Talaga Kadi a Pagkaykaysaen ti World Cup Dagiti Tattao?—Ania ti Ibaga ti Biblia?

Natantia nga agarup lima a bilion a tattao ti agbuya iti FIFA World Cup manipud Nobiembre 20 agingga iti Disiembre 18, 2022. Pampanunoten ti adu a dagiti kastoy nga sports event ket saanna laeng a basta pagkaykaysaen dagiti tattao nga agbuya.

• “Kaya ti isports a balbaliwan ti lubong. Pagbalinenna nga inspirado dagiti tattao. Kayana a pagkaykaysaen dagiti tattao iti nakaskasdaaw a pamay-an.”—Nelson Mandela, dati a presidente ti South Africa.

• “Gapu iti football, agkaykaysa ti amin a tattao. Amin ket mangnamnama, amin ket naragsak, amin ket eksayted, ken ay-ayatenda ti amin a tattao, uray agduduma ti naggapuanda.”—Gianni Infantino, presidente ti FIFA.a

Maaramid kadi a talaga ti World Cup wenno dadduma pay nga sports event dagiti kasta kadakkel a namnamaenda? Posible kadi ti talna ken panagkaykaysa?

Mapagkaykaysana kadi a talaga dagiti tattao?

Para iti adu a tattao, ti World Cup ita a tawen ket saan laengen a basta football. Gapu iti daytoy nga isport, nagdedebate dagiti tattao maipapan kadagiti isyu iti kagimongan ken politika, kas iti kalintegan ti tao, panangidumduma iti puli, ken saan a patas a kasasaad iti biag.

Uray kasta, adu a tattao ti agen-enjoy kadagiti internasional nga sports event kas iti World Cup. Ngem saan a maipaay dagitoy nga sports event ti permanente a panagkaykaysa, uray no dayta ti kayat unay dagiti tattao. Imbes ketdi, lalo pay nga ipakita dagitoy dagiti mamagsisina nga ugali ken ar-aramid dagiti tattao nga ibaga ti Biblia a tanda ti tiempo a maawagan “maudi nga al-aldaw.”—2 Timoteo 3:1-5.

Ti pudno a panagkaykaysa iti intero a lubong

Mabasa iti Biblia ti pudno a namnama a panagkaykaysa para iti intero a lubong. Ikarkarina nga amin a tattao ditoy daga ket agkaykaysanto iti panagturay ti nailangitan a gobierno a maawagan “Pagarian ti Dios.”—Lucas 4:43; Mateo 6:10.

Siguraduen ti Ari dayta a Pagarian, ni Jesu-Kristo, nga addanto talna iti intero a lubong. Ibaga ti Biblia:

• “Umadunto dagiti nalinteg, ken agsaknapto ti talna.”—Salmo 72:7.

• “Ta ispalennanto dagiti napanglaw nga agpatpatulong . . . Isalakannanto ida iti pannakairurumen ken iti kinaranggas.”—Salmo 72:12, 14.

Agkaykaysa uray itan ti minilion a tattao iti 239 a daga gapu iti pannursuro ni Jesus. Nasursuroda nga ikkaten iti pusoda ti gura. Tapno maammuam ti ad-adu pay, basaem ti serye dagiti artikulo iti “Mapasardengtayo ti Panagwaras ti Gura.”