“Pannagna Babaen ti Pammati, Saan a Babaen ti Panagkita”

“Magmagnakami babaen ti pammati, saan a babaen ti panagkita.”​—2 CORINTO 5:7.

1. Ania ti kayat a sawen ti “pannagna babaen ti pammati”?

TUNGGAL agkararagtayo maitunos kadagiti bilin a nailanad iti Sao ti Dios, ipaspasimudaagtayo nga uray kaskasano addaantay iti pammati. No rugiantayo nga ikasaba ti Pagarian ti Dios kadagiti sabsabali, pakakitaan met daytoy ti pammati. Ket no idedikartay ti biagtayo ken Jehova, ipampaneknektayo a tarigagayantay ti ‘magna babaen ti pammati,’ kayatna a sawen, panangsurot iti kabibiag nga iwanwanwan ti pammati.​—2 Corinto 5:7; Colosas 1:9, 10.

2. Apay a ti pannakiraman kadagiti aktibidad iti kongregasion ket saan a kanayon a pammaneknek a ti maysa adda pammatina?

² Tapno pudpudno a makapagbiagtayo iti kasta a wagas, kasapulantay ti pammati a nalagda ti pamuonna. (Hebreo 11:1, 6) Adu dagiti maguyugoy kadagiti Saksi ni Jehova gapu kadagiti nangato a moral nga estandarte ken ayat a makitada kadagiti Saksi. Nasayaat a pangrugian dayta, ngem dina kayat a sawen nga addaan dagita a tattao iti pammati. Dagiti dadduma mabalin a natibker ti pammati ti asawada wenno naganak kadakuada, ket nalabit makiramramanda kadagiti dadduma nga aktibidad dayta nga ay-ayatenda. Talaga a bendision ti kaadda ti kasta nga impluensia iti uneg ti pagtaengan, ngem daytoy saan met a sandi ti personal nga ayat iti Dios ken personal a pammati.​—Lucas 10:27, 28.

3. (a) Tapno nalagda ti pamuon ti pammatitayo, ania ti kasapulan a patientayo maipapan iti Biblia? (b) Apay a nalaklaka a makombinsir dagiti dadduma a tattao iti pannakaipaltiing ti Biblia ngem kadagiti sabsabali?

³ Dagidiay talaga a magmagna babaen ti pammati naan-anay a kombinsidoda a ti Biblia isu ti Sao ti Dios. Aglaplapusanan ti ebidensia a ti Nasantuan a Kasuratan ket pudno nga “impaltiing ti Dios.”a (2 Timoteo 3:16) Mano kadagitoy nga ebidensia ti kasapulan a sukimaten ti maysa a tao sakbay a makombinsir? Mabalin nga agpannuray dayta iti nalikudanna. Daydiay naan-anay a mangkombinsir iti maysa a tao nalabit saan a makaguyugoy iti sabali. Iti dadduma a kaso, uray no maidatagan ti maysa a tao iti nawadwad a di mabalusingsing nga ebidensia, mabalin a supiatenna latta ti lohikal a konklusion. Apay? Gapu kadagiti tarigagay a nairamut iti pusona. (Jeremias 17:9) Gapuna, uray no kuna ti maysa nga isu ket interesado iti panggep ti Dios, mabalin a tarigagayan ti pusona a pagustuan ti lubong. Mabalin a dina kayat a panawan ti kabibiag a maikontra kadagiti estandarte ti Biblia. Ngem, no talaga a mabisin iti kinapudno, no napudno iti bagina, ken no napakumbaba, inton agangay mabigbigna a ti Biblia isu ti Sao ti Dios.

4. Ania ti kasapulan tapno maaddaan ti maysa a tao iti pammati?

⁴ Masansan nga iti sumagmamano la a bulan, dagiti tattao a mayad-adalan iti Biblia mabigbigda nga aglaplapusananen ti nakitada a pammaneknek a dayta ti Sao ti Dios. No daytoy ti mangtignay kadakuada a naimpusuan nga agpaisuro ken Jehova, ti maad-adalda in-inut a sukogenna ti kaunggan a pampanunot, tarigagay, ken motiboda. (Salmo 143:10) Kuna ti Roma 10:10 a mamati ti maysa a tao “buyogen iti puso.” Ipanayag ti kasta a pammati ti agpayso a marikriknana, ket maiparangarang dayta iti panagbiagna.

Nagtignay ni Noe Maibatay iti Pammati a Nalagda ti Pamuonna

5, 6. Ania ti nakaibatayan ti pammati ni Noe?

⁵ Addaan idi ni Noe iti pammati a nalagda ti pamuonna. (Hebreo 11:7) Ania ti nangibatayanna iti dayta? Ik-ikutan idi ni Noe ti sao ti Dios, saan a naisurat, no di ket naisao kenkuana. Kuna ti Genesis 6:13: “Kinuna ti Dios ken Noe, Ti panungpalan ti amin a lasag dumtengen iti imatangko ta ti daga napno ti ranggas gapu kadakuada.” Binilin ni Jehova ni Noe a mangbangon iti daong ket intedna dagiti detalye maipapan iti pannakapatakder dayta. Sa innayon ti Dios: “Siak paglayusek ti danum iti rabaw ti daga, tapno mangpukaw iti amin a lasag, nga addaan anges ti biag, iti baba ti langit; amin nga adda iti daga matayto.”​—Genesis 6:14-17.

⁶ Adda kadin tudo sakbay daytoy? Awan ti ibaga ti Biblia. Kuna ti Genesis 2:5: “Di pay pinagtudo ni Jehova a Dios.” Ngem, kastoy ti panangyebkas ni Moises, a nagbiag sumagmamano a siglo kalpasanna, kadagiti bambanag iti panangisalaysayna, saan nga idi tiempo ni Noe, no di ket iti panawen nabayag sakbay dayta. Kas ipakita ti Genesis 7:4, dinakamat ni Jehova ti tudo idi nakisao ken Noe, ket nabatad a natarusan ni Noe ti kayatna a sawen. Kaskasdi, ti pammati ni Noe saan a naibatay iti makitana. Insurat ni apostol Pablo a ni Noe “naipaayan iti nadibinuan a pakdaar maipapan kadagiti bambanag a di pay nakita.” Imbaga ti Dios ken ni Noe nga iyegnanto ditoy daga ‘ti layus,’ wenno “ti nailangitan a taaw,” sigun ti footnote ti Genesis 6:17 iti New World Translation. Agingga iti daydi a tiempo, awan pay pulos napasamak a kasta. Ngem amin a parsua a nakita ni Noe ket nabatad a pammaneknek a talaga a kabaelan ti Dios nga iyeg ti kasta a makadadael a dilubio. Gapu ta tinignay ti pammati, binangon ni Noe daydi daong.

7. (a) Ania ti di kasapulan ni Noe tapno maaramidna ti imbilin ti Dios kenkuana? (b) Kasanotay a magunggonaan iti panangutob iti pammati ni Noe, ket kasano a ti pammatitayo bendision kadagiti sabsabali?

⁷ Saan nga inted ti Dios ken Noe ti petsa a panangrugi ti Dilubio. Ngem saan a pinagpambar dayta ni Noe tapno iyaleng-alengna dayta, nga iyud-udina iti biagna ti panangbangon iti daong ken ti panangasaba. Iti umdas a panawen, imbaga ti Dios ken Noe no kaano a sumrek iti daong. Kabayatanna, “inaramid ni Noe kas mayanatup iti amin nga imbilin ti Dios kenkuana. Kasta ti inaramidna.” (Genesis 6:22, NW) Nagna ni Noe babaen ti pammati, saan a babaen ti panagkita. Anian a yamantayo ta kasta ti inaramidna! Gapu iti pammatina, sibibiagtayo itatta. No kadatayo met, ti pammati nga ipakitatayo dakkel ti epektona saan laeng nga iti masakbayantayo no di pay ket iti masakbayan dagiti annaktayo ken dagiti sabsabali a tattao iti aglawlawtayo.

Ti Pammati ni Abraham

8, 9. (a) Ania ti nangibatayan ni Abraham iti pammatina? (b) Kasano ti ‘panagparang’ ni Jehova ken Abraham?

⁸ Utobenyo ti maysa pay nga ehemplo​—ti ehemplo ni Abraham. (Hebreo 11:8-10) Ania ti nangibatayan ni Abraham iti pammatina? Idolatroso ken materialistiko ti lugar a dimmakkelanna idiay Ur dagiti Caldeo. Ngem adda dadduma nga impluensia a nangsukog iti panangmatmat ni Abraham. Awan duadua a nakalangenna ti anak ni Noe a ni Sem, a ti biagna naun-unday iti 150 a tawen ngem ti biag ni Abraham. Kombinsido ni Abraham a ni Jehova ti “Dios a Kangatuan unay, a makinkukua iti langit ken iti daga.”​—Genesis 14:22.

⁹ Adda pay banag a nangimpluensia iti kasta unay ken Abraham. “Nagparang [ni Jehova] ken . . . Abraham bayat nga adda idi idiay Mesopotamia, sakbay a nagtaeng idiay Haran, ket kinunana kenkuana, ‘Pumanawka iti dagam ken kadagiti kakabagiam ket umayka iti daga nga ipakitakto kenka.’” (Aramid 7:2, 3) Kasano ti ‘panagparang’ ni Jehova ken Abraham? Saan a rupanrupa a nakita ni Abraham ti Dios. (Exodo 33:20) Nupay kasta, mabalin a nagparang ni Jehova ken ni Abraham iti tagtagainep, buyogen ti datdatlag a pannakaiparangarang ti dayagna, wenno babaen ti anghel a mensahero, wenno pannakabagi. (Idiligyo ti Genesis 18:1-3; 28:10-15; Levitico 9:4, 6, 23, 24.) Aniaman ti pamay-an a panagparang ni Jehova ken Abraham, ammo dayta a matalek a tao nga adda napateg a pribilehio nga inranta ti Dios para kenkuana. Nagtignay ni Abraham a buyogen ti pammati.

10. Kasano a pinabileg ni Jehova ti pammati ni Abraham?

¹⁰ Saan a nagdepende ti pammati ni Abraham iti kaadda kenkuana dagiti detalye ti daga a pangibaonan ti Dios kenkuana. Saan a nagpannuray iti panangammona no kaano a maited ti daga kenkuana. Namati gapu ta ammona ni Jehova kas Dios a Mannakabalin-amin. (Exodo 6:3) Imbaga ni Jehova ken Abraham nga isu ket maaddaanto iti putot, ngem pasaray pinampanunot ni Abraham no kasano a mapasamak dayta. Lumakayen idi. (Genesis 15:3, 4) Pinabileg ni Jehova ti pammati ni Abraham babaen ti panangibagana a tangadenna dagiti bituen sana bilangen ida no kabaelanna. “Kastanto dagiti putotmo,” kinuna ti Dios. Natukay unay ti rikna ni Abraham. Nabatad a ti Namarsua kadagita a nakaskasdaaw a nailangitan a parsua kabaelanna a tungpalen ti inkarina. Ni Abraham “pinatina ni Jehova.” (Genesis 15:5, 6) Saan a basta namati ni Abraham gapu ta magustuanna ti nangngegna; nalagda ti pamuon ti pammatina.

11. (a) Idi dandanin 100 ti tawenna, ania ti reaksion ni Abraham iti kari ti Dios a ni baketen a Sara aganakto iti lalaki? (b) Buyogen ti ania a kita ti pammati a sinango ni Abraham ti pannubok nga idatonna ti anakna idiay Bantay Moria?

¹¹ Idi dandanin 100 ti tawen ni Abraham ket ag-90 ni Sara a baketna, inulit ni Jehova ti karina a maaddaanto ni Abraham iti putot ket ni Sara ti agbalinto nga ina. Realistiko nga inut-utob ni Abraham ti kasasaadda. “Ngem gapu iti kari ti Dios isu di nagpangpangadua iti kinakurang ti pammati, no di ket bimmileg babaen ti pammatina, a nangipapaay iti dayag iti Dios ken naan-anay a nakumbinsir a no ania ti inkarina kabaelanna met nga aramiden.” (Roma 4:19-21) Ammo ni Abraham a saan nga agkibaltang ti kari ti Dios. Idi agangay, gapu iti pammatina, nagtulnog ni Abraham idi imbaga ti Dios nga itugotna ti anakna a ni Isaac iti daga ti Moria ket idatonna. (Genesis 22:1-12) Naan-anay a nagtalek ni Abraham a ti Dios a nakabael iti simimilagro a pannakaipasngay dayta nga anak kabaelanna met a pagungaren tapno matungpal dagiti kanayonan a karina a nainaig iti dayta nga anak.​—Hebreo 11:17-19.

12. Kasano kapaut nga intultuloy ni Abraham ti nagna babaen ti pammati, ket ania a gunggona ti agur-uray kenkuana ken iti pamiliana a nangiparangarang iti natibker a pammati?

¹² Saan laeng nga iti dadduma a kasasaad nga impakita ni Abraham ti pammati no di ket iti intero a panagbiagna. Iti unos ti panagbiagna, awan paset ti Naikari a Daga nga inawat ni Abraham iti Dios kas tawid. (Aramid 7:5) Kaskasdi, saan a nautoyan ni Abraham tapno agsubli koman sadi Ur dagiti Caldeo. Iti las-ud ti 100 a tawen, agingga iti ipapatayna, nagnaed kadagiti tolda iti daga a nangiturongan ti Dios kenkuana. (Genesis 25:7) Maipapan kenkuana ken ni Sara a baketna, ni Isaac nga anakda, ken ni Jacob nga apokoda, kuna ti Hebreo 11:16: “Ti Dios saanna nga ibain ida, nga isu awaganda kas Diosda, ta insaganana ti maysa a siudad a maipaay kadakuada.” Wen, adda insagana ni Jehova a lugar para kadakuada iti naindagaan a sakup ti Mesianiko a Pagarianna.

13. Siasino kadagiti adipen ni Jehova ita ti mangipampaneknek nga addaanda iti pammati a kas ken Abraham?

¹³ Adda dagiti adipen ni Jehova itatta a kas ken Abraham. Adun a tawen a magmagnada babaen ti pammati. Gapu iti bileg nga ipaay ti Dios, naparmekda dagiti arig bantay a tubeng. (Mateo 17:20) Di kimmapuy ti pammatida gapu ta dida ammo no kaano nga ited ti Dios kadakuada ti tawid nga inkarina. Ammoda a saan nga agkibaltang ti sao ni Jehova, ket ibilangda a nakapatpateg a pribilehio ti panagbalin a Saksina. Kasta met kadi ti riknayo?

Ti Pammati a Nangtignay ken Moises

14. Kasano a naipasdek ti pamuon ti pammati ni Moises?

¹⁴ Ti maysa pay a pagwadan iti pammati isu ni Moises. Ania ti pundasion ti pammatina? Nangrugi iti kinamaladagana. Nupay balasang ni Faraon ti nakasarak ken Moises iti uneg ti bassit a bilog a papiro iti Karayan Nilo sana innala kas anakna, ni Jocabed, a Hebreo nga ina a mismo ni Moises, ti nangtagibi iti ubing ken nangtaraken kenkuana bayat ti kinaubingna. Nabatad a sinursuruan a naimbag ni Jocabed, nga intukitna ti panagayat ken Jehova ken panangipateg kadagiti inkari ni Jehova ken Abraham. Idi agangay, kas miembro ti sangakabbalayan ni Faraon, “nasursuruan [ni Moises] iti amin a kinasirib dagiti taga Egipto.” (Aramid 7:20-22; Exodo 2:1-10; 6:20; Hebreo 11:23) Nupay naparaburan ti saad ni Moises, bimmuyog ti pusona kadagiti natagabo a tattao ti Dios.

15. Ania ti kaipapananna ken Moises ti pannakidasigna iti ili ni Jehova?

¹⁵ Idi 40 ti tawenna, pinatay ni Moises ti maysa nga Egipcio tapno ikaluyana ti maysa nga Israelita a nairurumen. Impakita daytoy a pasamak no kasano ti panangmatmat ni Moises iti ili ti Dios. Kinapudnona, “babaen iti pammati nagkitakit ni Moises, idi dimmakkelen, a maawagan anak daydi anak a babai ni Faraon.” Imbes a kumpet iti “temporario a panangtagiragsak iti basol” kas miembro ti korte ti Egipto, tinignay ti pammatina a makipagsagaba iti ili ti Dios.​—Hebreo 11:24, 25; Aramid 7:23-25.

16. (a) Ania ti impaannong ni Jehova ken Moises, ket kasano a tinulongan ti Dios? (b) Iti panangitungpalna iti annongna, kasano nga impakita ni Moises ti pammatina?

¹⁶ Sigagagar ni Moises nga agtignay tapno mabang-aran dagiti kadaraanna, ngem saan pay idi a dimteng ti tiempo a panangispal ti Dios kadakuada. Kapilitan a pinanawan ni Moises ti Egipto. Kalpasan laeng ti 40 a tawen a ni Jehova, babaen ti anghel, binilinna ni Moises nga agsubli idiay Egipto tapno iruarna dagiti Israelita iti dayta a daga. (Exodo 3:2-10) Ania ti reaksion ni Moises? Dina pinagduaduaan ti pannakabalin ni Jehova a mangispal iti Israel, ngem impapanna nga isu ket di maikari iti akem a pangisaadan ti Dios kenkuana. Siaayat nga impaay ni Jehova ti pammaregta a kasapulan ni Moises. (Exodo 3:11–4:17) Bimmileg ti pammati ni Moises. Nagsubli idiay Egipto ket inulit-ulitna a pinakdaaran a rupanrupa ni Faraon maipapan kadagiti saplit nga umapay iti Egipto gapu ta dayta nga agturay dina palubosan ti Israel a mapan agdaydayaw ken Jehova. Awan ti pannakabalin ni Moises a mamartuat kadagidi a saplit. Nagna babaen ti pammati, saan a babaen ti panagkita. Insaadna ti pammatina ken Jehova ken iti saona. Pinangtaan ni Faraon ni Moises. Ngem di simmardeng ni Moises. “Babaen iti pammati pinanawanna ti Egipto, ngem saan a nagbuteng iti unget ti ari, ta isu nagtultuloy a natibker a kasla kitkitaenna daydiay Maysa a di makita.” (Hebreo 11:27) Saan a perpekto ni Moises. Nakaaramid kadagiti biddut. (Numeros 20:7-12) Ngem kalpasan a dinutokan ti Dios, ti biagna inwanwanen ti pammati.

17. Ania ti resulta ti pannagna da Noe, Abraham, ken Moises babaen ti pammati, uray no dida nakita ti baro a lubong ti Dios idi kaaldawanda?

¹⁷ Sapay koma ta ti pammatiyo ket kas iti pammati da Noe, Abraham, ken Moises. Pudno a dida nakita ti baro a lubong ti Dios idi tiempoda. (Hebreo 11:39) Saan pay idi a dimteng ti naituding a tiempo ti Dios; addada pay dadduma nga aspeto ti panggepna a masapul pay a maibanag. Ngem di kimmapuy ti pammatida iti sao ti Dios, ket naisurat ti nagnaganda iti libro ti biag a kukua ti Dios.

18. Kadagidiay naayaban iti nailangitan a biag, apay a kasapulan a magnada babaen ti pammati?

¹⁸ “Ti Dios nakitana a nasaksakbay ti maysa a banag a nasaysayaat maipaay kadatayo,” insurat ni apostol Pablo. Kayatna a sawen, nakita ti Dios a nasaksakbay ti banag a nasaysayaat para kadagidiay, kas ken apostol Pablo, naayaban iti nailangitan a biag a kadua ni Kristo. (Hebreo 11:40) Dagitoy ti pampanunoten ni Pablo idi insuratna ti sasao ti 2 Corinto 5:7: “Magmagnakami babaen ti pammati, saan a babaen ti panagkita.” Idi naisurat dayta, awan pay kadakuada ti nakagun-od iti nailangitan a gunggonada. Dida makita idi babaen ti pisikal a matada, ngem ti pammatida iti dayta nalagda ti pamuonna. Napagungaren idi ni Kristo manipud kadagiti natay, ti umuna a bungbunga kadagidiay naparaburan iti nailangitan a biag. Ket nasurok a 500 a saksi ti nakakita kenkuana sakbay nga immuli sadi langit. (1 Corinto 15:3-8) Adda umdas a rasonda tapno dayta a pammati ti mangiwanwan iti intero a panagbiagda. Addaantayo met iti nainkalintegan a panggapuan a magna babaen ti pammati.

19. Kas naipakita iti Hebreo 1:1, 2, babaen ti siasino a nagsao ti Dios kadatayo?

¹⁹ Iti kaaldawantayo, saan a makisarsarita ni Jehova iti ilina babaen ti anghel, a kas ti inaramidna idi ken Moises iti sumsumged a mula. Nagsao ti Dios babaen ti Anakna. (Hebreo 1:1, 2) Ti sinao ti Dios babaen kenkuana, impaisuratna iti Biblia, a naipatarus kadagiti lenguahe dagiti tattao iti intero a lubong.

20. Kasano a nasaysayaat nga amang ti kasasaadtayo ngem ti kasasaad idi da Noe, Abraham, ken Moises?

²⁰ Ad-adu ti adda kadatayo ngem ti adda idi kada Noe, Abraham, ken Moises. Adda kadatayo ti kompleto a Sao ti Dios​—nga adu kadagiti naisurat iti dayta ti natungpalen. Gapu iti amin a kuna ti Biblia maipapan kadagiti lallaki ken babbai a napaneknekan a matalek a saksi ni Jehova iti baet dagiti amin a kita ti suot, idagadag ti Hebreo 12:1: “Ikkatentayo met koma ti tunggal dadagsen ken ti basol a silalaka a mangsagud kadatayo, ket buyogen ti panagibtur tarayentayo koma ti lumba a naikabil iti sanguanantayo.” Ditay koma iyaleng-aleng ti pammatitayo. Ti kinaawan pammati ket “basol a silalaka a mangsagud.” Kasapulan ti napinget a pannakidangadang tapno makapagtultuloytayo a ‘magna babaen ti pammati.’

[Footnote]

Ania ti Komentoyo?

◻ Ania ti nairaman iti “pannagna babaen ti pammati”?

◻ Kasanotay a magunggonaan iti wagas a panangipakita ni Noe iti pammati?

◻ Kasano a matulongannatayo ti wagas a panangipakita ni Abraham iti pammati?

◻ Apay a dinakamat ti Biblia ni Moises kas pagwadan iti pammati?

[Ladawan iti panid 10]

Nagna ni Abraham babaen ti pammati

[Ladawan iti panid 10]

Impakita da Moises ken Aaron ti pammatida idi sinangoda ni Faraon