Proverbio 17:17—“Ipakita a Kanayon ti Maysa a Gayyem ti Panagayatna”

Kaipapanan ti Proverbio 17:17

Ti pudno a gayyem ket mapagtalkan ken kanayon nga adda no kasapulam. Kas kadagiti nadekket nga agkakabsat, matalekda ken saandaka a baybay-an, lalo no adda nadagsen a problemam.

“Ti pudno a gayyem agayat iti amin a tiempo.” Dagitoy a sasao ket mabalin met a maipatarus kas “kanayon nga ipakita dagiti aggagayyem ti ayatda.” Ti Hebreo a sao a nausar ditoy para iti “ayat” ket saan laeng a basta emosion wenno rikna iti maysa a tao. Dayta a di agimbubukodan nga ayat ket maipakita babaen iti aramidtayo. (1 Corinto 13:4-7) No kasta a klase nga ayat ti ipakita dagiti aggagayyem, saan a maperdi ti panaggagayyemda uray no masubok dayta gapu iti di pagkikinnaawatan wenno dadduma pay a problema. Nakasaganada met a mangpakawan iti maysa ken maysa. (Proverbio 10:12) Dagiti kasta a gagayyem saanda nga umapal no adda nasayaat a mapasamak iti gayyemda. Imbes ketdi, makipagragsakda kenkuana.—Roma 12:15.

“Ti pudno a gayyem . . . [ket] maysa a kabsat a mapangnamnamaan no adda rigat.” Kas ipakita daytoy a proverbio, talaga a posible nga agbalin a nadekket dagiti agkakabsat. Isu a no ar-aramidentayo ti amin a tumulong iti marigrigatan a gayyemtayo, ipakpakitatayo a kaslatayo pudno a kabsat kenkuana. Kasta met, uray no masubok ti panaggagayyemtayo, saan a maperdi dayta. Ad-adda ketdi a lumagda gapu ta umuneg ti ayat ken respetotayo iti maysa ken maysa.

Konteksto ti Proverbio 17:17

Ti libro a Proverbio ket naglaon iti adu a nagsasayaat nga ideya ken suhestion. Naisurat dayta iti pamay-an nga ababa ken makaala iti atension a mamagpanunot kadagiti agbasbasa. Kaaduan iti daytoy a libro ti Biblia ket insurat ni Ari Solomon. Ti pamay-an ti panagsuratna ket saan a kas kadagiti gagangay a Hebreo a daniw. Imbes nga agusar kadagiti sasao nga agpapada ti uni ti murdongna, nagusar ketdi iti panamagpapada wenno panamagduduma, a ti sumaruno a linia ket mabalin a mangsuporta wenno mangkontra iti immuna a linia. Ti Proverbio 17:17 ket maysa a pagarigan ti panamagpapada ta ti maikadua a pasetna suportaranna ti umuna. Ti met Proverbio 18:24 ket pagarigan ti panamagduduma. “Adda agkakadua nga agpipinnerdi, ngem adda gayyem a nadekdekket ngem iti kabsat.”

Idi insurat ni Solomon ti Proverbio 17:17, mabalin a pampanunotenna ti nadekket a panaggayyem ni tatangna a David ken ti anak ni Ari Saul a ni Jonatan. (1 Samuel 13:16; 18:1; 19:1-3; 20:30-34, 41, 42; 23:16-18) Uray no saan nga agkabagian da David ken Jonatan, nadekdekketda pay ngem iti agkabsat. Uray la nakasagana ni Jonatan a matay tapno laeng maprotektaranna ti ub-ubing a gayyemna.a

Sabali Pay a Pannakaipatarus ti Proverbio 17:17

“Ti gayyem agayat iti amin a tiempo; ket ti cabsat nayanac a maipaay a casalisal.”—Ti Biblia.

“Ti gayyem ket kanayonto latta a gayyem, nayanak a kabsat no adda rigat.”—The Moffatt Translation of the Bible.

“Ipakita ti gayyem ti ayatna kenka iti amin a tiempo; nayanak [dayta] a kabsat tapno tumulong kenka no adda rigat.”—The Complete Jewish Study Bible.

Buyaem ti ababa a video tapno maammuam no ania ti pakabuklan ti libro a Proverbio.