Asino ti Mapagtalkam?—Ania ti Ibaga ti Biblia?

Madismaya dagiti tattao no dagidiay mapagtalkanda koma ket saan met a mapagtalkan. Adu ti saanen nga agtaltalek kadagiti . . .

• politiko a mangyun-una kadagiti pagsayaatanda imbes a kadagiti kasapulan dagiti tattao.

• media a saan a patas ken saan a husto dagiti ipadpadamagda.

• sientista a saan a ti pagsayaatan ti publiko ti ar-aramidenda.

• lider ti relihion a mangsupsuporta iti politika imbes nga irepresentarda ti Dios.

Umiso laeng nga agannad dagiti tattao no asino ti pagtalkanda. Ipakpakdaar ti Biblia:

• “Dika agtalek kadagiti agtuturay awan ti tao a makaisalakan kenka.”—Salmo 146:3, Ti Baro a Naimbag a Damag Biblia.

Ti maysa a mapagtalkam

Ibaga ti Biblia no asino ti mapagtalkam: ni Jesu-Kristo. Saan la a basta maysa a naimbag a tao a nagbiag idi ginasut a tawenen ti napalabas. Inapointaran ti Dios ni Jesus “nga agturay kas Ari . . . , ken saanto nga agpatingga ti Pagarianna.” (Lucas 1:32, 33) Ni Jesus ti Ari ti Pagarian ti Dios, ket agturturayen dayta a gobierno idiay langit.—Mateo 6:10.

• Tapno maammuam no apay a mapagtalkam ni Jesus, basaem dagiti artikulo nga “Asino ti Ari ti Pagarian ti Dios?” ken “Ania ti Aramiden ti Pagarian ti Dios?”