Mapukpukaw a Panagtalek Dagiti Tattao Kadagiti Politiko—Ania ti Ibaga ti Biblia?

Iti tawen 2024, ad-adu nga eleksion ti mapasamak iti intero a lubong ngem kadagiti eleksion a napasamak iti napalabas a tawtawen. Nupay kasta, adu a tattao ti mapukpukawen ti panagtalekna kadagiti politiko.

• Dakdakkel a porsiento kadagiti nasurbey nga Amerikano ti nangibaga a “kaaduan kadagiti sumsumrek iti politika ket gapu iti agimbubukodan a rason” saan ket a gapu ta kayatda ti agserbi iti publiko.a—Pew Research Center, Septiembre 19, 2023.

Adu met nga agtutubo ti saanen nga agtaltalek kadagiti politiko.

• “Interesado dagiti tin-edyer ita nga agbirok iti solusion kadagiti napapateg nga isyu, ngem sigun iti surbey, saanda a marikna nga agporporsegi dagiti politiko a mangbirok iti solusion kadagita.”—The New York Times, Enero 29, 2024.

• “Sigun iti maysa a surbey, mas agtaltalek dagiti agtutubo kadagiti tattao nga agipo-post iti video ken adu ti follower-na iti social media ngem kadagiti politiko.”—The Korea Times, Enero 22, 2024.

Makapagtalektayo kadi a kaya dagiti politiko a pasayaaten ti masakbayantayo? Asino ti mabalintayo a pagtalkan?

Agannadka no asino ti pagtalkam

Husto laeng nga agbalinka a naannad no asino ti pagtalkam. Ibaga ti Biblia a “patien ti awan ammona ti tunggal sao, ngem panunoten ti masirib ti tunggal addangna.”—Proverbio 14:15.

• Para kadagiti makatulong a tip no kasanom a maammuan no umiso wenno di umiso ti maysa nga impormasion, basaem ti artikulo a “Protektaram ti Bagim iti Di Umiso nga Impormasion.”

Kanayonanna, limitado latta ti maaramidan uray ti kasasayaatan ken kapupudnuan a politiko, isu a pakdaarannatayo ti Biblia:

• “Dika agtalek kadagiti agtuturay awan ti tao a makaisalakan kenka.”—Salmo 146:3, Ti Baro a Naimbag a Damag Biblia.

Ti lider a mapagtalkam

Ibaga ti Biblia a pinili ti Dios ti kalalaingan ken mapagtalkan unay a lider a ni Jesu-Kristo. (Lucas 1:32, 33) Ni Jesus ti Ari ti Pagarian ti Dios, maysa a gobierno nga agturturay manipud langit.—Mateo 6:10.

• Ammuem no apay a mapagtalkam ni Jesus ken no anianto ti aramidenna a mangsolbar kadagiti problema ita. Basaem dagiti artikulo nga “Asino ti Ari ti Pagarian ti Dios?” ken “Ania ti Aramiden ti Pagarian ti Dios?”