Thomas Jackson/Stone via Getty Images
AGTULTULOYKAYO NGA AGBANTAY!
Panangbirok iti Namnama iti 2024—Ania ti Ibaga ti Biblia?
Adu ti mangpampanunot nga iti tawen 2024, awan latta ti solusion dagiti problema iti lubong. Ngem adda masarakantayo a namnama para iti masanguanan. Sadino?
Mangted ti Biblia iti namnama
Gapu kadagiti problema ita, kasla awanen ti nasayaat a masakbayan. Ngem ikarkari ti Biblia a solbarento ti Dios dagita. Asidegen a ‘punasen ti Dios ti amin a lua kadagiti matatayo, ken awanton ni patay. Awanto metten ti panagladingit wenno panagsangit wenno ut-ot.’—Apocalipsis 21:4.
Tapno maammuam ti ad-adu pay a kari ti Biblia para iti masanguanan, basaem ti artikulo nga “Adda Nasaysayaat a Masakbayan.”
Kasano a matulongannaka ita ti Biblia?
Mangted ti Biblia iti namnama para iti masanguanan a tumulong tapno malabanam dagiti negatibo a rikrikna ken maaddaanka iti mas positibo a panangmatmat iti biag. (Roma 15:13) Makatulong met kenka dagiti praktikal a balakad iti Biblia tapno makayam a sanguen dagiti problema a mabalin a mapaspasaram ita, kas iti kinapanglaw, kinaawan hustisia, ken sakit.
Ammuem no kasano a nakatulong iti maysa a lalaki ti namnama manipud iti Biblia tapno agbalin a natalna ken naragsak ti biagna uray no dimmakkel a napanglaw ti pamiliana. Buyaem ti video a Juan Pablo Zermeño: Inikkannak ni Jehova iti Makapnek a Biag.
Kitaem no kasano a makatulong kenka ti Biblia no makariknaka iti pannakakonsiensia, kinaliday, panagdandanag, ken pannakaulila. Basaem ti artikulo a “Makasarakak Kadi iti Makaliwliwa a Sasao iti Biblia?”
Kitaem no kasano a nangted ti Biblia iti namnama iti maysa a dati a soldado a nangibaga a ‘nagmadi ti ugalina ken awan bibiangna iti sabsabali.’ Buyaem ti video a Tinallikudakon ti Kinasoldadok.
Pagbalinem ti 2024 a nasayaat a tawen para kenka ken iti pamiliam. Ammuem ti ad-adu pay no kasano a makatulong kenka ti Biblia. Padasem ti libre a panagadal iti Biblia. Kitaem no kasano a ‘maikkannaka ita ti Dios iti talna’ ken “nasayaat a masakbayan ken namnama.”—Jeremias 29:11.