Ania ti Ibaga ti Biblia Maipapan iti Pannakigayyem?
Sungbat ti Biblia
Mangparagsak iti biag dagiti gagayyem ken makatulong tapno agballigitayo. Ti nasayaat nga aggayyem ket nasayaat ti impluensiada ken mapasayaatda ti ugali ti maysa ken maysa.—Proverbio 27:17.
Ngem ibaga ti Biblia nga importante a pilientayo a naimbag dagiti gagayyemtayo. Ibagana pay dagiti pagdaksan no saan a nasayaat dagiti gagayyemtayo. (Proverbio 13:20; 1 Corinto 15:33) Dagiti kasta a gagayyem maimpluensiaanda ti maysa nga agaramid kadagiti di nasayaat a desision wenno madadaelda pay dagiti nasayaat nga ugalina.
Iti daytoy nga artikulo
Ania ti makuna a nasayaat a gayyem?
Isuro ti Biblia nga adda pay ti naun-uneg a pangibatayan iti maibilang a nasayaat a gayyem, saan laeng a dagiti kapadam iti paginteresan wenno kaykayat nga aramiden. Kas pagarigan, ibaga ti Salmo 119:63: “Gayyemdak ti amin nga agbuteng kenka,a ken dagidiay agtultulnog kadagiti bilinmo.” Pansinenyo ta imbaga ti mannurat iti Biblia a ti pilpilienna nga agbalin a nadekket a gayyem ket dagiti mangparparagsak iti Dios ken mangsursurot kadagiti paglinteganna.
Ipakita met ti Biblia dagiti ugali ti maysa a nasayaat a gayyem. Kas pagarigan:
“Ti pudno a gayyem agayat iti amin a tiempo ken maysa a kabsat a mapangnamnamaan no adda rigat.”—Proverbio 17:17.
“Adda agkakadua nga agpipinnerdi, ngem adda gayyem a nadekdekket ngem iti kabsat.”—Proverbio 18:24.
Isuro dagita a bersikulo a ti maysa a nasayaat a gayyem ket matalek, naayat, nasingpet, ken naparabur. Ti pudno a gayyem manamnamam a suportarannaka no adda problemam ken no naragsakka. Ken natured met a mangbagbaga kenka no makitana a madi ti ar-aramidem wenno kamali ti aramidem a desision.—Proverbio 27:6, 9.
Siasino dagiti nasayaat nga aggayyem iti Biblia?
Iti Biblia, adda dagiti nadekket nga aggayyem uray nagduma ti edad, kasasaad iti biag, kultura, ken autoridadda. Kitaem dagitoy tallo a pagarigan.
Da Ruth ken Noemi. Ni Ruth ket manugang ni Noemi. Mabalin nga adayo a bakbaket ni Noemi ken agduma ti kulturada. Ngem uray adda dagiti nagdumaanda, nakadekdekketda nga aggayyem ken ay-ayatenda ti maysa ken maysa.—Ruth 1:16.
Da David ken Jonatan. Uray no 30 a tawen a laklakay ni Jonatan ngem ni David, ibaga ti Biblia a nagbalinda a “nadekket nga aggayyem.”—1 Samuel 18:1.
Ni Jesus ken dagiti apostolna. Adda autoridad ni Jesus kadagiti apostolna ta isu ti mannursuro ken apoda. (Juan 13:13) Ngem saan man la a pinanunot ni Jesus a saanda a maikari a gayyemna, no di ket nadekket ni Jesus kadagiti mangsursurot kadagiti isursurona. Imbagana: “Awagankayo iti gagayyem, ta impakaammok kadakayo ti amin a nangngegko iti Amak.”—Juan 15:14, 15.
Posible kadi nga agbalin a gayyem ti Dios ti maysa a tao?
Wen, posible nga agbalin a gayyem dagiti tattao ti Dios. Kuna ti Biblia: “Nasinged a gayyemna ti nalinteg.” (Proverbio 3:32) Kayatna a sawen, ibilang ti Dios a nadekket a gayyemna dagiti mangikagkagumaan nga agbalin a desente, napudno, ken dagiti mangsursurot kadagiti paglinteganna iti umiso ken di umiso. Kas pagarigan, ti matalek a tao a ni Abraham ket espesipiko a naibaga iti Biblia a gayyem ti Dios.—2 Cronicas 20:7; Isaias 41:8; Santiago 2:23.
a Ipakita ti konteksto daytoy a salmo a ti sao a “kenka” iti daytoy a bersikulo ket tumukoy iti Dios.