Nakaam-amak a Panagpaltopaltog iti Intero a Lubong—Ania ti Ibaga ti Biblia?

Bayat ti Hulio 2022, adda dagiti nakabutbuteng ken naranggas a panagpaltopaltog a napasamak iti intero a lubong:

• “Nagdanag dagiti umili ti Japan idi napapatay ti prominente a politiko [dati a Prime Minister Shinzo Abe]. Nakigtot met ti intero a lubong nangruna ta nababa ti krimen ken istrikto dagiti linteg iti panagusar iti paltog ditoy Japan.”—Hulio 10, 2022, The Japan Times.

• “Nakigtot dagiti umili ti Denmark idi adda nagpaltopaltog iti maysa a shopping mall idiay Copenhagen a nakatayan ti tallo a tattao.”—Hulio 4, 2022, Reuters.

• “South Africa: 15 ti natay iti panagpaltopaltog iti maysa a bar iti ili ti Soweto.”—Hulio 10, 2022, The Guardian.

• “Nasurok a 220 ti napaltogan ken natay iti U.S. bayat ti holiday weekend ti Hulio 4.”—Hulio 5, 2022, CBS News.

Adda kadi namnama nga agpatingga ti kasta a kinaranggas? Ania ti ibaga ti Biblia?

Panagpatingga ti Kinaranggas

Deskribiren ti Biblia ti panawentayo kas “maudi nga al-aldaw,” tiempo a dagiti tattao ket nauyong, bayolente, ken naranggas. (2 Timoteo 3:1, 3) Gapu kadagita a kinaranggas, agbibiagen dagiti tattao iti buteng. (Lucas 21:11) Nupay kasta, ikarkari ti Biblia nga addanto tiempo nga agpatingga ti kinaranggas ken “agnaedto [dagiti tattao] iti natalna a lugar, kadagiti natalged ken natalna a paginanaan.” (Isaias 32:18) Kasano nga agpatingga ti kinaranggas?

Pukawento ti Dios ti amin a dakes a tattao ken dadaelenna ti amin nga armas.

• “Maikkatto dagiti dakes ditoy daga, ken mapukawto dagiti manangallilaw.”—Proverbio 2:22.

• “Pagsarsardengen [ti Dios] dagiti gubat iti intero a daga. Tukkolenna dagiti pana ken putdenna dagiti pika; puoranna dagiti lugan ti militar.”—Salmo 46:9.

Ikkatento ti Dios ti ramut ti kinaranggas babaen ti panangisurona kadagiti tattao nga agbiag a natalna.

• “Saandanto a pulos mangdangran wenno mangdadael iti intero a nasantuan a bantayko, ta sigurado a mapnonto ti daga iti pannakaammo maipapan ken Jehova kas iti pannakapunno ti baybay iti danum.”—Isaias 11:9.

• Uray ita, isursuron ti Dios dagiti tattao iti intero a lubong a mangliklik iti kinaranggas ken iti panagusar iti armas, a ‘pitpitenda ti espadada a pagbalinen a subsob ti arado ken dagiti pikada a pagbalinen a kumpay.’—Mikias 4:3.

Tapno maammuam ti ad-adu pay maipapan iti kari ti Biblia a lubong nga awanan iti buteng, basaem ti artikulo nga “Awanton ti Buteng Posible Ngata?”

Tapno maammuam ti ad-adu pay maipapan iti permanente a solusion ti kinaranggas, basaem ti artikulo a “Talna Ditoy Daga Kamaudiananna!”