Adda Kadi ti Dios iti Amin a Lugar?
Sungbat ti Biblia
Makita ti Dios ti amin ken maaramidna ti kayatna iti sadinoman. (Proverbio 15:3; Hebreo 4:13) Ngem saan nga isursuro ti Biblia nga adda ti Dios iti amin a lugar ken iti amin a bambanag. Imbes ketdi, isurona a ti Dios ket maysa a persona ken adda espesipiko a lugar a paggigiananna.
Ti maipapan iti Dios: Ti Dios ket maysa nga espiritu. (Juan 4:24) Isu ket saan a makita dagiti tattao. (Juan 1:18) Dagiti sirmata iti Biblia maipapan iti Dios agpapada nga ipakitada nga adda espesipiko a lugar a paggigiananna. Awan a pulos mabasatayo nga isu ket adda iti amin a lugar.—Isaias 6:1, 2; Apocalipsis 4:2, 3, 8.
Ti paggigianan ti Dios: Aggigian ti Dios iti ayan dagiti espiritu a parsua, maysa a lugar a naiduma iti ayan dagiti makitatayo a parsua. Adda iti dayta a lugar ti ‘disso a pagnanaedan ti Dios, iti langlangit.’ (1 Ar-ari 8:30) Mabasa iti Biblia ti maipapan iti maysa a pasamak a dagiti espiritu a parsua ‘simrekda tapno agsaadda iti sanguanan ni Jehova.’a Ipakita dayta nga aggigian ti Dios iti maysa nga espesipiko a lugar.—Job 1:6.
Kabaelannak kadi a tulongan ti Dios uray no isu ket awan iti amin a lugar?
Wen. Ipatpateg unay ti Dios ti tunggal indibidual. Uray no adda iti ayan dagiti espiritu a parsua, makitkitana dagiti tattao ditoy daga a talaga a mayat a mangparagsak kenkuana, ket tultulonganna ida. (1 Ar-ari 8:39; 2 Cronicas 16:9) Kitaem no kasano nga ipakpakita ni Jehova nga isu ket sipapanunot iti pagimbagan dagiti napudno nga agdaydayaw kenkuana:
No agkararagka: Dengdenggennaka ni Jehova bayat nga agkarkararagka.—2 Cronicas 18:31.
No madepdepreska: “Ni Jehova asideg kadagidiay nadunor ti pusoda; ket dagidiay a naidagel iti espiritu [wenno, maup-upay] isalakanna.”—Salmo 34:18.
No kasapulam ti panangidalan: Ikkannaka ni Jehova iti ‘pannakatarus ket isuronaka’ babaen iti Saona, ti Biblia.—Salmo 32:8.
Di umiso a pagarup maipapan iti Dios
Di umiso: Adda ti Dios iti amin a parsuana.
Umiso: Saan nga aggigian ti Dios ditoy daga wenno iti sadinoman iti uniberso. (1 Ar-ari 8:27) Agpayso a dagiti bituen ken ti dadduma pay a parsua “idekdeklarada ti dayag ti Dios.” (Salmo 19:1) Nupay kasta, saan nga aggigian ti Dios kadagiti pinarsuana no kasano a saan nga aggigian ti maysa a pintor iti impintana. Ngem adu ti maammuantayo maipapan iti pintor babaen iti impintana. Kasta met, ipakita dagiti parsua ti Dios dagiti “di makita a kualidadna,” kas iti pannakabalin, sirib, ken ayat.—Roma 1:20.
Di umiso: Masapul nga adda ti Dios iti amin a lugar tapno ammona ti amin a bambanag ken agbalin a mannakabalin-amin.
Umiso: Ti nasantuan nga espiritu ti Dios, wenno ti aktibo a puersana, ket isu ti pannakabalin nga us-usarenna tapno maaramidna ti pagayatanna. Babaen ti nasantuan nga espirituna, makita ti Dios ti amin, ken maaramidna ti amin a kayatna kaanoman ken sadinoman, a saanna a kasapulan ti mapan sadiay.—Salmo 139:7.
Di umiso: Isursuro ti Salmo 139:8 nga adda ti Dios iti amin a lugar. Kunana: “No umuliak koma idiay langit, sadiay addaka; ket no isimpak koma ti sopak idiay Sheol [wenno, Tanem] adtoy! addaka sadiay.”
Umiso: Daytoy a bersikulo ket saan a maipapan iti paggigianan ti Dios. Kaipapanan dayta a daniw a matulongannatayo latta ti Dios sadinoman ti ayantayo.
a Jehova ti nagan ti Dios a naipakaammo iti Biblia.