Pannakagunggona iti Inaldaw a Panagbasa iti Biblia

“Naragsak ti tao . . . [a] ti pakaragsakanna adda iti linteg ni Jehova, ket iti lintegna basaenna a siaalumamay iti aldaw ken rabii.”​—SALMO 1:1, 2.

1. (a) Ania a nalawag a karatula ti agparang iti bakrang ti paktoria ti sangalubongan a hedkuarter ti Watch Tower Society? (b) Kasanotay a magunggonaan no personal nga ipapusotayo dayta a balakad?

“INALDAW A BASAENYO TI SAO TI DIOS, TI NASANTUAN A BIBLIA.” Agparang iti dadakkel a letra dagitoy a sao iti bakrang ti pasdek a pagimalditan kadagiti Biblia ken literatura ti Biblia ti Watchtower Bible and Tract Society, idiay Brooklyn, Nueva York. Saan a nairanta dayta a pammalagip nga agpaay laeng kadagiti tattao ti lubong a makakita iti dayta a karatula. Bigbigen dagiti Saksi ni Jehova a nasken nga ipapusoda met dayta. Magunggonaan dagidiay regular nga agbasbasa iti Biblia ken personal a mangyap-aplikar iti dayta manipud iti pannursuro, pannubngar, panangatur, ken pannakadisiplina iti kinalinteg nga ipaayna.​—2 Timoteo 3:16, 17.

2. Kasano nga impaganetget ni Brother Russell ti kinapateg ti panagbasa iti Biblia?

² Apresiaren unay dagiti Saksi ni Jehova dagiti katulongan iti panagadalda iti Biblia, a pakairamanan Ti Pagwanawanan, ket regular nga ar-aramatenda dagitoy. Ngem ammoda nga awan kadagitoy ti makasandi iti Biblia a mismo. Idi 1909, insurat ni Charles Taze Russell, ti immuna a presidente ti Watch Tower Bible and Tract Society, kadagiti managbasa iti magasin a Watch Tower: “Diyo liplipatan a ti Biblia isu ti Estandartetayo ket nupay dagiti katulongantayo [iti panagadal] ket inted ti Dios, dagitoy ket ‘katulongan’ laeng ken dida sandian ti Biblia.”

3. (a) Aniat’ epekto “ti sao ti Dios” kadagidiay makabasa iti dayta? (b) Kasanot’ kasansan ti panagbasbasa ken panagad-adal dagiti taga-Berea kadagiti Kasuratan?

³ Addaan ti naipaltiing a Kasuratan iti kauneg ken bileg nga awan iti dadduma a libro: “Ti sao ti Dios nabiag ken adda bilegna ken natartarumamis ngem iti aniaman a kampilan a dua ti tademna ket sumalput uray agingga iti paglasinan ti kararua ken espiritu, ken kadagiti nagsuopan ken ti patada, ket kabaelanna a lasinen dagiti panunot ken dagiti panagem ti puso.” (Hebreo 4:12) Sipapasnek a pinadayawan ni adalan a Lucas dagiti taga-Berea, nga inawaganna ida a “nataktakneng.” Saan laeng a sigagagar nga inawatda ti sao nga inkaskasaba ni apostol Pablo ken ti kaduana a ni Silas no di pay ket “siaannad a sinuksukimatda ti Kasuratan iti inaldaw” tapno masiertoda ti Nainkasuratan a pakaibatayan ti maisursuro.​—Aramid 17:11.

Inaldaw a Panagbasa

4. Aniat’ ipamatmat dagiti Kasuratan no kasanot’ kasansan ti panangbasatayo iti Biblia?

⁴ Saan nga espesipiko a dinakamat ti Biblia no kasanot’ kasansan ti panagbasatayo iti dayta. Nupay kasta, nailanad iti dayta ti balakad ni Jehova ken ni Josue a ‘basaenna a siaalumamay ti libro ti linteg iti aldaw ken iti rabii’ tapno makapagtignay a nainsiriban ken agballigi a mangtungpal iti annongenna nga inted ti Dios. (Josue 1:8) Kunaenna kadatayo a rebbeng a basaen ti siasinoman nga agturay kas ari iti nagkauna nga Israel ti Kasuratan “iti amin nga aldaw ti panagbiagna.” (Deuteronomio 17:19) Kunana pay: “Naragsak ti tao a saan a magna iti patigmaan dagiti nadangkes . . . Ngem ti pakaragsakanna adda iti linteg ni Jehova, ket iti lintegna basaenna a siaalumamay iti aldaw ken rabii.” (Salmo 1:1, 2) Kasta met, kunaen kadatayo ti Ebanghelio nga insurat ni Mateo nga idi linaksid ni Jesu-Kristo ti pananggay-at ni Satanas a mangsulisog Kenkuana, nagadaw manipud iti Hebreo a Kasuratan, a kunkunana: “Adda a naisurat, ‘Ti tao agbiag, saan nga iti tinapay laeng, no di ket iti tunggal sao a rumrummuar iti ngiwat ni Jehova.’” (Mateo 4:4) Kasanot’ kasansan ti pannakasapultayo iti pisikal a taraon? Inaldaw! Napatpateg ti inaldaw a panangipauneg iti naespirituan a taraon agsipud ta apektaranna ti namnamatayo iti biag nga agnanayon.​—Deuteronomio 8:3; Juan 17:3.

5. Kasanonatay a matulongan ti inaldaw a panagbasa iti Biblia a “magna a maikari ken Jehova” no maipasangotay kadagiti pakasuotan ti pammati?

⁵ Kasapulan a mapatibker ti tunggal maysa kadatayo iti inaldaw babaen ti Sao ti Dios. Tunggal aldaw​—iti pagtaengan, panggedan, eskuelaan, lansangan, no gumatgatang, iti ministeriotayo​—maipasangotayo kadagiti karit iti pammatitayo. Kasanotay a tamingen dagitoy? Dagus kadi a malagiptayo dagiti bilin ken prinsipio ti Biblia? Imbes nga iparegtana ti panagtalek iti bagi, ballaagannatay ti Biblia: “Ti mangipagarup nga isu sitatakder agannad koma tapno di maikulbo.” (1 Corinto 10:12) Tulongannatay ti inaldaw a panagbasa iti Biblia a ‘magna a maikari ken Jehova maipaay iti panggep a panangay-ayo a naan-anay kenkuana’ imbes a pasukogtayo iti lubong.​—Colosas 1:9, 10; Roma 12:2.

Kasapulan ti Maulit-ulit a Panagbasa iti Biblia

6. Apay a makagunggona ti maulit-ulit a panagbasa iti Biblia?

⁶ Naiduma unay ti panagbasa iti Biblia iti panagbasa iti libro ti sarsarita. Nairanta ti kaaduan a popular a libro ti sarsarita a basaen iti maminsan; no ammon ti maysa a tao ti estoria ken paggibusanna, agingga la ditan. Maigidiat iti dayta, uray namin-anon a nabasatayo ti Biblia, dakkel ti magunggonatayo no ulit-ulitentayo a basaen. (Proverbio 9:9) Iti mannakaawat a tao, kanayon a lumawag ti pannakatarusna kadagiti Kasuratan. Ad-adda a makaawis kenkuana dagiti padto maipapan iti maudi nga al-aldaw gapu iti nakita, nangngegan, ken personal a napadasanna kadagiti kallabes a bulan. (Daniel 12:4) Bayat nga umad-adu ti kapadasanna iti biag ken mapagbalballigianna dagiti parikut, ad-adda nga apresiaren ti mannakaawat a managbasa iti Biblia ti balakad a mabalin a basta nabasana laeng idi. (Proverbio 4:18) No makaptan iti grabe a sakit, ad-adda nga umuneg ti kaipapanan kenkuana dagiti kari ti Biblia maipapan iti pannakaikkat ti ut-ot ken pannakaisubli ti salun-at. No matay dagiti nadekket a gagayyem wenno kameng ti pamilia, dumakkel ti pateg ti kari maipapan iti panagungar.

7. Aniat’ makatulong kadatayo no maaddaantay iti baro a pagrebbengan iti biag, ken apay?

⁷ Mabalin a personal a nabasbasamon ti Biblia ken inyaplikar ti balakadna kadagiti naglabas a tawen. Ngem mabalin nga adda dagiti baro a pagrebbengan iti biag a naipabaklay kenka ita. Planom kadi ti mangasawa wenno makiasawa? Dandanika kadin agbalin nga ama wenno ina? Naikkanka kadi iti pagrebbengan iti kongregasion kas maysa a panglakayen wenno ministerial nga adipen? Maysaka kadi itan nga amin-tiempo nga ebanghelisador, nga addaan iti ad-adu a gundaway a mangasaba ken mangisuro? Anian a makagunggona ti panangbasa manen iti intero a Biblia a sipapanunot kadagidiay a baro a pagrebbengan!​—Efeso 5:24, 25; 6:4; 2 Timoteo 4:1, 2.

8. Kasano a kalikaguman dagiti baro a kasasaad ti panagsursuro iti ad-adu pay maipapan kadagiti bambanag nga impagaruptayo nga ammotayon?

⁸ Iti napalabas mabalin a nasayaat ti panangiparangarangmo kadagiti bunga ti espiritu. (Galacia 5:22, 23) Ngem mabalin a kalikaguman dagiti baro a kasasaad ti panagsursurom iti ad-adu pay maipapan kadagidiay a nadiosan a galad. (Idiligyo ti Hebreo 5:8.) Kastoy ti kinuna ti dati nga agdaldaliasat a manangaywan a kapilitan a simmardeng iti naisangsangayan a serbisiona tapno maaywananna dagiti lakay ken baketen a nagannakna: “Impagarupko idi a nasayaat ti panangiparangarangko kadagiti bunga ti espiritu. Ita mariknak a kasla mangrugiak manen.” Kasta met, dagiti assawa a lallaki ken babbai nga agsagsagaba ti assawada iti nakaro a pisikal wenno emosional a sakit mabalin a masarakanda nga iti personal a panangaywanda, ti irteng mangpataud no dadduma kadagiti reaksion a mangupay kadakuada. Maysa a gubuayan ti dakkel a liwliwa ken tulong ti regular a panagbasa iti Biblia.

No Kaano a Mabalin a Basaen ti Biblia

9. (a) Aniat’ makatulong iti maysa a tao nga okupado unay a maaddaan iti panawen nga agbasa iti Biblia kada aldaw? (b) Apay a nangnangruna a napateg kadagiti panglakayen ti panagbasa iti Sao ti Dios?

⁹ Siempre, kadagiti tattao nga okupado unayen, maysa a karit ti panangisapar a mangaramid a regular iti dadduma a banag. Nupay kasta, magunggonaantayo iti ulidan ni Jehova. Ipakita ti Biblia nga adda ‘naituding a tiempo’ a panangaramidna kadagiti bambanag. (Genesis 21:2; Exodo 9:5; Lucas 21:24; Galacia 4:4) Ti panangapresiar iti kinapateg ti regular a panagbasa iti Sao ti Dios matulongannatayo a mangituding iti panawen para iti dayta iti inaldaw nga eskediultayo. (Efeso 5:15-17) Kasapulan a nangnangruna dagiti panglakayen ti mangiwayá iti panawen para iti regular a panagbasa iti Biblia tapno nalawag a naibatay ti balakadda kadagiti prinsipio ti Biblia ken tapno maanninaw iti espiritu nga ipakpakitada “ti sirib manipud ngato.”​—Santiago 3:17; Tito 1:9.

10. Kaano ti panagbasa dagidiay inaldaw nga agbasbasa iti Biblia?

¹⁰ Adu kadagiti nagballigi iti programa a personal a panagbasa iti Biblia ti mangar-aramid iti daytoy iti agsapa sakbay nga irugida ti inaldaw nga aramidda. Kadagiti dadduma, ad-adda a maaramidda dayta nga awan langanna iti sabali a gundaway. Makatulong dagiti audiocassette ti Biblia (no magun-odan) kadagiti agbibiahe a manggundaway iti panawen ti panagbiaheda, ket dagiti dadduma a Saksi denggenda dagitoy bayat nga as-asikasuenda ti inaldaw a trabahoda iti balay. Naipakita iti pinanid 20 ken 21, iti artikulo a “No Kaanot’ Panagbasada ken No Kasanoda a Nagunggonaan” dagiti programa nga epektibo kadagiti dadduma a Saksi idiay Europa, Africa, Norte America, Sud America, ken iti Oriente.

11. Kasano a maaramid ti inaldaw a panagbasa iti Biblia uray no limitado unay ti panawen?

¹¹ Ti kaskenan ket saan a ti kaadu ti panawen a mabusbos iti panagbasayo iti Biblia iti aniaman a gundaway no di ket ti regular a panangaramid iti dayta. Mabalin a makagunggona ti panagbasa iti maysa nga oras wenno nasursurok pay iti sangkatugawan, a mangaramid iti kanayonan a panagsukisok ken ipamaysa ti panunot iti material. Ngem ipalubos kadi ti eskediulyo ti panangaramidyo iti dayta a regular? Imbes nga ipalubos nga aglabas dagiti aldaw a pulos a diyo man la nabasa ti Biblia, saan kadi a nasaysayaat ti agbasa iti las-ud ti 15 wenno uray 5 a minuto laeng kada aldaw? Ikeddengyo koma a basaen ti Biblia iti inaldaw. Kalpasanna pakuyoganyo dayta a panagbasa iti naun-uneg a panagsukisok no mabalbalin.

Dagiti Nadumaduma a Pamay-an ti Panagbasa iti Biblia

12. Ania a programa iti panagbasa iti Biblia ti sursuroten dagiti baro a kameng ti pamilia ti Bethel ken estudiante ti Gilead?

¹² Adu dagiti pamay-an ti panagbasa iti Biblia. Makagunggona ti panangbasa iti dayta manipud Genesis agingga iti Apocalipsis. Makalikaguman kadagiti amin a kameng ti pamilia ti Bethel nga agserserbi iti sangalubongan a hedkuarter wenno iti maysa kadagiti sanga ti Sosiedad a basaenda ti intero a Biblia iti umuna a tawen a panagserbida iti Bethel. (Kadawyanna a tallo agingga iti lima a kapitulo, depende iti kaatiddogda, wenno uppat agingga iti lima a panid, ti basaenda kada aldaw.) Masapul met a basaen dagiti estudiante iti Watchtower Bible School of Gilead ti intero a Biblia sakbay ti panagturposda. Mainanama a makatulong daytoy kadakuada a mamagbalin iti inaldaw a panagbasa iti Biblia a paset ti biagda.

13. Ania a kalat ti mairekomendar kadagiti Saksi a nabiit pay a nabautisaran?

¹³ Makagunggona kadagiti Saksi a nabiit pay a nabautisaran no pagbalinenda a kalat ti panangbasa iti intero a Biblia. Idi 1975, dinamag ti maysa a panglakayen iti maysa a baro a taga-Francia nga agsagsagana nga agpabautisar no adda met laeng masnup a programana iti panagbasa iti Biblia. Manipud idin tinawen a mabasana ti intero a Biblia, a masansan nga agbasa iti bigat sakbay a mapan agtrabaho. No maipapan kadagiti resulta, kunana: “Simmayaat ti pannakaammok ken Jehova. Makitak no kasano a mainaig iti panggepna ti amin nga aramidna ken no kasanot’ panangtulongna no tumaud dagiti tubeng. Makitak met a ni Jehova ket nalinteg ken naimbag iti amin a tignayna.”

14. (a) Tapno mairugi ti programa iti agtultuloy a personal a panagbasa iti Biblia, ania ti kasapulan? (b) Aniat’ makatulong kadatayo a manglaglagip iti pakabuklan ti tunggal libro ti Biblia bayat a basbasaentay dayta?

¹⁴ Nabasayo kadin ti intero a Biblia? No saan pay, itan ti nasayaat a tiempo a panangirugiyo. Mangaramidkayo iti masnup a programa, ket surotenyo dayta. Ikeddengyo no mano a panid wenno kapitulo ti basaenyo kada aldaw, wenno ikeddengyo laeng no kasanot’ kaadu ti panawen a busbosenyo ken kaano. Saan a mabasa ti tunggal maysa ti intero a Biblia iti makatawen, ngem ti nasken isu ti regular a panangbasa iti Sao ti Dios, inaldaw no mabalbalin. Bayat ti panangbasayo iti intero a Biblia, mabalin a makatulong ti panangaramatyo iti sumagmamano a reperensia a mangyukuok ti pakabuklan ti material iti panunotyo. No magun-odan iti pagsasaoyo ti Insight on the Scriptures, sakbay a rugianyo a basaen ti partikular a libro ti Biblia, repasuenyo ti ababa a balabala dagiti tampok a pasetna a naipaay iti Insight.a Paliiwenyo a naimbag dagiti paulo iti balabala a naisurat kadagiti napuskol (bold) a letra. Wenno mabalinyo met nga aramaten ti nasaksaklaw a pananggupgop a naipaay iti libro nga “Amin a Kasuratan Impaltiing ti Dios ken Naimbag.”b

15. (a) Ania dagiti singasing a naipaay iti pinanid 16 ken 17 a makatulong a mangpasayaat iti panagbasayo iti Biblia? (b) Imbes a pagbalinen a ritual ti panagbasa iti sumagmamano a panid, ania a napatpateg a banag ti rumbeng nga ikkantay iti dakdakkel nga atension?

¹⁵ Makagunggona ti agsasaruno a panagbasa iti Biblia, ngem diyo koma basta basaen laeng. Saankay nga agbasa iti sumagmamano a panid kada aldaw tapno laeng maikunayo a basbasaenyo ti intero a Biblia kada tawen. Kas naipakita iti kahon a “Dagiti Singasing a Mangparang-ay iti Panagbasayo iti Biblia” (pinanid 16 ken 17), adu dagiti pamay-an a matagiragsakyo ti agbasa iti Biblia. Aniaman ti pamay-an nga usarenyo, siguraduenyo a pakpakanenyo agpadpada ti panunot ken pusoyo.

Alaenyo ti Kababagas ti Basbasaenyo

16. Apay a napateg ti panangiwayá iti panawen a mangutob iti basbasaentayo?

¹⁶ Idi isursurona dagiti adalanna, impaganetget ni Jesus ti kinapateg ti panangawatda iti ibagbagana. Ti nasken ket, saan laeng a mental a pannakaawat, no di ket ti panangala iti “kababagas iti puspusoda” tapno mayaplikarda dayta iti panagbiagda. (Mateo 13:14, 15, 19, 23) Ti napateg iti Dios ket no aniat’ pudpudno nga adda iti uneg ti maysa a tao, ket isu daytoy ti itakderan ti puso. (1 Samuel 16:7; Proverbio 4:23) Gapuna, malaksid iti panangsierto a maawatantayo ti ibagbaga dagiti teksto ti Biblia, nasken nga utobentayo dagitoy, nga usigentayo ti pakainaiganda iti panagbiagtayo.​—Salmo 48:9; 1 Timoteo 4:15.

17. Ania ti sumagmamano a benneg a pangutobantayo iti mabasbasatayo kadagiti Kasuratan?

¹⁷ Ikagumaanyo nga ilasin dagiti prinsipio a naibugas kadagiti salaysay ti Biblia tapno mayaplikaryo ida kadagiti kasasaad a pakaipasanguanyo. (Idiligyo ti Mateo 9:13; 19:3-6.) Bayat a basbasaenyo ti maipapan kadagiti nakaskasdaaw a galad ni Jehova ken ut-utobenyo dagitoy, usarenyo dayta a gundaway a mangpatibker iti personal a relasionyo kenkuana, a patanorenyo ti nasged a nadiosan a debosion. No makabasakayo iti maipapan kadagiti panggep ni Jehova, panunotenyo no aniat’ maaramidyo a maitunos kadagitoy. No makabasakayo iti direkta a balakad, imbes a kunayo laeng iti bagiyo, ‘Ammokon dayta,’ isaludsodyo, ‘Ar-aramidek kadi ti ibagbagana?’ No wen, isaludsodyo iti bagiyo, ‘Kadagiti ania a pamay-an a maaramidko dayta nga “ad-adda pay a naan-anay?”’ (1 Tesalonica 4:1) Bayat nga ad-adalenyo dagiti pagannurotan ti Dios, imutektekanyo met dagiti pudno nga ulidan a nailanad iti Biblia maipapan kadagidiay nagbiag a maitunos kadagitoy a pagannurotan ken dagidiay di nangannurot kadagitoy. Usigenyo no apay a kasta ti sinurotda a dana ken no ania ti nagbanaganna. (Roma 15:4; 1 Corinto 10:11) No basbasaenyo ti maipapan iti biag ni Jesu-Kristo, laglagipenyo a ni Jesus ti nangitalkan ni Jehova ti kinaari iti intero a daga; usarenyo ti gundaway a mangparayray iti panangsegseggayo iti baro a lubong ti Dios. Kasta met, panunotenyo no kasano nga ad-adda pay a matuladyo a naan-anay ti Anak ti Dios.​—1 Pedro 2:21.

18. Kasanotay a mabalanse ti panagbasa iti Biblia ken ti panangaramattayo iti material a pagadalan nga ipapaay “ti matalek ken masirib nga adipen”?

¹⁸ Siempre, di koma sandian ti panagbasa iti Biblia ti panagusaryo kadagiti nagsayaat a material iti panagadal nga ipapaay “ti matalek ken masirib nga adipen.” Paset met dayta ti probision ni Jehova​—a napateg unay. (Mateo 24:45-47) Siguraduenyo a ti regular a panagbasa iti Sao ti Dios a mismo ket addaan iti napateg a paset iti biagyo. No mabalbalin, “INALDAW A BASAENYO TI SAO TI DIOS, TI NASANTUAN A BIBLIA.”

[Dagiti Footnote]

Kasanoyo a Sungbatan?

◻ Apay a makagunggona ti panagbasa iti Biblia kada aldaw?

◻ Apay a nasken nga ulit-ulitentayo a basaen ti Biblia?

◻ Iti bukodyo nga eskediul, ania ti nasayaat a panawen para iti inaldaw a panagbasa iti Biblia?

◻ Bayat nga ulit-ulitenyo a basaen ti Biblia, aniat’ mangpasayaat iti programayo?

◻ Apay a nagpateg ti panangutob iti basbasaentayo?

[Kahon iti panid 16, 17]

Dagiti singasing a mangparang-ay iti panagbasayo iti Biblia

(1) Basaen ti adu a tattao dagiti libro ti Biblia nga agsasaruno sigun iti kadawyan a pannakaimalditda, manipud Genesis agingga iti Apocalipsis. Mabalinyo met a basaen ida nga agsasaruno sigun iti orihinal a pannakaisuratda. Panunotenyo a ti Biblia ket napagtitipon nga 66 a naipaltiing a liblibro, maysa a nadiosan a libraria. Maipaay iti kinanadumaduma, mabalin a kayatyo a basaen ti sumagmamano kadagiti libro a naglaon iti historia, kalpasanna, ti dadduma a gistay padpadto amin ti linaonna, a sarunuen ti sumagmamano a sursurat ti pammagbaga, imbes a basta suroten laeng ti panagsasaruno dagiti pinanidna. Usigenyo ti binasayo ket siguraduenyo a mabasayo ti intero a Biblia.

(2) Kalpasan a mabasayo ti maysa a paset ti Kasuratan, saludsodenyo iti bagiyo no aniat’ ipalgak dayta maipapan ken Jehova, ti panggepna, ti pamay-an a panangaramidna iti bambanag; no kasanot’ rumbeng a panangapektarna iti mismo a biagyo; no kasanoyo a maaramat dayta a pangtulong iti sabali.

(3) Aramatenyo kas giya ti tsart a “Main Events of Jesus’ Earthly Life” a naipablaak iti sidong ti paulo a “Jesus Christ” iti Insight on the Scriptures (kasta met iti “Amin a Kasuratan Impaltiing ti Dios ket Naimbag”), basaenyo nga agsasaruno dagiti agkakaasping a salaysay iti tunggal benneg dagiti Ebanghelio. Nayonanyo daytoy babaen ti panangkita kadagiti katupagna a benneg iti libro a Ti Katan-okan a Tao a Nagbiag Pay Laeng.

(4) No basaenyo ti pakasaritaan ti biag ken ministerio ni Pablo iti Aramid dagiti Apostol, basaenyo met dagiti nainaig a naipaltiing a sursurat. Gapuna, no madakamat ti nagduduma a siudad wenno lugar a nangaskasabaan ni Pablo, agsardengkayo ket basaenyo dagiti surat nga insuratna kamaudiananna kadagiti pada a Kristiano kadagidiay a lugar. Makatulong met a suroten iti mapa dagiti nagdaliasatanna, kas ti maysa nga adda iti uneg ti makinlikud nga akkub ti New World Translation.

(5) Kagiddan ti panangbasayo iti Exodo agingga iti Deuteronomio, basaenyo ti surat kadagiti Hebreo tapno makagun-odkayo iti pannakailawlawag ti adu kadagiti propetiko a padron. Iti sidong ti “Law” iti Insight on the Scriptures, kitaenyo ti tsart a “Some Features of the Law Covenant.”

(6) No agbasa kadagiti naimpadtuan a libro, mangyurnoskay iti panawen a mangrepaso iti nainaig a historikal a nalikudan iti Biblia. Kas pagarigan, no basbasaenyo ti libro ni Isaias, repasuenyo no aniat’ nakunana maipapan kada Ari Ozias, Joatam, Acaz, ken Ezekias, a nadakamat idiay Isaias 1:1. (2 Ar-ari, kapitulo 15-20; 2 Cronicas, kapitulo 26-32) Wenno no basbasaenyo ti Haggeo ken Zacarias, mangyurnos iti panawen a mangrepaso kadagiti masarakan iti libro ni Esdras.

(7) Mangpili iti maysa a libro ti Biblia, mangbasa iti pasetna (mabalin a maysa a kapitulo), kalpasanna, agsukimatkayo, nga agaramat iti Watch Tower Publications Index wenno ti nai-computer a Watchtower Library no magun-odan iti pagsasaoyo. Yaplikaryo ti material iti mismo a biagyo. Aramatenyo dayta kadagiti palawag ken iti tay-ak ti ministerio. Kalpasanna, basaenyo ti sabali pay a benneg.

(8) No adda publikasion ti Watch Tower a mangipaay iti komentario iti maysa a libro ti Biblia wenno iti maysa a paset daytoy, masansan a kitaenyo daytoy bayat a basbasaenyo dayta a paset ti Biblia. (Kas pagarigan: iti Kanta ni Solomon, The Watchtower, December 1, 1957, pinanid 720-34; iti Ezequiel, “The Nations Shall Know That I Am Jehovah”​—How?; iti Daniel, “Maaramid Coma ti Pagayatam Ditoy Daga” wenno Our Incoming World Government​—God’s Kingdom; iti Haggeo ken Zacarias, Paradise Restored to Mankind​—By Theocracy!; iti Apocalipsis, Apocalipsis​—Ti Grande a Tampokna Asidegen!)

(9) Bayat ti panagbasayo, sukimatenyo ti dadduma kadagiti cross-reference. Kitaenyo dagiti 320 a teksto manipud iti Hebreo a Kasuratan a direkta nga inadaw ti Kristiano a Griego a Kasuratan ken ti ginasut a dadduma pay a teksto a nakaaramidan ti panangtukoy, kasta met ti naipaay nga aplikasion. Itudo ti cross-references dagiti kaitungpalan ti padto a naisurat iti Biblia, dagiti biograpia ken geograpia a detalye, ken dagiti umasping a kapanunotan a mabalin a mangibuksil kadagiti sao a nalabit narigatyo a matarusan.

(10) Iti panangaramatyo iti Reference Edition ti New World Translation, no magun-odan iti pagsasaoyo, sukimatenyo dagiti footnote ken artikulo ti apendise a nainaig iti basbasaenyo. Dagitoy ti mangipakita iti nakaibatayan dagiti naaramat a patarus ken dadduma pay a pamay-an a mabalin a pakaipatarusan dagiti napateg a sasao. Mabalin a kayatyo met nga idilig ti pannakaipatarus dagiti masinunuo a bersikulo iti dadduma a patarus ti Biblia.

(11) Kalpasan a nabasayo ti tunggal kapitulo, mangisuratkayo iti ababa a sumario iti kangrunaan a kapanunotan iti dayta a kapitulo. Aramatenyo dayta kas pakaibatayan ti panangrepaso ken panangmennamennayo kalpasanna.

(12) Bayat a basaenyo ti Biblia, markaanyo dagiti napili a teksto a nangnangruna a kayatyo a laglagipen, wenno sakarenyo ida kadagiti card ket ikabilyo dagitoy iti lugar a makitkitayo iti inaldaw. Ikabesayo ida; mennamennaenyo ida; aramatenyo ida. Saanyo a padpadasen ti agikabesa iti adu unay iti mamimpinsan, nalabit a maysa laeng wenno dua iti kada lawas; kalpasanna, mangpili iti ad-adu pay iti sumaganad a panagbasayo iti Biblia.

[Dagiti Ladawan iti panid 15]

Inaldaw kadi a basbasaenyo ti Biblia wenno dumdumngeg iti nairekord a pannakaibasa dayta?