Ania ti Langit?

Ti sungbat ti Biblia

Iti Biblia, adda tallo a kangrunaan a kaipapanan ti sao a “langit”: (1) ti pisikal a langit; (2) ti ayan dagiti di makita nga espiritu a parsua; ken (3) simbolo ti nangato wenno naitan-ok a saad. Tunggal mausar ti sao a “langit” iti Biblia, makatulong dagiti bersikulo iti aglawlawna tapno maammuantayo ti umiso a kaipapananna.a

1. Ti pisikal a langit. Iti daytoy a kaipapananna, tumukoy ti sao a “langlangit” iti atmospera ti daga, a pagpuypuyupoyan ti angin, pagtaytayaban dagiti billit, ayan dagiti ulep a mangpatpataud iti tudo ken niebe, ken paggilgilapan ti kimat. (Salmo 78:26; Proverbio 30:19; Isaias 55:10; Lucas 17:24) Mabalin met a tumukoy dayta iti law-ang, nga ayan “ti init ken ti bulan ken dagiti bituen.”—​Deuteronomio 4:​19; Genesis 1:1.

2. Ti ayan dagiti di makita nga espiritu a parsua. Tumukoy met ti sao a “langit” iti ayan dagiti di makita nga espiritu a parsua. Natantan-ok dayta ngem iti uniberso ken saan a paset ti uniberso. (1 Ar-ari 8:​27; Juan 6:​38) Dayta ti pagnanaedan ni Jehova a Dios, a “maysa nga Espiritu,” ken dagiti anghel a pinarsuana. (Juan 4:​24; Mateo 24:36) No dadduma, tumukoy met ti “langlangit” kadagiti matalek nga anghel, ti “kongregasion dagidiay sasanto.”​—Salmo 89:​5-7.

   Nausar met iti Biblia ti sao a “langlangit” a mangtukoy iti espesipiko a ‘disso a pagnanaedan’ ni Jehova iti lugar nga ayan dagiti espiritu a parsua. (1 Ar-ari 8:​43, 49; Hebreo 9:​24; Apocalipsis 13:6) Kas pagarigan, impadto ti Biblia a maitapuakto ni Satanas ken dagiti demonio manipud langit, ket saandan a mapalubosan a mapan iti sanguanan ni Jehova. Ngem agtalinaedda latta kas espiritu a parsua.​—Apocalipsis 12:​7-9, 12.

3. Simbolo ti nangato wenno naitan-ok a saad. Nausar met iti Biblia ti sao a “langit” a mangirepresentar iti maysa a naitan-ok a saad, wenno posision, a kaaduanna ket mainaig iti panagturay. Kas pagarigan, mabalin nga irepresentarna dayta ti saad:

   • Ni Jehova a Dios kas mannakabalin-amin a Soberano.​—2 Cronicas 32:20; Lucas 15:21.

   • Ti Pagarian ti Dios, ti gobierno a mangsukat iti turay ti tao. Tukoyen ti Biblia dayta a Pagarian kas ti “baro a langlangit.”​—Isaias 65:17; 66:22; 2 Pedro 3:​13.b

   • Dagiti Kristiano nga addaan iti namnama a mapan idiay langit.​—Efeso 2:6.

   • Dagiti agtuturay a tattao a nangitan-ok iti bagbagida kadagiti iturayanda.​—Isaias 14:12-​14; Daniel 4:​20-​22; 2 Pedro 3:7.

   • Dagiti dakes nga espiritu nga agturturay itan iti lubong.​—Efeso 6:​12; 1 Juan 5:​19.

Ania ti kasasaad idiay langit?

Adu ti trabaho iti ayan dagiti espiritu a parsua. Pagnanaedan dayta ti ginasut a milion nga espiritu a parsua a “mangitungtungpal iti sao [ni Jehova].”​—Salmo 103:20, 21; Daniel 7:​10.

Iti Biblia, nailadawan ti langit kas addaan iti nakaranraniag a lawag. (1 Timoteo 6:​15, 16) Idi nasirmata ni propeta Ezequiel ti langit, adda nakitana a naraniag a lawag. Iti met sirmata ni Daniel, adda nakitana a “waig ti apuy.” (Ezequiel 1:​26-​28; Daniel 7:​9, 10) Ti langit ket nasantuan, wenno nadalus, ken napintas.​—Salmo 96:6; Isaias 63:15; Apocalipsis 4:​2, 3.

Nakaskasdaaw ti panangiladawan ti Biblia iti langit. (Ezequiel 43:​2, 3) Ngem saan a naan-anay a maawatan ti tao ti langit gapu ta limitado laeng ti kabaelantayo a tarusan.