PANANGBENDISION, PANANGBENDITO

Panamagbalin wenno panangikuna a nasantuan; panangkiddaw iti Dios nga ipaayna ti nadibinuan a parabur; panangipaay iti kinaimbag; pammarabur; panangitan-ok kas nasantuan; panangpadayag; panagsao iti naimbag; panangsalaknib wenno panangsaluad manipud iti dakes; panangyeg iti kinaragsak.

Ti nadumaduma a porma ti Hebreo a sasao a gagangay a naipatarus a “bendituen,” “bendisionan” wenno “bendision” agparang iti agarup 400 a daras iti Kasuratan. Ti berbo a ba·rakhʹ ket gagangay a naipatarus a “bendisionan” wenno “bendituen.” Iti sumagmamano a teksto, naipatarus dayta a sao kas “kumablaaw iti naimbag” (1Sm 25:14); “kablaawan” (2Ar 4:29; 1Cr 18:10). Ti nombre a porma ti Hebreo a sao ket makita iti nagan ti Nababa a Tanap ti Beraca (kaipapananna ti “Bendito”), ta ditoy binendito ni Jehosafat ken ti ilina ni Jehova. (2Cr 20:26) Ti maysa a berbo a kasta met laeng ti pormana ket naipatarus nga “agparintumeng.”​—Ge 24:11; 2Cr 6:13; Sal 95:6.

Dagiti Judio a Soferim, wenno eskriba, binaliwanda ti sumagmamano a teksto tapno mabasa a “bendituen” imbes nga “ilunod” (1Ar 21:10, 13; Job 1:5, 11; 2:5, 9), nga imbilangda a panagtabbaaw uray ti panangilanad laeng iti inaramid ti maysa a tao a panangilunod iti Dios.​—Kitaenyo ti apendise ti Rbi8, p. 1569.

Ti Griego a berbo a eu·lo·geʹo literal a kaipapananna ti “panagsao iti naimbag.” Ti sao a eu·lo·giʹa (iti literal, bendision) ket naaramat iti Roma 16:18 iti negatibo a kaipapanan, kas “makaay-ayo a panagsasao” tapno pangallilaw iti puso ti maysa a tao.

Aramaten ti Kasuratan ti “bendituen,” “bendisionan” wenno “bendision” iti di kumurang nga uppat a kangrunaan nga aspeto: (1) panangbendision ni Jehova kadagiti tattao; (2) panangbendito dagiti tattao ken Jehova; (3) panangbendito dagiti tattao ken Kristo; (4) panangbendision dagiti tattao iti sabali a tattao.

Panangbendision ni Jehova Kadagiti Tattao. “Ti bendision ni Jehova​—isu dayta ti mangpabaknang, ket awan rigat nga inayonna iti dayta.” (Pr 10:22) Bendisionan ni Jehova dagidiay anamonganna babaen ti panangsalaknib, panangparang-ay, panangibagnos, panamagballigi, ken panangipaayna kadagiti kasapulanda, nga agbanag iti pagsayaatanda.

Ti pagayatan ni Jehova kadagiti naindagaan a parsuana ket naiparangarang idi tiempo a pinataudna ida. Binendisionan ti Dios dagiti an-animal a naparsua iti maikalima nga aldaw babaen ti panangibagana kadakuada no ania ti panggepna maipaay kadakuada. (Ge 1:22) Ti pamendision ti Dios kada Adan ken Eva iti ngudo ti maikanem nga aldaw isu ti nangtaginayon koma kadakuada iti anamongna no intultuloyda ti nagtulnog, agsipud ta impaayna amin a naespirituan ken namaterialan a kasapulanda.​—Ge 1:28; 2:9; 5:2.

Idi nairingpasen ni Jehova ti ar-aramidna a panagparsua ditoy daga iti innem nga aldaw a panagparsua, awanen ti kurang kadagiti kasapulan dagiti parsuana. (Ge 1:31) Kalpasanna naginanan ti Dios, wenno nagsardengen iti daytoy nga aramidna, a binendisionanna ti maikapito nga aldaw, nga indeklarana a sagrado, nasantuan. Adda idi namnama ti natauan a parparsua a magun-odanda ti kinaragsak agraman manayon a bendision.​—Ge 2:3; Ex 20:11.

Idi rimmuar ni Noe ken ti pamiliana manipud iti daong, pinaraburan ida ni Jehova, a binendisionanna ida ken ti pagayatanna agpaay kadakuada. Babaen ti panangaramidda iti pagayatan ni Jehova, rumang-ayda nga addaan iti parabur ken pannalaknibna.​—Ge 9:1.

Nakapatpateg iti intero a sangatauan ti pamendision a nainaig ken Abraham ken iti Bin-ina. (Ge 12:3; 18:18; 22:18) Ni Jehova binendisionanna da Abraham ken Sara babaen ti namilagruan a panangbiagna kadagiti pannakabalinda nga agpaadu, a namagbalin a posible a maaddaanda iti anak a lalaki uray lakay ken baketdan. (Ge 17:16; 21:2) Pinagrang-ayna ni Abraham ken inaramatna a mangiladawan iti daddadakkel a bambanag iti masanguanan. (Ga 4:21-26) Gapuna, ti pamendision ti Dios babaen ti panangipaayna iti bin-i ken Abraham ket dakdakkel ti kaipapananna iti inkarina a pannakabendisionto dagiti tattao iti amin a nasnasion babaen iti daydiay inladawan ni Isaac, ni Jesu-Kristo.​—Ga 3:8, 14; Ara 3:25, 26; Heb 6:13-20.

Bendisionan ni Jehova ti maysa a tao wenno ili no la ket agtulnog kenkuana. (Ex 23:25) Dagiti agsupadi unay a kasasaad a nailanad iti Deuteronomio kapitulo 27 ken 28 silalawag nga ipakitada nga agpaay kadagiti nasukir ti panangilunod ni Jehova, idinto ta agpaay kadagiti natulnog dagiti bendision a mangibunga iti naespirituan nga irarang-ay ken mangipaay kadagiti namaterialan a kasapulanda. Mapasamak dagita kadagiti pagtaenganda, dagada, putotda, an-animalda, abastoda a taraon, panagdaliasatda, ken iti tunggal aramidenda. “Dagiti bendision agpaayda iti ulo daydiay nalinteg.” (Pr 10:6, 7) No simamatalek nga agtulnog ti ili ni Jehova, isu maragsakan a ‘mangilukat kadagiti aribengbeng ti langlangit ket pudno a mangibukbok iti bendision agingga nga awanen panagkasapulan.’​—Mal 3:10.

Panangbendito Dagiti Tattao ken Jehova. Dagiti tattao bendituenda ni Jehova kangrunaanna babaen ti panangidaydayawda kenkuana. Pakabendituan met ni Jehova ti panangyebkas iti panagyaman, ti panangbigbig kenkuana kas gubuayan dagiti amin a bendision, ti panagsao iti naimbag maipapan kenkuana iti tunggal gundaway, ken ti panangidaydayaw ken panagserbi. (Sal 26:12) Ti panangikasaba iti naimbag a damag ket maysa a pamay-an a panangbendito ken Jehova, yantangay maidaydayaw ti nagan ken pangpanggepna.​—Mt 24:14; Heb 13:15.

Dagiti tattao binenditoda ni Jehova gapu iti panangispalna iti ilina manipud iti panangirurumen (Ex 18:9, 10); gapu iti panangipaayna kadagiti kasapulanda (De 8:10); gapu iti dayawna, kinamannakabalinna, kinaturayna, ken kinapintasna kas Pannakaulo ti isuamin (1Cr 29:10-12, 20); gapu iti panangtignayna iti ilina a suportaranda ti panagdaydayaw kenkuana (2Cr 31:8); idi nagkararagda tapno agpudnoda gapu ta salsalimetmetanna ti tulagna ken gapu ta naasi (Ne 9:5, 31, 32); gapu iti panangtedna iti sirib ken pannakabalin (Da 2:19-23); gapu iti panangsalaknibna kadagiti adipenna ken panangiparangarangna iti kinasoberanona (Da 3:28; 4:34). Ti libro ti Salmo patinayon a bembendituenna ni Jehova ken aw-awisenna ti isuamin nga adda idiay langit ken ditoy daga nga idaydayawda ti naganna gapu iti adu a natatan-ok a kualidadna. Ti sabali pay a rason no apay a ni Jehova masapul a bendituen ti tao ket isu ti panangisagutna iti Anakna a ni Jesu-Kristo.​—Sal 16:7; 103:1, 20-22; 145:2, 10; Jn 3:16; idiligyo ti Ara 2:8-11; Apo 7:11, 12; 14:6, 7.

Panangbendito Dagiti Tattao ken Kristo. Ni Jesus a mismo rumbeng met a bendituen ti isuamin. Ni Elisabet binenditona ti ina ni Jesus a ni Maria ken ti di pay naipasngay a bunga ti aanakanna. (Lu 1:42) Ti nailangitan a namunganayan ni Jesus, ti iyaayna iti nagan ni Jehova kas Anakna, ti ministeriona, ti sakripisiona, ti kinapadina, ti kinaarina, ken ti di kaikarian a kinamanangngaasina, amin dagitoy ket nainkalintegan a rason no apay a rumbeng a maidir-i kas bendito. (Jn 12:13; 2Co 8:9; Heb 1:2; 7:24-26) Kas kaitungpalan ti Salmo 118:26, isu inabrasa ti bunggoy kas daydiay bendito ni Jehova idi sumsumrek idiay Jerusalem a kas iseserrek ti maysa a nagballigi. (Mt 21:9) Isu bendituen dagiti amin nga angheliko a parsua ken dagiti agnanaed ditoy daga.​—Apo 5:12, 13.

Panangbendision Dagiti Tattao iti Sabali Pay a Tattao. Maisupadi ken Jehova, a mangtungpal a kanayon iti isawangna a pamendision, mabalin a saan a kabaelan a tungpalen ti maysa a tao ti isawangna a pamendision iti sabali pay a tao. Iti Biblia, ti panangisawang ti tao iti pamendision masansan a kaipapananna ti panagkiddaw iti nadibinuan a pamendision, nupay saan a nayebkas babaen iti kararag. Gapuna nupay tao ti pakaipapaayan ti kasta a pamendision, maibilbilang a ti Dios a mismo ti Gubuayan dayta. Manen, ti panangbendision ti tao iti sabali pay a tattao ket masansan a maysa nga ebkas ti panagyaman, panangisawang iti panangtagipateg kadagiti nasayaat a kualidad wenno iti trabaho a nasayaat ti pannakaaramidna.

Idi iruprupir ni Pablo a natantan-ok ti kinapadi ni Melquisedec ngem iti kinapadi ni Levi, inyebkasna ti prinsipio nga: “Ita awan ti aniaman a supiat, ti bassit bendisionan ti dakdakkel.” (Heb 7:7) Ti kayat a tukoyen ditoy ni Pablo ket maipapan iti pannakabael a mangbendision a sieepektibo ken kaadda ti autoridad manipud iti Dios a mangbendision, wenno ti pannakabalin a mangipatungpal iti pamendision. Ni Melquisedec ket padi ti Dios ken maysa nga ari, ket buyogen ti autoridad ken pammadto makapagsao maipaay iti Dios iti panangipaayna iti pamendision ken Abraham.​—Ge 14:18-20; Heb 7:1-4.

No adda dagiti nakaaramid iti banag a pakaidaydayawan ni Jehova, imbilang ti dadduma a maiparbeng laeng ti panangisawang iti pamendision kadakuada. Ni Moises binendisionanna ni Bezalel ken ti dadduma pay a trabahador idi nairingpasda ti panangibangon iti tabernakulo. (Ex 39:43) Kas naespirituan a papanguluen iti Israel, nadutokan dagiti papadi ken Levita a mangbendision kadagiti umili iti adu a pasamak. (Nu 6:23-27; Le 9:22, 23; De 10:8; 21:5; 1Cr 23:13; 2Cr 30:27) Binendisionan ti Nangato a Padi a ni Eli dagiti nagannak ni Samuel gapu iti panangisagutda iti anakda maipaay iti panagserbi iti templo. (1Sm 2:20, 21) Binendisionan ni David dagiti umili idi naisangpeten ti Lakasa nga impaiyegna idiay Jerusalem. (2Sm 6:18; 1Cr 16:2) Kasta met laeng ti nainsiriban nga inaramid ni Solomon idi indedikarna ti templo ken Jehova. (1Ar 8:14, 55) Ni lakay Simeon binendisionanna dagiti nagannak ni Jesus. (Lu 2:34) Binendisionan ni Jesus dagiti ubbing a napan kenkuana.​—Mr 10:16.

Dagiti Gundaway a Panangyebkas iti Bendision. Iti kararag, ti maysa idaydayaw ken pagyamananna ti Dios, bendituenna, ket kalpasanna, idawdawatanna dagidiay nagkaykaysa iti pammati ken dagidiay mangsapsapul iti Dios, a kiddawenna ti pannakabendisionda. Ti panangyebkas wenno panangkiddaw iti bendision maipaay iti taraon sakbay ti pannangan ket gagangay a maar-aramid babaen ti kararag. Iti kasta a kararag, ni Jehova ti pakaiturongan ti panagyaman ken daydayaw gapu kadagiti naespirituan ken namaterialan a saganana, a kiddawen a pagbalinen koma ni Jehova a makagunggona ti sustansia ti taraon kadagidiay mangan iti dayta ken mapapigsada nga agserbi kenkuana babaen iti dayta a taraon. (1Sm 9:13; Mt 14:19; Lu 9:16) Idi naikararag ti pannakabendision ti tinapay ken arak iti Pangrabii ti Apo, naiturong iti Dios ti daydayaw ken panagyaman agraman ti kiddaw a magunggonaan koma iti naespirituan dagiti amin makiraman kadagiti bambanag nga isimsimbolo dagitoy ken agtalinaedda koma a nagkaykaysa ken natarnaw kas bagi ti Kristo.​—Mt 26:26; 1Co 10:16.

Iti kagimongan dagiti patriarka, kadawyan a sakbay unay ti ipapatay ti maysa nga ama, bendisionanna dagiti annakna. Nakapatpateg idi daytoy ken matarigagayan unay. Gapuna ni Isaac binendisionanna ni Jacob, nga impagarupna nga isu ni Esau nga inauna. Gapu ta bulsek ken lakay idin ni Isaac, ni Jacob ti immuna a nangisawanganna iti pammarabur ken panagrang-ay imbes nga iti kabsatna a ni Esau, a di pagduaduaan a kiniddaw ni Isaac ken Jehova nga itungpalna dayta a bendision. (Ge 27:1-4, 23-29; 28:1, 6; Heb 11:20; 12:16, 17) Idi agangay, pinatalgedan ken imbinsabinsa ni Isaac ti bendision, nga ammonan a ni Jacob ti pangibagbagaanna. (Ge 28:1-4) Sakbay ti ipapatayna, immuna a binendisionan ni Jacob ti dua nga annak ni Jose, sana insaruno dagiti bukodna nga annak. (Ge 48:9, 20; 49:1-28; Heb 11:21) Umasping iti dayta, sakbay unay a matay ni Moises, binendisionanna ti intero a nasion ti Israel. (De 33:1) Kadagitoy amin a panangbendision, naimpadtuan ti panagsaoda kas paneknekan dagiti wagas a pannakatungpal dagita. Adda dagiti gundaway a no mayeb-ebkas idi ti kakasta a bendision, ti ima daydiay mangbembendision ket naipatay iti ulo daydiay bembendisionanna.​—Ge 48:13, 14.

No ti pamendision ket maysa a kablaaw, ti panangipaay ti maysa iti dayta kaipapananna a tartarigagayanna a nasayaat koma a kankanayon ti kasasaad ti sabali. Idi naipan ni Jacob iti sanguanan ni Faraon, binendisionanna ni Faraon. (Ge 47:7; kitaenyo met ti 1Sm 13:10; 25:14; 1Ar 1:47; 2Ar 10:15.) Mabalin met nga ipaay dagiti bendision iti tiempo ti iluluas. Kas pagarigan, ni Rebecca ket binendisionan ti pamiliana idi pumanawen iti pagtaenganda tapno makiasawa ken Isaac.​—Ge 24:60; kitaenyo met ti Ge 28:1; 2Sm 19:39; 1Ar 8:66.

Ti panangted iti sagut ket nainaig met idi kadagiti pamendision. (Ge 33:11; Jos 14:13; 15:18, 19) No kasta, dagiti sagut a mismo ket mabalin nga awagan iti bendision, maysa a “sagut a bendision.” Nalabit maited dagiti sagut kas panangipakita iti panagtarigagay a nasayaat koma ti kasasaad ti maysa nga ay-ayaten, iti panangikagumaan a gumun-od iti pabor, wenno kas ebkas ti panagyaman.​—1Sm 25:27; 30:26.

Dagiti bendision ket mabalin met nga ipaay kas pammadayaw. Gapu iti naayat a kinamanangngaasi ni Ruth, binendisionan ni Boaz. (Ru 3:10) Dagiti tattao nga agboluntario nga agserbi maipaay iti panagdaydayaw ken Jehova ket binendisionan dagiti umim-imatang. (Ne 11:2) Maikari dagiti nagannak nga umawat iti bendision nga aggapu kadagiti annakda.​—Pr 30:11.

Ti bendision mabalin a buklen ti makaay-ayo wenno makapabileg a sasao. Binagbagaan ni Jesus dagiti dumdumngeg kenkuana a ‘bendisionanda dagidiay mangilunlunod’ kadakuada. (Lu 6:28) “Itultuloyyo a bendisionan dagidiay mangidadanes; mangbendisionkayo ket dikay agilunod.” (Ro 12:14) Saanna a kaipapanan ti panangidayaw kadagidiay bumusbusor, ngem ti naimbag a kababalin nga ipakita kadagita a tattao, a nabuyogan iti naayat, naasi, napudno a sasao a pakagunggonaanda no ipangagda, mabalin nga agbanag iti isasayaat ti ugalida. (1Co 4:12; 1Pe 3:9) Masapul met nga usigen ti pamay-an a panagsao. (Pr 27:14) Pudno a maysa a bendision no mapagbaw-ing ti maysa a tao manipud iti nadangkes nga ar-aramidna, nga agpaay a pagimbagan unay dayta a tao ken pakaidaydayawan ni Jehova.​—Ara 3:26.

Panagbalin a Bendision iti Sabsabali. Agbalin a bendision ti maysa a tao kadagiti padana a tao no ipakpakitana ti panagtulnog iti Dios. Ti timpuyog ti kasta a tattao a bembendisionan ni Jehova ket pakabendisionan met ti sabsabali. Nabendisionan ni Laban gapu ta inaywanan ni Jacob dagiti arbanna. (Ge 30:27, 30) Rimmang-ay ti sangakabbalayan ken talon ni Potifar gapu iti panangaywan ni Jose. (Ge 39:5) Ti Sodoma ket saan koma a dinadael ti Dios no adda laeng koma sangapulo a nalinteg nga umili iti dayta. (Ge 18:32) Ti dedikado nga adipen ti Dios ket mabalin a pakaigapuan ti naparabur a konsiderasion ti Dios maipaay iti di manamati nga asawa ken kadagiti ubbing nga annakda. (1Co 7:14) Kinuna ni Jesus nga inton tiempo ti kadakkelan a rigat ti lubong, “maigapu kadagiti napili mapaababanto dagidiay nga aldaw,” ta no saan “awan ti lasag a maisalakan.” (Mt 24:21, 22; idiligyo ti Isa 65:8.) Ti panangtulad iti ulidan dagidiay binendito ti Dios mangyeg kadagiti daddadakkel pay a bendision. (Ga 3:9; Heb 13:7; 1Co 11:1; 2Te 3:7) Ti panangaramid iti naimbag iti kakabsat ni Kristo, dagidiay “pinili” ti Dios, mangyeg kadagiti pamendision ni Jehova kadagiti “karnero,” agraman ti gunggona nga agnanayon a biag.​—Mt 25:31-34, 40, 46.