ANER

1. Maysa a Canaanita. Isu ken ti dua a kakabsatna, ni Mamre nga Amoreo ken ni Escol, ket “kakappon” (“kaaliansa,” AT; RS) ni Abraham. (Ge 14:13) Ti sao ditoy a “kakappon” ket naipatarus manipud Hebreo a ba·ʽalehʹ verithʹ, a ti literal a kaipapananna ket “dagiti makinkukua (appo) iti maysa a tulag”; ngem ti “kakappon” ket pakaipatarusan ti Latin a confoederatus, a kaipapananna ti “napagkaykaysa,” wenno “napagkakadua babaen iti maysa a liga,” ket ngarud siuumiso a mayallatiwna ti ideya ta agparang ti sao a foedus iti Genesis 14:13 iti Latin a Vulgate. No maipapan kadagiti linaon daytoy a tulagan iti nagbaetan ni Abraham ken dagitoy tallo nga agkakabsat, saan unay nga ipasimudaag ti rekord no daydi ket panagsisinnalaknibda maibusor kadagiti mananggubat a kaarrubada, wenno maipapan laeng iti natalna a panagkakaduada. Naipakat daytoy a panagkakappon idi a ti kaanakan ni Abraham a ni Lot ket kinautibo ti maysa a gunglo ti ar-ari, ta ni Aner ken dagiti kakabsatna kimmuyogda ken Abraham ken kadagiti 318 a nasanay nga adipenna manipud kadagiti dadakkel a kayo ti Mamre (a pagtoltoldaan idi ni Abraham) agingga iti Dan, agarup 200 km (120 mi) iti amianan nga amianan-a-daya, ken kalpasanna, iti labes ti Damasco. Kalpasan ti panagballigida, saan nga inawat ni Abraham ti aniaman a bingay iti samsam ngem siniguradona a mabingayan dagiti tallo a kakapponna gapu iti panangraemda iti daytoy a “panagkakappon.”​—Ge 14:24; kitaenyo ti ALIANSA.

2. Maysa nga ili iti teritoria ti Manases a naited kadagiti pamilia ti annak ni Cohat. (1Cr 6:70; Jos 21:26) Mamati ti dadduma nga eskolar nga isu met laeng daydiay Taanac iti Josue 21:25.​—Kitaenyo ti TAANAC.