Mapagbalin Kadi Dagiti Tattao a Natalna ti Lubong?

Agtultuloy ti gubat ken panaglalaban iti intero a lubong. Gapu iti dayta, adda dagiti ar-aramiden ti United Nations ken ti dadduma pay nga organisasion tapno agtalinaed ti talna. Karaman iti dayta ti panangibaonda kadagiti pannakabagida kadagiti lugar nga adda panaglalaban ken gubat. Agyanda sadiay agingga a mapagkalmada ti situasion. Kuna ti UN Secretary General a ni António Guterres: “Dagiti pannakabagi ti United Nations ti kapatgan a paset ti misionmi a pagbalinen a nataltalna ti lubong.”

Iti adu a tawen, adda dagiti nasayaat a resulta dagiti ar-aramiden dagiti tattao tapno mataginayon ti talna. Kas pagarigan, naprotektaranda dagiti sibilian, natulonganda dagiti refugee nga agsubli kadagiti pagilianda, nakaipaayda iti makan ken dadduma pay a kasapulan dagiti tattao, ken naibangonda manen dagiti patakder a dinadael ti gubat. Ngem adda dagiti dadakkel a problema isu a saan a kanayon nga agballigi ti misionda. Adda kadi permanente a solusion tapno agbalin a pudpudno a natalna ti lubong? Ania ti ibaga ti Biblia?

Dagiti problema a manglaplapped iti talna ken dagiti solusion nga ibagbaga ti Biblia

Icon ti dua a lallaki a nagtinnallikud ken nakadalikepkep.

Ti problema: saan a naan-anay a panagtitinnulong. Saan nga amin nga organisasion ti militar ken sibilian manipud iti agduduma a pagilian ket makitintinnulong. No dadduma, saanda a makapagtrabaho a sangsangkatunos gapu ta adda dagiti dida pagkikinnaawatan ken agduduma ti prioridadda.

Ti solusion nga ibagbaga ti Biblia: “Mangipasdekto ti Dios ti langit iti maysa a pagarian . . . ken pagpatinggaennanto amin dagitoy a pagarian [dagiti gobierno ti tao], ket daytanto laeng ti agtalinaed iti agnanayon.”—Daniel 2:44.

Asidegen a pagpatinggaen ti Dios ti amin a gubat ken pagbalinennanto a natalna ti intero a lubong. (Salmo 46:8, 9) Sukatannanto ti amin a gobierno ditoy daga iti maymaysa a gobierno: ti Pagarian ti Dios. Dayta a perpekto a gobierno idiay langit ti mangiturayto ditoy daga, isu nga awanton ti gubat ken panaglalaban, ket saanto metten a kasapulan dagiti organisasion ti tao a mangtaginayon iti talna.

Ti problema: limitado dagiti maaramidan ken kasapulanda. No dadduma, kurang ti tao, pondo, wenno dadduma pay a kasapulanda isu a bassit laeng ti maaramidan dagiti pannakabagi dagiti organisasion a mangtagtaginayon iti talna. Kasta met, rumikrikut ken pumegpeggad ti situasion kadagiti lugar a pakaibaonanda.

Ti solusion nga ibagbaga ti Biblia: ‘Ti Dios ni Apotayo a Jesu-Kristo pinagtugawna ni Jesus iti makannawanna idiay langit, nga adayo a nangatngato ngem iti tunggal gobierno, autoridad, ken pannakabalin.’—Efeso 1:17, 20, 21.

Ti mannakabalin-amin a Dios a ni Jehovaa inikkanna ni Jesus iti amin a kasapulanna tapno agballigi nga agturay kas Ari ti Pagarian ti Dios. (Daniel 7:13, 14 b) No ikompara iti aniaman a gobierno wenno organisasion ti tao, inikkan ti Dios ni Jesus iti adayo nga ad-adu a pannakabalin, pannakaammo, sirib, ken pannakatarus. (Isaias 11:2) Addaan pay ni Jesus kadagiti mannakabalin nga anghel nga usarenna. (Apocalipsis 19:14) Isu nga awan ti nakarikrikut wenno nakarigrigat a situasion para kenkuana.

Usarento ni Jesus ti amin nga inted ti Dios kenkuana tapno pagpatinggaenna ti gubat. Ngem saan la a dayta. Pagbalinennanto pay a pudpudno a natalinaay, natalged, ken natalna ti biag ti amin nga iturayan ti Pagarian ti Dios.—Isaias 32:17, 18.

Ti problema: dagiti linteg. No dadduma, saan a maaramid dagiti pannakabagi dagiti organisasion a mangtagtaginayon iti talna dagiti masapul nga aramidenda gapu ta saan a nalawag dagita wenno adda dagiti linteg a manglimitar iti aktibidadda. Gapuna, mabalin a saanda a naballigi a mangprotektar iti sabsabali wenno saanda a naan-anay a maaramid ti panggepda.

Ti solusion nga ibagbaga ti Biblia: “Naiteden [ken Jesus] ti amin nga autoridad idiay langit ken ditoy daga.”—Mateo 28:18.

Inikkan ti Dios ni Jesus iti nalawag nga instruksion a pagbalinenna a natalna ti lubong. Inikkanna pay iti naan-anay nga autoridad tapno maaramidna dayta. (Juan 5:22) Kanayonto a patas ken nalinteg ni Jesus. (Isaias 11:3-5) Isu met la gayam nga inawagan ti Biblia ni Jesus kas ti “Prinsipe ti Kappia,” a ti pundasion ti Pagarianna ket “kinahustisia ken kinalinteg.”—Isaias 9:6, 7.

Ti Pagarian ti Dios ti mangyeg iti pudpudno a talna

Uray kaskasano, adda met maar-aramidan dagiti organisasion a mangtagtaginayon iti talna ken mabalin a mapasardengda dagiti panaglalaban iti dadduma a lugar. Ngem saanda a maikkat ti ramut ti kinaranggas—ti umap-apuy a gura iti puso ti adu a tattao.

“Kasanom a taginayonen ti talna no awan met ti talna?”—Dennis Jett, dati a U.S. ambassador.

Nupay kasta, kabaelan ti Pagarian ti Dios nga iyeg ti pudpudno a talna ta matulonganna dagiti tattao a mangparut iti gura iti pusoda. Idi adda ni Jesus ditoy daga, insurona dagiti pasurotna iti sao ken aramid, no kasano ti makikappia ken no kasano nga ipakita ti ayat. Kas pagarigan:

“Naragsak dagiti mannakikappia.”—Mateo 5:9.

“Masapul nga ayatem ti kaarrubam a kas iti bagim.”—Marcos 12:29-31.

“Isublim ta espadam iti kalubanna, ta ti mangusar iti espada matayto iti espada.”—Mateo 26:52.

“Idi nain-insulto [ni Jesus], saanna a sinubadan iti insulto. Idi agsagsagaba, saan a nagipangta.”—1 Pedro 2:23.

Imbaga pay ni Jesus a dagiti iturayan ti Pagarian ti Dios ket mailasinto gapu iti ayatda iti maysa ken maysa. Nalawag ti kuna ti Biblia a saanto nga ipalubos ti Pagarian ti Dios nga agtultuloy nga agbiag dagiti manggurgura iti padada a tao:

“Maammuanto ti amin a dakayo dagiti adalak—no agiinnayatkayo.”—Juan 13:34, 35.

“Mammapatay ti amin a manggurgura iti kabsatna.”—1 Juan 3:15.

“Asinoman a mangay-ayat iti Dios masapul nga ayatenna met ti kabsatna.”—1 Juan 4:20, 21.

Ni Jehova a Dios ti nangparsua kadagiti tattao, isu nga ammona ti kasayaatan ken kakaisuna a pamay-an tapno agbalin a natalna ti lubong. Aramidento ti Pagarianna dagiti saan a naaramidan ti tao a pakairamanan ti panangtaginayon iti talna.

a Jehova ti personal a nagan ti Dios. (Salmo 83:18) Kitaem ti artikulo nga “Asino ni Jehova?”

b Iti Daniel 7:13, 14, ti termino nga “anak ti tao” ket tumukoy ken Jesu-Kristo.—Mateo 25:31; 26:63, 64.

Uray ita, isursuron ti Pagarian ti Dios kadagiti tattao nga agkakappia ken agkaykaysada

Iti masanguanan, agturayton ti Pagarian ti Dios iti intero a daga. Agkaykaysanton ti amin a tattao gapu ta tungtungpalenda dagiti pannursuro ti Dios. (Isaias 2:4; 11:9) Ngem agturturayen ti Pagarian ti Dios idiay langit, isu nga uray ita, isursuronan ti minilion a tattao ditoy daga nga agkakappia ken agkaykaysada.

Buyaem ti video a Kaano nga Abaken ti Napudno nga Ayat ti Guranggura? tapno makitam no kasano a tinulongan ti Biblia ti dua a lallaki a mangparut iti panangidumduma iti pusoda uray no nabayagen nga adda panaggiginnura dagiti Judio ken Arabo.

Buyaem ti video a Dati nga Agkalaban Ngem Aggayyem Itan tapno makitam no kasano a ti pannursuro ti Biblia tinulonganna ti naranggas a lider ti maysa a gang ken ti awan pagbutbutnganna a polis tapno maikkatda ti gurada iti maysa ken maysa ken agbalinda a nadekket nga aggayyem.