ASUPRE

Duyaw, saan a metal nga elemento nga agparang a puro wenno nailaok iti dadduma pay nga elemento nga adda iti sulfide ken sulfate. Saan a kadawyan ti kinababa ti temperatura a pakalunaganna, 113° C. (235° F.). Nalaka a mapuoran ken mangpataud iti nalusiaw nga asul nga apuy, a kagiddan dayta mangporma iti sulfur dioxide, a nabang-i ti angotna.

Ti damo a pannakatukoy ti asupre iti pakasaritaan salaysayenna no kasano a nadadael dagiti nadangkes a siudad ti Sodoma ken Gomorra babaen ti panagtudo ti apuy ken asupre. (Ge 19:24; Lu 17:29) Maibatay iti pammaneknek ti geolohia, ibagbaga ti sumagmamano a daytoy a mangdidigra a pannusa manipud ken Jehova ket mabalbalin a babaen ti maysa a panagbettak ti bulkan iti makin-abagatan a rehion ti Natay a Baybay, a makagapu a nakaad-adu ti asupre iti dayta a lugar iti agdama.

Patien a ti nakabarbara nga urno a pagpadapuan wenno krematorio maipaay iti kadaanan a siudad ti Jerusalem napataud babaen ti pananginayon iti asupre kadagiti patinayon a sumsumged nga apuy iti Ginget ti Hinnom (Gehenna) iti mismo a ruar dagiti pader.

Ti kasasaad ti asupre a nalaka a mauram natuktukoyen iti Kasuratan sipud pay daydi umap-apuy a pannakaukom ti Sodoma ken Gomorra idi 1919 K.K.P. (Isa 30:33; 34:9; Apo 9:17, 18) Simbolo dayta ti naan-anay a pannakalangalang. (De 29:22, 23; Job 18:15) Aggidgiddan a maar-aramat ti “apuy ken asupre” no ti naan-anay a pannakadadael ti mailadladawan. (Sal 11:6; Eze 38:22; Apo 14:9-11) Naibaga kadatayo a ti Diablo ‘maitapuakto iti danaw nga apuy ken asupre,’ mayanatup a pannakailadawan ti naan-anay a pannakatalipupos, “ti maikadua nga ipapatay.”​—Apo 19:20; 20:10; 21:8.