Talaga Kadi a Pagkaykaysaen ti Olympics Dagiti Tattao?—Ania ti Ibaga ti Biblia?

Iti 2024 Summer Olympics, natantia a lima a bilion ti agbuybuya kadagiti agay-ayam nga atleta a naggapu iti 206 a pagilian. “Karamantayo iti maysa nga okasion a mamagkaykaysa iti lubong,” imbaga ni Thomas Bach, presidente ti International Olympic Committee. “Aramidentayo koma ti panggep ti Olympics a pagkakappiaen ken pagkaykaysaen ti amin a tattao uray naidumatayo iti maysa ken maysa.”

Maaramid kadi ti Olympics dagiti kasta a nagsayaat a panggep? Posible kadi ti pudpudno a kappia ken panagkaykaysa?

Mapagkakappia ken mapagkaykaysana kadi dagiti tattao?

Para iti adu, ti Olympics ita a tawen ket saan laengen a basta isports. Nalawag a nakita iti dayta nga sports event dagiti isyu iti komunidad ken politika a mamagsisina kadagiti tattao. Karaman kadagita nga isyu ti maipapan iti kalintegan ti tao ken panangidumduma gapu iti puli, relihion, wenno gapu ta lalaki wenno babai ti maysa.

Adu a tattao ti agen-enjoy kadagiti internasional nga sports event kas iti Olympics. Ngem ipakita ken iparegta met dagita nga sports event dagiti ugali ken ar-aramid dagiti tattao a mamagsisina imbes a mangyeg iti manayon a kappia ken panagkaykaysa.

Impakpakauna ti Biblia dagiti ugali dagiti tattao ita. Dagita ti rason a narigat a maadda ti panagkaykaysa iti lubong. (2 Timoteo 3:1-5) Tapno maammuam ti ad-adu pay maipapan iti daytoy a padto ti Biblia, basaem ti artikulo nga “Impakpakauna Kadi ti Biblia ti Kababalin ken Ar-aramid Dagiti Tattao Ita?”

Ti pudno a kappia ken panagkaykaysa iti intero a lubong

Mabasa iti Biblia ti pudno a namnama a kappia ken panagkaykaysa para iti intero a lubong. Ikarkarina nga amin a tattao ditoy daga ket agkaykaysanto iti panagturay ti nailangitan a gobierno a maawagan “Pagarian ti Dios.”—Lucas 4:43; Mateo 6:10.

Ipaayto ni Jesu-Kristo nga Ari dayta a Pagarian ti talna iti intero a lubong. Ibaga ti Biblia:

• “Umadunto dagiti nalinteg, ken agsaknapto ti talna.”—Salmo 72:7.

• “Ispalennanto dagiti napanglaw nga agpatpatulong . . . Isalakannanto ida iti pannakairurumen ken iti kinaranggas.”—Salmo 72:12, 14.

Agkaykaysa uray itan ti minilion a tattao iti 239 a pagilian gapu iti pannursuro ni Jesus. Kas Kristiano, nasursuro dagiti Saksi ni Jehova iti intero a lubong no kasano ti makikappia. Tapno maammuam ti ad-adu pay, basaem ti magasin a Pagwanawanan a napauluan iti “Mapasardengtayo ti Panagwaras ti Gura.”