SALUDSOD DAGITI AGTUTUBO
Kasano a Matulongannak ti Biblia?—Paset 1: Adalem a Naimbag ti Bibliam
“Pinadasko a basaen ti Biblia ngem ma-boring-ak ta nakaat-atiddog!”—Briana, 15.
Kasta met kadi ti riknam? Matulongannaka daytoy nga artikulo!
Apay a basaek ti Biblia?
Pampanunotem pay laeng kadi a basaen ti Biblia ket ma-boring-kan? No wen, saanka nga agmaymaysa. Mabalin a mapanunotmo a ti Biblia ket nakapuspuskol a libro a babassit ti letrana ken awan picture-na ken saan unay a makapainteres a kas iti TV ken video.
Ngem panunotem daytoy: No makakitaka iti dakkel a daan a baul, saanka kadi nga aginteres no ania ti kargana?
Kasta met laeng ti Biblia. Napno dayta iti sirib a makatulong kenka tapno
Makaaramidka iti nasayaat a desision
Makabagayam dagiti nagannakmo
Maaddaanka iti nasayaat a gagayyem
Malabanam ti stress
Apay a makatulong unay ita ti kasta a daanen a libro? Gapu ta ti “amin a Kasuratan impaltiing ti Dios.” (2 Timoteo 3:16) Kayatna a sawen, dagiti balakad a mabasa iti Biblia ket naggapu iti kalaingan a Persona.
Ti Biblia ket maysa a baul a naglaon kadagiti agkakapateg a sirib
Kasano ti panangbasak iti Biblia?
Ti maysa a pamay-an ket basaem ti intero a Biblia. Makatulong dayta tapno maammuam ti pakabuklan ti mensahe ti Biblia. Adu ti pamay-an ti panangbasa iti dayta. Kitaem ti dua a pagarigan:
Mabalinmo a basaen sigun iti panagsasaruno ti 66 a libro ti Biblia, manipud iti Genesis agingga iti Apocalipsis.
Mabalinmo a basaen ti Biblia sigun iti kronolohia wenno panagsasaruno dagiti pasamak.
Tip: Makitam iti Appendix A7 ti New World Translation ti listaan ti panagsasaruno dagiti napapateg a pasamak iti biag ni Jesus ditoy daga.
Ti maikadua a pamay-an ti panangbasa iti Biblia ket mangpilika iti salaysay a maibagay iti agdama a situasionmo. Kas pagarigan:
Kayatmo kadi ti maaddaan iti mapagtalkan a gagayyem? Basaem ti maipapan kada Jonatan ken David. (1 Samuel, kapitulo 18-20) Sa usarem ti worksheet a “No Kasano ti Makasarak iti Napudno a Gayyem” tapno makasursuroka kadakuada.
Kayatmo kadi a natibtibkerka a manglaban iti sulisog? Basaem ti pakasaritaan ni Jose a nanglaban iti sulisog. (Genesis, kapitulo 39) Sa usarem ti worksheet a “No Kasano a Pagkedkedam ti Sulisog . . . Jose—Paset 1” ken “Napabasol! Jose—Paset 2” tapno makasursuroka kenkuana.
Kayatmo kadi a maammuan no kasano a makatulong ti kararag kenka? Basaem ti kapadasan ni Nehemias. (Nehemias, kapitulo 2) Sa usarem ti worksheet a “Sinungbatan ti Dios ti Kararagna” tapno makasursuroka kenkuana.
Tip: No agbasaka iti Biblia, siguraduem a naulimek ti aglawlawmo tapno makapokuska.
Ti maikatlo a pamay-an ti panangbasa iti Biblia ket mangpilika iti maysa a salaysay wenno salmo, basaem dayta, ket kalpasanna, panunotem no kasano a makatulong kenka. No nabasamon, sungbatam dagitoy a saludsod:
Apay nga impaisurat ni Jehova daytoy iti Biblia?
Ania ti ipakita daytoy maipapan iti personalidad ni Jehova wenno iti panangasikasona kadagiti bambanag?
Kasano a makatulong kaniak daytoy nga impormasion?
Tip: Kitaem dagiti video, mapa, ken dadduma pay a linaon ti study edition ti New World Translation tapno naan-anay a mabenepisiaranka iti panagbasam iti Biblia.