Pagtataudan ti Pondo Para iti Trabaho Dagiti Saksi ni Jehova?

Ti pondo para iti sangalubongan a trabahomi ket kangrunaanna nga aggapu iti boluntario a donasion dagiti indibidual a Saksi ni Jehova.a Kadagiti paggigimonganmi, adda dagiti kahon a pagitinnagan kadagiti kontribusion, ken makita ti dadduma pay a pamay-an ti panagdonar iti web page a Donasion. Iti dayta a web page, adda dagiti opsion a pagpilian ti maysa no kayatna ti agdonar para iti sangalubongan a trabahomi, lokal a paggastuan, wenno agpada.

Saan nga obligado a mangted dagiti Saksi ni Jehova iti apagkapullo wenno iti espesipiko a donasion wenno iti porsiento ti ganansiada. (2 Corinto 9:7) Saankami nga agkolkolekta wenno agpabpabayad kadagiti umay iti paggigimonganmi. Kasta met, saan nga agpabpabayad dagiti ministromi para iti panagpabautisar, pumpon, kasar, wenno dadduma pay a narelihiosuan a serbisio. Saankami a mangpatpataud iti pondo babaen ti panaglako iti makan, bazaar, bingo, karnibal, panagpapangan nga adda bayadna (dinners), raffle, wenno sabali pay nga okasion, ken saankami met nga agkiddaw iti donasion. Saan a maibaga wenno maipakaammo iti publiko dagiti nagan dagiti nagdonar. (Mateo 6:2-4) Awan ti adbertismen kadagiti website ken publikasionmi a paggapuan ti pondomi.

Iti tunggal kongregasion dagiti Saksi ni Jehova, maipakaammo iti kada bulan ti report ti pondo iti gimong, a mabalin nga atenderan ti asinoman. Regular a ma-audit ti rekord ti pondo ti tunggal kongregasion tapno masigurado nga umiso ti pannakausar dagiti naidonar.—2 Corinto 8:20, 21.

Pamay-an ti Panagdonar

• Kahon ti kontribusion: Mabalinmo nga itinnag ti donasionmo a cash wenno tseke kadagiti kahon ti kontribusion nga adda iti Kingdom Hall, Assembly Hall, wenno iti dadduma pay a lugar a pakaang-angayan dagiti taripnongmi.

• Online a panagdonar: Iti adu a pagilian, mabalin ti agdonar iti web page nga “Agdonar kadagiti Saksi ni Jehova” babaen ti credit card, debit card, bank transfer, ken dadduma pay nga elektroniko a pamay-an.b Adda dagiti Saksi a nangikeddeng a kada bulan a “mangilasin” iti nayeskediul a regular a panagdonar babaen ti maysa kadagita a pamay-an.—1 Corinto 16:2.

  

• Naiplano a panangted: Dadduma a pamay-an ti panagdonar ket agkasapulan iti nasaksakbay a panagplano ken/wenno panagpabalakad iti abogado. Mabalin a maksayan ti kasta a panagplano ti baybayadam a buis iti pagilianyo. Adu ti nabenepisiaran gapu ta ad-adu ti ammoda maipapan iti charitable gift a mabalin a maited bayat a sibibiag ti nagdonar wenno maited inton matay ti nagdonar. Pangngaasim ta kontakem ti sanga nga opisina dagiti Saksi ni Jehova para iti kanayonan nga impormasion no kayatmo ti agdonar babaen kadagitoy a pamay-an:

  • deposito iti banko

  • insurance ken retirement plan

  • real estate

  • stock ken bond

  • testamento ken trust

Para iti ad-adu pay nga impormasion iti pamay-an ti panagdonar nga available iti lugarmo, kitaem ti web page nga “Agdonar kadagiti Saksi ni Jehova.”