No Kasano ti Mangbalakad

1. Siasino dagiti masapul a mangted iti balakad? Ilawlawag.

Napadasam kadin ti mangbalakad? Nalaka laeng dayta para iti dadduma. Ngem adda dagiti marigatan gapu ta mabuteng wenno mabainda. Aniaman ti mariknatayo, amintayo ket masapul a mangbalakad no dadduma. Apay? Imbaga ngamin ni Jesus a ti pakabigbigan dagiti pudno a pasurotna ket ti panagiinnayatda. (Juan 13:35) Ket ti maysa a pamay-an a maipakitatayo nga ay-ayatentayo dagiti kakabsat ket ti panangbalakadtayo kadakuada no kasapulan. Ibaga ti Biblia a ti “naimpusuan a balakad” palagdaenna ti panaggagayyem.—Prov. 27:9.

2. Ania ti masapul nga aramiden dagiti panglakayen, ken apay? (Kitaen met ti kahon a “Panangbalakad iti Gimong iti Tengnga ti Lawas.”)

² Masapul nga epektibo ti panangbalakad dagiti panglakayen. Apay? Isuda ngamin ti dinutokan da Jehova ken Jesus a mangipastor iti kongregasion. (1 Ped. 5:​2, 3) Maaramidda dayta no ibatayda iti Biblia dagiti palawagda iti kongregasion. Balbalakadandatayo met no kasapulantayo dayta, ken tultulonganda dagiti nangpanaw ken Jehova nga agsubli iti kongregasion. Kasano a makaipaay dagiti panglakayen ken uray datayo iti nasayaat a balakad?

3. (a) Ania ti makatulong tapno masursurotayo ti mangted iti nasayaat a balakad? (Isaias 9:6; kitaen met ti kahon a “Tuladem ni Jesus no Mangbalakadka.”) (b) Ania ti pagsasaritaantayo iti daytoy nga artikulo?

³ Adu ti masursurotayo kadagiti karakter iti Biblia no maipapan iti panangipaay iti nasayaat a balakad. Ni Jesus ti kangrunaan a pagtuladantayo iti dayta. Ngamin, naawagan isuna iti “Masirib a Mamalbalakad.” (Basaen ti Isaias 9:6.) Iti daytoy nga artikulo, pagsasaritaantayo dagiti mabalintayo nga aramiden no adda agpabalakad kadatayo ken dagiti aramidentayo no masapul a balakadantayo ti maysa uray no saan nga agpabpabalakad. Pagsasaritaantayo met ti kinapateg ti panangbalakad iti umiso a tiempo ken pamay-an.

NO ADDA AGPABALAKAD KADATAYO

4-5. No adda agpabalakad kadatayo, ania ti panunotentayo nga umuna? Mangted iti pagarigan.

⁴ Ania koma ti reaksiontayo no adda agpabalakad kadatayo? Mabalin a maragsakantayo isu a balakadantayo no kuan a dagus. Ngem aguray. Masapul a panunotentayo nga umuna: ‘Umdas kadi ti pannakaammok ken kapadasak a mangbalakad kenkuana?’ Laglagipentayo a no dadduma, ti kasayaatan a maitulongtayo ket ibirokantayo iti makaammo wenno eksperto iti situasionna, imbes a dagus a balakadantayo.

⁵ Panunotem daytoy: Adda nakaro a sakit ti nadekket a gayyemmo. Ita, imbagana kenka nga addan dagiti na-research-na a makaagas kenkuana. Idi kuan, dinamagna no ania ti makunam a kasayaatan a pannakaagas a makatulong kenkuana. Mabalin nga adda nagustuam kadagiti imbagana. Ngem daydiay laeng ta saanka met a doktor wenno eksperto iti dayta a banag. Ania ngarud ti kasayaatan nga aramidem? Tulongam nga agbirok iti makaammo wenno eksperto iti sakitna.

6. Apay a saantayo koma a dagus a mangbalakad?

⁶ No dadduma, kasla mariknatayo nga adda maibalakadtayo a makatulong iti gayyemtayo. Ngem baka nasaysayaat a saantayo a dagus a mangted iti balakad. Apay? Ngamin, kas ibaga ti Proverbio 15:​28, “ti nalinteg [a tao ket] agpanunot nga umuna sakbay a sumungbat.” Isu nga uray no ipagaruptayo nga ammotayon ti ibagatayo, baka nasaysayaat no ag-research, agkararag, ken agutobtayo nga umuna. No ngamin kasta ti aramidentayo, masiguradotayo a ti balakadtayo ket maitunos iti panagpampanunot ni Jehova. Kitaentayo ti napasamak ken propeta Natan.

7. Ania ti masursurom iti napasamak ken propeta Natan?

⁷ Imbaga ni Ari David ken propeta Natan a kayatna ti mangibangon iti templo para ken Jehova. Dagus nga imbaga ni Natan a husto dayta nga aramidenna. Ngem saan ngata a nasaysayaat no nagkonsulta nga umuna ni Natan ken Jehova? Koma. Ngamin, saan a ni David ti kayat ni Jehova a mangibangon iti templo. (1 Cron. 17:​1-4) Ania ti masursurotayo? No ngarud adda agpabalakad kadatayo, masiribtayo no “nainayad[tayo] nga agsao,” kayatna a sawen, saantayo a dagus a mangbalakad.—Sant. 1:19.

8. Ania pay ti sabali a rason a masapul nga agannadtayo no mangbalbalakadtayo?

⁸ Daytoy ti sabali pay a rason a masapul nga agannadtayo no mangbalbalakadtayo: No saan a nasayaat ti resulta ti desision ti maysa gapu iti balakadtayo, mabalin a pabasolennatayo. Masapul ngarud nga agpanunottayo a naimbag sakbay a mangbalakadtayo.

NO MASAPUL A BALAKADANTAYO TI MAYSA URAY NO SAAN NGA AGPABPABALAKAD

9. Sakbay a mangbalakad dagiti panglakayen, ania ti masapul a siguraduenda? (Galacia 6:1)

⁹ Adda dagiti gundaway a masapul a balakadan dagiti panglakayen ti maysa a kabsat a nakaaramid “iti di umiso.” (Basaen ti Galacia 6:1.) Baka ngamin adda dagiti ar-aramiden dayta a kabsat a mabalin nga agtinnag iti nadagsen a basol. Isu a kayat dagiti panglakayen a tulongan tapno agtultuloy nga agserbi ken Jehova ket agbiagto iti agnanayon. (Sant. 5:​19, 20) Ngem ania ti aramiden dagiti panglakayen tapno epektibo ti balakadda? Masapul a siguraduenda nga umuna no talaga nga adda naaramid ti kabsat a di umiso. Apay? Ngamin, palpalubosannatayo ni Jehova a mangusar iti bukodtayo a konsiensia no agdesdesisiontayo. Isu a saan a gapu ta naiduma ti desision ti kabsat iti pampanunoten dagiti panglakayen ket adda ar-aramidennan a kagura ni Jehova. (Roma 14:​1-4) Ngem kasano ngay no talaga a nakaaramid ti kabsat iti di umiso ket kasapulan a balakadan dagiti panglakayen?

10-12. Ania ti aramiden dagiti panglakayen no masapul a balakadanda ti maysa uray no saan nga agpabpabalakad? Mangted iti pagarigan. (Kitaen met dagiti ladawan.)

¹⁰ Saan a kaskarina kadagiti panglakayen ti mangbalakad iti maysa a masapul a mabalakadan uray no saan nga agpabpabalakad. Apay? Imbaga ni apostol Pablo nga adda dagidiay dida mapupuotan nga agar-aramiddan iti di umiso. Isu nga uray no balakadan dagiti panglakayen, baka mapanunotna: ‘Apay ngata a balbalakadandak?’ No kasta, ania ngarud dagiti masapul nga aramiden dagiti panglakayen tapno nalaklakanton nga awaten dayta a kabsat ti balakadda?

¹¹ Panunotem daytoy a pagarigan: Adda mannalon a kayatna ti agmula iti natangken a daga. Basta agmula latta kadin a dagus? Saan. Masapul a parukaen wenno paluknengenna pay ti daga sakbay nga imulana ti bukel. Kalpasanna, sibuganna tapno dumakkel. Kasla kasta met la ti aramiden ti panglakayen no masapul a balakadanna ti maysa uray no saan nga agpabpabalakad. Arigna parukaenna pay ti daga. Kayatna a sawen nga adda pay dagiti masapul nga aramidenna sakbay a mangbalakad. Kas pagarigan, mabalin a mangpanunot iti kasayaatan a tiempo tapno makasaritana ti kabsat. Kalpasanna, ipasiguradona nga ipatpateg ken pampanunotenna ti pagimbagan ti kabsat. No ti panglakayen ket pagaammo a nadungngo ken nasingpet, nalaklaka nga awaten ti dadduma ti balakadna.

¹² Bayat ti panagsaritada, nalaklaka nga awaten ti kabsat ti balakad no ipalagip ti panglakayen nga agkamalitayo amin ken adda dagiti tiempo a kasapulantayo ti balakad. No kasta ti aramidenna, arigna palpaluknengenna ti daga. (Roma 3:23) Kalmado koma a makisarita ti panglakayen ken ipariknana a resrespetuenna ti kabsat. Usarenna ti Biblia a mangipabigbig iti di umiso a naaramidanna. No naamirisen ti kabsat ti di umiso a naaramidanna, mangrugin nga arigna “agimula” ti panglakayen iti bukel. Kasano? Ilawlawagna iti kabsat iti simple a pamay-an dagiti aramidenna tapno mailintegna ti kamalina. Kamaudiananna, arigna “sibugan” ti panglakayen ti bukel no naimpusuan a komendaranna ti kabsat ken agkararagda.—Sant. 5:15.

13. Kasano a masigurado dagiti panglakayen a naawatan ti kabsat ti balakadda?

¹³ No dadduma, mabalin a naiduma ti pannakaawat ti mabalbalakadan iti kayat nga ipaawat ti mangbalbalakad. Kasanoda a maliklikan dayta? Mabalin nga agsaludsod dagiti panglakayen iti narespeto ken nataktika a pamay-an tapno masiguradoda a talaga a maawatan ti kabsat ti kayatda nga ibalakad kenkuana.—Ecl. 12:11.

PANANGBALAKAD ITI UMISO A TIEMPO KEN PAMAY-AN

14. Masapul kadi a mangbalakadtayo no agpupungtottayo pay laeng? Ilawlawag.

¹⁴ Agkamalitayo amin. Isu a makaibaga wenno makaaramidtayo no dadduma iti pakasaktan ti sabsabali. (Col. 3:13) Ibaga ti Biblia nga adda dagiti tiempo a masuron wenno makaungettayo pay ketdi iti dadduma. (Efe. 4:26) Ngem masapul a saantay a mangbalakad no agpupungtottayo pay laeng. Apay? Ngamin, “ti pungtot ti tao ket saan a maitunos iti kinalinteg ti Dios.” (Sant. 1:20) Isu a no mangbalakadtayo nga agpupungtottayo pay laeng, baka kumaro laeng ti situasion. Ngem kayatna kadi a sawen a saantayon nga ibaga ti mapampanunot ken marikriknatayo iti nakapasakit kadatayo? Saan met. Ngem nasaysayaat lang ngamin ti resultana no agkalmaka pay nga umuna. Adda pagtuladantayo no maipapan iti dayta—ti matalek a ni Elihu a nangbalakad idi ken Job.

15. Ania ti masursurotayo ken Elihu? (Kitaen met ti ladawan.)

¹⁵ Sumagmamano nga aldaw a dimdimngeg ni Elihu iti pannakirinnason ni Job kadagiti peke a gagayyemna. Naasian ni Elihu ken ni Job. Ngem idi nangngeg ni Elihu nga ikalkalintegan ni Job nga isu ti husto imbes a ti Dios, nakapungtot unay. Nupay kasta, nagur-uray ni Elihu iti tiempo a sumungbat ken Job. Naalumamay ken nadayaw ti panangbalakadna kenkuana. (Job 32:2; 33:​1-7) Ania ti nagpateg a masursurotayo ken Elihu no maipapan iti panangbalakad? Urayentayo ti umiso a tiempo. Kalmadotayo koma met ken ipakitatayo a resrespetuen ken ay-ayatentayo ti balbalakadantayo.—Ecl. 3:​1, 7.

ITULTULOY TI MANGBALAKAD KEN AGPABALAKAD

16. Ania ti nasursurom iti Salmo 32:8?

¹⁶ Ti pannakatema a teksto daytoy nga artikulo ibagbagana a ‘balakadannatayo ni Jehova bayat a kitkitaennatayo.’ (Basaen ti Salmo 32:8.) Ipakita dayta nga itultuloynatayo a tulongan ni Jehova. Saannatayo la a balakadan no di ket tulongannatayo pay a mangyaplikar iti balakad. Nagsayaat a tuladentayo! No adda gundawaytayo a mangbalakad iti dadduma, tuladentayo koma ni Jehova. Itultuloytayo ida a paregtaen ken tulongan a mangaramid kadagiti nainsiriban a desision.

17. Ania ti mariknatayo no mangted dagiti panglakayen iti espesipiko ken naibatay-Biblia a balakad? Ilawlawag. (Isaias 32:​1, 2)

¹⁷ Mas kasapulantayo itan ti mangted ken umawat iti nasayaat a balakad. (2 Tim. 3:1) Dagiti panglakayen a mangmangted iti espesipiko ken naibatay-Biblia a balakad ket “kas ayus ti danum iti namaga a daga.” (Basaen ti Isaias 32:​1, 2.) Adda met dagiti kakabsat a makaammo iti kayattayo a mangngeg, ngem ibagada latta ti kasapulantayo a mangngeg. Arigna mangmangtedda iti regalo a kas kapateg dagiti “mansanas a balitok iti nakitikitan a pirak.” (Prov. 25:11) Itultuloytayo ngarud a sursuruen no kasano ti mangbalakad ken umawat iti nasayaat a balakad.