Ti Ayat ti Dios ket Agnanayon

1-2. No maipasango ti maysa a Kristiano iti problema, ania ti mabalin a mariknana?

IMADYINEM ti maysa a bangka nga adda iti tengnga ti nakadawdawel a baybay nga iyallo-allon dagiti nagdadakkel a dalluyon. Nalaka laeng a mayanud dayta, malaksid no adda mangitinnag iti angklana. Makatulong ti angkla tapno saan a mayanud ti bangka iti uray sadino lattan bayat ti napigsa a bagyo.

² No maipasangoka iti narigat a problema, baka mariknam a kaslaka laeng iti dayta a bangka a nalaka a mayallo-allon. Agbaliwbaliw ti emosionmo. Kas pagarigan, ita, siguradoka nga ay-ayaten ken tultulongannaka ni Jehova. Ngem inton bigat, pagduaduaam metten no talaga met laeng a makitkitana ti mapaspasaram. (Sal. 10:1; 13:1) Wenno, baka adda imbaga kenka ti maysa a gayyemmo a nangliwliwa kenka, ket limmag-an ti riknam. (Prov. 17:17; 25:11) Ngem pagammuan ta nagsubli manen ti panagduaduam. Baka napanunotmo pay ketdin a binaybay-annakan ni Jehova. Kasanoka nga arigna mayangkla no maipasangoka iti pakarigatan? Iti sabali a pannao, kasano nga agbalinka a kombinsido—ken agtalinaedka a kombinsido—a talaga nga ay-ayaten ken tultulongannaka ni Jehova?

3. Ania ti kaipapanan ti “napudno nga ayat” a nadakamat iti Salmo 31:7 ken 136:1? (b) Apay a maibagatayo a ni Jehova ti kasayaatan nga ulidan iti panangipakita iti dayta? (Kitaen met ti ladawan.)

³ No maipasangoka iti pakarigatan, arigna mayangklaka no laglagipem ti napudno nga ayat ni Jehova. (Basaen ti Salmo 31:7; 136:1.) Ti sasao a “napudno nga ayat” ket tumukoy iti nauneg ken di agkupas nga ayat ken kinamatalek ti maysa para iti sabali. Ket ni Jehova ti kasayaatan nga ulidan iti panangipakita iti napudno nga ayat. Kinapudnona, ibagbaga ti Biblia a “dakkel ti napudno nga ayatna.” (Ex. 34:​6, 7) Ibagbaga met ti Salmo 86:5 maipapan ken Jehova: “Aglaplapusanan ti napudno nga ayatmo kadagiti umaw-awag kenka.” Ania ti kaipapanan dayta? Ipakitana a saanto a pulos baybay-an ni Jehova dagiti matalek kenkuana! No laglagipem a napudno ni Jehova, arigna mayangklaka, wenno natibkerka latta, aniaman a pakarigatan ti pakaipasanguam.—Sal. 23:4.

LAGLAGIPEM A TI AYAT NI JEHOVA KET MAYSA KADAGITI KANGRUNAAN A PANNURSURO TI BIBLIA

4. Mangted kadagiti kangrunaan a pannursuro ti Biblia ken ilawlawag no apay a kombinsidoka nga agpaypayso dagita.

⁴ No maipasangotayo iti pakarigatan, makatulong met kadatayo no panunotentayo a ti ayat ni Jehova ket maysa kadagiti “kangrunaan a pannursuro ti Biblia.” Para kenka, ania ti kaipapanan ti “kangrunaan a pannursuro ti Biblia”? Baka mapanunotmo dagiti kinapudno a naammuam iti Biblia. Kas pagarigan, naammuam a ti nagan ti Dios ket Jehova, a ni Jesus ti bugbugtong nga Anak ti Dios, nga awan a pulos ti ammo dagiti natay, ken agbiagto dagiti tattao iti agnanayon iti paraiso a daga. (Sal. 83:18; Ecl. 9:5; Juan 3:16; Apoc. 21:​3, 4) Manipud idi pinatim dagita a kinapudno ti Biblia, sigurado a saanmon a pinagduaduaan dagita. Apay? Gapu ta naammuam dagiti ebidensia a mangpaneknek nga agpaypayso dagita. Pagsasaritaantayo itan no kasano a ti ayat ti Dios ket maysa kadagiti kangrunaan a pannursuro ti Biblia. Kitaentayo met no kasano a makatulong dayta tapno makombinsirka a talaga a makitkita ni Jehova ti rigatmo ken maseknan kenka.

5. Ilawlawag no kasano a makombinsir ti maysa a saan nga umiso ti maysa a pannursuro.

⁵ Idi damom ti agadal iti Biblia, ania ti nakakombinsiram a saan nga umiso ti maysa a pannursuro? Posible nga inkomparam dagiti naammuam idi iti dati a relihionmo iti isursuro ti Biblia. Kas pagarigan: Patiem idi a ni Jesus ti Mannakabalin-amin a Dios. Ngem idi nagadalka iti Biblia, isalsaludsodmo metten iti bagim, ‘Agpaypayso kadi daytoy?’ Kalpasan a sinukimatmo dagiti kinapudno iti Biblia, nakitam a ti sungbat ket saan. Isu a daytoyen ti patpatiem ita: Ni Jesus “ti inauna iti amin a parsua,” “ti bugbugtong nga Anak ti Dios.” (Col. 1:15; Juan 3:18) Siempre, dagiti ulbod a pannursuro ket “natibker ti pannakapaderna” isu a narigat a rebbaen dagita wenno tallikudan. (2 Cor. 10:​4, 5) Ngem idi naammuamon ti kinapudno, saanmon a kayat a sublian dagita a tinallikudamon a pannursuro.—Fil. 3:13.

6. Apay a makapagtalekka nga ‘agnanayon ti napudno nga ayat’ ni Jehova?

⁶ Mabalinmo met a sukimaten ti isursuro ti Biblia maipapan iti ayat ni Jehova. No maipasangoka iti pakarigatan ket pagduaduaam nga ay-ayatennaka ni Jehova, panunotem ti ibagbaga ti Salmo 136:1—ti pannakatema a teksto daytoy nga artikulo. Kalpasanna, isaludsodmo iti bagim, ‘Husto kadi daytoy a mapampanunotko? Apay nga ibagbaga ni Jehova a “napudno” ti ayatna? Apay a namin-26 a daras a naulit ti sasao nga “agnanayon ti napudno nga ayatna” iti dayta a salmo?’ Kas napagsasaritaantayon, ti napudno nga ayat ni Jehova para kadagiti agserserbi kenkuana ket napateg a pannursuro ti Biblia, a kas met laeng iti dadduma pay a pannursuro ti Biblia a naglakatayo nga inakseptar. No ngarud sumiplot iti panunotmo nga awan serserbim wenno saannaka nga ay-ayaten ni Jehova, iwaksim a dagus dayta. Ngamin, kinaulbod dayta a kas iti dadduma pay a pannursuro a tinallikudamon!

7. Mangted iti sumagmamano a teksto a mangipasigurado nga ay-ayatennaka ni Jehova.

⁷ Adu a teksto iti Biblia ti mangipasigurado nga ay-ayatennaka ni Jehova. Kas pagarigan, imbaga ni Jesus kadagiti pasurotna: “Napatpategkayo ngem iti adu a billit-tuleng.” (Mat. 10:31) Imbaga met a mismo ni Jehova iti tunggal adipenna: “Patibkerenkanto, wen, tulongankanto, talaga nga iggamankanto babaen ti kannawan nga imak ti kinalinteg.” (Isa. 41:10) Kitaem no kasano kaagpayso dagita a sasao. Saan nga imbaga ni Jesus: ‘Napatpategkayo siguro,’ ken saan met nga imbaga ni Jehova, ‘Baka tulongankanto.’ Imbes ketdi, imbagada: “Napatpategkayo” ken “Tulongankanto.” No maipasangoka iti pakarigatan ket pagduaduaam no talaga met laeng nga ay-ayatennaka ni Jehova, makatulong dagita a teksto, saan laeng a tapno lumag-an ti riknam, no di ket tapno makombinsirka nga ay-ayatennaka. Kinapudno ti ibagbaga dagita a teksto. Isu a no ikararagmo ken Jehova maipapan iti panagduaduam ken panunotem a naimbag dagita a teksto, maibagamto met ti mabasa iti 1 Juan 4:16: “Naammuantayo nga ay-ayatennatayo ti Dios ket mamatitayo iti dayta.”a

8. Ania ti mabalinmo nga aramiden no adda dagiti gundaway a pagduaduaam no talaga met laeng nga ay-ayatennaka ni Jehova?

⁸ Ngem kasano ngay no adda latta dagiti gundaway a pagduaduaam no talaga met laeng nga ay-ayatennaka ni Jehova? Ikomparam ti marikriknam iti naammuam. Laglagipem, saan a mapagtalkan ti rikna ta agbaliwbaliw dayta. Ngem ti ayat ni Jehova ket maysa a kinapudno nga isursuro ti Biblia. Isu a no pagduaduaantayo a saannatayo nga ay-ayaten ni Jehova, kas man la ibagbagatayo a saantayo a patien a ti kangrunaan a kualidad ni Jehova ket ayat.—1 Juan 4:8.

LAGLAGIPEM NGA ‘AY-AYATENNAKA’ NI JEHOVA

9-10. Ania ti konteksto ti imbaga ni Jesus nga “Ay-ayatennakayo ti Ama,” a mabasa iti Juan 16:​26, 27? (Kitaen met ti ladawan.)

⁹ Adda pay masursurotayo maipapan iti ayat ni Jehova no usigentayo ti imbaga ni Jesus kadagiti pasurotna: “Ay-ayatennakayo ti Ama.” (Basaen ti Juan 16:​26, 27.) Saan nga imbaga ni Jesus dagita tapno laeng rumagsak dagiti adalanna. Kinapudnona, ipakita ti konteksto a saan a ti rikna dagiti adalanna ti tuktukoyen ni Jesus iti dayta a gundaway. Imbes ketdi, ti isursurona idi kadakuada ket maipapan iti kararag.

¹⁰ Imbaga ni Jesus kadagiti adalanna a masapul nga agkararagda iti naganna, saan ketdi a kenkuana. (Juan 16:​23, 24) Napateg a maammuanda dayta. Kalpasan ngamin a napagungar ni Jesus, posible a pampanunoten dagiti adalanna nga agkararagda kenkuana. Siempre, nagbalin ngaminen a gayyemda ni Jesus. Mabalin koma nga impagarupda a gapu ta ay-ayaten ida ni Jesus, denggenna dagiti kiddawda ken ipakaasina dagita iti Amana. Ngem imbaga ni Jesus a saan koma a kasta ti panunotenda. Apay? Gapu ta imbagana kadakuada: “Ay-ayatennakayo ti Ama.” Dayta a kinapudno ket maysa kadagiti kangrunaan a pannursuro ti Biblia maipapan iti kararag. Kitaem ti kaipapanan dayta kenka: Idi nagadalka iti Biblia, naam-ammom ni Jesus ken inayatmo isuna. (Juan 14:21) Ngem kas kadagiti adalan idi umuna a siglo, saanka a bumdeng nga agkararag iti Dios ta ammom nga ‘ay-ayatennaka.’ Ket kada agkararagka ken Jehova, pampaneknekam a mamatika iti dayta nga imbaga ni Jesus.—1 Juan 5:14.

AMMUEM NO APAY NGA AGDUADUAKA

11. Apay a maragsakan ni Satanas no pagduaduaantayo nga ay-ayatennatayo ni Jehova?

¹¹ Apay nga adda dagiti tiempo a pagduaduaantayo no ay-ayatennatayo met laeng ni Jehova? Mabalin a mapanunottayo a naggapu dayta ken Satanas, ket agpayso met ketdi dayta. Kayatnatayo nga ‘alun-onen’ ti Diablo, ken kayatna a pagduaduaantayo nga ay-ayatennatayo ni Jehova. (1 Ped. 5:8) Kas pagarigan, ammotayo nga impaay ni Jehova ti subbot gapu ta ay-ayatennatayo. Ngem kayat ni Satanas nga iparikna a kas man la nakadakdakestayo la unayen, a saantayo a maikari iti dayta. (Heb. 2:9) Ngem siasino ti maragsakan no pagduaduaantayo nga ay-ayatennatayo ni Jehova? Ni Satanas. Ken siasino ti maragsakan no agsardengtayo nga agserbi ken Jehova gapu iti pannakaupay? Ni Satanas. Panunotem daytoy: Kayat ni Satanas a pagduaduaantayo nga ay-ayatennatayo ni Jehova. Ngem asino a talaga ti saan nga ay-ayaten ni Jehova? Ni Satanas. Laglagipentayo koma a ti maysa kadagiti “nasikap nga aramid” ni Satanas ket kayatna a panunotentayo a datayo ti saan nga ay-ayaten ni Jehova. (Efe. 6:11) No ammotayo dayta, tumibker ti determinasiontayo a ‘mangbusor iti Diablo.’—Sant. 4:7.

12-13. Apay a gapu ta nayanaktayo a managbasol ket pagduaduaantayo no dadduma a saannatayo nga ay-ayaten ni Jehova?

¹² Adda pay maysa a rason a pagduaduaantayo nga ay-ayatennatayo ni Jehova. Ania dayta? Gapu ta nayanaktayo a managbasol. (Sal. 51:5; Roma 5:12) Gapu iti basol, nadadael ti relasiontayo iti Namarsua kadatayo. Naapektaran met ti panagpampanunot, puso, ken uray ti salun-attayo.

¹³ Gapu ta managbasoltayo, adda dagiti negatibo a mariknatayo. Kas pagarigan, makonkonsiensia, madandanagan, nababa ti panagkitatayo iti bagitayo, ken makariknatayo iti bain. Baka mariknatayo dagita no makaaramidtayo iti basol. Nupay kasta, mabalin met a mariknatayo dagita gapu ta sangkapanunottayo a managbasoltayo. Ngem saan a maitunos dayta iti pannakaparsuatayo. (Roma 8:​20, 21) Kas pagarigan, panunotem daytoy: No ma-flat ti maysa a lugan, maapektaranen ti panagtarayna, saanen a kas iti manamnama a naannayas koma a panagtarayna. Arigna kastatayo met. Gapu ta managbasoltayo, naapektaranen ti panagpampanunot ken rikriknatayo, a saan a maitunos iti pannakaparsuatayo. Isu a no dadduma, pagduaduaantayo no talaga met laeng nga ay-ayatennatayo ni Jehova. No mapasamak dayta, masapul a laglagipentayo a ni Jehova a Dios ket naindaklan ken ‘mangipakpakita iti napudno nga ayat kadagidiay mangay-ayat kenkuana ken agtultulnog iti bilbilinna.’—Neh. 1:5.

14. Kasano a makatulong ti panangutob iti subbot tapno masiguradotayo a talaga nga ay-ayatennatayo ni Jehova? (Roma 5:8) (Kitaen met ti kahon nga “Agannad iti ‘Manangallilaw a Pannakabalin ti Basol.’”)

¹⁴ No dadduma, baka mariknatayo a saantayo a maikari iti panagayat ni Jehova. Ti agpayso, saantayo met a talaga a maikari ken saantayo a maitrabaho wenno mateggedan dayta. Isu a talaga a maibagatayo nga espesial unay ti ayatna para kadatayo ta intedna latta ti subbot tapno mapakawan dagiti basoltayo. Ket inaramidna dayta gapu ta ay-ayatennatayo. (1 Juan 4:10) Laglagipentayo met nga immay ni Jesus tapno isalakanna dagiti managbasol, saan a dagiti perpekto a tattao. (Basaen ti Roma 5:8.) Agkamalitayo amin, ken saan met nga ekspektaren ni Jehova a saantayo nga agkamali. Gapu iti natawidtayo a basol, adda dagiti tiempo nga agduaduatayo no talaga met laeng nga ay-ayatennatayo ni Jehova. No maawatantayo dayta, mas determinadotayo a mangiwaksi iti dayta iti panunottayo.—Roma 7:​24, 25.

AGTALINAEDKA A NAPUDNO

15-16. No agtalinaedtayo a napudno ken Jehova, ania ti masiguradotayo, ken apay? (2 Samuel 22:26)

¹⁵ Kayat ni Jehova nga agtalinaedtayo a ‘matalek kenkuana.’ (Deut. 30:​19, 20) No aramidentayo dayta, masiguradotayo nga agtalinaed a napudno kadatayo. (Basaen ti 2 Samuel 22:26.) No kanayon a napudnotayo ken Jehova, masiguradotayo a tulongannatayo nga agibtur iti aniaman a situasion a dumteng iti biagtayo.

¹⁶ Kas napagsasaritaantayon, nagadu ti rason a masapul nga agtalinaedtayo a natibker, wenno arigna nakaangkla, uray no dumteng dagiti arig bagyo a pakasuotan. Ngamin, ammotayo nga ay-ayaten ken tultulongannatayo ni Jehova. Dayta ti isursuro ti Biblia. No bilang pagduaduaantayo no talaga met laeng nga ay-ayatennatayo, laglagipentayo dagiti ammotayon a kinapudno, imbes a dagiti laeng marikriknatayo. Kanayon koma a kombinsidotayo iti isursuro ti Biblia a ti napudno nga ayat ni Jehova ket agnanayon.