MENE

Ti panglukat a sao ti maysa a nalmeng a mensahe a namilagruan a nailanad iti palitada ti diding ti siled ti bangkete ni Ari Belsazar idiay Babilonia idi rabii ti Oktubre 5, 539 K.K.P. (Gregoriano a kalendario), sakbay a dayta a siudad ket pinarmek dagiti Medo ken Persiano. Sigun ken Daniel a tinulongan ni Jehova a mangbasa iti nailanad a kitikit ken mangibaga iti kayulogan dayta, ti mabasa iti surat ket: “MENE, MENE, TEKEL ken PARSIN.” (Da 5:25) Nabatad a bin-ig a konsonante ti naisurat isu nga agkasapulan ti kinasaririt ken maitutop a pannakaibalikas, kasta met iti umiso a pannakaipaulog. Ti literal a kaipapanan dagita a sasao ket: “Maysa a mina, maysa a mina, maysa a siklo, ken kagudua a siklo.”

Idi ibagana ti umiso a kayulogan dayta, kinuna pay nga umuna ni Daniel: “Daytoy ti kayulogan ti sao: MENE, ti Dios binilangna dagiti aldaw ti pagariam ket pinagpatinggana dayta.” (Da 5:26) Uray iti dayta laeng a paset ti mensahe, rumbeng a nalawag koman ken Ari Belsazar ti bambanag. Inikkat ni Jehova iti trono ti nabileg a ni Nabucodonosor, a nabilbileg ngem ni Belsazar. Isu a kabaelanna a paababaen ti bilang ti al-aldaw ti kinaari ni Belsazar ken ti kaduana nga agturay ken kasta met nga amana, a ni Nabonido. Kabaelan ni Jehova a pagpatinggaen ti dinastia. Ti sao a “MENE” ket namindua a nailanad, nalabit gapu ta ti mensahe agaplikar iti dua nga agturay iti pagarian ti Babilonia iti dayta a tiempo, da Nabonido ken Belsazar. Nupay kasta, idi imbaga ni Daniel ti kayuloganna, naminsan laeng nga inaramatna ti “MENE,” mabalin a gapu ta ni Belsazar laeng ti adda iti daydi a gundaway.

Saan nga ipalgak ti Biblia no apay a ti surat ket saan a kabaelan a basaen dagiti mamasirib a tattao ti Babilonia. (Da 5:8) Mabalin a gapu ta ti mensahe ket nalmeng, wenno mabalin a ti surat ket nailanad iti letra wenno pagsasao a saanda nga ammo.