AMMON
[Dagiti Umili].
Anak ni Lot babaen iti ub-ubing nga anakna a babai; ti nagtaudan dagiti Ammonita. (Ge 19:38) Kas iti napasamak iti in-inauna nga anak a babai ni Lot, ti ub-ubing nga anakna nakidenna met kenkuana bayat nga agnanaedda idi iti maysa a rukib iti nakabambantay a rehion—kalpasan nga isu inikkan ti annakna a babbai iti adu nga arak nga inumen. (Ge 19:30-36) Ni Ammon ket pinanaganan ti inana iti Ben-ammi, a kaipapananna, “Anak dagiti Kailiak [kayatna a sawen, kakabagian]” saan ket a dagiti ganggannaet a kas kadagiti Sodomita. Nabatad ngarud a nainaig ti nagan iti pannakaseknan nga inyebkas ti in-inauna nga anak—mainaig dayta iti kasasaad a dagitoy dua a babbai saanda a makasarak iti asinoman a pakiasawaanda manipud kadagiti mismo a kailianda wenno iti linia ti pamiliada iti daga a pagnanaedanda.
Iti Salmo 83:7, nausar met ti “Ammon” a tumukoy iti nasion dagiti kaputotanna. Ti ebkas nga “annak ni Ammon” ipalagipna kadagiti Israelita ti relasionda kadagiti Ammonita, maysa a pannakirelasion nga inkabilangan uray ni Jehova, kas paneknekan ti panangibilinna kadagiti Israelita a saanda a semsemen ti Ammon wenno makiringgor kadakuada, yantangay annak ida ni Lot, ti kaanakan ni Abraham.—De 2:19; kitaenyo ti AMMONITA, DAGITI.