Panangipaay Kadagiti Kasapulan ti Natataengantayo—Maysa a Karit iti Kristiano
TALLO a bulan ti napalabasen. Kaskasdi nga awan kadagiti annak ti baket ti nangisamira ti panangbisita kenkuana. Ti baket ti agmaymaysa nga aggigian iti balay para kadagiti natataengan idiay Cape Town, Sud Africa. Dagiti annakna ti aggigianda laeng iti asideg.
Iti maysa a balay dagiti natataengan idiay Johannesburg, busbusbosen ti maysa a baket ti kaaduan a tiempona idiay balkonahe ti kuartona. Ti baket ti masansan makitkita nga agsangsangit.
Dagiti nakasaksakit a buya kas kadagitoy ti agbalbalinen a gagangay, uray kadagiti pagilian a masansan nakaiyugalianen ti pannakatartaripato dagiti natataengan. Idiay Soweto, ti nagdakkelan a pasdek a pagtataengan kaaduanna dagiti nangisit nga asideg ti Johannesburg, “napukaw[en] dagiti lallakay ti naipaugalin a panagraem, autoridad ken panangtartaripato ti pampamiliada,” sigun iti maysa a damag ti pagiwarnak. Ti umas-asping a kasasaad ti timmanor met iti dadakkel a populasion nga Indian idiay Sud Africa. Nupay dagiti Indians ti kasisigudna a maseknanda kadagiti natataenganda, maysa nga opisial ti nabiit pay a nagkuna a dagiti agtutubo pay a pagassawaan nga Indian ‘saanda a kayat a madagdagsenanda kadagiti dadakkelda.’
Dagiti pudno a Kristiano, nupay kasta, ipangpangagda dagiti bilin ti Biblia: “Dayawen ni amam ken ni inam.” (Exodo 20:12; Efeso 6:2) Daytoy nga obligasion saan nga agsardengen no natataenganen dagiti nagannak. Kuna ti 1 Timoteo 5:8: “Ngem no adda saan a mangtaraon kadagiti adda iti aywanna, ket nangruna dagiti kabbalayna met laeng, naglikudanna ti pammati ket dakdakes ngem iti saan a mammati.” Dagiti natataengan a nagannak ti nairaman kadagidiay tulongan ti maysa a Kristiano, uray no daytoy ket ramanenna ti kalalainganna a panagsakripisio—iti emosional ken pinansial.
Masansan, dagiti miembro ti kongregasion Kristiano itatta ti nakaaramiden ti makaay-ayo a trabaho iti panangtaripato kadagiti emosional ken pisikal a kasapulan dagiti dadakkelda. Ngem, aniat’ mapaspasamak, no dagiti natataengan a Kristiano addaandat’ annak wenno appoko a saanda a managbuteng iti Dios a mangaywan kadakuada? Kasano a maipaay dagiti kasapulanda?
Responsabilidad ti Kongregasion
Insurat ni adalan a Santiago: “Ti panagdaydayaw a nadalus ken awan tulawna iti imatang ti Diostayo ken Ama isu daytoy: Sarungkaran dagiti awan ti ammada ken dagiti balo a babbai iti ladingitda.” Imbaga pay met ni Santiago: “No ti maysa a kabsat a lalaki wenno babai adda a lamolamo wenno awan taraonna nga inaldaw, ket ti maysa kadakayo kunaennanto: ‘Inkayo a sitatalna, aginudo ken agbussogkayo,’ ngem dikayto ited kadakuada dagiti masapul a maipaay iti bagi, ania ti magunggonada? Kasta met ti pammati, no awan dagiti ar-aramidna, isu ti pammati a natay.”—Santiago 1:27; 2:15-17.
Gapuna no maysa a nataenganen a Kristiano agkasapulan ti tulong, daytoy ket maysa a banag a pakaseknan ti intero a kongregasion. Dagiti panglakayen ti mangidaulo itoy a banag. Kas imbilin ni Pablo idiay 1 Timoteo 5:4, umuna nga ammuenda no dagiti natataenganen ti addaan annak wenno appoko a situtulok a “mangted ti pannupapak kadagiti nagannak kadakuada, ta daytoy makaay-ayo iti imatang ti Dios.” No saan, mabalin a sukimaten dagiti panglakayen tapno makita no ania dagiti adda a panangisiguro wenno ipapaay ti gobierno a tulong. Mabalin nga addada sumagmamano iti kongregasion nga addat’ posision a personal a makatulong a pinansial.
Nupay kasta, no awan dagiti kasta nga urnos ti maaramid, mabalin nga usigen dagiti panglakayen no ti indibidual ket makakualipikar nga umawat ti tulong manipud kongregasion mismo. Kuna ni Pablo: “Saan koma a pailista ti uray siasino a kas balo no awan pay innem a pulo a tawenna, asawa ti maymaysa a lalaki, nga adda naimbag a damagna kadagiti nasayaat nga aramid.”—1 Timoteo 5:9, 10.
Ngem, masansan, saan met a ti kuarta ti kasapulan. Masapul nga ammuen dagiti panglakayen no ania a pudno ti kasapulan. Kasapulan kadi ti nataengan ti tulong nga ag-shopping? Isu aya ti maladladingitan wenno agkasapulan ti pammaregta?
Kasapulanna kadi ti pagluganan a mapan makipagadal? Kasapulanna aya ti maysa a mangibasa kenkuana manipud Biblia ken dagiti Nakristianuan a publikasion? No ti tao a nataenganen ti dinan kabaelan a pisikal ti mapan makigimong, mabalin kadi ti agaramid ti tape recordings tapno daytanto ti mangngeganda idiay pagtataenganda? Mabalin nga alaenna ti sumagmamano nga ibibisita ken pannakipatpatang sakbay a rummuar ti pudpudno a ladawan. Ngem kas papastor, dagiti panglakayen ‘gagetanda nga ammuen ti kasasaad dagiti pangen.’—Proverbio 27:23.
No Kasanon a Nakatulong dagiti Kongregasion
Apaman a naammuanen ti kasapulan dagiti natataengan, mabalinen nga aramiden dagiti espesipiko nga urnos. Idiay adda nabara, naayat, ken awan-imutna nga espiritu iti kongregasion, saan a narigat ti panangsapul ti sumagmamano a kakabsat a lallaki ken babbai a situtulok a tumulong. Iti kasta saan a maipabaklay ti di nainkalintegan a babantot iti sumagmamano laeng nga indibidual. Kas pangarigan, maysa a kongregasion ti nangyurnos ti eskediul dagiti agibumbunannag a mangbisita kadagiti natataenganen. Maragragsakan dagiti kakabsat a lallaki ken babbai a nairaman iti panangaramid iti daytoy, ket awan kadagiti natataenganen ti naliwayan.
Iti sabali pay a kongregasion, maysa a nataenganen a Saksi ti di inkankanon dagiti di manamati nga annakna. Dagiti agtutubo a lokal a Saksi, nupay kasta, ti mangar-aramid amin a panagpalabana, panagplantsa, ken panagdaldalus, kasta met ti panangaywan iti paraanganna. Timmulong dagiti kakabsat iti panagbayad ti abangna ken ti pagtaraonna. Isut’ itugtugotda a mapan kadagiti asamblea ken panaggigimong. Ket idi natayen ti baket, inaywananda amin nga urnos ti pumpon ken amin a gastos.
Iti maysa a bassit a kongregasion idiay Sud Africa, maysa a kabsat a lakayen a colored [daydiay laok ti rasa dagiti inapona] ti naan-anay a paralitiko gaput’ pannakaistrokna. Yantangay awan uray maysa iti pamiliana ti makaasikaso kenkuana, maysa a kabsat a babai iti kongregasion—a biuda met-ken ti anakna a lalaki ti nangala kenkuana. Dagiti kalalakian iti kongregasion nagsisinnublatda a mangdigos kenkuana. Mainayon pay, maysa a payunir a kabsat a lalaki a puraw ti mangidurduron iti daytoy nataenganen a kabsat iti maysa a wheelchair no agpasiarda. Daytoy a buya, a mammano idiay Sud Africa, ti makapatignay unay. Ti kongregasion ti nangted iti kabsat a lakayen ti naayat a panangtaripato agingga nga isut’ natay.
Ngem, saan a panangibagbaga iti daytoy, a ti panangipaay kadagiti kasapulan dagiti natataengan a kakabsat a lallaki ken babbai ti nalaka. Alaen dayta ti pudpudno a panagregget ken determinasion a mangparmek kadagiti rumsua a problema.
Panangipan kadagiti Nataengan iti Paggigimongan
Maysa a kabsat a baketen, a biuda ken adda sakitna iti puso, ti binisita naminsan ti maysa a panglakayen. Bayat ti kaadda ti panglakayen sadiay, maysa met a kaarruba ti immay ken nagreklamo, a kunkunana: “Kanayon nga umumayak ditoy ket makitak nga isut’ agsangsangit agsipud ta awan ti bumisbisita kenkuana a mangipan kenkuana idiay Kingdom Hall.” Ti problema ti saan met a serioso kas panangipresenta ti kaarrubana, ta maysa a pamilia idiay kongregasion ti mangmangted ti regular a pagluganan. Nupay kasta, iti sumagmamano nga okasion nag-overtime ti ama ket saanna a nadagas ti kabsat a baket. Siempre, adda koma naaramid nga urnos maipapan iti dadduma a pagluganan.
Ngarud, nasayaat koma a laglagipen, a ti itatabuno iti gimong ti nasken kadagiti natataenganen. (Hebreo 10:24, 25) Maysa a panglakayen ti kanayon a mangsitsitar tapno maammuan no maysa a nataenganen a Saksi ti presente. No isut’ awan gapu ta pimmalia ti urnos ti pagluganan, agdaras ti panglakayen iti kotsena ket isut’ mapanna alaen. Ti nagpintas nga isem iti rupa ti baket ti umdasen a manggunggona kenkuana iti kanayonan a panagreggetna.
Nataktika Kaskasdi Napinget
Ngem, no maminsan, addada met natataenganen a medio managbukbukodda. Mabalin a kasapulanda ti tulong ngem saanda a kayat ti umawat iti dayta. Ket malaksid no dagiti panglakayen, wenno dagidiay natudingan a tumulong, ti alertoda, adda pagannayasan dagita a natataengan a padpadasen nga ‘aramiden dayta a bukbukodda.’
Maysa a baket a biuda ti agsakit ti kanser ngem inlimlimedna dayta. Kasapulanna ti tulong a mangiyakar kadagiti personal a sansanikuana iti maysa a lugar a maysa milia ti kaadayona. Imbes a pinakaammuanna dagiti dadduma iti pagkasapulanna, innalana ketdi ti tulong ti maysa a 84-años a gayyemna. Isuda a dua inkargada ti dadduma kadagiti bambanag iti kariton ket indurduronda dayta a bukbukodda. Ngem, di nagbayag, nabigbigda a saanda a kabaelan dayta a trabaho, ket ti gayyem ti biuda napan iti asideg a panglakayen a maipaay met laeng iti tulongna.
Ngarud, mabalin, nga alaenna ti naintaktikaan a kinapinget a panagsalsaludsod iti biangtayo a mangdeterminar no ania a talaga ti maaramidantayo a pangtulong iti kakasta a tattao. No basta mangaramidtay laeng ti di nalawag a panangitukon, kas ti: ‘No adda aniaman a kasapulanyo, ibagayo kaniak,’ mabalin nga adda met ti napartak a sungbat: ‘Pagyamanan, ngem awan aniaman a kasapulak.’ Laglagipenyo, nupay kasta, nga idi nangitukon ni Lydia ti kinamanagpadagusna kada apostol Pablo ken kadagiti dadduma, isut’ saan a natungday babaen iti umuna a panagkitakitda. Imbes ketdi, ‘impapilitna kadakuada nga umayda.’ (Aramid 16:15) Gapuna agbalinkayo a napinget. Ammuenyo no ania dagiti kasapulan ken kayat dagiti natataenganen sakbay nga ikalikagumda pay ti itutulongyo.
Siempre, rebbengna a dagiti natataengan manangpresiarda koma met iti panagregget dagiti dadduma ket saanda nga agbalin a sensitibo, a nalabes ti panagdawatda, wenno nababalawda. No maipapaayen ti pagluganan, kas pangarigan, ti panangitukon a tumulong iti panagbayad ti gastos ti maiyanatup met. Maysa a kabsat a baket ti agaramid ti kankanen ken aggansilio ti babassit a bambanag ket itedna dagitoy kas regalo kadagidiay mangiluglugan kenkuana a mapan makigimong. Iti adu a kaso, nupay kasta, ti bassit a sao ti panagyaman ti isu lat’ kasapulan.
Pagregreggetan dagiti Kristiano itatta a pagtulnogan ti bilin idiay Levitico 19:32: “Tumakderkanto iti sango ti ubanan nga ulo, ket dayawemto ti langa ti lakay.” Saan a sursuroten dagiti ad-adipen ni Jehova ti nailubongan a pagannayasan nga iwaksi dagiti natataenganen ken lislisian ti responsabilidad dagiti nagannak. Imbes ketdi, buyogen ti tiempo, anus, ken tulong ni Jehova, pagreggetan dagiti Kristiano nga ipaay a sibaballigi ti karit a panangtaripato kadagiti natataengantayo.
[Ladawan iti panid 23]
Masansan dakkel ti maaramidan dagiti agtutubo iti kongregasion a mangtulong kadagiti natataengan