Masiguradom nga Ay-ayatennaka ni Jehova

1. Apay nga indedikarmo ti biagmo ken Jehova? (Kitaen met ti ladawan.)

MALAGIPMO pay kadi idi indedikarmo ti biagmo ken Jehova? Inaramidmo dayta gapu ta naam-ammom isuna ken nasursurom nga ayaten. Inkarim nga iyun-unam iti biagmo ti pagayatanna ken itultuloymo nga ayaten iti amin a pusom, kararuam, panunotmo, ken pigsam. (Mar. 12:30) Sipud idi nagdedikarka, immuneg nga immuneg ti ayatmo kenkuana. Ania ngarud ti isungbatmo no adda mangisaludsod kenka iti, “Talaga kadi nga ay-ayatem ni Jehova?” Sigurado a dagus nga ibagam, “Siempre! Isu ti kapatgan kaniak. Awanen ti sabali a mas ay-ayatek no di isuna!”

2-3. Ania ti kayat ni Jehova a masiguradotayo, ken ania ti pagsasaritaantayo iti daytoy nga artikulo? (Jeremias 31:3)

² Ngem kasano ngay no adda mangisaludsod kenka, “Siguradoka kadi nga ay-ayatennaka ni Jehova?” Baka saanka a dagus a makasungbat. Ngamin, baka pampanunotem a saanka a maikari iti ayat ni Jehova. Imbaga ti maysa a sister a dimmakkel iti saan a nadungngo a pamilia: “Ay-ayatek ni Jehova. Siguradoak iti dayta. Ngem masansan nga agduaduaak no talaga nga ay-ayatennak ni Jehova.” No kasta, ania ti makatulong tapno maammuam no talaga nga ay-ayatennaka ni Jehova?

³ Kayat ni Jehova a kombinsidoka nga ay-ayatennaka. (Basaen ti Jeremias 31:3.) Kinaagpaysuanna, ni Jehova a mismo ti nangyasideg kenka kenkuana. Ket idi indedikarmo ti biagmo kenkuana ken nagpabautisarka, adda nakapatpateg nga inregalona kenka. Ania dayta? Ti napudno nga ayatna. Kayatna a sawen, ay-ayatennaka la unay ken awanto a pulos ti kanito a panawannaka. Gapu iti napudno nga ayat ni Jehova kadagiti matalek nga adipenna, ibilangna amin ida kas ‘maipatpateg a sanikuana,’ ket karamanka kadakuada. No kasta, espesialka unay kenkuana. (Mal. 3:​17, ftn.) Kombinsido idi ni apostol Pablo nga ay-ayaten isuna ni Jehova. Isu nga insuratna: “Kombinsidoak nga uray ti ipapatay wenno ti biag wenno dagiti anghel wenno dagiti gobierno wenno ti bambanag nga addan wenno ti bambanag nga umayto wenno dagiti pannakabalin wenno ti kangato wenno ti kauneg wenno ti aniaman a sabali pay a parsua ket saandatayo a kabaelan nga isina iti ayat ti Dios.” (Roma 8:​38, 39) Kayat met ni Jehova a kombinsidoka nga ay-ayatennaka. Iti daytoy nga artikulo, pagsasaritaantayo no apay a masapul a patientayo nga ay-ayatennatayo ni Jehova ken no ania dagiti masapul nga aramidentayo tapno ad-adda a masiguradotayo nga ay-ayatennatayo.

NO APAY A MASAPUL A PATIENTAYO NGA AY-AYATENNATAYO NI JEHOVA

4. Kasanotayo a labanan ti maysa kadagiti nasikap nga aramid ni Satanas?

⁴ No patientayo nga ay-ayatennatayo ni Jehova, malabanantayo ti maysa kadagiti “nasikap nga aramid” ni Satanas. (Efe. 6:11) Aramiden ni Satanas ti amin tapno mapasardengnatayo nga agserbi ken Jehova. Maysa a nasikap nga aramidna ket ti panangipariknana a saannatayo nga ay-ayaten ni Jehova. Ditay liplipatan nga ulbod ken oportunista ni Satanas. Masansan a gundawayannatayo no nakapuy, nabannog, wenno nalidaytayo gapu iti nasaem a napalabas, agdama a problema, wenno no madanagantayo iti mabalin a mapasamak iti masanguanan. (Prov. 24:10) Ibaga ti Biblia a ni Satanas ket kas iti leon. (1 Ped. 5:​8, 9) Kayat dagiti leon a puntiriaen dagiti awan gawayna ken nakapuy. Isu a kayat ni Satanas a gundawayan ti kinakapuytayo tapno agsardengtayo nga agserbi ken Jehova. Ngem no itultuloytayo a pabilgen ti pammatitayo nga ay-ayatennatayo ni Jehova, kabaelantayo a ‘busoren ti Diablo’ ken malabanantayo dagiti panangallilaw ken taktikana.—Sant. 4:7.

5. Apay a napateg a mariknatayo nga ay-ayaten ken ipatpategnatayo ni Jehova?

⁵ No patientayo nga ay-ayatennatayo ni Jehova, ad-adda a tumibker ti relasiontayo kenkuana. Apay? Pinarsuanatayo ngamin ni Jehova nga agayat ken maayat. No adda mangay-ayat kadatayo, natural laeng nga ayatentayo met. Isu a no ad-adda a mariknatayo nga ay-ayaten ken ipatpategnatayo ni Jehova, ad-adda met nga ayatentayo isuna. (1 Juan 4:19) Bayat nga umun-uneg ti panagayattayo kenkuana, umun-uneg met ti panagayatna kadatayo. Nalawag ti ibagbaga ti Biblia: “Umasidegkayo iti Dios, ket umasidegto kadakayo.” (Sant. 4:8) Ania ngarud dagiti masapul nga aramidentayo tapno ad-adda a masiguradotayo nga ay-ayatennatayo ni Jehova?

ANIA TI MAKATULONG TAPNO AGTALEKTAYO NGA AY-AYATENNATAYO NI JEHOVA?

6. Ania ti ikararagmo no saanka a sigurado nga ay-ayatennaka ni Jehova?

⁶ Kanayonmo a kiddawen ken Jehova a tulongannaka a mangtarus no apay nga ay-ayatennaka. (Luc. 18:1; Roma 12:12) Ikararagmo ken Jehova a tulongannaka a mangammo no apay nga ay-ayatennaka. No kasapulan, mamin-adu nga aramidem dayta iti kada aldaw. Adda dagiti tiempo a masuronka iti bagim ta nagrigatmo a patien nga ay-ayatennaka ni Jehova. Ngem laglagipem a dakdakkel ni Jehova ngem iti pusom. (1 Juan 3:​19, 20) Mas am-ammonaka ni Jehova ngem iti asinoman. Makitkitana dagiti nasayaat a kualidadmo uray no saanmo a makitkita dagita. (1 Sam. 16:7; 2 Cron. 6:30) Isu nga ‘iyebkasmo’ kenkuana dagiti linaon ti pusom. Kiddawen met a tulongannaka a mangkombinsir iti bagim nga ay-ayatennaka. (Sal. 62:8) Kalpasanna, masapul nga aramidem dagiti sumaganad a suhestion.

7-8. Kasano nga ipasigurado kadatayo ti Salmo nga ay-ayatennatayo ni Jehova?

⁷ Agtalekka iti Sao ni Jehova. Impaisuratna ti Biblia tapno maammuantayo no asino a talaga isuna. Kitaem ti nagpintas a panangdeskribir ni salmista David ken Jehova. Kunana: “Asideg ni Jehova kadagiti nasaktan ti pusoda; isalakanna dagidiay maup-upay.” (Sal. 34:​18, ftn.) No nakalidlidayka, mabalin a mapanunotmo nga awan ti makaawat iti marikriknam wenno awan ti makatulong kenka. Ngem ikarkari ni Jehova a kadagita a tiempo, asideg isuna kenka. Makitkitana a kasapulam unay ti tulongna. Insurat pay ni David: “Urnongem koma dagiti luluak iti lalat a pagkargaam.” (Sal. 56:8) Makitkita ni Jehova no malidliday ken marigrigatanka. Ipatpategnaka unay ken marikriknana ti saem a marikriknam. Para iti agdaldaliasat iti desierto, napateg kenkuana ti tunggal tedted ti danum iti lalat a pagkargaanna. Kasta met, napateg ken Jehova ti tunggal tedted dagiti luam ken malaglagipna ti tunggal sangit ken panagrigrigatmo. Kuna ti Salmo 139:3: “Ammom [Jehova ti] amin nga ar-aramidek.” Makitkita ni Jehova ti amin nga ar-aramidem, ngem ti kangrunaan a kitkitaenna ket dagiti nasayaat nga ar-aramidem. (Heb. 6:10) Apay? Gapu ta ap-apresiarenna ti tunggal panangikagumaam a mangparagsak kenkuana.a

⁸ Us-usaren ni Jehova dagiti kasta a makaliwliwa a teksto iti Biblia tapno arigna ibagana kenka: “Kayatko a maammuam nga ay-ayaten ken ipatpategka unay.” Ngem kas iti naammuantayon, kayat ni Satanas a patientayo a saannatayo nga ay-ayaten ni Jehova. Isu a no agduaduaka no ay-ayatennaka ni Jehova, panunotem ken isaludsodmo iti bagim, ‘Asino ti patiek—“ti ama ti kinaulbod” wenno “ti Dios ti kinapudno”?’—Juan 8:44; Sal. 31:5.

9. Ania ti ipaspasigurado ni Jehova kadagiti mangay-ayat kenkuana? (Exodo 20:​5, 6)

⁹ Panunotem ti marikrikna ni Jehova kadagiti mangay-ayat kenkuana. Kitaem ti imbaga ni Jehova ken Moises ken kadagiti Israelita. (Basaen ti Exodo 20:​5, 6.) Inkari ni Jehova nga itultuloyna nga ipakita ti napudno nga ayat kadagiti mangay-ayat kenkuana. Gapu ta napudno ni Jehova, masiguradotayo a no ayatentayo, ayatennatayo met. (Neh. 1:5) Isu a no ipagarupmo a saannaka nga ay-ayaten, isaludsodmo iti bagim, ‘Ay-ayatek kadi ni Jehova?’ Panunotem daytoy: No ay-ayatem ken ar-aramidem ti amin tapno maparagsakmo isuna, masiguradom nga ay-ayatennaka met unay. (Dan. 9:4; 1 Cor. 8:3) Iti sabali a pannao, no siguradoka nga ay-ayatem ni Jehova, apay ngarud a pagduaduaam nga ay-ayatennaka? Talaga a masiguradom a kanayon nga ayatennaka ken dinakanto pulos panawan.

10-11. Ania ti kayat ni Jehova a laglagipem maipapan iti subbot? (Galacia 2:20)

¹⁰ Utobem ti subbot. Ti kapatgan a regalo ni Jehova kadagiti tattao ket ti subbot nga impaay ni Jesu-Kristo. (Juan 3:16) Ngem dayta kadi a regalo ket para met kenka? Wen! Usigem ti kapadasan ni apostol Pablo. Nakaaramid kadagiti nadagsen a basol sakbay a nagbalin a Kristiano. Ken uray idi nagbalinen a Kristiano, adda latta dagiti pagkapuyan a lablabananna. (Roma 7:​24, 25; 1 Tim. 1:​12-14) Ngem kombinsido unay ni Pablo a ti subbot ket regalo met kenkuana ni Jehova. (Basaen ti Galacia 2:20.) Laglagipem a ni Jehova a mismo ti nangipaisurat ken Pablo kadagita a sasao. Ken amin a naisurat iti Biblia ket naisurat a pakasursuruantayo. (Roma 15:4) Ipakita dagita a sasao ni Pablo a kayat ni Jehova nga ibilangmo ti subbot kas personal a regalona kenka. No kasta ti panangmatmatmo iti subbot, mas kombinsidoka nga ay-ayatennaka ni Jehova.

¹¹ Agyamantayo ken Jehova ta imbaonna ni Jesus ditoy daga tapno matay para kadatayo. Ngem ti sabali pay a rason nga immay ni Jesus ditoy daga ket tapno ipakaammona ti kinapudno maipapan iti Dios. (Juan 18:37) Karaman iti dayta ti kinapudno nga ay-ayatennatayo ni Jehova kas annakna.

NO KASANO A TULTULONGANNATAYO NI JESUS TAPNO PATIENTAYO NGA AY-AYATENNATAYO NI JEHOVA

12. Apay a patientayo ti imbaga ni Jesus maipapan ken Jehova?

¹² Idi adda ni Jesus ditoy daga, pagay-ayatna nga ibaga kadagiti tattao ti maipapan iti kinasiasino ni Jehova. (Luc. 10:22) Patientayo ti imbaga ni Jesus maipapan ken Jehova. Apay? Ngamin, binilionen a tawen a nagkadua da Jehova ken Jesus idiay langit sakbay nga immay ni Jesus ditoy daga. (Col. 1:15) Narikna a mismo ni Jesus no kasano kauneg ti panagayat ti Amana kenkuana. Nakitana met no kasano nga ay-ayaten unay ti Amana dagiti matalek nga anghel ken dagiti matalek nga annakna ditoy daga. Kasano ngarud a tultulongan ni Jesus ti dadduma tapno patienda nga ay-ayaten ida ti Dios?

13. Ania ti kayat ni Jesus a maammuantayo maipapan iti talaga a marikrikna ni Jehova kadatayo?

¹³ Kayat ni Jesus a maammuantayo ti talaga a marikrikna ni Jehova kadatayo. Kadagiti Ebanghelio, nasurok a 160 a daras a tinukoy ni Jesus ni Jehova kas “Ama.” Idi met kasarsaritana dagiti pasurotna, inusarna dagiti termino kas “ti Amayo” wenno “ni Amayo nga adda idiay langit.” (Mat. 5:16; 6:26) Sakbay nga immay ni Jesus ditoy daga, dagiti matalek nga adipen ni Jehova inawaganda ni Jehova kas ti ‘Mannakabalin-amin,’ ‘ti Kangatuan,’ ti ‘Naindaklan a Namarsua,’ ken dadduma pay nga umasping a termino. Ngem masansan nga inawagan ni Jesus ni Jehova iti ‘Ama.’ Ipakita dayta a termino a kayat ni Jehova nga agbalin a nasinged kenkuana dagiti adipenna a kas iti kinasinged ti maysa nga anak iti nadungngo nga amana. Nalawag ngarud nga isursuro ni Jesus nga ay-ayatennatayo ni Jehova a kas iti panagayat ti maysa nga ama kadagiti ipatpategna nga annak. Kitaentayo ti dua a pagarigan nga inusar ni Jesus ti termino nga “Ama.”

14. Kasano nga impakita ni Jesus nga ipatpateg ti nailangitan nga Amatayo ti tunggal maysa kadatayo? (Mateo 10:​29-31) (Kitaen met ti ladawan.)

¹⁴ Umuna, kitaentayo ti imbaga ni Jesus iti Mateo 10:​29-31. (Basaen.) Imbaga ni Jesus nga ammo ti Amatayo ti eksakto nga ayan ti tunggal maysa kadagita a babassit a billit. Ngem ti maysa a billit saanna a maayat ni Jehova ken saan a makapagdaydayaw kenkuana. No ipatpateg unay ni Jehova ti maysa a nagbassit a billit, masiguradotayo a mas ipatpategna ti tunggal maysa kadatayo gapu ta ay-ayaten ken agdaydayawtayo kenkuana! Imbaga met ni Jesus nga ammo ti Amatayo ti kaadu ti ‘bilang ti buok iti ulotayo.’ Gapu ta ammo ni Jehova uray dagiti nagbabassit a detalye maipapan kadatayo, talaga a masiguradotayo nga ipatpategnatayo la unay. Nalawag ngarud a kayat ni Jesus a patientayo nga ipatpateg ti nailangitan nga Amatayo ti tunggal maysa kadatayo.

15. Ania ti ipakita ti imbaga ni Jesus iti Juan 6:44 maipapan iti nailangitan nga Amam?

¹⁵ Kitaentayo ti maikadua a pagarigan nga inusar ni Jesus ti termino nga “Ama.” (Basaen ti Juan 6:44.) Ti mismo a nailangitan nga Amam ti nangyasideg kenka iti kinapudno ken timmulong kenka a mangam-ammo ken mangayat kenkuana. Apay nga inaramidna dayta? Gapu ta adda nakitana a naimbag iti pusom. (Ara. 13:48) Idi imbaga ni Jesus dagiti nadakamat iti Juan 6:​44, mabalin a ti tuktukoyenna ket dagiti imbaga ni Jehova iti Jeremias 31:3 a pannakatema a tekstotayo. Imbaga ni Jehova kadagiti adipenna: “Inyasidegka kaniak babaen ti napudno nga ayat [wenno, intultuloyko nga impakita kenka ti napudno nga ayat].” (Jer. 31:3; ftn.; idilig ti Oseas 11:4.) Panunotem ti kaipapanan dayta. Kanayon a kitkitaen ni Jehova dagiti nasayaat a kualidadmo a posible a saanmo a makitkita iti mismo a bagim.

16. (a) Ania ti arigna ibagbaga kadatayo ni Jesus, ken apay a patientayo isuna? (b) Kasano a mapabilegmo ti panagtalekmo a ni Jehova ti Ama a kasapulam? (Kitaen ti kahon a “Ti Ama a Kasapulantay Amin.”)

¹⁶ Idi dinakamat ni Jesus ni Jehova kas ti Amatayo, kas man la ibagbagana: “Amak ni Jehova; ngem Amam met isuna. Ket ipaspasiguradok kenka nga ay-ayaten ken ipatpategnaka.” Isu a no pagduaduaam no ay-ayatennaka ni Jehova, panunotem ken isaludsodmo iti bagim, ‘Ni Jesus ti makaam-ammo unay ken Jehova ken kanayon a pudno ti ibagbagana. Isu nga apay koma a diak mamati kenkuana?’—1 Ped. 2:22.

ITULTULOYMO A PABILGEN TI PANAGTALEKMO NGA AY-AYATENNAKA NI JEHOVA

17. Apay a masapul nga itultuloytayo a pabilgen ti panagtalektayo nga ay-ayatennatayo ni Jehova?

¹⁷ Masapul nga itultuloytayo a pabilgen ti panagtalektayo nga ay-ayatennatayo ni Jehova. Kas naammuantayon, ar-aramiden ni Satanas ti amin a kabaelanna tapno mapasardengnatayo nga agserbi ken Jehova. Kayatna nga agduaduatayo ken panunotentayo a saannatayo nga ay-ayaten ni Jehova. Dimo pulos patien ti kinaulbod ni Satanas!—Job 27:5.

18. Ania dagiti aramidem tapno kanayon a patiem nga ay-ayatennaka ni Jehova?

¹⁸ Iti daytoy nga artikulo, naammuam dagiti aramidem tapno masiguradom nga ay-ayatennaka ni Jehova. Itultuloymo nga ikararag a tulongannaka a mangkita kadagiti nasayaat a kualidadmo a makitkitana kenka. Panunotem a naimbag dagiti teksto ti Biblia a mangiladawan iti kinadungngo ni Jehova kadagiti mangay-ayat kenkuana. Laglagipem a kanayon nga ipakita ni Jehova ti ayatna kadagiti mangay-ayat kenkuana. Dimo liplipatan a ti subbot ket personal a regalona kenka. Agtalekka met iti imbaga ni Jesus a ni Jehova ti nailangitan nga Amam. Isu a no addanto mangdamag kenka: “Siguradoka kadi nga ay-ayatennaka ni Jehova?” sigurado a ti sungbatmo ket: “Wen, ay-ayatennak! Ken inaldaw nga ar-aramidek ti amin a kabaelak tapno maipakitak nga ay-ayatek met isuna!”