Kannigid: Bagyo nga Ian, Florida, USA, Septiembre 2022 (Sean Rayford/Getty Images); tengnga: Agina nga agbakbakuit, Donetsk, Ukraine, Hulio 2022 (Alex Chan Tsz Yuk/SOPA Images/LightRocket via Getty Images); kannawan: Mass COVID testing, Beijing, China, Abril 2022 (Kevin Frayer/Getty Images)
AGTULTULOYKAYO NGA AGBANTAY!
2022: Tawen a Napno iti Problema—Ania ti Ibaga ti Biblia?
Bayat ti 2022, dagiti gubat, kinarigat ti ekonomia, ken kalamidad ket kanayon a linaon dagiti damdamag. Ti Biblia laeng ti makailawlawag no apay a mapaspasamak dagita.
No apay a napno iti problema ti 2022
Gapu kadagiti napasamak iti 2022, lallalo a nalawlawag nga agbibiagtayon iti aw-awagan ti Biblia a “maudi nga al-aldaw.” (2 Timoteo 3:1) Nangrugi dayta a tiempo idi 1914. Kitaem no kasano a dagiti nabiit pay a pasamak ket kapada dagiti impakpakauna ti Biblia a mapasamak iti kaaldawantayo:
‘Dagiti gubat.’—Mateo 24:6.
“2022—Ti Tawen a Napadasan Manen ti Europe Dagiti Nakabutbuteng nga Epekto ti Gubat.”a
Kitaem ti artikulo nga “Inatakaren ti Russia ti Ukraine.”
“Bisin.”—Mateo 24:7.
“2022: Ti Tawen ti Nagkaro a Bisin.”b
Kitaem ti artikulo a “Krisis iti Makan iti Intero a Lubong—Kimmaro Gapu iti Gubat Idiay Ukraine.”
“Makapapatay a saksakit.”—Lucas 21:11.
“Immadu manen dagiti addaan iti polio, ken agtultuloy nga umad-adu dagiti makapkaptan iti monkeypox ken COVID-19. Ipakita dagita a nakadeldelikado dagiti makaakar a sakit ken awan ti maaramidan ti tao a mangpasardeng kadagita.”c
Kitaem ti artikulo nga “6 a Milionen ti Natay iti COVID.”
“Dagiti nakabutbuteng a buya.”—Lucas 21:11.
“Dagiti heatwave wenno sobra a pudot, tikag, uram iti kakaykaywan, ken layus. Saan a malipatan ti summer iti 2022 gapu iti nakaro a panagbaliwbaliw ti paniempo a nagresulta iti adu a perhuisio ken ipapatay ti rinibu a tattao. Naawanan met iti balay ti minilion a tattao iti intero a lubong.”d
Kitaem ti artikulo a “Sobra a Pudot iti Intero a Lubong.”
‘Dagiti riribuk [wenno, “panaggugulo,” ftn.].’—Lucas 21:9.
“Makapungtot dagiti tattao gapu kadagiti problema iti ekonomia, aglalo ti ingingina dagiti gagatangen, isu nga immadu ti nagprotesta laban iti gobierno idi 2022.”e
Kitaem ti artikulo a “Panagngina Dagiti Gagatangen iti Intero a Lubong.”
Ania ngata ti mapasamak inton 2023?
Ditay ammo. Ti laeng ammotayo ket dandanin balbaliwan ti Pagarian ti Dios, wenno ti nailangitan a gobierno, ti kasasaad ditoy daga. (Daniel 2:44) Ikkatento dayta a gobierno ti ramut ti panagrigat ti tao ken siguraduenna a maaramid ti pagayatan ti Dios ditoy daga.—Mateo 6:9, 10.
Pangngaasim ta aramidem ti imbaga ni Jesu-Kristo nga ‘itultuloymo ti agbantay,’ gapu ta dagiti mapaspasamak iti lubong ket ebidensia a matungtungpalen dagiti padto ti Biblia. (Marcos 13:37) Kontakennakami tapno maammuam ti ad-adu pay no kasano a matulongannaka ti Biblia ita ken no kasano a maikkannaka ken ti pamiliam iti pudpudno a namnama para iti nasaysayaat a masakbayan.
a AP News, “2022 Was Year the Horror of War Returned to Europe,” ni Jill Lawless, Disiembre 8, 2022.
b World Food Programme, “A Global Food Crises.”
c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” ni Lawrence O. Gostin, JD, Septiembre 22, 2022.
d Earth.Org, “What’s Behind the Record-Breaking Extreme Weather Events of Summer 2022?” ni Martina Igini, Oktubre 24, 2022.
e Carnegie Endowment for International Peace, “Economic Anger Dominated Global Protests in 2022,” da Thomas Carothers ken Benjamin Feldman, Disiembre 8, 2022.