Pagpatinggaento ni Jesus ti Krimen

Ammo ni Jesus ti rigat ti agbalin a biktima ti krimen ken kinaawan hustisia. Siuulbod a naakusaran, naparparigat, illegal ti pannakabista ken pannakasentensiana, ken pinapatayda. Uray no inosente, situtulok nga insakripisiona “ti biagna kas pangsubbot iti adu.” (Mateo 20:28; Juan 15:13) Ita, agturturayen kas Ari ti Pagarian ti Dios, ket asidegen nga iyegna ti hustisia kadagiti tattao ken permanente a pagpatinggaenna ti krimen iti intero a daga.—Isaias 42:3.

Ibaga ti Biblia no anianto ti kasasaad ti lubong inton agtignayen ni Jesus:

• “Awanton dagiti managdakdakes; kitaemto ti dati nga ayanda, ket awandanton. Ngem dagiti naemma kukuadanto ti daga, ken maragragsakandanto unay iti naruay a talna.”—Salmo 37:10, 11.

Kasanotayo a maipakita ti apresasiontayo iti amin nga inaramid ni Jesus ken kadagiti aramidennanto pay para kadatayo? Ti maysa a pamay-an ket ti panangadaltayo iti ad-adu pay maipapan iti “naimbag a damag ti Pagarian ti Dios.” Dayta ti mensahe nga inkasabana. (Lucas 4:43) Basaem ti artikulo nga “Ania ti Pagarian ti Dios?”