EREC

Maysa kadagiti uppat a siudad a nangbukel iti “nangrugian ti pagarian [ni Nimrod]” iti daga ti Sinar. (Ge 10:10) Ti Erec ket rimmuok laengen ita dagiti munturod iti disso nga inawagan dagiti Arabo iti Warka, pagaammo met dayta kadagiti nagkauna nga Akkadiano ti Mesopotamia kas Uruk. Adda dayta iti agarup 177 km (110 mi) iti abagatan a daya ti Babilonia iti makinlaud nga igid ti daan a lansad ti Eufrates (ti Shatt-ek-Kar), wenno agarup 6 km (3.5 mi) iti daya ti agdama a pagay-ayusan dayta a karayan. Nakabakab sadiay ti maysa a kadaanan a ziggurat, agraman ti adu a munturod ken lungon. Agparang nga ipasimudaag dayta a ti Erec ket sigud a pagitabonan dagiti Asirio nga ar-ari.

Dagiti agnanaed iti Erec (“dagiti Arqueveo,” KJ) ket karaman kadagiti umili a nayakar idiay Samaria babaen ken Asirio nga Emperador Asenapar.​—Esd 4:9, 10.