Apay a Pagsisinaen ti Politika Dagiti Tattao?—Ania ti Ibaga ti Biblia?

Iti intero a lubong, adu a nasion ti nabingaybingay gapu iti politika. Sigun iti surbey ti Pew Research Center idi 2022, “65% kadagiti adulto iti 19 a pagilian a nasurbey ti nangibaga nga adda nakaro wenno nakakarkaro a di pagkikinnaawatan dagiti tattao iti pagilianda gapu ta agduduma a partido ti politika ti supsuportaranda.”

Mapalpaliiwmo met kadi a kumarkaro ti panagsisina dagiti tattao iti lugaryo gapu iti politika? Apay? Adda kadi solusionna? Kitaem ti ibagbaga ti Biblia.

Kababalin a mangdaddadael iti panagkaykaysa

Impakpakauna ti Biblia nga iti tiempotayo, a maawagan iti “maudi nga al-aldaw,” imposible ti panagkaykaysa gapu iti kababalin ti adu a tattao.

• “Iti maudi nga al-aldaw, dumtengto dagiti delikado ken narigat a tiempo. Ta ay-ayatento laeng dagiti tattao ti bagbagida, . . . saanda a kayat ti makitulag.”—2 Timoteo 3:1-3.

Uray no ar-aramiden dagiti tattao ti amin a kabaelanda tapno nasayaat ti gobiernoda, saanda nga agballigi. Gapu ta agduduma ti kapanunotan dagiti tattao, narigat wenno imposible pay ketdi nga agkaykaysada a mangsolbar kadagiti problema. Ipakita dayta a pudno ti nabayagen nga imbaga ti Biblia.

• “Iturturayan ti tao ti padana a tao iti pakadangranna.”—Eclesiastes 8:9.

Ngem ibaga ti Biblia ti solusion—maysa a gobierno nga idauluan ti maysa a makaikkat iti amin a problema a mangparparigat kadagiti tattao ita.

Kualipikado ken mannakipagrikna a lider

Ibaga ti Biblia ti lider a kualipikado unay: ni Jesu-Kristo. Adda pannakabalin ken autoridad ni Jesus. Ken kayatna nga adda talna ken panagkaykaysa iti amin a tattao.

• “Bayat ti panagturayna, umadunto dagiti nalinteg, ken agsaknapto ti talna.”—Salmo 72:7.

• “Agserbinto kenkuana ti amin a nasion.”—Salmo 72:11.

Ni Jesus ti kasayaatan a lider ta mannakipagrikna ken kayatna a tulongan dagiti tattao, lalo dagidiay saan a patas ti pannakatratoda.

• “Ispalennanto dagiti napanglaw nga agpatpatulong, agraman dagiti marigrigat ken ti asinoman nga awan katulonganna. Maasianto kadagiti marigrigat ken napanglaw, ket ispalennanto ti biag dagiti napanglaw. Isalakannanto ida iti pannakairurumen ken iti kinaranggas.”—Salmo 72:12-14.

Ammuem ti ad-adu pay maipapan iti Pagarian ti Dios, ti nailangitan a gobierno a ni Jesus ti agturay. Ammuem no kasano a masuportaram ti panagturayna ken no kasano a pagimbagam dayta.

• Buyaem ti video nga Ania ti Pagarian ti Dios?

• Basaem ti artikulo a “Pagarian ti Dios—Maysa a Gobierno nga Awanan Kurapsion.”