Mangliwliwa Uray Agsaksakit

Ni Clodean ket maysa a Saksi ni Jehova ken taga-South Africa. Nayospital gapu ta masapul a maoperaan. Adu ti komplikasion ti sakitna ket masapul nga agpili iti pannakaagasna. Sakbay ken kalpasan ti operasionna, alisto a mabannog, agpapaut-ot, ken mais-stress. Dandani 10 a lawas kalpasan a nakaawid, saan pay latta a makabangon. Ken gapu iti COVID-19 pandemic, saan a mabalin ti bumisita kenkuana.

Determinado ni Clodean a saan a mangay-ay iti bagina isu a nagpatulong iti Dios nga ikkanna iti bileg a mangliwliwa iti sabsabali. Isu nga idi makabangonen, kinontakna ti ading ti kaarrubana, a dati a makipagad-adal kadagiti Saksi ngem nagsardengen. Nangibaga ni Clodean iti makaparegta a bersikulo iti Sao ti Dios, ket natignay ti babai a mangituloy iti panagadalna. Inlawlawagna met dagiti pagsayaatan ti pannakigimong, sa siniguradona a makakonektar ti iyad-adalanna iti gimong ti kongregasion babaen ti videoconference. Kimmonektar ti babai iti gimong ket nagkomento pay ketdi iti saludsod ken sungbat a paset ti programa.

Nakisarita met ni Clodean iti in-inaudi nga ading ti iyad-adalanna, a magagaran met a makipagadal iti Biblia. Imbagana pay ketdi ken Clodean ti dadduma a posible nga interesado. Ania ti resultana? Nairugi ni Clodean nga iyadalan iti Biblia ti uppat pay a babbai. Ngem saan la a dayta ti napasamak!

Gapu iti naimpusuan nga interes ni Clodean iti sabsabali, nakairugi iti panangyadal iti Biblia iti 10 pay a babbai—amin ket bayat ti pandemic—isu a 16 aminen ti iyad-adalanna! Regularen nga umat-atender iti gimong ti dadduma kadakuada babaen ti videoconference. Gapu kadagitoy nga ar-aramiden ni Clodean, saanna a sangkapanunot ti situasionna. Mariknana met a gapu ta ni Jehova—ti “Dios ti amin a liwliwa”—liniwliwana isuna kadagiti pakasuotanna, naliwliwana met ti sabsabali.—2 Corinto 1:3, 4.

Ania ti makuna dagiti iyad-adalan ni Clodean maipapan iti nasursuroda? Imbaga ti maysa kadakuada: “Adu ti naitulong kaniak dagiti naadalko. Ngem ti kasayaatan a nasursurok ket ti nagan ti Dios. Daytoy ti timmulong kaniak nga umasideg ken Jehova.” Ti umuna a babai a kinontak ni Clodean ket dandanin agpabautisar. Nakaragragsak ni Clodean gapu kadagitoy a kapadasanna. Ken immimbagen ti operasionna.