Kasano nga Us-usaren Dagiti Saksi ni Jehova Dagiti Donasion?
Us-usarenmi dagiti donasion para kadagiti narelihiosuan nga aktibidad ti organisasionmi ken panangtulong kadagiti tattao. Ar-aramidenmi dagitoy kas paset ti kangrunaan a panggepmi, ti panangtulong kadagiti tattao nga agbalin nga adalan ni Kristo Jesus.—Mateo 28:19, 20.
Pulos a saanmi nga usaren dagiti donasion a mangpabaknang iti asinoman. Awan ti suelsuelduanmi a panglakayen wenno ministro, ken saan a matangtangdanan dagiti Saksi ni Jehova nga agbalaybalay. Dagiti agserserbi kadagiti sanga nga opisina ken iti sangalubongan a hedkuartermi, a pakairamanan dagiti mangbukel iti Bagi a Manarawidwid, ket saan a masuelsuelduan a miembro ti narelihiosuan nga orden.
Ti Dadduma nga Aktibidadmi
Panagipablaak: Tinawen nga agipatpatarus, agim-imprenta, agipatpatulod, ken agiwarwaraskami iti minilion a Biblia ken dadduma pay a Nakristianuan a publikasion. Awan bayadna amin dagita. Kasta met, libre a mai-download dagiti publikasionmi iti jw.org website ken JW Library app ken awan ti adbertismen kadagita.
Konstruksion ken Panagmantener: Agibangbangon ken agmanmantenerkami kadagiti simple a lugar a pagdaydayawan iti intero a lubong tapno maaddaan dagiti kongregasionmi iti nasayaat a lugar a pagtataripnongan ken pagdaydayawan iti Dios. Kasta met laeng ti ar-aramidenmi kadagiti sanga nga opisina ken translation office. Kaaduan kadagitoy a trabaho ket ar-aramiden dagiti boluntario isu a basbassit ti magastos.
Administrasion: Dagiti aktibidadmi iti sangalubongan a hedkuarter, sanga nga opisina, ken translation office, kasta met ti aktibidad dagiti agdaldaliasat a ministro ket masupsuportaran babaen kadagiti pondo a naidonar iti sangalubongan a trabahomi.
Panangasaba: Saan a matangtangdanan dagiti Saksi a mangikasaba iti naimbag a damag wenno mangisuro “iti sao ti Dios.” (2 Corinto 2:17) Ngem kas kadagiti Kristiano idi umuna a siglo, dagiti napili ken nasanay a ministro a mangus-usar iti kaaduan a tiempoda iti panangasaba ket maipapaayan iti simple a pagdagusan ken kangrunaan a kasapulan iti biag.—Filipos 4:16, 17; 1 Timoteo 5:17, 18.
Panangisuro: Dagiti asamblea ken kombensionmi ket masupsuportaran babaen kadagiti donasion. Mangar-aramidkami met kadagiti naibatay iti Biblia nga audio ken video a programa. Adda pay dagiti eskuelaan a pakasanayan dagiti panglakayen ken amin-tiempo a ministro tapno agbalinda nga ad-adda nga epektibo iti asaynmentda.
Panagsaranay: Mangipapaaykami iti makan, danum, ken balay kadagiti nadidigra. Saan laeng a dagiti ‘kapammatianmi’ ti matultulonganmi, no di ket uray dagiti saan a Saksi.—Galacia 6:10.