov. 23:15) Sigurado nga adu pay ti mapanunotmo a dadduma a bendision ta gayyemnatayo ni Jehova. Ngem kasanoka nga agtultuloy nga umasideg iti Dios?

NO KASANO TI AGTULTULOY NGA ‘UMASIDEG ITI DIOS’

12. Ania ti aramidem tapno agbalinka a nasingsinged pay iti Dios?

¹² No bautisadokan a Kristiano, adu la ketdin dagiti inaramidmo tapno agbalinka a nasinged ken Jehova. Adun dagiti nasursurom a kinapudno maipapan ken Jehova a Dios ken ni Kristo Jesus, nagbabawyamon dagiti basolmo, naipakitamon a nabileg ti pammatim iti Dios, ken inkagumaam nga aramiden ti pagayatanna. Ngem tapno agbalintayo a nasingsinged pay iti Dios, masapul nga itultuloytayo nga aramiden dagita.—Col. 2:6.

13. Ania ti tallo a banag a makatulong kadatayo tapno agtultuloytayo a makaasideg ken Jehova?

¹³ Ania ti makatulong kadatayo tapno agtultuloytayo a makaasideg ken Jehova? (1) Masapul nga itultuloytayo a basaen ken adalen ti Biblia. No basaentayo ti Biblia, ti koma panggeptayo ket saan laeng a tapno adda maammuantayo nga impormasion maipapan iti Dios. Imbes ketdi, ikagumaantayo a tarusan ti pagayatan ti Dios para kadatayo ken agpaiwanwantayo kadagiti prinsipio iti Saona. (Efe. 5:​15-17) (2) Masapul a patibkerentayo ti pammatitayo babaen ti panangutobtayo iti nakaad-adu nga ebidensia nga ay-ayatennatayo. (3) Masapul nga itultuloytayo a guraen dagiti kagura ni Jehova ken liklikan ti makigayyem kadagiti tattao nga agar-aramid kadagita.—Sal. 1:1; 101:3.

14. Maitunos iti 1 Corinto 10:​31, ania ti maaramidantayo kada aldaw a mangparagsak ken Jehova? (Kitaen met dagiti ladawan.)

¹⁴ Basaen ti 1 Corinto 10:31. Napateg nga aramidentayo ti amin a kabaelantayo a mangparagsak ken Jehova. Ngem saan laeng a ti panangasaba ken pannakigimong ti ramanen dayta. Masapul met a paragsakentayo ni Jehova kadagiti ar-aramidentayo iti inaldaw. Kas pagarigan, maparagsaktayo ni Jehova no agbalintayo a napudno iti amin a banag ken no iranudtayo iti dadduma ti adda kadatayo. (2 Cor. 8:21; 9:7) Kayatna met nga ipakitatayo nga agyamyamantayo iti biag nga insagutna kadatayo. Ad-adda pay nga umasidegtayo iti Gubuayan ti biag no agbalintayo a balanse iti pannangan ken panaginumtayo ken no mangaramidtayo kadagiti pamay-an tapno maaywanantayo ti salun-attayo. No makitkita ni Jehova nga agregreggettayo a mangparagsak kenkuana iti amin nga ar-aramidentayo, uray kadagiti kasla nagbabassit a banag, ad-adda pay nga ayatennatayo.—Luc. 16:10.

15. Ania ti namnamaen ni Jehova a panangtratotayo iti dadduma?

¹⁵ Naimbag ni Jehova agpadpada kadagiti nalinteg ken kadagiti nakillo. (Mat. 5:45) Namnamaenna a kasta met ti panangtratotayo iti dadduma. Kas pagarigan, ‘saantayo nga agsao iti dakes iti asinoman, saantayo a mannakiriri, ken naalumamaytayo iti amin a tattao.’ (Tito 3:2) Isu nga uray no saan a mamati dagiti tattao ken Jehova, saantayo koma a panunoten a nangatngatotayo kadakuada. (2 Tim. 2:​23-25) Ad-adda nga umasidegtayo ken Jehova no kanayon a naimbag ken nakonsiderartayo iti amin.

‘MAKAASIDEGTAYO ITI DIOS’ URAY NO MAITIBKOLTAYO

16. Ania ti narikna ti nangisurat iti Salmo 73 idi agangay?

¹⁶ Ngem kasano ngay no adda dagiti tiempo a mariknam a kasla saankan a maikari iti ayat ni Jehova? Laglagipem ti napasamak iti nangisurat iti Salmo 73. Imbagana: “Dandaniak nayaw-awan; nagistayanak naikaglis.” (Sal. 73:2) Inaminna a “nasaem” idi ti riknana ken ‘saan idi a manakem’ ken ‘kasla la animal nga awan ammona’ iti imatang ni Jehova. (Sal. 73:​21, 22) Ngem nariknana kadi a gapu kadagiti kamalina ket saanen nga ay-ayaten ken mapakawan pay ni Jehova?

17. (a) Ania ti inaramid ti salmista uray iti nagrigat a tiempo ti biagna? (b) Ania ti masursurotayo iti kapadasanna? (Kitaen met dagiti ladawan.)

¹⁷ No bilang ta narikna ti salmista a binaybay-an isuna ni Jehova, sigurado a saan la ketdi a bimmayag dayta. Agparang nga iti nagrigat a tiempo ti biagna, nabigbigna a masapul a lallalo pay nga umasideg iti Dios, kas ipakita ti sasaona: “Ngem ita, kanayonen a kaduaka [Jehova]; ig-iggamamon ti makannawan nga imak. Dagiti balakadmo ti mangidalan kaniak, ket kalpasanna, iturongnak iti kinadayag.” (Sal. 73:​23, 24) Masapul met a kiddawentayo ken Jehova a pabilgennatayo no mariknatayo a kumapkapuyen ti pammatitayo wenno no maup-upaytayo gapu kadagiti kamalitayo. (Sal. 73:26; 94:18) Uray no makaaramidtayo kadagiti nadagsen a basol, makapagsublitayo ken Jehova ta masiguradotayo a ‘sisasagana a mangpakawan.’ (Sal. 86:5) Masapul nga umasidegtayo iti Diostayo, nangnangruna no addatayo iti nagrigat a tiempo ti biagtayo.—Sal. 103:​13, 14.

‘UMASIDEGKA ITI DIOS’ ITI AGNANAYON

18. Apay nga awan patinggana ti iyaasidegtayo ken Jehova?

¹⁸ Saan nga agpatingga ti iyaasidegtayo ken Jehova ken ti kaadu ti maammuantayo maipapan kenkuana. Ibagbaga ti Biblia a dagiti daldalan, ti sirib, ken ti pannakaammo ni Jehova ket “saan a matunton.”—Roma 11:33.

19. Ania ti ipasigurado kadatayo ti Salmo?

¹⁹ Kuna ti Salmo 79:13: “Dakami a tattaom ken arban iti pagpastoram, agnanayonto nga agyamankami kenka; idaydayawdakanto iti amin a henerasion.” No itultuloymo ti umasideg iti Dios, masiguradom a mabendisionanka iti agnanayon ken sikokompiansa met a maibagam: “Ti Dios ti mangpapigsa iti pusok, ti dakkel a bato a pagkamangak. Isu ti agnanayon a bingayko.”—Sal. 73:26.