‘Nasursurom Kadin ti Sekreto’ ti Panagbalin a Kontento?

1. Ania ti kaipapanan ti kinakontento, ken ania met ti saanna a kaipapanan?

KONTENTOKA kadi kadagiti adda kenka? Ti kontento a tao ket naragsak ken natalna ti panunotna. Ngamin, nakapokus kadagiti agdama a bendision nga ipapaay ni Jehova. Saan a masuron wenno maupay gapu ta adda dagiti banag nga awan kenkuana. Ngem dina kayat a sawen nga awanen ti aramidentayo ken saantayon nga agporsegi. Kas pagarigan, saan ngarud a kamali no kayat ti maysa a Kristiano nga ad-adu pay koma ti maaramidanna para ken Jehova. (Roma 12:1; 1 Tim. 3:1) Ngem no kas pagarigan ta saanna pay a maragpat dagiti pribilehio a kayatna, naragsak latta gapu ta kontento.

2. Ania dagiti pagdaksanna no saantayo a kontento?

² No saanka a kontento, posible a makaaramidka iti dakes a desision. Kas pagarigan, adda dagiti kanayon nga ag-overtime iti trabaho tapno laeng magatangda dagiti saanda met a talaga a kasapulan. Makapaladingit ta adda sumagmamano a Kristiano a nagtakaw pay ketdi tapno laeng maadda kadakuada dagiti kayatda. Mabalin a pinampanunotda, ‘Kukuak met koma a talaga daytoy,’ ‘Kasapulak ngamin itan,’ wenno ‘Bayadakto met laeng.’ Ngem aniaman a kita ti panagtakaw ket kagura ni Jehova ken pakaibabainan ti naganna. (Prov. 30:9) Adda met dagiti simmardengen nga agserbi ken Jehova gapu ta naupaydan unay idi saanda a naawat dagiti pribilehio a kayatda. (Gal. 6:9) Apay a naitured nga aramiden dayta ti maysa nga agdaydayaw ken Jehova? Gapu ta posible nga in-inut a napukawen ti kinakontentona.

3. Ania ti makaparegta a masursurotayo iti Filipos 4:​11, 12?

³ Kayatayo amin ti agbalin a kontento. Insurat ni apostol Pablo a ‘nasursurona ti agbalin a kontento aniaman ti kasasaadna.’ (Basaen ti Filipos 4:​11, 12.) Insuratna dagita bayat a nakabalud. Ngem naragsak latta ta ‘nasursurona ti sekreto’ ti agbalin a kontento. No marigrigatantayo nga agbalin a kontento, maparegtatayo iti imbaga ken napadasan ni Pablo. Saan nga automatiko ti agbalin a kontento. Ngem masapul a sursuruentayo dayta. Kasano? Pagsasaritaantayo dagiti kualidad a makatulong tapno masursurotayo ti sekreto ti kinakontento.

AGBALINKA A MANAGYAMAN

4. Apay a makatulong ti kinamanagyaman tapno agbalinka a kontento? (1 Tesalonica 5:18)

⁴ Ad-adda nga agbalintayo a kontento no managyamantayo. (Basaen ti 1 Tesalonica 5:18.) Kas pagarigan, no talaga nga agyamyamantayo gapu ta adda kadatayo dagiti talaga a kasapulantayo, ditay unay pakadanagan dagiti awan kadatayo. No agyamyamantayo ken Jehova gapu kadagiti agdama a pribilehiotayo, makatulong dayta tapno maipaaytayo ti kasayaatantayo iti asaynmenttayo, imbes a sangkapanunottayo nga adda koma sabali a pribilehiotayo. Isu met la gayam nga iparparegta ti Biblia nga agyamantayo ken Jehova no agkarkararagtayo! No ngamin managyamantayo, mariknatayo “ti talna ti Dios a mangartap iti amin a pannakaawat.”—Fil. 4:​6, 7.

5. Ania dagiti rason a nagbalin koma a managyaman dagiti Israelita? (Kitaen met ti ladawan.)

⁵ Kitaentayo ti napasamak kadagiti Israelita. Namin-adu a nagreklamoda ken Jehova gapu ta awanen dagiti magusgustuanda idi a kanen idiay Egipto. (Num. 11:​4-6) Agpayso met ketdi a narigat ti biag idiay let-ang. Ngem ania koma ti nakatulong kadakuada nga agbalin a kontento? Pinampanunotda koma ti amin nga inaramid ni Jehova para kadakuada ken nagbalinda a managyaman. Idi addada idiay Egipto, naparparigatda kas adipen. Ngem insalakan ida ni Jehova babaen ti 10 a didigra. Idi nawayawayaanen dagiti Israelita, “innalada dagiti sanikua dagiti Egipcio” a kas iti pirak, balitok, ken badbado. (Ex. 12:​35, 36) Idi dandanin makamatan dagiti Egipcio dagiti Israelita iti Nalabaga a Baybay, binisngay dayta ni Jehova. Bayat met a lumaslasatda iti let-ang, inaldaw a pinakan ida ni Jehova iti manna. Ngem ania ngarud ti problema? Saan a nagbalin a kontento dagiti Israelita, saan a gapu ta awan ti kanenda no di ket gapu ta saanda a nagyaman kadagiti addan kadakuada.

6. Ania dagiti makatulong kadatayo nga agbalin a managyaman?

⁶ Kasanotayo ngarud nga agbalin a managyaman? Umuna, inaldaw a panunotem dagiti mangparparagsak kenka. Mabalinmo pay ketdi nga isurat ti dua wenno tallo a pagyamyamanam. (Un. 3:​22, 23) Maikadua, iyebkasmo ti panagyamanmo. Agyamanka kadagiti nangaramid iti nasayaat kenka. Kangrunaan iti amin, kanayon nga agyamanka ken Jehova. (Sal. 75:1) Maikatlo, dagiti koma managyaman ti pagbalinem a nasinged a gagayyemmo. Ngamin, no managyamanda, agbalinkanto met a managyaman. Ngem no makigayyemka kadagiti reklamador, baka reklamadorkanto metten. (Deut. 1:​26-28; 2 Tim. 3:​1, 2, 5) No mangpanunottayo kadagiti gundaway a mayebkastayo ti panagyamantayo, ad-adda nga agbalintayo a kontento.

7. Kasano a nasursuro ni Aci ti agbalin a managyaman, ken ania ti resultana?

⁷ Kitaentayo ti napasamak ken Aci a taga-Indonesia. Inaminna: “Idi COVID-19 pandemic, ikomkomparak ti kasasaadko kadagiti kakabsat. Idi kuan, nagbalinak metten a saan a kontento.” (Gal. 6:4) Ania ti nakatulong kenkuana a mangbalbaliw iti panagpampanunotna? Imbaga ni Aci: “Binilangko dagiti bendision a maaw-awatko kada aldaw ken dagiti nagsasayaat a matagtagiragsakko gapu ta pasetak ti organisasion ni Jehova. Kalpasanna, nagyamanak ken Jehova. Kas resultana, talaga a nariknak ti kinakontento.” No mariknam a kasla saanka a kontento iti kasasaadmo, mabalinmo kadi a tuladen ti inaramid ni Aci tapno agbalinka a managyaman?

AGTALINAEDKA A NAPAKUMBABA

8. Ania ti napasamak ken Baruc?

⁸ Adda idi gundaway a saan a nagtalinaed a kontento ni Baruc a sekretario ni propeta Jeremias. Narigat idi ti situasionna ta masapul a suportaranna ni Jeremias a mangipakaammo iti mapasamak iti saan a managyaman a nasion ti Israel. Ngem imbes a panunotenna ti ipapaaramid ni Jehova, mas pinanunotna ketdin ti kayatna nga aramiden. Inusar ni Jehova ni Jeremias a mangibaga ken Baruc: “Agsapsapulka iti naindaklan a bambanag para iti bagim. Isardengmo ti agsapul kadagita.” (Jer. 45:​3-5) Kas man la ibagbaga ni Jehova ken Baruc: “Kontentoka koman iti agdama a situasionmo.” Impangag ni Baruc ni Jehova isu a nagtalinaed a nasinged a gayyemna.

9. Ania ti masursurotayo iti 1 Corinto 4:​6, 7? (Kitaen met dagiti ladawan.)

⁹ No dadduma, baka mapanunot ti maysa a Kristiano a maikari isuna iti maysa a pribilehio. Ngamin, baka nakalalaing, nakagaggaget, wenno eksperiensiado—wenno baka adda kenkuana amin dagita. Ngem kasano ngay no sabali ti nakaitedan ti pribilehio a kayatna? Ania ti mabalin nga aramidenna tapno saan nga agsakit ti nakemna? Mabalinna nga usigen ti insurat ni apostol Pablo iti 1 Corinto 4:​6, 7. (Basaen.) Naggapu ken Jehova ti amin a pribilehio ken abilidadtayo. Intedna dagita, saan a gapu ta mas espesialtayo ngem iti dadduma, no di ket gapu iti nagpaiduma a kinaimbagna kadatayo.—Roma 12:​3, 6; Efe. 2:​8, 9.

10. Ania ti makatulong tapno agtalinaedtayo a napakumbaba?

¹⁰ Makatulong kadatayo nga agtalinaed a napakumbaba no panunotentayo ti ulidan ni Jesus para kadatayo. Kitaentayo ti napasamak iti rabii a binugguan ni Jesus ti saka dagiti apostolna. Insurat ni apostol Juan: “Gapu ta ammo ni Jesus [1] nga inteden ti Ama ti amin a banag kenkuana ken [2] ammona nga isu ket naggapu iti Dios ken [3] agsublin iti Dios, . . . binugguanna dagiti saka dagiti adalanna.” (Juan 13:​3-5) Mabalin koma a pinanunot ni Jesus a masapul a dagiti apostolna ti mangbuggo kadagiti sakana. Ngem saanna a pinanunot dayta. Saanna met a pinanunot a mas nanamnam-ay ken narangrang-ay koma ti biagna. (Luc. 9:58) Napakumbaba ken kontento ni Jesus. Nagsayaat nga ulidan para kadatayo!—Juan 13:15.

11. Kasano a nakatulong ken Dennis ti kinapakumbaba tapno agbalin a kontento?

¹¹ Ikagkagumaan ni Dennis a taga-Netherlands a tuladen ti kinapakumbaba ni Jesus. Ngem para kenkuana, saan a kanayon a nalaka dayta. Imbagana: “No dadduma, agsakit ti nakemko no maited iti dadduma ti maysa a pribilehio a kayatko. Panagriknak ngamin a siak koma ti rumbeng a nakaawat iti dayta a pribilehio. Ngem no kasta ti mapasamak, adalek ti maipapan iti kinapakumbaba. Iti JW Library^® app, nangaramidak iti tag ti sumagmamano a teksto maipapan iti kinapakumbaba tapno alistok a mabirokan ken mabasak manen dagita. In-download-ko met iti selponko ti dadduma a palawag maipapan iti kinapakumbaba, ken masansan a denggek dagita.a Nasursurok nga amin nga aramidentayo ket tapno maidaydayawtayo ni Jehova, saan a ti bagitayo. Nakaim-imbag ni Jehova ta ipalpalubosna a makipagtrabahotayo iti pannakaitungpal ti pagayatanna.” No saanka a kontento iti situasionmo, ikagumaam ti agbalin a napakumbaba. Iti kasta, tumibker ti pannakigayyemmo ken Jehova ken matulongannaka nga agbalin a kontento.—Sant. 4:​6, 8.

KANAYON A PANUNOTEM DAGITI KARI NI JEHOVA

12. Ania dagiti kari ni Jehova a makatulong kadatayo nga agbalin a kontento? (Isaias 65:​21-25)

¹² Mas kontentotayo no utobentayo dagiti nagsayaat a kari ni Jehova. Iti libro ni propeta Isaias, imbaga ni Jehova a maawatanna ti adu a pakarigatantayo. Inkarina met a pukawennanto amin dagita. (Basaen ti Isaias 65:​21-25.) Maaddaantayonton iti napipintas a balay, makapnek a trabaho, ken adu a naimas ken makapasalun-at a taraon. Saantayton a madanagan di la ket ta adda dakes a mapasamak kadatayo wenno iti annaktayo. (Isa. 32:​17, 18; Ezek. 34:25) Masiguradotayo a matungpalto amin dagita a kari ti Diostayo.

13. Ania dagiti situasion a masapul nga ad-adda a panunotentayo dagiti kari ni Jehova?

¹³ Ad-adda a masapul a panunotentayo itan dagiti kari ni Jehova. Apay? Ngamin, agbibiagtayon iti “maudi nga al-aldaw” ken maipaspasangotayo amin kadagiti problema. (2 Tim. 3:1) Inaldaw a tultulongannatayo ni Jehova nga agibtur. Kasano? Iwanwanwan, pabpabilgen, ken tultulongannatayo. (Sal. 145:14) Kasta met a nangnangruna a makatulong kadatayo dagiti kari ni Jehova, no makapaspasartayo kadagiti pakarigatan. Baka marigrigatanka ita nga agtrabaho tapno maipaaymo dagiti material a kasapulan ti pamiliam. Kayat kadi a sawen dayta a kasta lattan ti situasionmo? Saan! Inkari ni Jehova nga inton Paraiso, itednanto ti amin a kasapulam—ngem ad-adunto pay ngem iti mapanunotmo. (Sal. 9:18; 72:​12-14) Baka adda grabe ita a sakitmo, madepdepreska, wenno marikriknamon dagiti epekto ti panaglakay wenno panagbaket. Kayat kadi a sawen dayta a saanen a sumayaat ti kasasaadmo? Saan! Inkari ti Dios nga inton agbalin a paraiso ti daga, awanton ti sakit ken ipapatay. (Apoc. 21:​3, 4) Makatulong dagita a kari tapno agbalintayo a kontento, imbes nga agsakit ti nakem wenno masurontayo iti situasiontayo ita. Naragsaktayo latta ken kalmado ti riknatayo, uray no adda ib-ibturantayo a pakasuotan, sakit, kinaawan hustisia, wenno no matayantayo. Apay? Ngamin, kasano man karigat dagiti problematayo ita, “apagbiit” laengen dagita ta asidegen ti tiempo a permanente a masolbar dagita.—2 Cor. 4:​17, 18.

14. Kasanotayo a mapabileg ti namnamatayo kadagiti kari ni Jehova?

¹⁴ Makatulong ti namnama tapno agbalintayo a kontento. Ngem kasanotayo a mapabileg dayta? Tapno nalawlawag a makita ti maysa a tao dagiti bambanag iti adayo, baka masapul nga agusar iti eyeglass wenno anteohos. Iti umasping a pamay-an, baka masapul nga adda dagiti aramidentayo tapno mapabileg ti namnamatayo. Iti kasta, nalawlawag a makitatayo ti biagtayto idiay Paraiso. No madandanagantayo unay maipapan iti kuarta, imadyinentayo ti biagtayo inton saantayon a kasapulan ti kuarta, inton awanen ti utang, ken awanen ti marigrigat. No madandanagantayo ta saantayo pay a naawat dagiti pribilehio a kayattayo, panunotentayo inton awanen ti serserbi dagita inton perpektotayon. Ngamin, rinibun a tawen a makapagserbitayo ken Jehova. (1 Tim. 6:19) Baka gapu iti kaadu ti problematayo ita, saantayo a mapanunot ti maipapan iti masakbayantayo. Ngem no kanayon a pampanunotentayo dagiti kari ni Jehova, naturalto laengen a dagita ti pampanunotentayo, imbes a dagiti problematayo.

15. Ania ti nasursurom iti imbaga ni Christa?

¹⁵ Kitaentayo no kasano a nakatulong ti namnama ken Christa, nga asawa ti nadakamaten a ni Dennis. Imbagana: “Adda sakitko a mangpakpakapuy kadagiti maselko. Saanak a makapagna ket masapul nga agusarak iti wheelchair ken kanayon a nakaiddaak. Inaldaw nga agpapaut-otak. Nabiit pay nga imbaga ti doktor a saanakon nga umimbag. Ngem napanunotko a dagus, ‘Saanna a makitkita ti masakbayan a makitkitak.’ Kanayon a pampanunotek ti namnama, isu a natalna ti panunotko. Masapul nga agibturak pay la ita. Ngem inton Paraiso, awanton ti sakitko!”

“SAAN NGA AGKURANG ITI ANIAMAN DAGIDIAY AGBUTENG KENKUANA”

16. Apay a naibaga ni Ari David a “saan nga agkurang iti aniaman” dagidiay agbuteng ken Jehova?

¹⁶ Uray no kontento ti maysa nga adipen ni Jehova, maipasango latta kadagiti problema. Kasta ti napasamak ken Ari David. Natayan iti tallo nga annak, napabasol, natraidor, ken nagbalin a pugante iti adu a tawen. Ngem bayat nga ib-ibturanna ti nakaro a pakasuotan, imbagana maipapan ken Jehova: “Saan nga agkurang iti aniaman dagidiay agbuteng kenkuana.” (Sal. 34:​9, 10) Apay a naibagana dayta? Ngamin, uray no agserserbitayo ken Jehova, ditay namnamaen a saantayon a maipasango kadagiti problema. Ngem masiguradotayo a ditayto pulos agkurang kadagiti talaga a kasapulantayo. (Sal. 145:16) Makapagtalektayo met ken Jehova a mapagballigiantayo ti amin a pakasuotantayo. Kabaelantayo ti agbalin a kontento.

17. Apay a masapul nga ikagumaam a sursuruen ti sekreto ti kinakontento?

¹⁷ Kayat ni Jehova nga agbalinka a kontento. (Sal. 131:​1, 2) Ikagumaam ngarud a sursuruen ti agbalin a kontento. No aramidem ti amin a kabaelam nga agbalin a managyaman, napakumbaba, ken kanayon a panunotem dagiti kari ni Jehova, maibagamto met: “Wen, mapmapnekak,” wenno “kontentoak.”—Sal. 16:​5, 6.