Talaga Kadi nga Adda Diablo?
Sungbat ti Biblia
Wen, agpayso nga adda Diablo. Isu ti “agturay iti lubong,” maysa nga espiritu a parsua a nagbalin a dakes ken nagrebelde iti Dios. (Juan 14:30; Efeso 6:11, 12) Ipakita ti Biblia ti personalidad ti Diablo babaen kadagitoy a nagan ken pannakadeskribirna:
Satanas, a kayatna a sawen “Bumusbusor.”—Job 1:6.
Diablo, a kayatna a sawen “Mammardaya.”—Apocalipsis 12:9.
Serpiente, a nausar iti Biblia a ti kaipapananna “Manangallilaw.”—2 Corinto 11:3.
Mannulisog.—Mateo 4:3.
Managulbod.—Juan 8:44.
Saan a kinadakes nga adda laeng iti kaunggan ti tao
Matmatan ti dadduma a ni Satanas a Diablo ket maysa laeng a kinadakes nga adda iti kaunggantayo. Ngem nairekord iti Biblia ti panagsarita ti Dios ken ni Satanas. Ti Dios ket perpekto, isu a saan la ketdi a makisarsarita iti dakes nga adda iti kaungganna. (Deuteronomio 32:4; Job 2:1-6) Maysa pay, sinulisog ni Satanas ti awan basolna a ni Jesus. (Mateo 4:8-10; 1 Juan 3:5) Paneknekan ngarud ti Biblia a pudno a persona ti Diablo, saan laeng a personipikasion ti kinadakes.
Rumbeng kadi a pagsiddaawantayo nga adu a tattao ti saan a mamati a talaga nga adda Diablo? Saan, gapu ta ibagbaga ti Biblia a mangal-allilaw ni Satanas tapno maitungpalna dagiti panggepna. (2 Tesalonica 2:9, 10) Ti maysa a kaepektibuan a panangallilawna ket ti panangbulsekna kadagiti adu a tattao tapno saanda a patien ti kaaddana.—2 Corinto 4:4.
Dadduma pay a di umiso a kapanunotan maipapan iti Diablo
Di umiso: Ti Lucifer ket sabali pay a nagan ti Diablo.
Umiso: Ti Hebreo a sao a naipatarus kas “Lucifer” kadagiti dadduma a Biblia ket “agsilsilnag” ti kaipapananna. (Isaias 14:12) Ipakita ti konteksto a daytoy a termino tukoyenna ti dinastia, wenno kaputotan dagiti ari, ti Babilonia nga imbabain ti Dios gapu iti kinatangsitna. (Isaias 14:4, 13-20) Nausar ti sao nga “agsilsilnag” a mangumsi iti dinastia ti Babilonia kalpasan ti pannakadadaelna.
Di umiso: Agserserbi ni Satanas iti Dios kas “ukom.”
Umiso: Ti Diablo ket kabusor ti Dios, saan ket nga agserserbi kenkuana. Busbusoren ken ak-akusaran ni Satanas a Diablo dagiti agserserbi iti Dios.—1 Pedro 5:8; Apocalipsis 12:10.